Ministria e Mbrojtjes - Arkivi 2008-2013

Prodhohet anija e parë në Pasha Liman

E martë, 13 Shtator 2011 18:36

Del në det të hapur anija e dytë e prodhuar në kuadër të projektit prej 31 milion eurosh për modernizimin e Forcës Detare

Foto Galeri Video Galeri

0.0001.jpgTë martën, më 13 shtator 2011, në bazën detare të Pasha Limanit, u zhvillua ceremonia e lëshimit në ujë të anijes ‘ORIKU’. Kjo anije është ndërtuar në Kantierin Detar Vlorë, në kuadër të kontratës me kompaninë hollandeze ‘Damen Shipyards'.

Në këtë ceremoni morën pjesë Ministri i Mbrojtjes Z. Arben Imami, Shefi i Shtabit të Përgjithshëm Gjeneral brigade Xhemal Gjunkshi, Zëvendësministri i Mbrojtjes Z. Ekrem Spahia, Komandanti i Forcës Detare Kundëradmiral Kudret Çela, Ambasadori hollandez, Z. Henk Van Den Dool, menaxheri i përgjithshëm i kompanisë ‘Damen Shipyards’, Z. Rene Berkvens, komandantë forcash, gjeneralë, si dhe  drejtues të tjerë të lartë dhe drejtorë të MM dhe SHPFA. Të pranishëm ishin gjithashtu edhe përfaqësues të Presidencës, të Këshillit të Ministrave, të Komisionit Parlamentar për Sigurinë Kombëtare, deputetë të Vlorës, përfaqësues të institucioneve të ndryshme, etj.

Fjalën e hapjes e mbajti Kundëradmiral Kudret Çela, i cili vlerësoi punën e kryer nga përfaqësuesit e kompanisë hollandeze dhe përfaqësuesit shqiptarë për ndërtimin e anijes ‘ORIKU’.

“Ndërtimi i kësaj anije është vazhdimi i përpjekjeve që ka bërë në këto vite qeveria shqiptare për transformimin e Forcave tona Detare, ku modernizimi ka qenë dhe mbetet pjesë thelbësore e këtij procesi. Falë mbështetjes së vazhdueshme të qeverisë dhe Ministrisë së Mbrojtjes, ngjarja e sotme ka një rëndësi të veçantë, sa në kontekstin historik, po aq edhe në atë ushtarak dhe ekonomik, jo vetëm për FD, por edhe për popullin shqiptar”, u shpreh ndër të tjera Kundëradmiral Çela.

Më pas pjesëmarrësit në këtë ceremoni i përshëndeti edhe Z. Rene Berkvens, i cili falënderoi specialistët shqiptarë për bashkëpunimin e ngushtë me ta, kujdesin e treguar nga ana e MM, FA dhe distriktit detar të Vlorës. Gjithashtu, Z. Berkvens falënderoi edhe Komandantin e Përgjithshëm të Flotës Detare, Kundëradmiralin Çela. “Nuk është hera e parë që qeveria e0.00001.jpg hollandës dhe qeveria shqiptare bashkëpunojnë në mënyrë të frytshme për të përmbushur të gjitha detyrat dhe arritjen e rezultateve brenda standardeve të Aleancës së Atlantikut të Veriut”, theksoi ai.

Më pas, fjalën e mori Ministri i Mbrojtjes Z. Arben Imami, i cili, pasi falënderoi punonjësit e kantierit dhe kompaninë hollandeze për përfundimin me sukses të ndërtimit të anijes, e vuri theksin tek ndikimi substancial që do të ketë në rritjen e kapaciteteve operacionale të Forcave tona Detare dhe u shpreh se “Për herë të parë Forcat tona të Armatosura do të kenë kapacitete prodhuese.”

Duke e cilësuar kantierin e Pasha Limanit si një ndër garnizonet më moderne të FA, Ministri Imami foli për modernizimin e mëtejshëm të FA, duke përmendur kontratën për blerjen e pesë helikopterëve, modernizimin e armatimit individual si dhe gjetjen e një zgjidhjeje të qëndrueshme për kompletimin e FA me mjete luftarake dhe transporti të standardeve më të larta perëndimore.

“Pavarësisht krizës ekonomike globale, buxheti i MM është konsoliduar dhe janë bërë hapa të qenësishëm përpara për menaxhimin e tij. Buxheti i modernizimit është rreth 20 milion euro në vit dhe realizimi për vitin 2010 ishte në masën 100% dhe po ashtu pritet të jetë dhe për vitin 2011.”- nënvizoi Ministri Imami.

Ndër të tjera, Ministri nuk la pa përmendur projektet e tjera të mëdha të cilat po ecin me ritme jashtëzakonisht të mira, siç janë projekti i Asgjësimit dhe Demontimit të municioneve të tepërta, kontributin që FA japin në misionet paqeruajtëse, si dhe modernizimi dhe standardizimi i infrastrukturës në përputhje me standardet e NATO–s. Ministri Imami, në emër edhe të qeverisë shqiptare, i delegoi një falënderim të veçantë Mbretërisë së Vendeve të Ulëta, Ambasadës Hollandeze në Tiranë dhe kompanisë ‘Damen Shipyard’ që bënë të mundur për herë të parë ndërtimin e një anijeje me standarde të tilla në vendin tonë.

0.000001.jpgNë mbyllje të fjalës së tij Ministri Imami u shpreh: “E gjithë kjo reformë është një proces i vështirë dhe i vazhdueshëm, por po mëton krijimin e një ushtrie të vogël, profesionale dhe me kapacitete të larta operacionale dhe ndërveprueshmërie me ushtritë partnere të NATO-s. Kjo ushtri do të jetë garanci për një Shqipëri më të sigurt dhe më të aftë për të kontribuar për paqen dhe sigurinë në botë.”

Më pas ai zbuloi emrin e anijes, e cila është pagëzuar me emrin e qytetit antik që shtrihej në këtë zonë, ‘ORIKU’.

Para se të lëshohej në det, anija u bekua nga kumbara e saj, Znj. Teuta Mati, vajza e ish komandantit të parë të Forcave Detare, Kundëradmiralit Abdi Mati.

Projekti i ndërtimit të Anijeve Bregdetare, që konsiston në pajisjen e Rojës Bregdetare me katër anije të projektit STAN PATROL 4207, është një ndër projektet më të rëndësishme të Ministrisë së Mbrojtjes të Republikës së Shqipërisë. Këto anije, për të cilat parashikohet edhe ndërtimi i infrastrukturës mbështetëse, do të mbështesin misionin e Rojës Bregdetare dhe të Operacioneve të kërkimit dhe shpëtimit. I gjithë projekti, fryt i marrëveshjes mes MM dhe kompanisë hollandeze ‘Damen Shipyards’, me një vlerë prej rreth 31 milion eurosh, është financuar në masën 35 % nga programi ORET i qeverisë së Hollandës.

Anija e parë e projektit STAN PATROL 4207, që mban emrin ILIRIA P 132, u prodhua në Hollandë dhe iu dorëzua Rojës Bregdetare Shqiptare në Gusht të vitit 2008. Ndërkohë që prodhimi i anijes së dytë të Projektit, por që është e para e prodhuar në Kantierin e Pasha Limanit, ka nisur në Maj të vitit 2009. Anija që mban emrin ‘ORIKU’ P- 133, do të komisionohet në fund të nëntorit 2011. Anija e tretë, Lisus P-133, do të jetë operacionale në vitin 2012 dhe e katërta Butrinti P-134 në vitin 2013, vit që shënon dhe përfundimin e këtij programi.

Projekti ka përfshirë dy faza, ku faza e dytë konsiston në ndërtimin e tre anijeve të të njëjtit tip në Pasha Liman. Në kantierin e ndërtimit, tashmë të pajisur me mjete moderne të ndërtimit të anijeve, punon një staf profesional e i kualifikuar e që pas përfundimit të anijes së parë, është i pajisur edhe me përvojën e nevojshme.0.0001.jpg

Një nga pikat kulmore të kësaj faze është ndërtimi i anijes ‘ORIKU’, përfundimi i të cilës u përurua në këtë ceremoni. Kjo është rrjedhojë e një pune të mirë organizuar dhe të përbashkët me kompaninë ‘Damen’. Të gjitha proceset e ndërtimit të anijes janë kryer nga punonjësit e kantierit të Pasha Limanit.

Ky përurim shënon jo vetëm ndërtimin e një anijeje që do të ndikojë në rritjen e aftësive operacionale të Forcave tona Detare për plotësimin e misionit të Rojës Bregdetare për kontrollin e zbatimit të ligjshmërisë në det për operacionet e kërkim shpëtimit, monitorimit, kontrollit për trafikun detar, mbrojtjen e mjedisit detar, etj, por ai shënon një aset më shumë në rritjen e bashkëveprimit në kuadrin e operacioneve që drejtohen nga NATO si dhe në bashkëpunimin rajonal për përballimin e emergjencave të ndryshme.