Shqipëria merr ftesën për anëtarësim në NATO

Udhëheqësit e NATO-s kanë ftuar zyrtarisht Shqipërinë dhe Koracinë që të fillojë bisedimet për anëtarësimin në Aleancë.
Ka qenë vetë Sekretari i Përgjithshëm i NATO-s Jaap de Hoop Scheffer, i cili njoftoi vendimin e marrë nga vendet e Aleancës në Samitin e Bukureshtit. Në fjalën e tij ai ka theksuar se “vendet që bashkohen me ne, me të drejtë mund të jenë krenarë për atë që ato kanë arritur, për plotësimin e kërkesave të kriterve të NATO-s për anëtarësim. Në sajë të punës suaj të fortë e të palodhur, aleatët mund të kenë besim se pranimi juaja në Aleancë do ta forcojë NATO-n. Prania juaj në Aleancë do ta forcojë edhe më tej sigurinë dhe stabilitetin në rajonin e euroatlantikut, e veçanërisht në Europën Juglindore. Ju vini nga një rajon i cili deri para pak vitesh ka qenë i prekur nga një konflikt i tmerrshëm, kjo është arsyeja që anëtarësia juaj ka një domethënie të veçantë”.

Bashkë për një Evropë më të fortë e të sigurtë

Duke iu drejtuar udhëheqësve të NATO-s, Presidenti Amerikan Xhorxh Bush u uroi mirëseardhjen shteteve më të reja të ftuara për të marrë ftesën për anëtarësim.

Anëtarët e rinj kanë sjellë ide të reja, entusiazëm të ri, energji të reja. Pranimi i tyre e ka bërë Europën më të fortë, më të sigurtë dhe më të lirë. Jam i lumtur që, Aleanca ra dakord të ftojë Shqipërinë dhe Kroacinë, të bëhen anëtarë të NATO-s. Të dy këto vende kanë demonstruar aftësinë dhe gatishmërinë, për të dhënë kontributin e tyre të fortë e të qëndrueshëm për NATO-n. Së bashku do të vazhdojmë të ndihmojmë në ndërtimin e një Europe të fortë, të qëndrueshme dhe të lirë, do të sjellim më shumë stabilitet në atë, që ishte njëherë e një kohë, rajoni i trazuar i Ballkanit Për gjashtë dekada, Aleanca e NATO-s ka qenë shpresa e një bote që shkonte drejt lirisë dhe drejtësisë, larg modeleve të konfliktit dhe frikës. Gjatë kohës së sfidës së madhe, ne kemi çuar përpara idealet tona, kemi qëndruar të fortë për mbrojtjen e tyre dhe i kemi ofruar kombeve premtimin e NATO-s, për gatishmëri, për të vepruar e bërë sakrifica të vështira, nëse kërkohet nga anëtarët e saj. Që prej përfundimit të Luftës së Ftohtë, NATO ka mirëpritur në rradhët e veta 10 vende të lira. Këto vende kanë sjellë ide të reja, entuziazëm të ri, energji të reja. Pranimi i këtyre anëtarëve të rinj e ka bërë Europën më të fortë, më të sigurtë dhe më të lirë. Këto vende e kanë bërë Aleancën tonë më relevante për rreziqet që ne përballemi në shekullin e ri. Në Bukuresht ne po ftojmë më shumë vende të bashkohen me ne. Unë jam i lumtur që Aleanca ka rënë dakord të ftojë Shqipërinë dhe Kroacinë të bëhen anëtarë të NATO-s. Që të dy këto vende kanë demonstruar aftësinë dhe gadishmërinë e tyre për të dhënë kontributin e tyre të fortë e të qëndrueshëm për NATO-n. Që të dyja kanë ndërmarrë reforma sfiduese në fushën politike, ekonomike dhe ushtarake; që të dyja kanë dërguar forcat e tyre në misionet e NATO-s. Shqipëria dhe Kroacia janë gati për përgjegjësitë që ka anëtarësimi në NATOdhe ata do të do të bëhen anëtarë të shquar të kësaj Aleance.
Më vjen keq që nuk ishim në gjendje të arrijmë konsensus, që sot të ftonim edhe Maqedoninë t’i bashkohej Aleancës. Maqedonia ka kryer reforma të vështira në vend. Ajo është duke dhënë një kontribut të madh në misionet e NATO-s jashtë. Çështja e emrit duhet të zgjidhet shpejt, me qëllim që Maqedonia të jetë e mirëpritur në NATO sa më shpejt që të jetë e mundur.
Ndërkohë, nevojitet që NATO të intesifikojë angazhimin e saj me Maqedoninë, për të bërë të sigurtë që NATO po sheh përpara, drejt ditës kur Maqedonia të zerë vendin e saj në mes të vendeve anëtare të Aleancës së Atlantikut.
Që të tre vendet, Shqipëria, Kroacia dhe Maqedonia e dinë dallimin mes të mirës dhe të keqes, sepse ato e kujtojnë fare mirë fytyrën e së keqes. Këto vende nuk e marrin lirinë e tyre si dhuratë, se ato ende e kujtojnë jetën pa liri. Këto vende respektojnë punën e vështirë për ndërtimin e demokracisë, se ato e bënë realitet atë në vendet e tyre. SHBA dhe të gjitha vendet anëtare të Aleancës i mbështesim fort aspiratat e popujve të tyre dhe angazhohemi të qëndrojmë me ta, ndërkohë që ato punojnë për reformat. Së bashku, ne do të vazhdojmë të ndihmojmë në ndërtimin e një Europe të fortë, të qëndrueshme dhe të lirë. Ne do të sjellim më shumë stabilitet në atë që ishte njëherë e një kohë rajoni i trazuar i Ballkanit. Ne do të jemi në gjendje të demonstrojmë përfitimet që vijnë nga të qenurit me forcat e lirisë. Dyert e NATO-s duhet të mbeten të hapura për vende të tjera në Europë që kanë të njejtën dashuri për lirinë dhe që dëshmojnë një angazhim për t’u reformuar dhe kërkojnë t’i forcojnë lidhjet e tyre me komunitetin transatlantik. Ne duhet t’i dëgjojmë plotësisht dhe ndershmërisht vendet e tjera që kërkojnë anëtarësim. Ashtu sikurse ne ftuam sot anëtarë të rinj, ne jemi gjithashtu të qartë se, progresi i zgjerimit do të vazhdojë. Aleanca gjithmonë ka mirëpritur ata, që janë të gatshëm për të bërë sakrificat e nevojshme për të mbrojtur vendet tona dhe të shërbejnë si forca të paqes. Kjo është ajo që e bën Aleancën tonë të pathyeshme dhe kjo është arsyeja që NATO mbetet Aleanca më e suksesshme në histori, në emër të lirisë së njeriut

Ftesa e NATO-s, ngjarje historike

Presidenti i Shqipërisë Bamir Topi falenderoi të gjitha vendet mike, të cilat besuan në kërkesën dhe dëshirën e sinqertë euroatlantike të popullit shqiptar dhe e mbështetën atë.

Jam shumë i nderuar që ndodhem sot në Bukuresht, për të përfaqësuar vendin tim në këtë ngjarje të madhe. Dëshiroj t’ju sjell mirënjohjen dhe falënderimin më të thellë të popullit shqiptar për vendimin që mori sot Aleanca e Vendeve të Atlantikut të Veriut. Sot, vendi im nënëshkruan aktin më të rëndësishëm në historinë e tij; sot populli shqiptar shkëputet përfundimisht nga e kaluara e Jaltës dhe Potsdamit; Shqipëria denjësisht dëshmon se, liria dhe demokracia kthehen në virtyte edhe në vendin ku, jo më shumë se dy dekada më parë, diktatura më e egër në historinë e pas Luftës së Dytë Botërore e kishte kthyer në institucion dhunën ndaj lirisë dhe të drejtës.
Si President i Shqipërisë, dëshiroj të falënderoj të gjitha ato vende mike, të cilët besuan në kërkesën dhe dëshirën e sinqertë euro-atlantike të popullit shqiptar dhe e mbështetën atë. Kjo ëndërr, e cila lindi natyrshëm që në ditët e para të çlirimit të shoqërisë shqiptare nga komunizmi, u realizua sot në Bukuresht.
E gjithë shoqëria shqiptare, e gjithë politika shqiptare, mediat dhe përfaqësuesit e shoqërisë civile në Shqipëri, janë të vendosur dhe të përgjegjshëm për të mbështetur anëtarësimin e vendit të tyre në NATO. Shqipëria ndodhet tashmë në rrugën e saj të pakthyeshme për të ndërtuar një shtet demokratik dhe të së drejtës. Ne jemi të vendosur të mos ndalemi përpara kësaj sfide, në emër të një të ardhmeje më të mirë, më të sigurtë dhe më të begatë për fëmijët tanë, ku çdo sakrificë është e përligjur. Reformat e rëndësishme politike dhe ekonomike në Shqipëri, reformat në sistemin e drejtësisë, në sistemin zgjedhor, në sistemin e sigurisë, në Forcat e Armatosura, në modernizimin e institucioneve, reformat për çrrënjosjen e korrupsionit dhe luftën kundër krimit të organizuar, të cilat janë kontribut i të gjitha forcave politike, pozitës dhe opozitës, i të gjitha qeverive të mbas vitit 1992, por sidomos i vetë popullit shqiptar, janë procese të pandalshme, të qenësishme dhe të domosdoshme edhe për një vend anëtar të Aleancës.
E konsideroj vendimin që Aleanca mori sot për Shqipërinë, si një vlerësim dhe besim ndaj të gjithë angazhimit të deritanishëm, serioz dhe shumëplanësh të vendit tim dhe si një angazhim madhor që ne kemi, si ndaj vendeve të Aleancës, ashtu dhe ndaj popullit shqiptar.
Shqipëria është e gatshme të bëhet pjesë e rëndësishme e politikave të sigurisë dhe demokracisë së Aleancës, si në planin rajonal dhe në atë global.
Të nderuar miq,
Shqipëria sot ndodhet në krah të vendeve, të cilat vlerat e demokracisë dhe të lirisë i kanë busulla të strategjive të tyre të zhvillimit kombëtar, për të ndërtuar një të ardhme të ndritur, jo vetëm për shoqëritë e tyre, por për të gjitha shoqëritë dhe kombet e botës. Ne jemi sa krenarë, aq edhe të përgjegjshëm për këtë akt.

Vlerësim i përpjekjeve të të gjithë shqiptarëve

Kryeministri i Shqipërisë Sali Berisha e ka cilësuar vendimin e kryetarëve të shteteve dhe qeverive të vendeve anëtare të NATO-s për të ftuar Shqipërinë, si një vlerësim për të afirmuar përpjekjet dhe arritjet e shqiptarëve në shndërrimin e Shqipërisë në vendin e pluralizmit politik dhe demokracisë funksionuese, shtetit ligjor, ekonomisë së lirisë së tregut; një vend që këto 15 vite ka vendosur bashkëpunim luajal, të gjithëanshëm me Aleancën e Atlantikut të Veriut.

Më lejoni t’ju shpreh mirënjohjen më të thellë, ju, liderëve të vendeve anëtare të NATO-s, për vendimin historik që morët, për të ftuar Shqipërinë të bëhet anëtare e Aleancës më të shkëlqyer politike ushtarake, që kohërat kanë njohur. Për shqiptarët që aq shumë kanë vuajtur, por edhe sakrifikuar për liri dhe dinjitet dhe që sot mbi 95% e tyre mbështesin anëtarësinë e vendit të tyre në NATO, vendimi i juaj i sotëm, këtu në Bukuresht, hapi epokën e sigurisë për lirinë dhe për të ardhmen e tyre të merituar. Historia e vendit tim ka qenë historia e mbijetesës. Liria dhe e ardhmja janë të pandashme. Por, me vendimin tuaj fisnik për të ftuar Shqipërinë, ju vendosët rikthimin e shqiptarëve, ndër më të vjetrit banorë të kontinentit, në familjen, në gjirin e kombeve euro-atlantike, me të cilat ne ndajmë vlerat shekullore të qytetërimit tonë. Vendimi i kryetarëve të shteteve dhe qeverive të vendeve anëtare të NATO-s, për të ftuar Shqipërinë është vlerësim dhe afirmim i përpjekjeve dhe arritjeve të shqiptarëve në shndërrimin e Shqipërisë nga vendi i monizmit total, izolimit më të thellë, hiperkolektivizmit të plotë, lirive dhe të drejtave të ndaluara, në vendin e pluralizmit politik dhe demokracisë funksionuese, shtetit ligjor, ekonomisë së lirë të tregut, një vend që këto 15 vite ka vendosur një bashkëpunim luajal, të gjithanshëm me Aleancën e Atlantikut të Veriut. Trupat tona janë të vendosura sot së bashku me trupat tuaja në Kabul dhe Herat dhe do të jenë atje ku NATO-ja të jetë. Ju, vlerësuat me vendimin tuaj këto arritje, por unë dua të shpreh këtu mirënjohjen më të thellë ndaj kombeve dhe vendeve tuaja, për solidaritetin, ndihmën e gjithanshme që na dhanë në rrugën tonë të ndërtimit të lirisë dhe vlerave të saj. Një mirënjohje shumë të thellë NATO-s, sekretarit të Përgjithshëm, ekipit të tij për ndihmën tejet të çmuar që na dhanë për të bërë të mundur këtë ditë.
Me vendimin tuaj, ju keni vendosur një besim të madh tek ne. Por edhe unë, marr sot këtu një zotim solemn para jush se, ne vlerësojmë këtë besim, para së gjithash, si një përgjegjësi madhore të kombit tim ndaj kombeve tuaja për të ndërmarrë çdo reformë, për të miratuar dhe zbatuar çdo vendim dhe ligj, për të arritur dhe konsoliduar standardet politike, ekonomike, sociale dhe ushtarake të vendeve anëtare të NATO-s.
Një nga te vërtetat e mëdha që kemi mësuar është se reformat janë “perpetum mobile” e vërtetë e shoqërisë së lirë. Kështu do të jenë edhe për shoqërinë tonë.
Duke shprehur edhe njëherë mirënjohjen ndaj jush dhe vendeve tuaja për vendimin historik që morët sot, me lejoni ta mbyll fjalën time me një ndjesi personale:
Për mua kjo është një mrekulli,
Mrekullia e lirisë!

Proces pune intensiv i FA-së deri në integrimin e plotë

Nga Bukureshti, është prononcuar për shtyp edhe Ministri i Mbrojtjes Gazmend Oketa. Së pari ai ka përshëndetur marrjen e ftesës për anëtarësim në NATO, si një fitore të të gjithë shqiptarëve. Më pas ai ka theksuar se ftesa është një vlerësim për kontributin madhor të Forcave tona të Armatosura.

“Marrja kësaj ftese është një proces intensiv pune dhe angazhimesh të mëtejshme, që na presin deri në anëtarësimin e plotë me të drejta të barabarta në Aleancë” -është ky mesazhi i parë i ministrit të Mbrojtjes Gazmend Oketa nga Saminti i Bukureshtit ku vendi ynë mori ftesën pë anëtarësimin në NATO. Këtë ftesë e shohim, shtoi më tej ai, si një vlerësim të kontributit madhor të Forcave të Armatosura të Republikës së Shqipërisë, të përpjekjeve dhe realizimit të reformave nëpërmjet të cilave ato kanë kaluar, si dhe të kontributit që ato kanë dhënë dhe po japin në operacionet paqeruajtëse në Afganistan, Irak, Bosnjë-Hercegovinë, etj.
Përfitoj nga rasti, që t’ju dërgoj një përshëndetje të veçantë trupave tona, që ndodhen aktualisht me mision në Herat, Kabul; togës mjekësore që vepron në kuadër të A3 në Afganistan, si dhe trupave që ndodhen në Mosul, në Irak.
Nuk mund të lë këtu pa përmendur kontributin e jashtëzakonshëm të Forcave tona të Armatosura në operacionin pas ngjarjes së Gërdecit, i cili meritoi edhe përgëzimet e ndërkombëtarëve nga mënyra e organizimit dhe e veprimeve të kryera. Unë dua t’i falenderoj për atë çfarë kanë bërë në situata të tilla emergjente, duke treguar se janë të përgatitura, për të përballuar operacionet e kërkim-shpëtimit të standardeve të NATO-s.
Këto aftësi të shkëlqyera të Forcave të Armatosura, janë rezultat i vazhdimësisë së procesit të reformave dhe të transformimit të kryer gjatë gjithë këtyre viteve.
Këtu, në mënyrë të veçantë do të doja të theksoja rolin vendimtar, që ka luajtur intensifikimi i këtij procesi reformues në dy vitet e fundit, drejt rrugës së anëtarësimit të plotë në NATO, reforma të cilat janë vlerësuar dukshëm edhe nga ministrat e Jashtëm të BE, në takimin e tyre të fundit.
Pavarësisht nga këto arritje, procesi i reformave dhe transformimit do të vazhdojë edhe pas Bukureshtit, me synim final krijimin e një ushtrie të vogël profesioniste, të mirëstërvitur, mirëpajisur, mirëtrajtuar dhe të denjë të plotësojë misionin e saj, brenda dhe jashtë vendit.