Kronika

Forcave të Armatosura Shqiptare do të kthehen nga forca pasive në forca aktive

Ministri i Mbrojtjes Fatmir Mediu ka raportuar në datë 18 tetor 2005 në Komisionin Parlamentar të Sigurisë lidhur me draftin e quajtur MAP, ku përfshihet dhe plani i reformave për të arritur anëtarësimin e vendit tonë në Aleancën e Atlantikut të Veriut. Në këtë draft, sipas ministrit Mediu, janë të përfshira një serë çeshtjesh të rëndësishme në fushën e mbrojtjes. Hartimi i këtij drafti, sipas Mediut, është fryt i bashkëpunimit me një serë partnerësh dhe është hartuar në përputhje me rekomandimet dhe vërejtjet e NATO-s. Ministri i Mbrojtjes, Fatmir Mediu para medias deklaroi gjithashtu se: "Në vitin 2008, pritet ftesa për anëtarësim në NATO dhe mendohet se ajo do t’u ofrohet vendeve anëtare të Kartës Adriatik-3, Shqipërisë, Kroacisë dhe Maqedonisë.

Objektivat tona janë plotësimi i standardeve brenda vitit 2008, për të qenë të gatshëm për anëtarësim"’.

Para anëtarëve të Komisionit të Sigurisë, Ministri i Mbrojtjes Fatmir Mediu, i cili shoqërohej nga zëvendësministrat Zana Xhuka dhe Petrit Karabina, si dhe nga shefi i Shtabit të Përgjithshëm gjeneral lejtnant Pëllumb Qazimi, parashtroi pikat kryesore të draftit, që janë:

- Heqja nga fluturimi deri në fund të tetorit i të gjithë avionëve MIG me krah fiks, kërkesë kjo e hershme e NATOS.

- Çështja e ushtarëve rezervistë.

Kjo çështje, sipas Mediut, është përcaktuar në Strategjinë e Forcave të Armatosura që ushtria shqiptare të mos të jetë e organizuar në mënyrë të tillë që të eci me komponentë apo brigadë rezerviste, por duhet të jetë një forcë e armatosur aktive.

- Duhet të miratohet sa më shpejt nga Parlamenti një rritje prej 0.1% e GDP eksluzivisht për Ministrinë e Mbrojtjes.

- Synimi i Forcave të Armatosura Shqiptare është që të kthehen nga forca pasive në forca aktive, që ka një fokus të qartë nga Shtabi i Përgjithshëm, te Forcat Tokësore, Ajrore dhe Detare.

- Partneritetin e tij në raport me vendet e Aleancës së Atlantikut Verior vendi ynë e ka kryer më së miri në misionet paqeruajtëse dhe ky është një nga objektivat e Ministrisë së Mbrojtjes në procesin e reformave.

- Me prioritet shihet dhe heqja e shërbimit ushtarak për studentet. Në diskutimet që janë bërë në NATO është quajtur ‘stupid loë’, pra që nuk ka asnjë sens logjik pasi për 1 muaj, kohë që është përcaktuar me ligj për kryerjen e shërbimit të detyrueshëm ushtarak për studentët, këta të fundit nuk do të mund të arrijnë të fitojnë formimin për të qenë ushtarë, pjesë e Forcave të Armatosura.

- Në draft është parashikuar dhe krijimi i një zeri të veçantë në buxhet për ushtarët profesionistë. Ministri i Mbrojtjes Mediu tha në Komisionin e Sigurisë se ne jemi duke tentuar të hyjmë në një ushtri profesioniste dhe për fat të keq deri tani këta profesionistë nuk i kemi paguar me një sistem pagash që është siguruar në rrugë dytësore.

Gjithashtu Ministri Mediu u shpreh se edhe funksionimi i Spitalit Ushtarak në Tiranë, duhet të jetë nje prioritet që duhet të shihet gjatë hartimit të buxhetit për vitin 2006 pasi më tepër se 70% e emergjencave civile përballohen pikërisht nga Spitali Ushtarak.

Berisha: Do bëjmë çdo përpjekje për t’u antarësuar në NATO

Kryeministri Berisha priti një delegacion të NATO-s kryesuar nga Zëvendës Komandanti Suprem Aleat për Evropën, Gjeneral Lejtnant John Reith. Pas vlerësimeve të përbashkëta pozitive për bashkëpunimin mes Shqipërisë dhe NATO-s, kryeministri Berisha theksoi se Shqipëria do të bëjë të gjitha përpjekjet e duhura për një bashkëpunim sa më të mirë, si dhe për të merituar antarësimin në NATO, si një synim madhor i vendit. Z.Berisha u shpreh gjithashtu se qeveria e re shqiptare do të caktojë objektiva të saktë dhe cilësorë për të arritur standartet e nevojshme për antarësimin. Nga ana tjetër, kryeministri shqiptar e siguroi z.Reith për vullnetin e qeverisë për të siguruar zgjedhje të lira e të ndershme, si dhe për të garantuar funksionimin e shtetit ligjor. Ai evidentoi korrupsionin dhe krimin e organizuar që lidhet me të, si problemin më të rëndë të vendit. Z.Berisha shprehu vullnetin e palëkundur të qeverisë për të këputur lidhjet e krimit të organizuar me politikën. Ai u shpreh se nisma për kufizimin e identitetit të deputetit synon krijimin e mundësive ligjore për luftimin dhe parandalimin e lidhjeve të krimit të organizuar me politikën. Zëvendës Komandanti Suprem Aleat për Evropën, Gjeneral Lejtnant John Reith, theksoi se duke e njohur mirë Shqipërinë, beson se zgjidhja e problemeve të krimit dhe korrupsionit do të hapin rrugën e zhvillimit për vendin. Ai shprehu gjithashtu gadishmërinë e NATO-s për të ndihmuar ushtrinë shqiptare në arritjen e standarteve. Në takim u diskutua gjithashtu edhe për funksionimin sa më efikas të bashkëpunimit të ushtrisë shqiptare me trupat e NATO-s në kuadër të forcave paqeruajtëse në Afganistan.

Nga ana e tij, kryeministri shqiptar vuri në dukje qëndrimin e Shqipërisë për të rritur angazhimin e saj në kuadrin e nismave paqeruajtëse të NATO-s. Ai përmendi rolin e komandove shqiptare në Irak dhe e cilësoi rrëzimin e diktatorit irakian Sadam Husein si një veprim të domosdoshëm. "Shqipëria, - u shpreh kryeministri Berisha, e njeh diktaturën sepse ka vuajtur prej saj. Prandaj dhe qëndrimi ynë i palëkundur është se diktatorët duhen rrëzuar."

Moisiu shpreh mirënjohje për kontributin e NATO-s

Presidenti i Republikës, Alfred Moisiu, ka pritur Gjen. Reith, Zv/Komandant Suprem i Aleancës për Evropën, shoqëruar nga këshilltari politik i NATO–s në Tiranë, Iliopulos, Asistent i NATO–s në Tiranë Gjen-Brigade Vito di Ventura etj. Në takim mori pjesë Shefi i Shtabit të Përgjithshëm Gjen - Lejtnant Pëllumb Qazimi.

Presidenti Moisiu shprehu mirënjohjen për kontributin që NATO ka dhënë për vendin tonë, veçanërisht në modernizimin e FA-së për plotësimin e standarteve të kërkuara për anëtarësim në këtë strukturë euro-atlantike dhe për ndërhyrjen në Kosovë për t’i dhënë fund genocidit dhe barbarisë të Milosheviçit. Duke venë në dukje se Shqipëria që në fillim të viteve ‘90 po punon për t’u bërë anëtare e denjë e NATO-s, Komandanti i Përgjithshëm i FA-së, shprehu besimin në ftesën për anëtarësim, e cila do të mbështetet në aspiratën e popullit dhe në përpjekjet serioze në rradhë të parë të ushtrisë sonë për t’u reformuar, si dhe të kontributeve të trupave tona në misione paqeruajtëse në mbështetje të veprimeve të NATO-s dhe në luftë kundër terrorizmit ndërkombëtar. Gjen. Reith, i cili ka qënë me mision në vendin tonë më parë, i cilësoi rrënjësore ndryshimet në FA, vuri në dukje nivelin e lartë të përgatitjes profesionale të trupave tona, demostruar në stërvitjet dhe në pjesëmarrjen në operacionet e NATO-s si dhe vuri në dukje rëndësinë që ka arritja e standarteve për anëtarësim.

Reith: SEEBRIG ka një rëndësi politike dhe ushtarake

Ministri i Mbrojtjes Fatmir Mediu ka pritur në 4 tetor, zv.komandantin e Komandës Supreme të Forcave të NATO-s në Europë, gjeneral lejtnant Ser John Reith. i pranishëm ishte edhe Këshilltari Politik pranë shtabit të NATO-s në Shqipëri, Dimitris N. Iliopoulos.Në këtë takim dy bashkëbiseduesit diskutuan për probleme që lidhen me gjendjen në rajon, për progresin e bërë në ristrukturimin e Forcave të Armatosura Shqiptare, angazhimin e tyre në misionet paqeruajtëse për sigurimin e lirisë dhe paqes në Afganistan, Irak, Bosnje-Hercegovinë etj. Një vënd të veçantë në takim zunë zhvillimet e fundit në Ministerialin e Mbrojtjes së Vendeve të Europës Juglindore dhe veçanërisht për angazhimin e Brigadës Shumëkombëshe SEEBRIG me mision në Afganistan. Ky mision, theksoi gjenerali Reith, ka një rëndësi të madhe sa politike aq edhe ushtarake për tiu treguar partnerëve tanë për një bashkëpumnim të ngushtë në rajon dhe me gjërë. Për këtë çështje do të diskutohet edhe një herë në takimin e ministrave të Mbrojtjes të vendeve anëtare të SEDM-it, i cili do të mbahet në muajin dhjetor të këtij viti, ku do të vendoset për dislokimin e kësaj njësie në Afganistan, si dhe për projekte të tjera.

Në këtë mision të SEEBRIG-ut do të marrin pjesë edhe numër i caktuar ushtarakësh shqiptar. Më pas, zv.komandanti i Forcave të NATO-s në Europë, gjeneral lejtnant Rieth u prit në takime të veçanta edhe nga shefi i Shtabit të Përgjithshëm i FA-së gjeneral lejtnant Pëllumb Qazimi dhe kryetari i radhës i Komitetit Koordinues Politiko-Ushtarak të procesit të SEDM-it, Besnik Baraj.

Ries konfirmon mbështetjen e SHBA-së për anëtarësimin në Aleancën Euroatlantike

Ministri i Mbrojtjes Fatmir Mediu priti ambasadoren e SHBA-së në Tiranë Marcie Ries

Ministri i Mbrojtjes Fatmir Mediu ka priti në 3 tetor ne një takim të veçantë ambasadoren e SHBA-së në Tiranë Marcie Ries. Në takim ishte i pranishëm edhe shefi i Shtabit të Përgjithshëm i FA-së, gjeneral lejtnant Pëllumb Qazimi. Ambasadorja Marcie Ries, pasi i uroi zotit Fatmir Mediu detyrën e re si ministër i Mbrojtjes i Republikës së Shqipërisë, vlerësoi punën që kanë bërë komandat ushtarake dhe strukturat e tjera të Ministrisë së Mbrojtjes dhe të Shtabit të Përgjithshëm për reformimin e Forcave të Armatosura Shqiptare dhe konfirmoi edhe një herë mbështetjen e Shteteve të Bashkuara të Amerikës në rrugën drejt arritjes së qëllimit parësor të vendit tonë, anëtarësimin në Aleancën Euroatlantike.

Nga ana e tij, ministri i Mbrojtjes Mediu vlerësoi lart marrëdhëniet shumë të mira midis dy vendeve dhe ushtrive tona, si dhe falenderoi Ambasdoren Ries, e nëpërmjet saj Qeverinë Amerikane për kontributin dhe ndihmën e vyer e të vazhdueshme që ka dhënë dhe po jep për ngritjen dhe forcimin e Ushtrisë Shqiptare. Ai theksoi se, në zbatim të programit të Qeverisë së re Shqiptare, do t’i kushtohet një vëmendje e veçantë vazhdimit të punës për reformimin dhe modernizimin e strukturave të Forcave të Armatosura, të arsimimit dhe kualifikimit të personelit të saj, si dhe përpjekjeve të shumanëshme për plotësimin e kërkesave dhe standardeve për integrim në NATO.

Më pas, Ministri Mediu dhe Ambasadorja Ries diskutuan dhe shkëmbyen mendime për çështje të rëndësishme që lidhen me gjendjen në rajon dhe më gjërë, për luftën kundër terrorizmit ndërkombëtar, për kontributin që ka dhënë dhe vazhdon të jap Shqipëria me misionet ushtarake për ruajtjen dhe sigurinë e paqes në disa vende të globit si në Irak, Afganistan, Bosnje-Hercegovinë etj.

Annen: Gjermania është e gatëshme për të mbështetur FA

Ambasadori i Republikës Federale të Gjermanisë Hans Peter Annen në takimin e zhvilluar ne 4 tetor me Ministrin e Mbrojtjes Fatmir Mediu, pasi uroi për detyrën, vlerësoi hapat e bëra nga Forcat tona të Armatosura në procesin e reformimit të tyre dhe arritjet e shënuara për plotësimin e standardeve për anëtarësim në NATO. Gjermania, theksoi ai, është e gatëshme për të mbështetur Forcat e Armatosura të Shqipërisë për të plotësuar kërkesat që kanë në rrugën drejt modernizimit të tyre. Nga ana e tij, Ministri Mediu u ndal në marrëdhëniet dhe bashkëpunimin që ekziston midis dy vendeve dhe ushtrive tona, vlerësoi ndihmën e dhënë nga Qeveria dhe Forcat e Armatosura Gjermane për Ushtrinë Shqiptare, sidomos për arsimimin dhe kualifikimin e ushtarakëve shqiptar, për ndihmat në fushën logjistike, të shëndetësisë etj, si dhe për mbështetjen e vazhdueshme për integrimin e Shqipërisë në strukturat e Aleancës Euroatlantike. Ministri Mediu mirëpriti asistencën e ekspertëve gjerman në fushën e arsimimit në akademitë tona ushtarake, si dhe në fusha të tjera të mundëshme.