Shqipëria ishte vendi i parë ish-komunist, që aplikoi për antarësimin në NATO, që në vitin 1992 nën drejtimin e Qeverisë Demokratike, duke shprehur kështu orientimin perëndimor të shqiptarëve dhe politikës. Në këtë drejtim janë hedhur hapa konkretë, të cilët startojnë me nënshkrimin e Partneritetit për Paqe (PfP) dhe sot në bashkëpunimin konkret sipas Planit të Veprimit për Antarësim në NATO, Membership Action Plan (MAP).

Qeveria e re ka një synim të qartë: Antarësimin e plotë të Shqipërisë në NATO. Duke e konsideruar si një përgjegjësi të madhe angazhimin në drejtim të Ministrisë së Mbrojtjes, kësaj pjese shumë të rëndësishme të Qeverisë shqiptare, theksoj se, e ndiej veten të nderuar të punojmë së bashku për të përshpejtuar reformat në fushën e Sigurisë dhe Mbrojtjes.

Këto reforma do të kenë në vëmendje respektimin e Kushtetutës dhe vendimeve të marra nga Kuvendi i Shqipërisë.

Ministria e Mbrojtjes si një dikaster i rëndësishëm i Qeverisë së RSH, do të përqëndrojë përpjekjet dhe burimet në përshpejtimin e reformës në fushën e Mbrojtjes, duke kontribuar në mënyrë institucionale, ligjore përmes kapacitetesh reale në të mirë të sigurisë së vendit. Në qendër të reformës do të jetë zbatimi i Kushtetutës së RSH-së, si dhe gjithë ligjeve të aprovuara nga Kuvendi i saj, që mbështesin mbrojtjen dhe zhvillimin e Forcave të Armatosura. Ministria e Mbrojtjes do të synojë konsolidimin e mëtejshëm të kontrollit civil demokratik në FA, duke respektuar Kushtetutën, ligjet e vendimet e Parlamentit, autoritetet e pushtetit e drejtimit, të Komandimit Strategjik në Forcat e Armatosura, si dhe duke menaxhuar në mënyrë të kontrolluar burimet që i vihen në dispozicion Mbrojtjes. Në të njëjtën kohë do të krijohen të gjitha kushtet që t’i jepet vendi i duhur profesionalizmit ushtarak. Në katër vitet e ardhshme do të punohet për transformimin dhe zhvillimin e Forcave të Armatosuara. Zhvillimi i instrumentit ushtarak të shtetit do të vazhdojë të realizohet mbi bazën e vlerësimeve të mjedisit të sigurisë e të burimeve, që i vihen në dispozicion Mbrojtjes. Ai do të mbështetet në plane zhvillimi afatmesme e afatgjatë, si dhe në programe mbrojtjeje të argumentuara. Cilat janë drejtimet ku do të mbështetet Ministria e Mbrojtjes për zhvillimin e saj dhe të Forcave të Atrmatosura, me synim rritjen e gatishmërisë e të aftësive operacionale, përmbushjen e kërkesave e standardeve të integrimit të tyre në strukturat euro-atlantike:

1. Ministria e Mbrojtjes në periudhën 2005–2009, do të realizojë reformimin dhe konsolidimin e strukturës së re të Forcave të Armatosura. Ky objektiv do të arrihet nëpërmjet zbatimit të filozofisë së zhvillimit të një force ushtarake më të vogël në numër, por më efektive, duke harmonizuar planin afatgjatë të zhvillimit të FA me programet e veçanta të Mbrojtjes. Plani aktual afatgjatë 2002-2010 do të rishikohet e shtrihet në periudhën 2005-2015.

2. Gjatë katër viteve të ardhshëm në mënyrë graduale dhe në përputhje me programet e nisura do të realizojmë ndryshime cilësore në sistemin e komandim-drejtim-ndërlidhje, në sistemin e vëzhgimit të hapësirës detare dhe hapësirës ajrore. Përpjekjet do të fokusohen në njësitë e repartet prioritare, të cilët mbajnë edhe barrën kryresore të angazhimeve ushtarake brenda e jashtë vendit. Në veçanti në to do të synohet plotësimi dhe rritja e kërkesave e standardeve për gadishmërinë e aftësinë operacionale. 

3. Planifikimi në fushën e Mbrojtjes për periudhën 2005-2009, do të synojë mbështetjen e një force më të vogël, por më efektive, alokimin e burimeve të nevojshme, të arsyeshme duke u mbështetur në treguesit e zhvillimit ekonomik të vendit, duke marrë parasysh prioritetet dhe jo duke konsideruar të gjithë instrumentin ushtarak njëherësh. 

Në fushën e personelit

Zhvillimi i personelit do të jetë në qendër të vëmendjes së Ministrisë së Mbrojtjes. Ai do të zhvillohet duke u mbështetur në bazën ligjore e aktet nënligjore, duke reflektuar në kohë e duke bërë përmirësimet e duhura. Në fushën e personelit do të insistohet veçanërisht në komponentin profesionist duke përfshirë të gjitha nivelet e FA.

Ne kemi të domosdoshme të shndërrojmë FA në forca profesionale dhe vitale. Prandaj do të angazhojmë në strukturat e FA, në përputhje me Statusin e Ushtarakut dhe ligjin për gradat, të gjithë ushtarakët e rinj të trajnuar në vendet anëtare të NATO-s. Synimi është realizimi i objektivit për të shndërruar ushtrinë nga një ushtri e bazuar në shërbimin e detyruar në një ushtri profesionale.

Rritja e numrit të ushtarëve e nënoficerëve profesionistë, si dhe përmirësimi i raporteve të gradave në trupën e oficerëve në interes të gradave të ulta, mbetet detyrë imediate për personelin e FA. Drejtimi dhe niveli i gradave madhore do t’i përshtatet rigorozisht ligjit në të gjitha nivelet, bazuar në praktikat dhe eksperiencat normative të qarkullimit të personelit në vendet e NATO-s.

Po ashtu do të ndërmerren hapa konkrete për të rritur dinjitetin dhe përmirësimin e jetës së ushtarakëve si: rritja e nivelit të pagave, kompesimet për strehim e ushqim, si dhe përfitimet pas daljes në rezervë e pension.

Arsimimi dhe stërvitja

Politika e Arsimimit dhe Stërvitjes në FA do të kërkohet të shtrihet në gjithë strukturat ushtarake. Sistemi i ri duke u aplikuar siç duhet do të ndikojë shumë pozitivisht në rritjen e aftësive operacionale.

Universiteti Ushtarak "Skënderbej" dhe funksionimi i tij, jo vetëm do të mbikqyren, por do të synohet që ai të shndërrohet në një institucion universitar konkurues. Ministria e Mbrojtjes do t’i kushtojë vëmendjen e duhur fondeve financiare për stërvitjen, pasi pa stërvitje nuk mund të flitet për struktura ushtarake të mirëfillta.

4.     Objektiv i Ministrisë së Mbrojtjes në këto 4 vite do të jetë shtrirja e aplikimit të Sistemit të Planifikimit, Programimit, Buxhetimit, Ekzekutimit dhe Kontrollit të Burimeve të Mbrojtjes. Ky është modeli që zbatohet në vendet perëndimore. Në zbatimin e tij përherë do të kemi parasysh përparësitë e zhvillimit të FA, si dhe sigurimin e transparencës së nevojshme për shpenzimin e burimeve të Mbrojtjes. Nga ana tjetër, Dikasteri i Mbrojtjes do të bëjë të gjitha përpjekjet për të realizuar rritjen e mbështetjes buxhetore me 0.1% të GDP, çdo vit, duke arritur në vitin 2010 me 2% të GDP.

5. Çështja e modernizimit do të institucionalizohet përmes diskutimeve, planeve, testimeve, programeve të modernizimit. Mekanizmat përkatës në këtë fushë do të vihen më mirë në lëvizje me qëllim që hapat modernizues të jenë afatgjatë. Me përparësi do të jenë pajimet personale të luftëtarit (nevojë kjo edhe e kontigjenteve tona të angazhuara në Operacione në Mbështetje të Paqes), helikopterët dhe anijet për misione kërkim-shpëtimi.

6.    Struktura e Forcës

Forcat e Armatosura të RSH do të vijojnë të transformohen e zhvillohen në përputhje me Strategjinë Kombëtare të Sigurisë, Strategjinë Ushtarake të RSH dhe Planin Afatgjatë të Zhvillimit. Gjithësesi, në përputhje me kushtet e reja dhe me problematikat që do të nxjerrë përvoja do të bëhen rishikime e përmirësime. Kujdes i veçantë do të bëhet për shmangien e strukturave të tepërta të infrastrukturës së panevojshme ushtarake dhe po kështu edhe armatimeve, municioneve e të pajisjeve të tepërta e të panevojshme. Një gjë e tillë do të krijojë kushte më të favorshme për mosshpërdorimin e burimeve dhe kalimin e tyre në strukturat prioritare.

7.   Përmbushja e detyrimeve ushtarake të integrimit në strukturat euro-atlantike do të përbëjnë objektivin parësor

Ministria e Mbrojtjes do të përmbushë në maksimum përgjegjësitë që rrjedhin nga dokumentat e MAP, PARP, IPP etj. Do të zgjerohet gjithëpërfshirja brenda Dikasterit të Mbrojtjes dhe me strukturat ushatrake, si dhe do të institucionalizohen më mirë koordinimi e bashkëpunimi me Ministrinë e Punëve të Jashtme, të Financave, të Brendshme, të Drejtësisë etj. Kërkesat e integrimit, të ndërveprimit dhe të plotësimit të standardeve të kërkuar do të jenë objekt pune i vijueshëm dhe i matshëm. Ndërkohë, me programe të veçanta do të ndiqet zbatimi i Objektivave të partneritetit, që janë marrë nga Shqipëria, si dhe zbatimi i Koncepteve e Standardeve Operacionale që Aleanca kërkon nga vendet  partnere.

Ministria e Mbrojtjes do të synojë përmbushjen me cilësi të përgjegjësive që burojnë nga Nisma e Evropës Juglindore dhe Karta "SHBA- Adriatik 3". Gjithashtu, stërvitjet e përbashkëta, brenda dhe jashtë vendit, të natyrës NATO-Partneritet për Paqe, të natyrës rajonale  etj., do të inkurajohen, duke siguruar në çdo kohë jo vetëm pjesëmarrjen, por edhe përfaqësimin cilësor.

Kujdes të veçantë Ministria e Mbrojtjes do të tregojë për bashkëpunimin me praninë ushtarake të NATO-s në Tiranë dhe përfaqësuesin ushtarak kryesor të saj, duke e shfrytëzuar këtë bashkëpunim në të mirë të zhvillimit të Forcave të Armatosura dhe Anëtarësimit të pritshëm në NATO. 

8. Bashkëpunimi ushtarak dy dhe shumëpalësh.

Do të vijohet bashkëpunim i ngushtë ushtarak me vendet anëtare të NATO-s dhe të BE-së. Bashkëpunimi do të jetë i institucionalizuar, përmes marrëveshjesh e projektesh, në përputhje me kërkesat dhe nevojat e zhvillimit te Forcave të Armatosura dhe në të mirë të sigurisë së vendit dhe të asaj rajonale.

9.Angazhimet ndërkombëtare

FA shqiptare nëpërmjet kontigjenteve të ndryshëm ushtarake do të vijojnë të jenë kontribuese në luftën globale kundër terrorizmit. Nëpërmjet kontributeve të deritanishëm dhe atyre të ardhshëm, ato po e shndërrojnë Shqipërinë në një gjenerator të sigurisë, në interes të paqes rajonale e më gjerë.

Vendi ynë që në vitin1996, po kontribuon në ruajtjen e paqes e sigurisë rajonale në Bosnjë-Hercegovinë, duke plotësuar në mënyrë profesionale misionin e vet. Pas ngjarjeve tragjike të 11 Shtatorit 2001, ne po kontribuojmë me trupa paqeruajtëse në misionin e "ISAF"-it në Afganistan, dhe pas çlirimit të Irakut nga regjimi Sadam Hyseinit, ne po marrim pjesë në operacionin e ruajtjes së paqes "Liria e Irakut" në Mosul.

Duke vlerësuar rolin e të gjithë trupave tona në Irak, ne jemi të vendosur për të vazhduar misionin tonë atje në përputhje me partneritetin me SHBA dhe forcat e tjera aleate.

Po kështu duhet të theksojmë edhe pjesëmarrjen e shumë oficerëve e nënoficerëve të tjerë të Forcave të Armatosura në misionet paqeruajtëse të Kombeve të Bashkuara në Gjeorgji apo prezencën aktuale të personelit ushtarak  shqiptar në shtabe të ndryshme ushtarake ndërkombëtare.

10. Lufta kundër terrorizmit është një element tjetër madhor në fokusin e planëzimit të Mbrojtjes sipas modeleve euro-atlantike.

Forcat e Armatosura të Republikës së Shqipërisë, si pjesë e koalicionit ndërkombëtar antiterror, do të përgatiten për përballjen e rreziqeve asimetrike, krimit të organizuar, etj., duke bashkëpunuar ngushtë me organizma të tjera shtetërore të specializuara në këtë drejtim. Ato do të përgatiten dhe aftësohen për marrjen e masave antiterror; zbulimin, parandalimin dhe veprimin në kohë kundër veprimeve terroriste, si dhe pjesëmarrjen aktive në luftën kundër terrorizmit ndërkombëtar, në kuadër të përpjekjeve kombëtare dhe të atyre rajonale dhe globale. Strukturat e posaçme ushtarake dhe struktura të tjera të mbështetjes me informacion do të krijojnë bazën e nevojshme ligjore, strukturore dhe proceduriale për shkëmbimin në kohë dhe të sigurtë të informacionit me strukturat dhe agjencitë e të tjera të specializuara shtetërore, për parandalimin e aktiviteteve dhe akteve të mundshme terroriste, për mbrojtjen dhe garantimin e Sigurisë Kombëtare.

Të gjitha këto masa sektoriale, të shoqëruara dhe me performancën e sektorëve të tjerë të shoqërisë, që kanë të bëjnë me forcimin e shtetit ligjor, luftën kundër korrupsionit dhe krimit të organizuar dhe mbi të gjitha forcimin e klimës demokratike në vend, objektiva të cilat janë të reflektuara qartë në programin e Qeverisë së Re, domosdoshmërisht do të forcojnë pozitën negociuese të Shqipërise.

E thënë ndryshe, reformat në fushën ushtarake të shoqëruara me reformat e pritshme në sektorë të tjerë jetikë të vendit, do të jenë rruga e integrimit të Shqipërisë në NATO. Si ministër i Mbrojtjes do të inkurajoj një diplomaci të shkathët në fushën e Mbrojtjes, me qëllim promovimin e standardeve e të treguesve të realizuar nga Forcat e Armatosura në funksion të antarësimit të pritshëm në Aleancën  e NATO-s.

Ministria e Mbrojtjes do të punojë për transformimin e Mbrojtjes shqiptare. Puna katërvjecare do të çojë në konsolidimin e FA, rritjen e gatishmërise e të aftësive të tyre operacionale, përmbushjen e misionit kushtetues, si dhe trasparencë përpara taksapaguesve shqiptarë.