|
4 Dhjetori
96 vjet Ushtri shqiptare
Forcë e re, me vizion të ri,
pranë anëtarësimit në NATO
Nëntëdhjetë e gjashtë vjet më parë, pesë ditë pas shpalljes së Pavarësisë nga plaku i urtë Ismail Qemali, u krijua edhe Ministria e Luftës. Në krye të saj u vendos Mehmet Pashë Dërralla, i cili njihet edhe si gjenerali i parë. 4 Dhjetori i vitit 1912, shënon kështu edhe krijimin e Ushtrisë shqiptare. Ngritja nga qeveria e re e shtetit të porsalindur e Ministrisë së Luftës, tregon lidhjen e ngushtë dhe rëndësinë e madhe që kanë Forcat e Armatosura për funksionimin normal të një shteti. Për këtë arsye, si edhe për nevojat urgjente të Mbrojtjes, një ndër detyrtat e qeverisë së parë shqiptare ishte ngritja dhe zhvillimi i Ushtrisë shqiptare, si garanti kryesor për ruajtjen e tërësisë territoriale të vendit, duke u ndërtuar mbi parametra bashkëkohorë. Gjatë mëse dy viteve të ekzistencës të qeverisë së parë shqiptare dhe të Ushtrisë së parë shqiptare, ajo krahas përsosjes së organizimit dhe të drejtimit, u angazhua totalisht edhe në mbrojtje të territoreve shqiptare, që kërcënoheshin nga synimet shoviniste të fqinjve. Në këtë kohë, ranë edhe dëshmorët e parë nga radhët e Ushtrisë. I paharruar do të mbetet i riu nga familja kolonjare e patriotit të shquar Gani Butkës, djali i të cilit la studimet në Amerikë dhe u rreshtua në ushtrinë e porsakrijuar të Ismail Qemalit...
|
