Takimi i 14-të i PMSC dhe Takimi i 13-të i SEDM-CC, në Tiranë

Në kuadrin e Ministerialit të Mbrojtjes së Europës Juglindore dhe drejtimit nga Shqipëria të Sekretariatit të Komitetit Drejtues Politiko-Ushtarak [PMSC] dhe të Komitetit Koordinativ të këtij Ministeriali [SEDM-CC], nga data 27-29 shtator 2005 ka zhvilluar punimet në hotel "Tirana International", Takimi i 14-të i PMSC dhe Takimi i 13-të i SEDM-CC. Në të u trajtuan mjaft probleme të rëndësishme që lidhen me sigurinë dhe mbrojtjen në rajon e më gjërë. Në këtë aktivitet morën pjesë delegacione të vendeve anëtare dhe vëzhguese të SEDM-it, Ukraina me satusin e vëzhguesit në SEDM-CC, një delegacion i SEEBRIG-ut i kryesuar nga komandanti i kësaj njësie shumëkombëshe gjeneral brigade Neyko Nenov, një delegacion i AFNORTH-it dhe Sekretariati Shqiptar i SEDM-CC, gjithsej rreth 60 vetë. Gjithashtu mori pjesë edhe një delegacion i NATO-s i kryesuar nga drejtori i Qendrës së Trajnimit të NATO-s, gjeneral major Peter Kuhnel; nga SHBA-ja mori pjesë drejtori për Europën dhe Azinë në Departamentin e Mbrojtjes Patrik Graf. Takimin e kryesoi Prof. Besnik Baraj, në cilësinë e drejtuesit të Sekretariatit të PMSC dhe SEDM-CC. Këtë veprimtari e përshëndeti edhe ministri i Mbrojtjes Fatmir Mediu.