|
Përshpejtimi i reformave, kryefjala e ditës
“Procesi i reformave do të vazhdojë pa ndërprerje duke synuar arritjen e standardeve të NATO-s. Përshpejtimi i tyre është kryefjala e ditës. “Ky është mesazhi i shefit të Shtabit të Përgjithshëm gjeneral brigade Maksim Malaj, i cili nëpërmjet një interviste për revistën “Mbrojtja” shpalos vizionin e tij për prioritetet aktuale në përmbushje të objektivave, që kanë Forcat e Armatosura në stadin aktual. Rritja e shkallës së operacionalitetit dhe e cilësisë së përgatitjes, njëherazi me zgjerimin e kontigjneteve paqeruajtëse, për kreun e ri të shtatmadhorisë, janë detyrat kryesore për tërë nivelet e strukturave ushtarake. Angazhimi për krijimin e një ushtrie më të vogël në numër, por më cilësore e efektive në shkallën e reagimit, sipas gjeneral Malajt do të jetë një nga përparësitë e reformës, ndërkohë që kompletimi hap pas hapi i Forcave të Armatosura me ushtarë profesionist, sipas tij, do të përbëjë preokupacionin kryesor të tërë korpusit të ushtarakëve. “Duhet të punojmë, u shpreh ai, që brenda vitit 2010, të kompletojmë tërë strukturat ushtarake me ushtarë profesionist, duke hequr njëherë e mirë shërbimin e detyrueshëm vullnetar në Forcat e Armatosura”. I pyetur nëse ka patur një lloj ngecje në procesin e reformimit të ushtrisë, gjeneral Maksim Malaj shpjegoi se, reformimi për transformimin e Forcave të Armatosura ka qenë e mbetet një proces i pakthyeshëm në të cilin tërë korpusi i ushtarakëve ka autorësinë dhe kontributet e veta. “Stadi aktual, vazhdoi ai, dikton një ritëm të ri për të përshpejtuar tërësinë e angazhimeve në përmbushje të objektivit final për anëtarësimin e plotë të Shqipërisë në NATO...”.
|
