Zhvillohet Konferenca e Koalicionit të Operacionit "Liria e Irakut"

Me 29-30 nëntor 2005, në mjediset e hotel ‘Sheraton’ në Tiranë zhvilloi punimet Konferenca e Koalicionit të Operacionit ‘Liria e Irakut’, e cila u organizua nga Komanda Qendrore e SHBA-së. Ministria e Mbrojtjes mori të gjitha masat për sigurimin dhe mbarëvajtjen e punimeve të kësaj konference, në të cilën morën pjesë 34 vende pjesëmarrës në Koalicionin Ndërkombëtar për lirinë e Irakut. Kjo ishte konferenca e dytë vjetore, pas asaj që është mbajtur vitin e kaluar në Rumani, për përparimin dhe sukseset e Koalicionit në Irak. Qëllimi i kësaj konferencës ishte trajtimi i një strategjie për të mbështetur Operacionin ‘Liria e Irakut’ për vitin 2006 dhe paraqitja e kërkesave për të ardhmen.

Në konferencë morën pjesë komandanti i Komandës Qëdrore të SHBA-së, gjenerali Joh Abizaid, komandanti i Forcave Multinacionale në Irak, gjenerali George Casey, si dhe përfaqësues ushtarakë të vendeve pjesëmarrës në këtë koalicion ndërkombëtar.

Mori pjesë gjithashtu ministri i Mbrojtjes Fatmir Mediu, shefi i Shtabit të Përgjithshëm, gjeneral lejtnant Pëllumb Qazimi, si dhe ushtarakë të tjerë përfaqësues të Forcave tona të Armatosura. E pranishme ishte edhe ambasdorja e SHBA-së në Tiranë Marcie Reis.