Ministria e Mbrojtjes - Arkivi 2008-2013

U zhvillua në Rinas ceremonia e mbërritjes së helikopterit të ri të Forcave Ajrore Cougar versioni “MEDEVAC”

25 prill 2013

Foto Galeri

b_230_153_16777215_00___images_galeria_2013_Prill_25b_05.jpgSot pasdite, në ambientet e komandës së Forcës Ajrore, në Rinas u zhvillua ceremonia e mbërritjes së helikopterit të ri të Forcave Ajrore, “Cougar”. Ky helikopter është i dyti që i bashkohet Forcave Ajrore dhe është ndërtuar në zbatim të kontratës Nr. 6853/10, datë 17.12.2009 , ndërmjet Ministrisë së Mbrojtjes të Republikës së Shqipërisë dhe kompanisë franceze “Eurocopter”, mbi furnizimin e pesë helikopterëve “AS 532 AL Cougar” dhe pajisjet që i shoqërojnë nënshkruar më 17 dhjetor 2009. Të pranishëm në këtë ceremoni ishin: shefi i Shtabit të Përgjithshëm të FA, gjeneralmajor Xhemal Gjunkshi, ambasadorja e Republikës së Francës në Shqipëri, znj. Christine Moro, komandanti i Forcës Ajrore, gjeneral brigade, Dhori Spirollari, përfaqësues të lartë të kompanisë “Eurocopter”, gjeneralë, drejtorë dhe personalitete të tjera të larta nga Ministria e Mbrojtjes dhe Shtabi i Përgjithshëm i Forcave të Armatosura.

Fjalën e hapjes së ceremonisë e mbajti komandanti i Komandës së Forcës Ajrore, gjeneral brigade , Dhori Spirollari.
Në fjalën e tij, shefi i Shtabit të Përgjithshëm i FA, gjeneralmajor Xhemal Gjunkshi u shpreh se: “Kam kënaqësinë e veçantë të jem i pranishëm dhe të përshëndes këtë ceremoni të thjeshtë që përkon me marrjen në dorëzim nga ana e Forcave tona të Armatosura dhe konkretisht nga ana e komandës së Forcës Ajrore të helikopterit të dytë nga paketa prej 5 helikopterësh shumë funksionalë, pjesë e programeve për modernizimin e Forcave të Armatosura.
Helikopteri i tipit “MEDEVAC” është helikopter i tipit shumë funksional i cili do të përdoret kryesisht për transportin e të sëmurëve, por mund të përdoret në rast nevoje edhe për misione të tjera, në SAR, transport trupash dhe materialesh”.

Në vijim të fjalës së tij, gjeneralmajor Gjunkshi theksoi se sot ne, falë këtyre dy helikopterëve të pajisur me fjalën e fundit të teknologjisë të kryejmë operacione ditën dhe natën, pavarësisht kushteve meteorologjike në misione të vështira, në operacione luftarake, si dhe në mbështetje të Forcave Tokësore, Detare dhe Komandave Mbështetëse. Kjo do të realizohet për faktin se këta helikopterë modernë kanë të përfshirë sistemet e navigimit satelitor, instrumente tërësisht dixhital dhe në të njëjtën kohë, ata garantojnë siguri maksimale për pilotët dhe personelin falë pajisjes së tyre me dy motorë. Përveç përkujdesjes për pajisjen me helikopter nga më modernët dhe të sigurt, Ministria e Mbrojtjes, Shtabi i Përgjithshëm dhe Komanda e Forcave Ajrore, janë përkujdesur për trajnimin sipas standardeve të NATO, për personelin që do të shërbejë në këta helikopter.
Më tej, gjatë fjalës së tij, gjeneralmajor Xhemal Gjunkshi nënvizoi se aktualisht në Bazën Ajrore të Farkës mbështetur në Marrëveshjen Teknike midis Ministrisë së Mbrojtjes të RSH dhe Ministrisë së Jashtme të Republikës së Francës, po kryhet trajnimi i avancuar për përdorimin luftarak të këtyre helikopterëve nga një instruktor fluturimi i ushtrisë franceze.
Në përfundim të fjalës së tij , gjeneralmajor Xhemal Gjunkshi i ka uruar të gjithë pilotëve shqiptarë që do të shërbejnë dhe pilotojnë këto helikopterë tejet modernë, suksese në realizimin e plotë të misionit të ngarkuar!

“Cougar”, është helikopteri dytë i një seti prej pesë të tillë, i përshtatshëm për shërbimet “MEDEVAC”, transport të sëmurësh dhe të plagosurish.
Në zbatim të kontratës Nr. 6858/10 datë 17. 12. 2009, ndërmjet Ministrisë së Mbrojtjes të Republikës së Shqipërisë dhe Kompanisë Franceze “Eurocopter” seti përmban: 1 helikopter për shërbimin VIP, 1 helikopter për shërbimin SAR, 1 helikopter për transport mjekësor “MEDEVAC”, si dhe 2 helikopterë të tjerë për transport trupash.
Helikopterët “Cougar” janë nga më modernët dhe operojnë në të gjitha kushtet meteorologjike, ditën dhe natën, në misione të vështira, operacione luftarake, si dhe në mbështetje të Forcave Tokësore apo Detare. “Cougar, AS 532 AL”, është një helikopter me dy motorë, prodhuar nga kompania “Eurocopter”.

“Cougar, AS 532 AL” është i pajisur me një sërë pajisjesh të veçanta të cilët bëjnë të mundur që ky helikopter të përdoret më së miri për transportim të plagosurish.
Fakti që është i pajisur me 2 motorë, e kombinuar kjo me fuqinë e madhe rezervë të tij, e bën atë një helikopter të përshtatshëm për misione të veçanta dhe paraqet siguri operacionale në lartësi dhe temperatura të ndryshme. Veçoria e këtij mjeti është se rezulton në një performancë optimale edhe në kushtet e fluturimit me një motor.

Ekuipazhi minimal: VFR: 1 pilot; IFR: 2 pilotë.
Evakuimi i të plagosurve: 6 barela dhe 11 ndenjëse për pacientët ose stafin mjekësor.
Helikopteri “Cougar”, “MEDEVAC” i Forcës Ajrore Shqiptare me numër anësor FA632, është helikopter i tipit shumërolësh. Në variantin e prokuruar nga Ministria e Mbrojtjes, “MEDEVAC” do të përdoret kryesisht për transport të plagosurish, 6 pacientë të sistemuar në barela, por mund të përdoret në rast nevoje edhe për transport trupash (deri në 24 trupa pa pajime), transport ngarkesash (CARGO) deri në 3000kg, (ngarkesë të brendshme), etj.