Zv.sekretari i Departamentit të Mbrojtjes të SHBA Gordon England, në Tiranë

Në mëngjesin e 30 shtatorit, Zv.sekretari England u prit me ceremoni dhe truprojë nderi nga ministri i Mbrojtjes z. Gazmend Oketa. Pas kalimit në revistë nderi dhe ekzekutimit të Himnit Kombëtar të SHBA-së dhe të Shqipërisë, dy personalitetet e larta zhvilluan një takim të veçantë. Në këtë takim morën pjesë edhe zv.ministrat e Mbrojtjes Zana Zhuka dhe Petrit Karabina, shefi i Shtabit të Përgjithshëm i FA-së gjeneral brigade Maksim Malaj, ambasadori amerikan në Tiranë Withers, si dhe anëtarë të tjerë të delegacionit amerikan.
Pas këtij takimi, u zhvillua një ceremoni për dekorimin e z. Hesham Islam, asistenti special për çështjet ndërkombëtare i Zv.sekretarit të Mbrojtjes të SHBA, të cilit iu akordua nga ministri i Mbrojtjes Oketa medalja, “Për Shërbime të Shquara” me motivacionin: “Për kontributin e dhënë për forcimin e bashkëpunimit bilateral në fushën e Mbrojtjes ndërmjet SHBA-ve dhe Republikës së Shqipërisë”.
Më pas, z. Gordon England bëri shënime në Librin e Përshtypjeve të Ministrisë së Mbrojtjes.
Pas këtyre ceremonive, Zv.sekretari England dhe Ministri Oketa dhanë për mediat deklaratat respektive.
“Dëshiroj të shpreh kënaqësinë për vizitën e Zv.sekretarit të Mbrojtjes të SHBA, zotit Gordon England, - tha në fjalën e tij Z. Oketa, - i cili është jo vetëm një mik personal, por edhe një mik i veçantë i Shqipërisë, me një kontribut të çmuar e mbështetje të pakursyer në përpjekjet e reformat e ndërmarra në rrugën tonë drejt anëtarësimit të plotë në NATO. Faleminderit zoti England”.
Duke përfituar gjithashtu nga ky rast, - vijoi më tej ministri Oketa, ashtu si gjithë shqiptarët, shpreh në emër të Forcave të Armatosura të Shqipërisë falenderimet për Presidentin Bush, Senatin dhe Qeverinë amerikane, për vendimin e rëndësishëm të ratifkimit të protokollit për anëtarësim në NATO.
“Gjatë takimit, - nënvizoi ministri ynë i Mbrojtjes, - vlerësuam frymën e shkëlqyer të bashkëpunimit, si dhe rikonfirmuam dëshirën dhe vullnetin për të vazhduar në të ardhmen përpjekjet e përbashkëta në përgatitjen dhe modernizimin e Forcave tona të Armatosura. Evidentuam gjithashtu klimën pozitive në rajonin tonë, e cila po i kontribuon paqes e sigurisë, një imazhi të ri të rajonit, ku Shqipëria ka kontributin e saj në këtë klimë. E sigurova zotin England, se ashtu si më parë edhe në të ardhmen SHBA do të gjejnë tek Shqipëria dhe Forcat e saj të Armatosura, aleatin e sigurt në përpjekjet për demokraci, paqe e siguri globale. Shqipëria do të vazhdojë rrugën e reformave me bindjen dhe besimin se, Samiti i ardhshëm i NATO-s do të shënojë për ne anëtarësimin e plotë në NATO.
Dhe njëherë, faleminderit z. England”.
Zv.sekretari amerikan i Mbrojtjes England theksoi: “Është një kënaqësi e veçantë që ndodhem në Shqipëri, në këtë vend të bukur. Dëshiroj të falenderoj, së pari, ministrin Oketa dhe bashkëshorten e tij për mikpritjen e ngrohtë që na kanë ofruar mua dhe bashkëshortes time, që kur mbërritëm dje pasdite në Tiranë”.
“SHBA dhe Shqipëria kanë qenë partnerë së bashku për shumë vite dhe ne ndajmë së bashku angazhimin për paqe, siguri dhe demokraci në mbarë rajonin. Sot FA shqiptare mbështesin një sërë operacionesh të Kombeve të Bashkuara dhe gjithashtu luajnë një rol të rëndësishëm në misionet në Irak dhe në Afganistan. Amerika shpreh mirënjohjen e saj të thellë për sakrificat e shumta dhe kontributet e rëndësishme, që vendi juaj ka dhënë. SHBA ndajnë me ju së bashku objektivin për të çuar më përpara paqen, sigurinë dhe begatinë në rajon. Në prillin që shkoi, Shqipëria mori ftesën zyrtare për t’u anëtarësuar në NATO dhe ne presim me dëshirë dhe hedhim sytë përpara drejt prillit të ardhshëm, drejt anëtarësimit të plotë të Shqipërisë në NATO.
Në këtë vizitë, dëshiroj gjithashtu të shpreh kënaqësinë time që Senati i SHBA ratifikoi protokollin e anëtarësimit të Shqipërisë në NATO, javën që shkoi. SHBA qëndrojnë fuqishëm në krah të Shqipërisë dhe presin me dëshirë që në vitet që vijnë të forcojnë edhe më tej lidhjet e miqësisë që bashkojnë dy vendet tona.
Dëshiroj të falenderoj ministrin Oketa për miqësinë e tij, profesionalizmin dhe kontributin e rëndësishëm në forcimin e mëtejshëm të marrëdhënieve ndërmjet dy vendeve tona dhe veçanërisht ndërmjet Ministrisë së Mbrojtjes të Shqipërisë dhe Departamentit të Mbrojtjes të SHBA-së. Ministri Oketa është bërë vërtet një mik i shtrenjtë për mua dhe dëshiroj ta falenderoj edhe njëherë për mikpritjen që më bëri gjatë vizitës në Shqipëri”.
Zv.sekretari England u prit në takime të veçanta edhe nga Kryeministri Sali Berisha dhe Presidenti i Republikës Bamir Topi. Gjithashtu, në Pallatin e Brigadave u organizua një ceremoni për dekorimin nga Presidenti i Republikës i Zv.sekretarit të Mbrojtjes të SHBA-së, Gordon England. Gjatë qëndrimit të tij në vendin tonë Zv.sekretari England bëri edhe disa vizita si në: Amfiteatrin dhe Muzeun Arkeologjik të Durrësit, në Muzeun Kombëtar në Tiranë dhe në Kalanë e Krujës.