Anija “Iliria” mbërrin në portin e Durrësit

Në portin detar të Durrësit, me 5 shtator 2008, u zhvillua ceremonia e mbërritjes së anijes “Iliria”, e cila nisi lundrimin nga Holanda gati tri javë më parë. Në këtë aktivitet morën pjesë: Kryeministri Sali Berisha, ministri i Mbrojtjes Gazmend Oekta, ministri i Jashtëm Lulëzim Basha, ministri i Brendshëm Bujar Nishani, shefi i Shtabit të Përgjithshëm i FA-së gjeneral brigade Maksim Malaj, përfaqësues të Presidencës, autoritete të pushtetit vendor, si dhe gjeneralë e ushtarakë të lartë të Forcave të Armatosura. Ishin të pranishëm edhe ambasadori i Mbretërisë së Hollandës Sweder Van Voorst Tot Voorst, atashe ushtarakë dhe përfaqësues të misioneve të huaja ushtarake në vendin tonë etj.
“Dëshiroj ta nis këtë përshëndetje, - theksoi në fjalën e tij ministri Oketa, - me një urim për ekuipazhin e anijes, për Forcat Detare shqiptare dhe t’i uroj mirëseardhjen anijes “Iliria”, mbërritja e së cilës përbën një ngjarje të shënuar për Shqipërinë dhe Forcat e saj të Armatosura”. E nisur nga brigjet e Holandës, vijoi më tej ai, e ndërtuar me profesionalizëm në kantierin “DAMEN SHIPYARD”, financuar 65% nga buxheti i shtetit dhe 35% nga Qeveria holandeze në kuadër të projektit ORET, kjo anije do të përdoret nga oficerët dhe nënoficerët më të mirë të Forcës Detare shqiptare, do të përballojë rreziqet e sotme globale në det si: trafiqet e paligjshme, terrorizmin detar, shfrytëzimin e paligjshëm të pasurive detare, fatkeqësitë detare etj.
Duke folur për modernizimin e Forcave Detare, ministri Oketa u shpreh se, tashmë FD Shqiptare shkojnë drejt finalizimit të dy projekteve madhore në funksion të modernizimit të tyre: atij të ndërtimit të katër anijeve të Rojes Bregdetare, si dhe në sistemin e ri e modern të Vëzhgimit të Hapsirës Detare. Mjete të tjera detare, të tipeve të ndryshme janë planëzuar që të ndërtohen në vitet e ardhshme. Në këtë kontekst, ministri Oketa, në emër të Ministrisë së Mbrojtjes, shprehu falenderime për Qeverinë shqiptare për mbështetjen, që i ka dhënë kësaj ministrie dhe FA, si dhe siguroi se buxheti i akorduar, burimet dhe energjitë e kësaj ministrie do të jenë të gjitha në funksion të përmbushjes së detyrave kushtetuese, në funksion të modernizimit, në funksion të reformave dhe në funksion të objektivit madhor, anëtarësimit në NATO.
Kryeministri Berisha e cilësoi mbërritjen e anijes “Iliria” në ujrat tona, si një ngjarje shumë të rëndësishme jo vetëm për FA, por për të gjithë vendin, e cila, tha ai, shënon edhe fillimin e një procesi të madh për transformimin e modernizimin e Forcave Detare dhe të FA.
Kryeministri Berisha theksoi se: “Teknologjitë e vjetra do të lihen prapa, sepse ato jo vetëm që nuk shërbejnë më, por edhe ndëshkojnë ata që i përdorin. Prandaj dhe ne do të punojmë për të siguruar mjete dhe teknologji të re për FA, për t’i kthyer në një forcë tërësisht profesioniste dhe të integruara në NATO”.
Të pranishmit në ceremoni i përshëndeti edhe drejtori ekzekutiv i kompanisë holandaze “Damen Shipyard”, z. Rene Berkvens.
Më pas, Kryeministri Berisha i dorëzoi Flamurin Kombëtar komandantit të anijes “Iliria”, lejtnant Blerim Hoxha, i cili, nën ritmet e Himnit Kombëtar e ngriti atë në majën e direkut të anijes.
Anija “Iliria” e tipit STAN Patrol Boat 4207 është anija e parë e klasit “Iliria”, në kuadër të Programit të Modernizimit për pajisjen e Forcës Detare. Ajo u ndërtua në kantierin e kompanisë “Damen Shipyard”, në Gorinchem të Hollandës. Në bazë të kontratës me këtë kompani, në kantierin detar të Pashalimanit do të vazhdojë puna për ndërtimin e tri anijeve të tjera për Brigadën tonë Detare. Ndërtimi i anijes “Iliria” u financua 65 % nga buxheti i shtetit dhe 35% nga Qeveria hollandeze në kuadër të projektit ORET. Kontrata për blerjen e katër anijeve patrulluese kap vlerën rreth 31 milion euro. Anijet e tjera që priten të ndërtohen gjatë viteve 2009-2011 do të quhen “Orik”, “Lissus” dhe “Butrinti” dhe do të rrisin në mënyrë të konsiderueshme kapacitetet operacionale të Forcave Detare dhe Rojës Bregdetare shqiptare për të përmbushur misionin e saj.

215 trupa paqeruajtëse komando nisen në Irak

Më 4 shtator 2008, në mjediset e Regjimentit Komando në Zall-Herr u zhvillua ceremonia e nisjes së Kontigjentit të 12-të Paqeruajtës në Mosul dhe të një kontigjenti shtesë në Bagdat të Irakut. Ishin të pranishëm Kryeministri i Shqipërisë Sali Berisha, ministri i Mbrojtjes Gazmend Oketa, shefi i Shtabit të Përgjithshëm i FA-së gjeneral brigade Maksim Malaj, zv.ambasadori i SHBA-së në Tiranë Stephen Cristina, atashe ushtarakë të akredituar në Tiranë, përfaqësues të Shtabit të NATO-s, të CUBIC, ODC-së, familjarë e të afërm të trupave paqeruajtëse etj.
Trupat e rreshtuar i përshëndeti ministri i Mbrojtjes Oketa. “Është vërtetë kënaqësi dhe krenari për mua të jem sot me ju, - e nisi fjalën e tij z. Oketa, - të takoj e përshëndes ushtarakët të cilët nisen në mision në Irak, në misionin e luftës kundër terrorizmit global, në misionin pjesë e së cilës Shqipëria është tashmë prej vitesh një kontribuese”. Kontigjenti i dymbëdhjetë dhe kompania shtesë me 95 ushtarakë, vijoi më tej ai, janë fakti dhe dëshmia se Forcat tona të Armatosura, ushtarakët shqiptarë tashmë janë realisht partnerë të denjë të NATO-s, partnerë të denjë të koalicionit antiterror të kryesuar nga SHBA-së, janë fakti dhe dëshmia më e mirë e kapaciteteve dhe aftësive tona. Me këtë rast, Ministri Oketa falenderoi qeverinë dhe ushtarakët amerikanë jo vetëm për mbështetjen e madhe që i kanë dhënë ushtarakëve tanë në mision, por edhe për ndihmesën dhënë Shqipërisë në rrugën drejt anëtarësimit në NATO
“Sot ju niseni me një mision të madh, për të mbrojtur lirinë e një kombi që ka vuajtur një diktaturë të egër”, - iu drejtua Kryeministri Berisha trupave tona paqeruajtëse. Prej 5 vitesh nga ky shesh, ushtarët shqiptarë janë nisur në misone paqe. Por dita e sotme është e veçantë, sepse trupat shqiptare jashtë vendit arrijnë numrin më të madh të kontigjentit paqeruajtës, në 400 vetë. Misioni juaj është shumë i rëndësishëm dhe delikat, por ju do ta përmbushni atë me dinjitet dhe me krenari”. Ai veçoi sidomos kontigjentin shtesë prej 95 ushtarakësh komando që do të shkojnë me mision në Bagdat, i cili përbën një mision të rëndësishëm dhe më të vështirë.
Kryeministri Berisha u shprehu mirënjohje dhe falenderime familjarëve dhe të afërmëve të paqeruajtësve për kontributin, që kanë dhënë dhe japin për forcimin e paqes në botë, por edhe për përshpejtimin e procesit të integrimit të vendit tonë në NATO, duke siguruar se Qeveria shqiptare do t’u qëndrojë kurdoherë pranë jo vetëm paqeruajtësve, por edhe familjeve të tyre.
Në ceremoni përshëndeti edhe zv.ambasadori i SHBA-së në Tiranë Stephen Cristina.

Filloi Kursi i Lartë i Sigurisë dhe Mbrojtjes

Në Akademinë e Mbrojtjes “Spiro Moisiu” u çel për të dytin vit radhazi Kursi i Lartë i Sigurisë dhe Mbrojtjes. Fjalën e rastit e mbajti drejtori i këtij kursi kolonel Jeronim Baze. Në fjalën e tij zv.ministri i Mbrojtjes Petrit Karabina, duke iu drejtuar pjesëmarrësve në këtë kurs, u shpreh se, Ministria e Mbrojtjes ju konsideron juve trurin e Forcave të Armatosura, sepse ju jeni ata që do të prodhoni idetë e së ardhmes në fushën e sigurisë dhe të mbrojtjes. “Zëri juaj, vijoi më tej ai, do të jetë i fuqishëm, sepse çdo shqiptar i ka kthyer sytë nga Forcat tona të Armatosura”. Më pas, zoti Karabina foli për progresin e bërë nga strukturat tona ushtarake në procesin e reformimit dhe të modernizimit, si dhe për arritjen e standardeve dhe theksoi se, edhe pak muaj na ndajnë nga anëtarësimi i plotë i Shqipërisë në NATO, ç’ka do të përbëjë realizimin e një objektivi madhor dhe të një aspirate të madhe.
Një përshëndetje të veçantë bëri edhe presidenti i Kolegjit të Mbrojtjes së Republikës së Italisë (CASD), admirali Marcantonio Trevisanti.
Kursi i Lartë i Sigurisë dhe Mbrojtjes zhvillohet në gjuhën angleze, me program tashmë të standardizuar në fushat e sigurisë, mbrojtjes, çështjeve rajonale e ndërkombëtare, të mjedisit të sigurisë, të bashkëpunimit e më gjerë. Pjesëmarrësit në këtë kurs janë nga Ministria e Mbrojtjes, Shtabi i Përgjithshëm, Parlamenti, Ministria e Financave, si dhe nga shtetet fqinjë si Italia, Mali i Zi, Bosnjë-Hercegovina dhe Kosova.
Objekti i këtij Kursi është kthimi i tij në një kurs prestigjioz, i cili do të ofrojë analiza të thella, debate e diskutime, të cilat do të këshillonin vendimmarrësit për çështjet më të rëndësishme, që lidhen me strategjinë dhe politikën e mbrojtjes. Për zhvillimin e kursit kontribuojnë edhe partnerë seriozë si: Kolegji i Mbrojtjes së Italisë (CASD), Qendra “Xhorxh Marshall” në Gjermani, si dhe Universiteti i Kolorados në SHBA.

Kthehen në Atdhe 120 trupa të
Kontigjentit 11-të Paqeruajtës

Në mesditën e 17 shtatorit 2008, në aeroportin “Nënë Tereza” u zhvillua ceremonia e mbërritjes në atdhe të Kontigjentit të 11-të Paqeruajtës, i cili përfundoi me sukses të plotë misionin e tij në Mosul të Irakut.
Për pritjen e trupave paqeruajtëse kishin dalë shefi i Shtabit të Përgjithshëm i FA-së gjeneral brigade Maksim Malaj, komandanti i Forcës së Bashkuar gjeneral brigade Agim Lala, drejtori i Kabinetit të ministrit të Mbrojtjes Besnik Dervishi, përfaqësues të pushtetit vendor, si dhe familjarë e të afërm të ushtarakëve paqeruajtës. Në ceremoni ishte i pranishëm edhe atasheu ushtarak amerikan në Tiranë, kapiten i Rangut të Dytë Brian Moore.
Trupat paqeruajtëse dhe të pranishmit e tjerë u përshëndetën nga shefi i Shtabit të Përgjithshëm i FA-së gjeneral brigade Maksim Malaj. “Ky kontigjent, u shpreh ai, - i bashkohet listës së gjatë të kontigjenteve tona që kanë përmbushur me sukses detyrat e ngarkuara. Ata kanë ngritur lart vlerat morale dhe atë çfarë kanë përfituar nga trajnimet e bëra, për përballjen me sfidat e fushë betejave”. “Në përmbushjen me sukses të misionit që ju ishte besuar, ka vijuar më tej gjeneral brigade Malaj, ju keni shkruar në ditarin e njësisë tuaj edhe një vlerësim tjetër të lartë. Arritjet e deritanishme ju garantojnë ecjen përpara në përmbushjen e të gjitha misioneve për ruajtjen e paqes dhe sigurisë kudo, ku ajo kërcënohet”.
Gjeneral brigade Malaj përgëzoi edhe familjarët e paqeruajtësve për mbështetjen që u kanë dhënë gjatë kohës së misionit, duke mbajtur barrën e rëndë të përballjes me hallet familjare gjatë mungesës së tyre. Duke folur për kryerjen e detyrave gjatë qëndrimit në Irak, ai tha se ju përfaqësuat FA shqiptare në mënyrën më dinjitoze, në mbështetje të paqes e sigurisë. Ne do të bëjmë gjithçka për përgatitjen e një Force profesioniste dhe të motivuar dhe për këtë garancia jeni ju, me arritjet e deritanishme, janë Forcat tona të Armatosura. Me këto suksese padyshim që rruga drejt anëtarsësimit të plotë në NATO është më se e merituar.
Kontigjenti i 11-të Paqeruajtës, efektiv i Regjimentit Komando, i përbërë nga 120 oficerë, nënoficerë dhe ushtarë profesionistë, për më se 6 muaj rresht kreu misionin e tij në veri të Irakut, në qytetin e dytë më të madh të tij, në Mosul dhe para pak ditësh u zëvëndësua nga trupat e Kontigjentit të 12-të Paqeruajtës. Ata u angazhuan për ruajtjen e paqes dhe të qetësisë në këtë zonë të largët. Kryesisht, detyrat e tyre kanë qenë të përqëndruara për sigurimin e Bazës Ajrore të Mosulit, duke kryer patrullim brenda dhe jashtë saj, për sigurimin e pikave të kontrollit në hyrjet kryesore të bazës, si dhe veprime në grupe të gatshme për ndërhyrje emergjente në rast se sulmohej baza, ditën apo natën. Gjithashtu, përkrah trupave amerikane, ata kanë kryer detyra për shoqërimin e konvojeve, të personaliteteve civile dhe ushtarake etj.

UUS, diplomohen 87 oficerë të rinj

Me 12 shtator 2008, u zhvillua ceremonia e diplomimit të 87 oficerëve të rinj të UU “Skënderbej”. I pranishëm në ceremoni ishte zv.ministri i Mbrojtjes Petrit Karabina, zv.shefi i Shtabit të Përgjithshëm gjeneral brigade Zyber Dushku, gjeneralë dhe ushtarakë të lartë të Forcave të Armatosura, atashe ushtarakë të akredituar në vendin tonë, pedagogë dhe studentë të këtij universiteti, si dhe mjaft të ftuar të tjerë.
“Ju sot diplomoheni dhe gradoheni oficerë të FA në një moment kyç dhe lavdiplotë, - tha në përshëndetjen e tij zv.ministri i Mbrojtjes Petrit Karabina, - në momentin e anëtarësimit të Shqipërisë në NATO. Kjo është krenari e të gjithë shqiptarëve që aq shumë punuan për NATO-n. Kjo është nder e lavdi për ju pjesëtarët e Forcave të Armatosura, që me përkushtim plotësuat më së miri standardet e NATO-s. Ju tashmë nuk do jeni vetëm oficerë të FA Shqiptare, emër të cilin do ta mbani me nder kudo që të jeni e shërbeni, por jeni edhe oficerë të NATO-s, sepse Shqiperia është anëtare e NATO-s, sepse FA Shqiptare janë pjesëtarë të NATO-s”. Ne tashmë jemi para detyrave të mëdha, u shpreh më tej z. Karabina, FA Shqiptare janë para evenimenteve thelbësore të kalimit në forca profesioniste dhe të modernizimit të strukturave. Synimi ynë i shpallur dhe i përkrahur nga aleatët dhe partnerët është mbajtja e një Force të Armatosur të mirëtrajnuar ekonomikisht, të mirëstërvitur profesionalisht dhe të modernizuar teknikisht. Në fjalën që mbajti rektori i UU “Skënderbej” Prof. Dr. Elmas Leci, theksoi se, studentët që diplomojmë sot, dhe padyshim brezat e ardhshëm të studentëve të “UU” Skënderbej”, do të jenë oficerë të kualifikuar e me vizion euro-atlantik, liderë të ardhshëm të FA Shqiptare, anëtarë të NATO-s. “Diploma që ju merrni sot, - iu drejtua ai oficerëve të rinj, - është vetëm çelësi për në sferën e sukseseve, por ajo është e rëndësishme, sepse është e nivelit universitar e dijeve të plota dhe e njohuri të vlefshme, që ju barazojnë ju me të gjithë universitarët dhe universitetet shqiptare, me të gjithë ata që mbarojnë ciklin universitar, brenda e jashtë vendit sipas marrëveshjes së Bolonjës”. Në këtë ceremoni ishin të ftuar dhe morën pjesë edhe disa studentë të diplomuar në shkollat ushtarake më prestigjoze amerikane, gjermane e italiane. 87 oficerët që përfunduan studimet katër vjeçare në Fakultetin e Menaxhimit të UU “Skënderbej” dhe që me urdhër të ministrit të Mbrojtjes u titulluan oficerë dhe u graduan me gradën “nëntoger”, janë oficerët e parë që dalin nga auditorët e këtij universiteti, pas reformimit dhe ristrukturimit që pësoi ish-Akademia Ushtarake “Skënderbej” para katër vjetësh. Sipas urdhërit të ministrit të Mbrojtjes 87 oficerët e rinj do të ndjekin Kursin Bazë të Oficerit në Shkollën e Trupës dhe pas disa muajsh do të nisin karrierën e tyre ushtarake në njësitë dhe repartet e FA ku do të caktohen. Tashmë janë janë përcaktuar edhe specialitetet ku ata do të profilizohen në Shkollën e Trupës si: këmbësori, xhenio, logjistikë-furnizim, logjistikë-mbështetje, armatim-municion, detari, aviacion etj.

Hapet viti i ri arsimor dhe stërvitor

Me 15 shtator u zhvillua ceremonia e hapjes së vitit arsimor dhe stërvitor 2008-2009. Me këtë rast ishin mbledhur drejtues dhe një numër i konsiderueshëm i personelit të institucioneve në vartësi të KDS-së, si të Akademisë së Mbrojtjes “Spiro Moisiu”, të UU “Skënderbej”, të Akademisë së Nënoficerëve “Tomson”, të Shkollës së Trupës dhe të Brigadës të Stërvitjes Bazë në Bunavi. I pranishëm ishte zv.ministri i Mbrojtjes Petrit Karabina. Në përshëndetjen e tij, në emër edhe të ministrit të Mbrojtjes, ai theksoi se kjo ditë përbën një eveniment në jetën e institucioneve të arsimimit tonë ushtarak, si dhe të stërvitjes në Forcat tona të Armatosura. Më tej, zv.ministri Karabina u fokusua në përpjekjet e gjithanshme që po bëjnë të gjitha strukturat ushtarake për arritjen e objektivave dhe të standardeve, me qëllim që Shqipëria dhe Forcat e saj të Armatosura të jenë pjesë përbërëse e NATO-s. Komandanti i KDS-së kolonel Sandër Lleshi, në fjalën e rastit, bëri një ekspoze të punës të çdo institucioni pjesë përbërëse e kësaj komande.