Di Paola: Anëtarësimi i vendit tuaj në NATO,
në interes të Shqipërisë dhe të Aleancës

Ministri i Mbrojtjes Gazmend Oketa priti në një takim të veçantë kryetarin e Komitetit Ushtarak të NATO-s, admiralin Gianpaolo Di Paola. Ministri Oketa, pasi i uroi mirëseardhjen në vendin tonë admiralit Di Paola, i bëri të njohur atij përpjekjet dhe arritjet e shënuara nga Forcat tona të Armatosura, për realizimin e objektivave dhe të standardeve për anëtarësimin e plotë të vendit tonë në NATO. Ai vlerësoi marrjen e ftesës për anëtarësim në NATO, si një arritje shumë të rëndësishme: një arritje e përpjekjeve shumëvjeçare të Qeverisë shqiptare dhe bashkëpunimit midis forcave politike. "Anëtarësimi i Shqipërisë në NATO, theksoi ministri Oketa, është realizimi i objektivit më të rëndësishëm për ne. Ne jemi të bindur se, ky anëtarësim i shërben interesave tona kombëtare, konsolidon dhe rrit sigurinë dhe stabilitetin në rajon, por në të njëjtën kohë do të ketë një impakt tepër pozitiv për zhvillimin ekonomik dhe social të vendit tonë. Anëtarësimi, përbën fillimin e një faze të re të kalimit nga detyrimet si partnerë, në detyrimet si aleatë".Gjithashtu Ministri Oketa vlerësoi si një ngjarje të rëndësishme marrjen e ftesës edhe për Kroacinë, si një faktor i rëndësishëm për rritjen e stabilitetit në rajon. Të njëjtën gjë dëshirojmë edhe për Maqedoninë, vuri në dukje ministri i Mbrojtjes Oketa.
Duke iu referuar së ardhmes, ai theksoi se, jemi të vendosur për të ecur përpara për të finalizuar përpjekjet tona me anëtarësimin e plotë, në samitin e ardhshëm të Aleancës. Ministria e Mbrojtjes dhe Qeveria shqiptare janë të vendosur për të vazhduar reformat, pasi ato janë prioriteti ynë thelbësor, ka nënvizuar z. Oketa. Më tej, ai e informoi admiralin Di Paola për arritjet e Forcave të Armatosura; ecurinë e reformave; mbështetjen e vendit tonë në luftën kundër terrorizmit; pjesëmarrjet në misionet paqeruajtëse, etj.
Ministri i Mbrojtjes është ndalur së fundi edhe në prioritetin që ka shkatërrimi i municioneve të tepërta në vendin tonë dhe e informoi admiralin Di Paola për punën e bërë në këtë drejtim. Përsa i përket projektit të shkatërrimit të municioneve, z. Oketa vlerësoi sidomos rolin dhe ndihmën e dhënë nga NATO dhe vendet aleate. Admirali Di Paola, duke vlerësuar mikpritjen e rezervuar ndaj tij, theksoi rëndësinë e kësaj vizite. Ai vlerësoi momentin historik të marrjes së ftesës nga ana e Shqipërisë, si një ngjarje tepër të rëndësishme, gjë që tregon se, vendi juaj ka bërë hapa të mëdhenj e të dukshëm.
"Për të qenë anëtarë të NATO-s, ka vënë në dukje më tej ai, nuk është e lehtë, pasi nuk është vetëm çështje nderi, por edhe detyrimesh të mëdha: pjesëmarrje në misione paqeruajtëse; përmbushje e reformave; bashkëpunim me aleatët etj. Është e rëndësishme për ju si ministër, ka theksuar ai, që të tregoni forcën në realizimin e ideve tuaja".
Gjithashtu, admirali Di Paola tregoi interesim të veçantë për detajet e projektit të shkatërrimit të municioneve të tepërta.
Pas takimit me ministrin e Mbrojtjes, admiral Di Paola u prit nga shefi i Shtabit të Përgjithshëm gjeneral brigade Maksim Malaj.
Detajet e takimit, ata i bënë të ditur në konferencën e shtypit që dhanë për mediat e pranishme.
Duke shprehur nderin dhe kënaqësinë që pati, duke pritur një mik të shquar të vendit tonë, i cili e ka ndjekur për shumë vjet ecurinë e Forcave tona të Armatosura, gjeneral Malaj e njohu atë me ecurinë e reformave, si dhe me arritjen e standardeve për anëtarësimin e plotë në Aleancë.
Moment i rëndësishëm i këtij takimi ishte edhe diskutimi për Paketën e Re të Objektivave të Partneritetit, si një nga angazhimet më serioze kombëtare, si pikë referimi për ecurinë e mëtejshme të reformave.
Duke folur për planet e zgjerimit të përfaqësimit të misioneve tona në NATO dhe kontributin në personel në strukturat e integruara, gjeneral Malaj nënvizoi se, ndanin mendim të njëjtë me admiralin Di Paola, për zgjerimin e përfaqësimit të Forcave të Armatosura. Në fund të deklaratës së tij për shtyp, gjeneral brigade Maksim Malaj i shprehu mirënjohjen personale dhe të FA shqiptare, për interesimin e drejtpërdrejtë dhe mbështetjen e dhënë në procesin e anëtarësimit. Admirali Di Paola u shpreh se ishte i nderuar që vizitoi përsëri vendin tonë, por këtë herë si kryetar i Komitetit Ushtarak të NATO-s. Më tej ai theksoi se: "Anëtarësimi i vendit tuaj në NATO, nuk është vetëm në interes të Shqipërisë, por edhe në interes të Aleancës".
Ai vlerësoi kontributin e dhënë nga Shqipëria në kuadër të partneritetit me NATO-n, duke kontribuar drejtpërdrejt në misionet e drejtuara prej saj. Ai vuri theksin se, anëtarësimi në NATO kërkon shumë përgjegjësi dhe angazhim dhe tha se: "Unë jam i sigurt se, Shqipëria si anëtare e ardhshme e NATO-s do të vazhdojë të kontribuojë më shumë për aleancën".