Të përkushtuar për zgjerimin e kapaciteteve operacionale

Intervistë me Gjeneral Major Kostaq Karoli, Komandant i Forcave Tokësore

Si e vlerëson komandanti i Forcave Tokësore përmbushjen e synimeve dhe objektivave të paracaktuara për vitin 2005 ?

Synimet dhe objektivat e paracaktuara për vitin 2005, bazuar në direktivën e ministrit të Mbrojtjes 2005-2010 dhe Planin Afatgjatë të Zhvillimit të Forcave Tokësore, kanë qënë mjaft ambicioze, si ato për zhvillimin e personelit, ristrukturimin, riorganizimin dhe modernizimin e FT, forcimin e elementëve të gatishmërisë, të operacionalitetit dhe menaxhimin e plotë të gjendjes ekonomiko-financiare. Kemi tregues konkretë dhe gjithnjë në rritje në të gjitha fushat e aktiviteteve të Forcave Tokësore dhe kjo është ajo që e dallon këtë vit nga vitet e tjera.

Në fushën e personelit është arritur përmirësimi gradual i piramidës së gradave dhe përafrimi maksimal me përcaktimet sipas TOP. Sot mospërputhja gradë funksion ka arritur masën 17,5 %

Arritje të dukshme kemi në drejtim të nivelit arsimor dhe kualifikimit të kuadrove. Vetëm gjate këtij viti janë arsimuar në shkollat tona ushtarake mbi 32 oficerë në KAO, 17 oficerë në KTHSH, 4 oficerë në KFSH dhe 303 nënoficerë në kurse të ndryshme kualifikimi.

Me personelin kryesor ushtarak në shtabin e FT dhe në reparte që vihet në dispozicion të operacioneve PfP të drejtuar nga NATO është arritur të komunikohet në gjuhën angleze dhe mund të themi se kemi arritur atë që synojme. Aktualisht kemi 70 oficerë me nivel mbi 70 pikë dhe 131 nënoficerë në nivelin 1 Stanagu 6001

Shkolla e Trupës e FT tashmë është konsoliduar plotësisht. Ai është institucioni bazë për pergatitjen e kuadrove të trupës në FT. Gjatë këtij viti janë çertifikuar mbi 258 ushtare profesionist, 111 nënoficerë dhe 70 oficerë

Janë realizuar 100 % format e planifikuara të përgatitjes së kuadrove dhe shtabeve dhe është arritur kompaktësimi dhe familjarizimi i tyre me procedurat e vendimmarrjes. Për t’u vlerësuar janë stërvitjet e shtabeve të BrK Korçë, Burrel, Shkodër etj dhe stërvitja e shtabit të FT, e cila për nga organizimi dhe arritjet solli nje eksperiencë të re. Përgatitja e trupave aktivë e profesionistë gjatë këtij viti solli gjithashtu një rritje cilesore në nivelet e stërvitjeve të ushtrive perëndimore.

E veçanta e këtij viti është zhvillimi për herë të parë pas 15 vjetësh e stërvitjes me batalionin rezervist në BrK Korçë , e cila na kërkoi mjaft mund e resurse, por që e justifikuan sakrificën e bërë.

Synimet e paracaktuara për vitin 2005 në drejtim të ristrukturimit dhe riorganizimit të FT janë realizuar plotësisht, si në drejtim të përqëndrimit të armatim municionit, ashtu dhe në ngritjen e strukturave të reja apo përmirësimin e atyre ekzistuese. Kështu gjatë këtij viti, komanda dhe shtabi i FT u vendos dhe mori drejtimin në venddisllokimin e ri në Durres. Kaloi në strukturen e FT regjimenti Komando dhe Batalioni Special, është organizuar dhe funksionon batalioni i mbështetjes së shtabit, i krijuar rishtaz në FT. Punë e mirë është bërë dhe për përqëndrimin e objekteve në njësi e reparte dhe të armatim municionit, ku është perqendruar rreth 4500 ton armatim e municion. Burimet e vëna në dispozicion për arritjen e niveleve operacionale të kërkuara janë shfrytëzuar plotësisht dhe kjo ka bërë të mundur që ato të arrijmë shkallën e kërkuar. Për nënrepartet e PfP, kjo detyrë është realizuar plotësisht

Për të ndërtuar një trupe rezerviste efiçente dhe te aftë për plotësimin e misionit, me qellim që ky kontigjent të jete sa më afër realiteteve që dikton koha, nga ana jonë janë përgatitur disa variante për ristrukturimin e tyre në SHPFA dhe pritet vendimi përfundimtar për këtë qëllim.

Bashkëpunimi ushtarak dhe integrimi i strukturave të FT ka njohur arritje të mëdha gjatë këtij viti. Janë realizuar e menaxhuar të gjitha aktivitetet e planifikuara. Në këto aktivitete kanë marrë pjesë mbi 300 ushtarakë (pa përmendur këtu pjesmarrjen në operacionet paqëruajtëse në Irak, Afganistan, Bosnje etj). Këto kanë qënë një bazë e mirë për rritjen e nivelit cilësor të përgatitjes së kuadrove, shtabeve dhe të gjithë personelit.

Situata ekonomiko-financiare është menaxhuar plotësisht duke bërë të mundur mbulimin e mbështetjen e të gjitha aktiviteteve të planizuara

Çfarë është realizuar konkretisht në fushën e operacionalitetit ?

Niveli i operacionalitetit të Forcës është sinteza e gjithë veprimtarisë së komandave dhe shtabeve, të gjitha masat dhe veprimtaritë konvergojne në këtë drejtim. Arritjet e niveleve operacionale nga disa formacione, kryesisht të reparteve prioritare, tregojnë se është punuar me kujdes për këtë qëllim. 25 formacione kanë arritur nivelin operacional të kërkuar për vitin 2005, 5 formacione kanë tejkaluar atë dhe 27 formacione punojnë për të arritur objektivin deri në fund të vitit. Një punë mjaft e kujdesshme bëhet në drejtim të personelit, ku aktualisht rëndësi i është kushtuar menaxhimit të ushtarëve profesionistë, duke i emëruar në funksione operacionale e sipas specialiteteve përkatëse, që ata kanë patur gjatë periudhës së kryerjes së shërbimit të detyrueshëm ushtarak, përmirësimit të vazhdueshëm të angazhimeve të ushtarëve aktivë me detyra të ndryshme etj, të cilat kanë rritur vazhdimisht nivelin operacional. Aktualisht, ka përfunduar procesi i plotësimit 100 % me ushtarë profesionistë të një kompanie në BrRSH.

Në stërvitje është rritur shkalla e nivelit operacional dhe konkretisht përgatitja fizike arrin në 75 %, kualifikimi në qitjet me armët individuale 75%, kualifikimi me armët kolektive 92%, stërvitja kolektive 75%, ku treguesit më të lartë i ka BrRSH, Regjimenti Komando etj. Përsa i takon resurseve është siguruar ruajtja e nivelit ekzistues dhe në 3 formacione ka rritje, si batalioni i Ndërlidhjes, Shkolla e Trupës së FT, Kompania PfP e b2k në BrRSH.

Problemet e raportimit dhe analizës së nivelit operacional kanë qënë objekt i punës së komandave, shtabeve dhe specialistëve, ku duhet thënë se ky aktivitet ka rritur ndjenjën e përgjegjesisë së tyre në zbërthimin e detajimin e plotë të kërkesave, duke iu permbajtur standartdeve bashkëkohore për mbajtjen në dorë të gjendjes operacionale në të gjitha formacionet.

Çfarë kapacitetesh të reja kanë afruar Forcat Tokësore në aspektin e operacioneve paqeruajtese dhe atyre humanitare?

Për vitin 2005, Forcat Tokësore kanë afruar kapacitete të reja në aspektin e operacioneve paqeruajtese dhe atyre humanitare. Ato kanë patur nje angazhim të madh me forca e mjete në këto operacione.

Një angazhim mjaft të madh, FT kanë patur në operacionet humanitare për përballmin e emergjencave civile, ku mund te përmendim operacionin për përballimin e situatës së krijuar nga rreshjet e dëborës për zhbllokimin e akseve kryesore rrugore, si dhe të rrugëve rurale në qarqet e Kukësit, Lezhës, Shkodrës, Dibrës , Elbasanit e të Korçës.

FT u angazhuan dhe në operacionet për zhvillimin e infrastrukturës rrugore në të gjithë vendin, ku mund të përmendim ndërtimin e segmentit rrugor Milot – Rrëshen, pjesë e aksit Durrës – Kukës – Morinë. Gjithsej, nga fillimi i punimeve në këtë segment janë realizuar ndërtim traseje 4.67 km ( me gjërësi të trupit të rrugës 22 ml ) me vlerë 146 milionë lekë.

Krahas kësaj, një angazhim mjaft të madh ka patur në operacione për riparimin e infrastrukturës rrugore si në bashkinë e Shkodres, në komunën Iballë (Pukë), në Komunën Vermosh, në Bashkinë Maliq, në Komunen Portez, në komunen Luftinje (Tepelene), në komunën Gjorice (Bulqize), në komunën Gziq, në komunën e Baldushkut, në komunën Ndroq në komunën Dhivër (Sarandë), si dhe për përmirësimin e rrugës në hyrje të Kalase se Kaninës (Vlore), pra në të gjithë teritorin e vendit.

Një veprimtari mjaft e gjërë ka qënë dhe montimi i disa urave Tip BAILEY si në komunën Vermosh, Zharrës, në Rrasfik (Rubik), nëkKomunën Dhivër (Sarande), në komunën Kajan dhe rikonstruksioni i Ures tip "BAILEY" në komunën Lekbibaj (Tropojë).

Forcat Tokësore janë angazhuar edhe në punime në zona të rrezikuara, ku mund të përmendim operacionin për heqjen e gurëve që rrezikonin lagjen Mangalem në Berat dhe operacionin për shembjen e ish-Komitetit Ekzekutiv në qytetin e Sarandës.

Aktualisht, Forcat Tokësore kanë të angazhuara në misione paqeruajtese 212 vetë, nga të cilat një kontigjent prej 70 vetësh i BrRSH në Bosnje – Hercegovine, 120 vetë të Regjimentit Komando në Irak, 22 vetë të BrRSH në Afganistan, ku kanë shërbyer me dinjitet, duke përmbushur me nder detyrën.

E veçanta e këtyre misioneve, krahasuar me vitin e kaluar ka qenë përzgjedhja dhe trajnimi i efektivave në kushtet reale të detyrave në mision, me program të veçantë me specifikat e vendeve ku do të shërbehet. Njëkohësisht janë bërë përpjekjet maksimale për kompletimin e tyre me pajisje, materiale, teknikë dhe armatim sipas TOP-it , të cilat kanë qenë funksionale dhe i kanë shërbyer detyrave të realizuara.

Me këto veprimtari, si në operacionet paqëruajtese dhe ato humanitare e në ndihme të komunitetit, FT treguan se kanë kapacitete të plota për kryerjen e misionit të tyre kushtetues.

Disa nga elementet e rinj që u konfirmuan gjatë këtij viti në realizimin e programit të stërvitjes?

Viti 2005 evidentoi mjaft elementë të rinj në të gjitha fushat, por veçanërisht në fushën e stërvitjes patëm një hop cilësor.

Realizimi i stëvitjes me trupa "Reagimi-‘05" me të gjithë efektivat e BrRSH në rajonin e Jubes, ku bazë e programit ishin temat bashkëkohore të detyrave që zgjidh kjo njësi në kuadrin e misionit, tregoi vlera kompaktësuese dhe treguese në përmbushjen e synimeve të paracaktuara. Kjo stërvitje tregoi se me një punë të organizuar e drejtuar me guxim dhe iniciativë janë të gjitha mundësitë që ne të ballafaqohemi me standardet e NATO-s, të cilat i prekëm realisht

Eksperiencë mjaft pozitive u arshivua edhe në Regjimentin Komando, për stërvitjen e ushtarëve aktivë e profesionistë, ku evidentohet përgatitja speciale në kushtet e motit të ftohtë e të nxehtë dhe mjaft elementë të tjerë që janë të lidhura me përgatitjet që bëjnë këto efektiva në kuadrin e realizimit të misionit që ata kanë. Eshtë pikërisht kjo eksperiencë, e cila ka shërbyer edhe për përgatitjen e efektivave të tjerë të FT, e sidomos atyre që janë angazhuar me misione paqeruajtese.

Mbas një shkëputje të gjatë, realizimi i stërvitjes me b1k të BrK Korçë me rezervistë ishte një nga të rejat dhe njëkohesisht arritje e këtij viti.

Këtë vit patëm një pjesëmarrje më të madhe në stërvitjet e përbashkëta me vendet e NATO-s dhe ato partnere, ku përfaqësimi ynë ka qënë dinjitoz. Kështu mund të përmendim stërvitjen "Adriatik Engagement 05", "Cooperative Engagement 05", " Eagle SAR ", " Bovilla-05", etj., në të cilat pati rritje cilësore të treguesve, ku janë dalluar efektivat e BrRSH, Regjimentit Komando, b MADM etj.

Elementë të rinj të këtij viti janë dhe hartimi dhe aplikimi i programeve të reja për stërvitjen kolektive dhe për ushtarët profesionistë, zhvillimi i kursit të avancuar të oficerit në Shkollën e Trupës të FT-se, si dhe realizimi i qitjeve me togat 12, 7 mm.

Çfarë mendoni se mbetet prioritare për të ardhmen në Komandën e Forcave Tokësore?

Mbyllja e ketij viti shënon mbylljen e një viti kalendarik, por realizimi i detyrave është në vazhdimësi. Eshtë e kuptueshme se disa detyra janë të natyrës së përhershme të ushtrisë si, rritja e operacionalitetit nga viti në vit dhe ruajtja e niveleve të gatishmërise, përgatitjes së komandave, shtabeve, kuadrove dhe efektivave, sigurimi i kushteve për jetesë e stërvitje, etj, por FT për vitin 2006, në zbatim të detyrave të direktivës së ministrit të Mbrojtjes për vitin 2006-2010 kanë edhe prioritete dhe objektiva specifike.

Prioritetet dhe objektivat për vitin 2006 synojnë krijimin e një force më të vogël, më të aftë, me të gatshme dhe të përgatitur ushtarakisht për mbrojtjen e vendit dhe për të kontribuar në operacionet paqeruajtëse dhe humanitare. Edhe për vitin 2006 do të vazhdoje puna për zhvillimin e personelit, vënien e stërvitjes sipas standardeve te NATO -s, mirëmbajtjen e teknikës e armatimit në përdorim, përmiresimin e infrastrukturës, si dhe konsolidimin e strukturave të shtabeve.

Puna e bërë në menaxhimin e personelit, do të përmirësohet dhe përsoset më tej në të gjitha aspektet. Sfidë mbetet vazhdimi i punës për një forcë profesioniste

Trajnimi dhe arsimimi edhe për këtë vit ka një rëndësi kritike për rritjen e profesionalizmit dhe të gatishmërisë së njësive të Forcave Tokësore.

Theksi do të vihet tek stërvitja e ushtarit, skuadrës, togës, kompanisë, e cila do të zgjerohet dhe zhvillohet në përputhje me doktrinën e re të stërvitjes dhe politikat e arsimimit.

Në përputhje me masterplanet e aprovuara, rinovimi i ndërtesave ekzistuese dhe ndërtimi i atyre të reja konsiderohet si një detyrë shumë e rëndësishme për plotësimin e nevojave të forcës. Kjo do të krijojë kushte më cilësore pune, jetese, argëtimi dhe çlodhjeje në kohën e lirë, duke sjellë dhe rritjen e produktivitetit për të gjithë pjesëtarët e FT. Prioritet, për modernizimin e infrastrukturës, do të vazhdojë të jetë krijimi i një numri më të vogël, por më efiçent dhe modern garnizonesh, përmes përqëndrimit të depove dhe ndërtesave ekzistuese.

Intervistoi: Afrim Imaj