Ministri i Mbrojtjes Oketa takohet me Presidentin Bush dhe me homologë të tij në Bukuresht

4 prill 2008. Ministri i Mbrojtjes Gazmend Oketa, gjatë ditëve të punimeve të Samitit të NATO-s në Bukuresht, ka realizuar edhe një axhendë të ngjeshur takimesh.
Një nga takimet më të rëndësishme të Ministrit Oketa ishte takimi me Presidentin e SHBA-ve, Xhorxh W Bush. Ministri Oketa, përveç prezantimit si Ministër i ri i Mbrojtjes i Republikës së Shqipërisë, ka marrë urimet më të mira nga Presidenti Bush për detyrën e tij të re dhe shumë të rëndësishme, si dhe për marrjen e ftesës zyrtare të Shqipërisë për anëtarsimin e saj në NATO. Ministri Oketa i shprehu Presidentit Bush falenderimet më të sinqerta për kontributin dhe mbështetjen e fuqishme që SHBA dhe Ai personalisht kanë dhënë për integrimin euroatlantik të Shqipërinë dhe të Forcave të saj të Armatosura.
Një takim të veçantë, Ministri Oketa pati me ministrin e Mbrojtjes të Kroacisë Branko Vukeliç, të cilit i uroi ftesën që vendi i tij, ashtu sikurse edhe Shqipëria, mori për t’u anëtarësuar në Aleancë e Atlantikut të Veriut. Dy ministrat e Mbrojtjes kanë diskutuar edhe për përgjegjësitë dhe angazhimet e mëdha që i presin në të ardhmen e afërt dy vendet dhe Forcat tona të Armatosura për të plotësuar të gjitha objektivat dhe standardet që kërkohen për t’u bërë anëtarë me të drejta të plota në NATO. Ministri ynë i Mbrojtjes Gazmened Oketa falenderoi homologun e tij kroat për ndihmën dhe bashkëpunimin e shkëlqyer mes Forcave të Armatosura të dy vendeve tona në kuadër të Kartës së Adriatikut, si dhe i shprehu gadishmërinë për të forcuar më tej këtë bashkëpunim, përmes projekteve konkrete që do të ndërmerren në vazhdim të reformimit të plotë të FASH dhe angazhimet e përbëshkëta për një stabilitet të mëtejshëm në dobi të ruajtjes së paqes e mirëkuptimit në Ballkan.
Ministri Oketa është takuar edhe me ministrin hollandez të Mbrojtjes Eimert van Middlekoop. Në këtë takim kreu i mbrojtjes hollandeze i ka shprehur Ministrit Oketa urimet e tij për marrjen e ftesës nga Samiti i Bukureshti për anëtarësimin e Shqipërisë në NATO, ndërsa më pas dy ministrat kanë shkëmbyer mendimet mbi bashkëpunimin midis palëve dhe rreth situatës aktuale në rajonin e Ballkanit.
Në kuadër të takimeve bilaterale, Ministri ynë i Mbrojtjes ka zhvilluar takime edhe me ministrin e Mbrojtjes të Hungarisë Szekeres dhe atë të Italisë Parisi. Ministri Oketa ka marrë urime të përzemërta nga homolgët e tij hungarez dhe italian për marrjen e ftesës për anëtarësim të Shqipërisë në NATO. Gjithashtu ata kanë vlerësuar faktin se marrja e ftesës ishte rezultat i përpjekjeve të mëdha dhe të gjithanëshme që Shqipëria dhe Forcat e saj të Armatosura kanë bërë në rrugën drejt NATO-s. Ministrat Parisi dhe Szekeres i kanë ofruar Ministrit Oketa gadishmërinë e tyre për mbështetjen e mëtejshme që do t’i japin Shqipërisë deri në anëtarësimin e plotë në Aleancën e Atlantikut të Veriut.

Kthehet nga Iraku Kontigjenti i 10-të Paqeruajtës

Në mëngjezin e 28 marsit 2008 mbërriti në atdhe Kontigjenti i 10-të Paqeruajtës, i cili kreu me sukses të plotë misionin e tij 6-mujor operacionin “Liria e Irakut”. Në përbërje të këtij kontigjenti ishin 120 oficerë, nënoficerë dhe ushtarë profesionistë të Regjimentit Komando. Ku kontigjent kreu me shumë sukses detyra nga më të ndryshmet dhe më të vështirat, siç ishin sigurimi i aeroportit të Mosulit; shoqërimi i autokolonave; ruajtja e instalimeve ushtarake, patrullim në zonat përreth aeroportit me mjete dhe në këmbë etj.
Në muajin dhjetor të vitit që kaloi, pikërisht në kohën kur vazhdonte të ishte në krye të detyrave në Mosul, Kontigjenti i 10-të Paqeruajtës u dekorua nga Presidenti i Republikës, njëherash edhe Komandanti i Përgjithshëm i Forcave të Armatosura, Bamir Topi, me “Medaljen e Artë të Shqiponjës”. Për të pritur paqeruajtësit në aeroportin ushtarak të Rinasit kishte dalë shefi i Shtabit të Përgjithshëm i FA-së, gjeneral lejtnant Luan Hoxha, komandanti i Forcës së Bashkuar gjeneral major Shpëtim Spahiu, ushtarakë të tjerë të lartë të Ministrisë së Mbrojtjes dhe Shtabit të Përgjithshëm, si dhe shumë familjarë dhe të afërm të tyre.
Gjeneral lejtnant Luan Hoxha përshëndeti trupat paqeruajtëse dhe i uroi atyre mirëseardhjen në atdhe. Më pas misionarët e paqes u takuan me familjarët dhe të afërmit e tyre.

Ndërrohet komandanti i Shtabit të NATO-s në Tiranë

Paraditen e 28 marsit 2008 në mjediset e Komandës së Doktrinës dhe Stërvitjes u zhvillua ceremonia e ndërrimit të komandantit të Shtabit të NATO-s në Tiranë, gjeneral brigade Anastasios Rintis me gjeneral brigade Vasil Kirilov Dimitrov. Në këtë ceremoni morën pjesë: Kryeministri Sali Berisha, ministri i Mbrojtjes Gazmend Oketa, ministri i Jashtëm Lulëzim Basha, zv.ministrat e Mbrojtjes Zana Xhuka e Petrit Karabina, shefi i Shtabit të Përgjithshëm i FA-së gjeneral lejtnant Luan Hoxha, ambasdorë dhe atashe ushtarakë të akredituar në vendin tonë, deputetë të Kuvendit të Shqipërisë, gjeneralë dhe drejtues të tjerë të Ministrisë së Mbrojtjes dhe Shtabit të Përgjithshëm të FA-së, drejtues të komuniteteve fetare etj. Në ceremoni ishte i pranishëm edhe zv.komandanti i Komandës së Bashkuar të NATO-s në Napoli (JFC), gjeneral lejtnant P.T.C. Pearson. Fjalën e hapjes e mbajti komandanti i Shtabit të NATO-s në Tiranë gjeneral brigade Anastasios Rintis, i cili pasi përshëndeti të pranishmit në ceremoni, u ndal në rolin dhe kontributin e Shtabit të NATO-s në Shqipëri, si një strukturë e rëndësishme që ka shërbyer dhe shërben për asistimin e Shqipërisë dhe të Forcave të saj të Armatosura në rrugën drejt NATO-s. Ai nënvizoi se reformat e mbrojtjes në Shqipëri janë në rrugë të mbarë dhe se struktura e re e FA Shqiptare ka arritur tashmë rezultate të mira. Më pas fjalën e mori ministri i Mbrojtjes Gazmend Oketa. “Sot për mua është dita e parë e punës si Ministër i Mbrojtjes i Republikës së Shqipërisë dhe si e tillë ajo është edhe një ditë e veçantë për mua”, - u shpreh që në fillim të fjalës së tij Ministri Oketa. Me këtë rast, vijoi më tej ai, ndjehem i keqardhur për ngjarjen tragjike që ndodhi dy javë më parë në Gërdec, ku humbën jetën 24 vetë, u plagosën shumë të tjerë dhe u shkatërruan një numër i madh shtëpish dhe pasurish të banorëve të asaj zone. Në këtë ditë të vështirë për ne, theksoi ai, kemi patur pranë edhe ndihmën e strukturave të Shtabit të NATO-s në Tiranë dhe të komandantit të tij, gjeneral brigade Rintis, ndihmë e cila u shndërrua në një pjesë të pandarë të përpjekjeve të Forcave tona të Armatosura për të përballuar pasojat e tragjedisë së Gërdecit. Më poshtë, ministri i Mbrojtjes Oketa vlerësoi rolin aktiv këshillues të gjeneral Rintis, e falënderoi atë për bashkëpunimin dhe ndihmën e vyer që ka dhënë për reformimin e strukturave tona ushtarake dhe përafrimin gjithnjë e më shumë të tyre me strukturat e NATO-s. Ne ndjehemi shumë pranë anëtarësimit në NATO, u shpreh ai duke iu drejtuar gjeneral Rintis, falë edhe ndihmës tuaj dhe të Shtabit të NATO-s në Tiranë. Ministri Oketa i uroi mirëseardhjen komandantit të ri të Shtabit të NATO-s në Tiranë, gjeneral brigade Vasil Dimitrov dhe shprehu besimin se bashkëpunimi midis Ministrisë së Mbrojtjes dhe Shtabit të NATO-s do të forcohet më shumë në interes të integrimit të plotë të Shqipërisë në NATO.
“Është një nder për mua, - e nisi përshëndetjen e tij në këtë ceremoni Kryeministri Sali Berisha, - të shpreh falenderimin dhe mirënjohjen për gjeneral Rintis, për ekipin tuaj, për komandën e Shtabit të NATO-s, për ndihmën e çmuar dhe kontributin e madh që keni dhënë gjatë këtij viti, si vit përcaktues për marrjen e ftesës nga Shqipëria për anëtarësim në NATO”. Siç e dini, vazhdoi më tej Kryeministri Berisha, anëtarësimi në NATO është projekti që shqiptarët e mbështesin më shumë se çdo komb tjetër. Kjo sepse kombi ynë është kombi që ka vuajtur më shumë për të ardhmen. Shqiptarët e duan kaq shumë NATO-n sepse tek kjo Aleancë shohin sigurinë më të madhe të tyre. Në rrugën tonë drejt NATO-s, vazhdoi më tej në fjalën e tij Kryeministri Berisha, kemi patur ndihmën e pakursyer të Komandës së Shtabit të NATO-s në Tiranë, të Komandës së Bashkuar të NATO-s në Napoli, si dhe të gjithë strukturave të tjera të Aleancës së Atlantikut të Veriut. Zoti Berisha shprehu mirënjohjen e thellë për FA, për oficerët, nënoficerët dhe ushtarët e saj dhe i siguroi ata se shqiptarët u janë shumë mirënjohës atyre për kontributin që kanë dhënë për integrimin e Shqipërisë në NATO. Ai vlerësoi sidomos kontributin e strukturave të FA që janë angazhuar për përballimin dhe kapërcimin e pasojave që shkaktoi tragjedia e Gërdecit. “Me kurajën, guximin, trimërinë dhe gjakftohtësinë e tyre, - theksoi ai, - ata kanë operuar me shpejtësi fill pas tragjedisë, duke rrezikuar edhe jetën e tyre për të shpëtuar me dhjetra e qindra të plagosur, duke dëshmuar edhe njëherë sensin e vetëmohimit, por edhe të aftësive të tyre të larta për të ndërmarrë operacione të kërkim-shpëtimit të kësaj shkalle”. Në fund Kryeministri Berisha i uroi gjeneral brigade Anastasios Rintis suksese në detyra të tjera, ndërsa gjeneral brigade Vasil Dimitrov i shprehu sigurinë e qeverisë shqiptare, të Ministrisë së Mbrojtjes dhe të FA për të bashkëpunuar ngushtësisht dhe për të konsoliduar më shumë reformat dhe standardet e NATO-s. Në ceremoni përshëndeti edhe shefi i Shtabit të Përgjithshëm i FA-së gjeneral lejtnant Luan Hoxha dhe zv.komandanti i Komandës së Bashkuar të NATO-s në Napoli (JFC), gjeneral lejtnant P.T.C. Pearson. Ministri i Mbrojtjes Gazmend Oketa i dorëzoi gjeneral brigade Anastasios Rintis medaljen “Për Shërbime të Shquara”. Gjithashtu gjeneral Rintisit iu dorëzua medalje edhe nga shefi i Shtabit të Përgjithshëm i FA-së gjeneral lejtnant Luan Hoxha dhe nga zv.komandanti i Komandës së Bashkuar të NATO-s në Napoli (JFC), gjeneral lejtnant P.T.C. Pearson.

Nisen kontigjentet paqeruajtëse në Afganistan dhe në Irak

Më 10 mars 2008, në aeroportin ushtarak të Rinasit u zhvillua ceremonia e përcjelljes së Kontigjenetit të 12-të në Afganistan dhe Kontigjenetit të 11-të në Irak. Në përcjelljen e trupave paqeruajtëse merrnin pjesë Kryeministri Sali Berisha, ministri i Mbrojtjes, shefi i Shtabit të Përgjithshëm i FA-së, zv.ministrat e Mbrojtjes, atashe ushtarakë të akredituar në vendin tonë, prindër dhe të afërm të misionarëve paqeruajtës etj. I pranishëm në ceremoni ishte edhe ambasadori amerikan në Tiranë.
Kontigjenti i 11-të i Irakut ka në përbërjen e tij 120 oficerë, nënoficerë dhe ushtarë profesionistë dhe shkon për të zëvendësuar kontingjentin paraardhës, duke vazhduar misionin në qytetin e Mosulit, në përbërje të forcave amerikane që janë të angazhuara për ruajtjen e paqes në këtë zonë të largët, në veri të Irakut. Ndërsa Kontigjenti i 12-të i Afganistanit, përbëhet nga 22 ushtarakë (oficerë, nënoficerë dhe ushtarë profesionistë) dhe kanë si detyrë kryesore ruajtjen dhe kontrollin e aeroportit të Kabulit.
Kryeministri Sali Berisha, duke iu drejtuar trupave paqeruajtëse që nisen për në mision në Irak dhe në Afganistan, theksoi se “dëshiroj të përshëndes përzemërsisht, të shpreh gëzimin dhe krenarinë time, të qeverisë shqiptare dhe mbarë popullit tonë në tërësi për ju dhe familjet tuaja, për misionin e madh për të cilin ju largoheni sot nga Shqipëria. Ky është një mision që mbush me krenari çdo shqiptar, ai është mision në ruajtje të paqes, në mbrojtje të vlerave të mëdha të lirisë në dy vende, në dy kombe mike, të cilët u ndanë nga regjime teokratike dhe terroriste dhe tani duan të ndërtojnë lirinë, demokracinë dhe vlerat e saj, në Afganistan dhe në Irak”.
Ju shkoni në këto vende, ka vijuar më tej Kryeministri Berisha, për të zëvëndësuar kontigjentet e mëparshme, pra shkoni në konsolidim të një tradite të shkëlqyer që FA të Shqipërisë, në bashkëpunim me FA Amerikane dhe me ato të Turqisë, kanë krijuar gjatë këtyre viteve, të një përvojë të madhe që ju tashmë keni fituar me punën tuaj, duke fituar edhe dashurinë dhe respektin e tyre. Duke nënvizuar kontributin e trupave tona paqeruajtëse, Kryeministri Berisha u shpreh se, ju jeni shndërruar në ambasadorë të shkëlqyer të këtij vendi dhe keni luajtur një rol jashtëzakonisht të rëndësishëm në përpjekjet e Shqipërisë për t’u integruar në strukturat euroatlantike. Qeveria Shqiptare do të mbështesë ju dhe familjet tuaja për gjithçka bëni ju në emër të lirisë dhe paqes. FA brenda vitit 2010 do të jenë tërësisht profesioniste dhe të afta për të ndërvepruar me forcat e NATO-s. “Ju uroj faqebardhë në misionin tuaj, po kështu edhe familjet tuaja dhe kur të ktheheni në atdhe ta gjeni Shqipërinë të anëtarësuar në NATO”, ka përfunduar përshëndetjen e tij Kryeministri Berisha.
Në ceremoni përshëndeti edhe ambasadori Amerikan në Tiranë John Withers II.

Takimi i 6-të i Grupit të Punës për Projektin SEEDIRET

Më 13 mars 2008, në kuadrin e kryesimit nga vendi ynë të projektit SEEDIRET (Bashkëpunimi i Europës Juglindore në fushën e Industrisë, Kërkimit dhe Teknologjisë së Mbrojtjes), u zhvillua Konferenca Rajonale dhe Takimi i 6-të i Grupit të Punës për Bashkëpunimin e Evropës Juglindore në fushën e industrisë, kërkimit dhe teknologjisë së mbrojtjes. Ky aktivitet i rëndësishëm u organizua nga Sekretariati Shqiptar i SEDM-it, pranë Ministrisë së Mbrojtjes dhe morën pjesë përfaqësues nga vendet anëtare të SEDM-it dhe vendet vëzhguese, nga vendet pjesëmarrëse në projektin e SEEDIRET-it: Shqipëria, Bullgaria, Kroacia, Greqia, Maqedonia, Rumania, Italia dhe Turqia, si edhe të ftuar nga Zyra e NATO-s në Tiranë, nga OSBE, AMAE etj.
Qëllim kryesor i këtij takimi ishte forcimi i mëtejshëm i bashkëpunimit dhe shkëmbimi i përvojës së vendeve të SEDM-it në fushën e industrisë, teknologjisë ushtarake dhe shkatërrimit të municioneve të tepërta; promovimi i arritjeve të vendit tonë në këtë fushë, por edhe i kontributit që ka dhënë ky proces në rritjen e sigurisë dhe bashkëpunimit në rajonin e Europës Juglindore e përtej saj. Takimin e përshëndeti zv.ministri i Mbrojtjes Petrit Karabina, i cili theksoi se procesi i SEDM-it, nëpërmjet projekteve të ndryshme dhe rreth 50-70 aktiviteteve në vit që zhillohen, përbën tashmë një instrument të përdorur me mjaft efikasitet, por edhe një thesar të bashkëpunimit të suksesshëm të vendeve të SEDM-it dhe forcimit të frymës së mirëbesimit. Ky takim, theksoi më tej zoti Karabina, është një mundësi e mirë për vendet pjesëmarrëse për të vlerësuar statusin aktual të projektit, çështjet e mbetura pezull dhe propozuar zgjidhjet e duhura për të ardhmen. Më pas, punimet vazhduan me diskutime dhe shkëmbime përvojash nga përfaqësuesit e vendeve pjesëmarrës në këtë konferencë. Në fokus të diskutimeve u përfshinë probleme të rëndësishme që lidhen me shkëmbimin e informacionit, evidentimin e angazhimeve dhe arritjeve të projektit në fushën e industrisë, kërkimit dhe teknologjisë së Mbrojtjes; diskutimi i propozimeve dhe programit për të ardhmen e tij, në funksion të përmbushjes së qëllimit, për një rajon më të sigurtë etj.

Konferenca Planizuese për stërvitjen “Combined Endeavor 2008”

Nga data 4 deri më 7 mars 2008 u zhvillua konferenca e fundit e planizimit të stërvitjes “Combined Endeavor 2008”. Kjo stërvitje është e përvitshme dhe zhvillohet në frymën e Partneritetit për Paqe, nën drejtimin e Komandës Amerikane në Europë. Në këtë konferencë morën pjesë 240 vetë nga 42 vende anëtare të NATO-s, të PfP-së, NATO-s dhe SEEBRIG-ut. Procesi i planizimit të saj është shtrirë në një periudhë gati një vjeçare dhe përfshinë katër konferenca dhe dy javë stërvitje në terren. Konferencën e përshëndeti zv.ministri i Mbrojtjes Petrit Karabina, i cili evidencoi rëndësinë e stërvitjes “Combined Endeavor 2008”, si një stërvitje shumëkombëshe për ndërlidhjen që tashmë ka fituar përvojën e saj disa vjeçare, për vlerat që ajo krijon në fushën e bashkëveprimit midis pjesëmarrësve etj. Më tej, zv.ministri Karabina foli për progresin e bërë nga Forcat tona të Armatosura, për transformimin dhe modernizimin e tyre, si dhe për angazhimin e madh të tyre dhe të të gjithë strukturave të tjera të vendit tonë për të merituar ftesën për anëtarësim në NATO në samitin e Bukureshtit, që do të mbahet në fillim të prillit. Ai shprehu bindjen se, tashmë, pas përfundimit të përgatitjeve planizuese, stërvitja “Combined Endeavor 2008” do të realizohet me sukses në terren.
Stërvitja “Combined Endeavor 2008” ka si objekt testimin e ndërveprimit të sistemeve të komunikimit dhe të informacionit të vendeve pjesëmarrëse. Ajo vlerësohet si një nga veprimtaritë kryesore të demonstrimit, realizimit dhe përhapjes së koncepteve të ndërveprimit të sistemeve të komunikimit dhe të informacionit. Kjo stërvitje është rritur nga viti në vit. Në vitin 1995 morëm pjesë 10 vende, ndërsa në vitin 2007 numri i tyre arriti në 42 dhe po kaq vende janë deklaruar për vitin 2008.
Forcat tona të Armatosura kanë marrë pjesë për herë të parë në stërvitjen “Combined Endeavor” në vitin 1999 dhe që nga ajo kohë kanë synuar që të kenë një rol aktiv, jo vetëm duke qenë pjesë e saj, por edhe duke marrë mbi vete përgjegjësi për procesin e planizimit të stërvitjes. Edhe rezultatet e testimeve të arritura në stërvitje dhe niveli i paraqitjes së efektivit tonë ka qenë në parametra të njëjtë me atë të ekipeve të vendeve të tjera. Stërvitja “Combined Endeavor 2008” do të zhillohet në muajin maj në Gjermani dhe Kroaci.

Zv.ministri Petrit Karabina priti ekipin e UNDAC të OKB-së

Më datë 21.03.2008, zv.ministri i Mbrojtjes Petrit Karabina priti në një takim delegacionin e OKB UNDAC (ekipi i vlerësimit dhe koordinimit të dëmeve i OKB). Delegacioni i OKB-s përbëhej nga ekspertë të fushave të ndryshme për vlerësimin e dëmtimeve në fatkeqësitë e ndryshme. UNDAC është një mekanizëm i specializuar i OKB-s për të bërë vlerësime të shpejta të dëmtimeve në zonat e katastrofave, përcaktimin e prioriteteve të ndihmës për autoritetet kombëtare, për të planifikuar dhe koordinuar ndihmën dhe mbështetjen ndërkombëtare në raste të tilla. Zoti Petrit Karabina, krahas falenderimit që bëri për gatishmërinë e treguar, kërkoi mundësinë e mbështetjes me materiale të ndryshme EOD, në interes të veprimeve që po kryhen në terren nga ekipet e pastrimit të zonës ku ndodhi ngjarja e Gërdecit nga predhat e municionet e paplasura. Gjithashtu u kërkua, që të asistohemi në terma afatmesëm e afatgjatë për një vlerësim të situatës së municioneve në të gjithë territorin e Republikës së Shqipërisë. Kryetari i ekipit të OKB UNDAC, shprehu ngushëllimet për familjet e viktimave dhe premtoi se do të punonin për realizmin e kërkesave të bëra. Ekipi do të qëndrojë dy javë në vendin tonë. Prej tyre u kërkua leje dhe shoqërim për të hyrë në zonën e fatkeqësisë dhe marrjen e mostrave të dheut në zonën e shpërthimit. Zoti Karabina u shpreh se nga ana e Ministrisë së Mbrojtjes ekipi i OKB-s do të ketë gjithë mbështetjen e nevojshme dhe kërkoi që të shkëmbenin informacionin në lidhje me rezultatet nga zona e shpërthimit.