Misioni

Shqipëria vazhdon kontributin ushtarak në Irak

Niset Kontigjenti i 6-të Paqëruatjes

Në 9 tetor 2005, në Regjimentin Komando në Zall-Herr u zhvillua ceremonia e nisjes së Kontigjentit të Gjashtë Paqeruajtës me mision në Irak. Në përbërje të këtij kontigjenti janë 120 oficerë, nënoficerë dhe ushtarë profesionistë me aftësi të larta ushtarako-profesionale dhe të pajisur me armatimin dhe teknikën e duhur, që i përgjigjen standardeve që kërkon realizimi me sukes i këtij misioni të rëndësishëm. Këto trupa komando, pas një stërvitje intensive dhe në kushte të përafërta me situatat që do të përballen gjatë kryerjes së detyrave të misionit, do të zëvëndësojnë parardhësit e tyre të Kontigjentit të Pestë Paqeruajtës në Mosul të Irakut.

Në ceremoni mori pjesë: ministri i Mbrojtjes Fatmir Mediu, shefi i Shtabit të Përgjithshëm i FA-së gjeneral lejtnant Pëllumb Qazimi, ambasdorja amerikane në Tiranë Marcie Reis, deputetë të Kuvendit të Shqipërisë, ushtarakë të lartë të Ministrisë së Mbrojtjes, Shtabit të Përgjithshëm të FA-së dhe të Forcave Tokësore, atashe ushtarakë të akredituar në vendin tonë, si dhe familjarë e të afërm të paqeruajtësve.

Pas fjalës së rastit që mbajti komandanti i Regjimentit Komando kolonel Vladimir Ndreu, të pranishmit i përshëndeti ministri i Mbrojtjes Fatmir Mediu. Në fjalën e tij ai theksoi se, misioni i paqeruajtësve shqiptarë në Irak para se të jetë një mision ushtarak në luftën kundër terrorizmit është një mision shpirtëror i një populli të vogël me djem të mrekullueshëm siç jeni ju, që i ofrojnë vlerat më të mira njerëzore dhe ushtarake Koalicionit Ndërkombëtar Kundër Terrorizmit. Më tej Ministri Mediu, duke iu drejtuar trupave të Kontigjentit të Gjashtë Paqeruajtës tha: ‘Akti juaj dhe i shokëve tuaj, është shumë fisnik, është dhe do të jetë tregues i vlerave bashkëkohore të historisë sonë të re për brezat që do të vijnë që, pavarsisht nga niveli i zhvillimit të vendit dhe i problemeve që ai ka në aspektin social, ekonomik e shoqëror, ushtarakët shqiptarë kontributin për paqen dhe sigurinë në botë e kanë vendosur më prioritare se hallet e familjeve të tyre’.

Në përfundim Ministri Mediu u kërkoi trupave të këtij misioni paqeruajtës që të vazhdojnë ecin në rrugën e shokëve të tyre paraardhës, të kryejnë detyrat me sukses, duke u bërë shëmbull disipline dhe profesionalizmi.

Në ceremoni përshëndeti edhe Ambasadorja Reis, e cila vuri në dukje marrëdhëniet dhe bashkëpunimin e ngushtë midis dy vendeve dhe ushtrive tona dhe vlerësoi veçanërisht kontributin e vyer të trupave tona ushtarake në misionet paqeruajtëse në botë.

Kthehet Kontigjenti i Pestë Paqeruajtës

Ndërsa Kontigjeti i Gjashtë Paqëruatjës është nisur në datë 9 tetor 2005 për në Irak, në datë 19 tetor 2005, pra pas dhjetë ditësh janë kthyer në atdhe 120 ushtarakët shqiptarë të Kontigjentit të Pestë Paqeruajtës, të cilët për më se 6 muaj rresht kryen me sukses misionin në Mosul të Irakut. Në ceremoninë e pritjes që u organizua në aeroportin ‘Nënë Tereza’ merrnin pjesë ministri i Mbrojtjes Fatmir Mediu, zv.ministri i Mbrojtjes Petrit Karabina, zv.shefi i Shtabit të Përgjithshëm gjeneral major Luan Hoxha, deputetë të Kuvendit të Shqipërisë, ushtarakë të lartë të Forcave të Armatosura, familjarë dhe të afërm të paqeruajtësve që u kthyen nga misioni. Ishte gjithashtu edhe Ambasadorja e SHBA-së në Tiranë Marcie Reis, komandanti i forcave të NATO-s në Shqipëri gjeneral brigade Di Ventura, përfaqësues të SAIC-ut dhe të DIE-s etj. Pas pritjes me ceremoni dhe takimit nga afër me oficerët, nënoficerët dhe ushtarët profesionistë të këtij kontigjenti, Ministri Mediu i uroi atyre mirëseardhjen në atdhe dhe i përgëzoi për kryerjen me sukses të misionit në Mosulin e largët të Irakut. ‘Të gjithë ne jemi krenar për ju, tha ndër të tjera ai, për punën tuaj që keni bërë dhe sukseset e arritura, duke përfaqësuar denjësisht ushtarakun shqiptar në një mision kaq të rëndësishëm. Ju jeni krenaria e vendit tonë dhe këtë e meritoni plotësisht’.