Kryeministri dhe ministri i Mbrojtjes festojnë me fëmijët e paqeruajtësve

Më 29 dhjetor 2009, Minis
tria e Mbrojtjes organizoi me rastin e festës së Vitit të Ri një aktivitet festiv për fëmijët e ushtarakëve, që shërbejnë në misionet paqeruajtëse në Afganistan, Çad, Bosnje, etj. Në këtë veprimtari ishin të pranishëm: Kryeministri z. Sali Berisha, ministri i Mbrojtjes z. Arben Imami, zv.ministria e Mbrojtjes Zana Xhuka, shefi i Shtabit të Përgjithshëm gjeneral brigade Maksim Malaj, gjeneralë dhe ushtarakë të lartë të Forcave tona të Armatosura, familjarë dhe të afërm të paqeruajtësve, etj.
Ministri i Mbrojtjes Arben Imami, pasi i uroi fëmijët e paqeruajtësve dhe të pranishmit e tjerë për festën e Vitit të Ri, vlerësoi lart pjesëmarrjen e ushtarakëve tanë në misionet e paqes, duke nënvizuar se kjo është një sakrificë jo vetëm për ata, por edhe për ju fëmijët dhe familjarët e tyre. "Ju do ta festoni Vitin e Ri pa pjesëmarrjen e baballarëve tuaj, - iu drejtua ai fëmijëve të pranishëm, sepse ata po punojnë për një mision fisnik, po punojnë për një botë më të mirë, për paqen dhe lumturinë e fëmijëve në ato vende ku po shërbejnë. Çdo fëmijë i këtij vendi u është mirënjohës prindërve tuaj, për misionin që ata kryejnë, prandaj dhe ju duhet të jeni krenarë për ta. Ministria e Mbrojtjes dhe Qeveria shqiptare i ka mbështetur dhe do t'i mbështes me të gjitha mënyrat që ata ta kryejnë me sukses misionin e tyre", ka përfunduar fjalën ministri Imami.
Në përshëndetjen e tij, Kryeministri Berisha theksoi se, sot ne këtu nderojmë në radhë të parë baballarët, bashkëshortët dhe djemtë tuaj që aktualisht janë në një detyrë të rëndësishme. Për shkak të kësaj detyre, ata nuk do ta kalojnë festën e Vitit të Ri me ju, në familjen dhe në atdheun e tyre, ndaj dhe u jemi mirënjohës, sepse ata janë në një sakrificë të vazhdueshme. "Ne jemi mbledhur sot, - ka vijuar më tej ai, - të urojmë së bashku një vit të gëzuar, një vit plot suksese, për ju dhe baballarët tuaj, për prindërit dhe të afërmit e paqeruajtësve tanë që shërbejnë larg atdheut dhe për t'i uruar atyre që të kthehen shëndoshë e mirë në gjirin e familjeve".
Me këtë rast, z. Berisha siguroi fëmijët dhe familjarët e paqeruajtësve se, do të jemi së bashku në çdo problem, hall apo vështirësi që do të keni. Duke përfunduar fjalën e tij, Kryeministri Berisha i uroi edhe njëherë gëzuar Vitin e Ri 2010 dhe mbarësi për të gjithë.
Më pas, Kryeministri Berisha dhe ministri i Mbrojtjes Imami biseduan në telefon me përfaqësues të ushtarakëve tanë që janë me mision në Herat të Afganistanit. Zoti Berisha duke biseduar me komandantin e kontingjentit që shërben në Herat të Afganistanit, major Abaz Bregu, i shprehu atij mirënjohjen e tij, të qeverisë dhe të gjithë popullit shqiptar për kryerjen me nder të detyrës së tyre fisnike dhe i kërkoi atij që të përshëndesë të gjithë efektivin e ushtarakëve që shërben me mision në Afganistan.

Në fund të kësaj veprimtarie mbresëlënëse për fëmijët e ushtarakëve paqeruajtës u shpërndanë dhurata për Vitin e Ri.