intervistë kolonel Zihni Goxhaj, komandant i Qendrës së Personel-Rekrutimit

Sfida e rekrutimit: Në vitin 2010, FA vetëm me ushtarë profesionistë

Intervistoi: Afrim Imaj

"Brenda vitit 2010 i gjithë kontigjenti i ushtarëve të FA do të jetë profesionist, duke i dhënë fund rekrutimit të ushtarëve të shërbimit të detyrueshëm". Kolonel Zihni Goxhaj, kreu i Qendrës së Personel-Rekrutimit të FA, në një intervistë me revistën "Mbrojtja", zbulon procedurat e standardizimit të strategjisë për kompletimin 100 përqind të FA me ushtarë profesionistë. "Kalimi hap pas hapi te Forca profesioniste, shton Goxhaj, do të vazhdojë njëherazi me procedurat e rekrutimit të ushtarëve të shërbimit të detyrueshëm". Përgatitja e këtyre të fundit me kualitetet dhe aftësitë e duhura sipas misionit dhe detyrave të reparteve dhe njësive, mbetet sfida e investimit për kontigjentin profesionist që do të rekrutohet rishtaz në shërbimin ushtarak. Në vijim, kolonel Goxhaj flet për problematikën me të cilën janë duke u ballafaquar së fundi institucionet e rekrutimit pranë pushtetit vendor...

Zoti kolonel! Fillimisht diçka për ecurinë e rekrutimit në fazën e tretë të mobilizimit të ushtarëve të shërbimit të detyrueshëm ushtrak aktiv, e cila është dhe e fundit për këtë vit...
Qendra e Personel-Rekrutimit ka planëzuar dhe po ndjek me përgjegjësi masat e marra nga personeli drejtues i Qendrave të Rekrutim-Mobilizimit për bashkërendimin e punës me organet e pushtetit lokal, për realizimin e rekrutimit të ushtarëve të shërbimit të detyrueshëm ushtarak aktiv për fazën e tretë shtator 2008, në bazë të ligjit nr. 9047 datë 10.07.2003, "Për shërbimin ushtarak në RSH", urdhrave të MM e SHP. Bazuar në urdhrin e ministrit të Mbrojtjes nr. 8 datë 14.01.2008, "Për kohën e thirrjes, lirimit, përzgjedhjes dhe mënyrën e organizimit të rekrutim-mobilizim të shtetasve" dhe detyrave të vëna nga Komanda Mbështetëse për ndjekjen e masave në lidhje me rekrutimin e shtetasve për plotësimin e nevojave të Forcave të Armatosura me rekrutë, nga Qendrat e Rekrutim-Mobilizimit po punohet intensivisht. Kjo fazë rekrutimi do të plotësojë nevojat e FA të RSH për kompletimin e Brigadës së Stërvitjes, Bunavi nga data 5 deri më 9 shtator, të Komandës së Forcës së Bashkuar nga data 10 deri 12 shtator dhe për Komandën Mbështetëse nga data 5 deri në 8 shtator 2008.
Deri tani, me gjithë vështirësitë e ndeshura, procesi i rekrutimit të shtetasve ka ecur mirë. Një sasi e konsiderueshme e kontigjenteve janë siguruar dhe me masat e marra deri në përfundim të periudhës së mobilizimit, ky rezultat do të jetë në rritje dhe do të plotësohen të gjitha nevojat e Forcave të Armatosura me rekrutë. Nga raportimet e bëra, nga ndjekja e situatës çdo ditë, rezulton se me shumë efektivitet është puna e organizuar nga Qendra e Rekrutim-Mobilizimit të Tiranës,Vlorës,Gjirokastrës, Fierit, etj., ku realizimi i detyrave është mirë.
Aktualisht, FA kanë dhe ushtarë të shërbimit të detyrueshëm ushtarak aktiv dhe ushtarë me pagesë, profesionistë. Si punohet për arritjen e objektivit që në 2010 FA të jenë tërësisht profesioniste?
Detyrë e vazhdueshme për QPR e QRM-të, në bashkëpunim dhe me organet e pushtetit lokal është zbatimi në të njëjtën kohë dhe i procedurave për rekrutimin e ushtarëve profesionistë. Nisur nga ajo që shërbimi ushtarak në Republikën e Shqipërisë është i detyrueshëm e vullnetar dhe kryhet nga shtetasit në moshën 19-27 vjeç e 19-30 vjeç, paralelisht i kushtohet rëndësi zhvillimit të një fushate marketingu e sensibilizimi, për të tërhequr sa më shumë vullnetarë për ushtarët profesionistë. Ajo konsiderohet si një mundësi zgjedhje për t'u bashkuar në FA të RSH, e cila të siguron mjaft shanse për punë e profesion, mundësi kualifikimi brenda e jashtë vendit, etj.
Me daljen e udhëzimit të MM nr. 2 dt.12.02.2008, "Për procedurat e rekrutimit të ushtarëve profesionistë në FA të RSH", në muajin mars 2008, Qendra e Personel- Rekrutimit filloi nga veprimtaria e saj për rekrutimin e vullnetarëve për t'u bërë ushtarë profesionistë. Duke zbatuar me rigorozitet të gjitha procedurat ligjore të përcaktuara në aktet ligjore e nënligjore, me një marketing disi të pakët për vetë mundësitë e burimet që ajo disponon, ne kemi mundur të realizojmë detyrën tonë për tërheqjen e të rinjve, për testimin e kontrollin dhe sigurimin e kontigjenteve të duhura për FA, për ushtarë profesionistë. Kalimi nga sistemi i shërbimit të detyrueshëm ushtarak në profesionist në FA do të jetë drejtimi kryesor i punës me synim minimizimin në maksimum të USHDUA dhe rritjen me rreth 3500 Pr.II për vitin 2008, 4250 Pr.II për vitin 2009, 5000 Pr.II për vitin 2010, 5250 Pr.II për vitin 2015 dhe rreth 5500 Pr.II për vitin 2020.
Në këtë aspekt përgjegjësitë e QPR për ushtarët profesionistë deri në vitin 2010 janë:
-Rekrutimi i personelit profesionist në bazë të planifikimit të J1.
-Rekrutim i ushtarëve të shërbimit të detyrueshëm.
-Marketing për personelin profesionistë.
Objektivi madhor i FA është që në vitin 2010 të kalojë tërësisht profesioniste, të hiqet plotësisht shërbimi i detyrueshëm ushtarak aktiv dhe plotësimi i nevojave të FA-së të realizohet njëqind për qind me ushtarë vullnetarë profesionistë. Por ky objektiv, pra, kalimi tërësisht profesionist ka të bëjë jo vetëm me zëvendësimin e e shërbimit të detyrueshëm ushtarak aktiv me atë vullnetar, por do të përfshijë dije e aftësi të veçanta për kryerjen e një detyre të caktuar, që kërkon trajnim e stërvitje të përparuar, bazuar në standardet e vendeve të NATO-s. E parë në këtë këndvështrim Qendra e Personel-Rekrutimit ka për mision:
-Ekzekutimin e planeve dhe programeve të rekrutimit të personelit nëpërmjet zbatimit rigoroz të rregullave te kontroll-pranimit dhe të ndjekjes së karrierës së tyre.
-Menaxhimin e të dhënave të ecurisë në karrierë nëpërmjet evidentimit, përpunimit, automatizimit dhe vënies së tyre në dispozicion të strukturave, që u nevojiten dhe që përcaktohen me akte ligjore dhe nënligjore
Aktualisht, FA të RSH ka një sistem miks, të përzier rekrutimi dhe QPR kryen detyra për rekrutimin e ushtarit të shërbimit të detyrueshëm aktiv dhe rekrutim të vullnetarëve për t'u bërë profesionistë.
Profesionalizmi do të përfshijë drejtimin kryesor të punës sonë dhe të gjithë FA për periudhën deri në vitin 2010.
Çfarë procedurash ndiqni me të rinjtë, që paraqiten për t'u bërë ushtarë profesionistë?
Aktualisht, për kontigjentet e paraqitura, pasi kemi kontrolluar dokumentacionin e nevojshëm bazuar në ligj, zhvillohet testim fizik dhe psikologjik. Vlerësimet e rezultatet për çdo kandidat afishohen në vend të dukshëm në ambjentet e QPR. Për ata që shpallen fitues përgatiten shkresat përcjellëse me emrat dhe dokumentat për Komandën e Forcës së Bashkuar, Komandën e Doktrinës e Stërvitjes, Komandën Mbështetëse për të vazhduar procedurën e mëtejshme, për titullim ushtar profesionist dhe emërim në detyrë. Marrin pjesë në testim përfaqësues nga kompania amerikane CUBIC, J1, KFB, KM, KDS, QRM-të. Për zhvillimin e testit fizik kemi koordinuar punën dhe kemi bashkëpunuar me personelin e përgatitjes fizike të UU "Skënderbej", të cilët e kanë drejtuar dhe ndjekur të gjithë procesin e testit fizik.
Eshtë e domosdoshme ndërhyrja e J1, Drejtorisë së Personel-Organizimit për të shpejtuar procedurat e emërimit në detyra nga komandat e forcave të kandidatëve për ushtarë profesionistë të testuar e pranuar nga QPR.
Nga analiza që i bëjmë punës sonë, deri tani ne konstatojmë se, Qendra e Personel-Rekrutimit si strukturë përgjegjëse për rekrutimin e ushtarit profesionist duhet të bashkëveprojmë më tepër me Drejtorinë e Burimeve Njerëzore, Arsimimit, Marrëdhënieve me Publikun, Drejtorinë e Personel-Organizimit, Drejtorinë e Marrëdhënive Civilo-Ushtarake dhe Informimit. Megjithëse koha ka qenë e pakët që nga fillimi i aktivitetit, QPR duhet të plotësohet me personel, pajisje e fonde, që të organizojë më mirë marketing dhe promovimin për rekrutimin e ushtarit profesionist në bashkëveprim me komandat e reparteve, shkollat, mediat, etj. Gjithashtu drejtoritë bashkëpunuese dhe strukturat e tjera si: Komanda Mbështetëse, Komanda e Forcës së Bashkuar, Komanda e Doktrinës e Stërvitjes të mbështesin QPR në kryerjen e marketingut.
Cilat janë kontigjentet që ju përzgjidhni për ushtarë profesionistë?
Përzgjedhja dhe rekrutimi i ushtarëve profesionistë është sfida kryesore e punës së personelit të QPR për rritjen e cilësisë së rekrutimit, me qëllimin e arritjes së objektivit për një forcë tërësisht profesioniste deri në vitin 2010. Kontigjentet që përzgjedhim ne për t'u bërë ushtarë profesionistë janë:
Kontigjentet që kanë përfunduar më parë shërbimin e detyrueshëm ushtarak.
Kontigjentet e ushtarëve që vazhdojnë shërbimin e detyrueshëm ushtarak dhe kanë kryer stërvitjen bazë në qendrat stërvitore, të cilët kanë bërë kërkesë për t'u bërë ushtarë profesionistë. Këto kontigjente pasi kanë nënëshkruar kontratën, ndërpresin SHDUA dhe titullohen ushtarë profesionistë.
Kontigjentet që kanë përfunduar arsimin universitar dhe kanë përfunduar stërvitjen bazë në Bunavi.
Shtetas që kanë mbushur moshën për t'u rekrutuar ushtarë aktivë dhe kanë dëshirë të jenë pjesë përbërëse e FA si ushtarë profesionistë.
Përgatitja profesionale e ushtarëve do të ishte padyshim sfida kryesore për krijimin e një force sa më profesioniste. Padyshim, përgatitja e tyre ka problematikën e vet, e cila do të varet nga cilësia e përzgjedhjes dhe rekrutimit, aftësive tona për të afruar profesionalizëm të lartë në përgatitjen e tyre; infrastruktura e stërvitjes; kushtet e jetesës dhe të punës etj.
Si prioritete për përgatitjen e ushtarëve profesionistë të jenë:
Kryerja e stërvitjes bazë në BrS Bazë, Bunavi.
Kurseve institucionale dhe funksionale.
Kualifikimet e ndryshme si brenda vendit ashtu dhe jashtë tij.
Kurse për specialitete të veçanta si: shoferë, manovratorë, mekanikë etj.