Cilësia, sekreti i transformimeve
në Forcën e Bashkuar

Komanda e Forcës së Bashkuar mban peshën kryesore në detyrat vjetore të Forcave të Armatosura. Ky vit ka qenë viti i transformimeve të mëdha dhe në këto kushte është dashur një bashkëveprim shumë herë më i madh sesa vitet e tjera.

Viti 2009, për Forcën e Bashkuar, ka qenë viti i detyrave dhe aktiviteteve të shumta, realizimeve dhe përkushtimit për të përballuar të gjitha sfidat dhe nga tërë ky anagazhim janë nxjerrë dhe shumë mësime që do t’i shërbejnë vazhdimësisë.E rëndësishme është që detyrat janë realizuar thotë shefi i shtabit të Komandës së Forcës së Bashkuar kolonel Perikli Koliçi. “Në zbatim të detyrimeve të direktivës së Mbrojtjes dhe Programit të Veprimtarive Kryesore të FA 2009, sqaron zoti Perikli Koliçi. për revistën “Mbrojtja”, fokusi dhe objektivi kryesor i FB ka qenë zhvillimi i operacionalitetit në nivelet e planifikuara dhe kërkuara për të siguruar përmbushjen e detyrave dhe angazhimeve brenda dhe jashtë vendit. Në këtë kuadër, zhvillimi dhe menaxhimi efektiv i personelit është konsideruar dhe vlerësuar angazhimi dhe përgjegjësia kryesore e të gjitha niveleve të komandave të FB. Komandat dhe organizmat përgjegjëse kanë treguar angazhimin maksimal të mundshëm për të dhënë të qartë mesazhin se, vlerësimi, kualifikimi dhe ecuria në karrierë e personelit matet me qëndrimin, vlerat morale, përgjegjshmërinë në kryerjen dhe realizimin e detyrave. Plotësimi i strukturave prioritare ka qenë një ndër prioritetet kryesore të personelit, me synimin për të përzgjedhur dhe emëruar personelin më të kualifikuar që mbartin vlera dhe potenciale të spikatura profesionale, arsimore, kulturore dhe atdhetare. Rezultat i kësaj pune është kompletimi në masën 78% të personelit të Forcës së Bashkuar nga rreth 72%, që ishte në fund të vitit 2008. Me qëllim zbutjen e problemeve sociale, emërimet dhe lëvizjet e personelit, në maksimumin e mundshëm, janë kryer pranë qendrave të tyre të banimit”, thotë zoti Perikli Koliçi. Ne trupën e nënoficerëve, si një nga shtyllat kryesore të zhvillimit të personelit, është përmirësuar në vazhdimësi gjendja, duke shtuar numrin e nënoficerëve të kualifikuar dhe reduktuar kontingjentin e pakualifikuar. Është këmbëngulur dhe janë dërguar më shumë kontingjente për kualifikime në institucionet arsimore, duke përzgjedhur elementët më të mirë të personelit ushtar profesionist. Janë titulluar nënoficerë, 160 ushtarë profesionistë. Në gjithë strukturat e FB gjatë vitit 2009 janë rekrutuar rreth 700 ushtarë profesionistë, duke realizuar planin në masën 100% dhe nga ana tjetër është zbatuar me korrektesë kontrata, për të mos lejuar shkelje në mënyrë të njëanshme të saj, duke kufizuar në mënyrë të ndjeshme lirimet pa shkaqe të arsyeshme. Gjatë vitit 2009, strukturat e Forcës së Bashkuar kanë qenë të angazhuara në mënyrë konstante brenda dhe jashtë vendit. Pavarësisht përfshirjes në operacione të ndryshme brenda vendit, angazhimi kryesor operacional i FB për vitin 2009 ishte përgatitja dhe kryerja e misioneve në Operacionet e Mbështetjes së Paqes në Afganistan dhe Çad. Mësimet e nxjerra në këto anagzhime janë reflektuar relativisht në përmirësimin e programeve stërvitore dhe në elementë e drejtime të tjera të zhvillimit të forcës. Pavarësisht ecurisë së mirë në kryerjen e misioneve jashtë vendit, mësimi kryesor është nevoja imperative e përmirësimit të përgatitjes së gjithanshme dhe stërvitjes së kontigjenteve, veçanërisht për specifikat konkrete të situatave dhe ambjenteve të këtyre operacioneve. Një aktivitet madhor, në pikëpamje të resurseve, rëndësisë e vështirësisë, i Komandës së Forcës së Bashkuar dhe strukturave të saj gjatë vitit 2009, por që ngelet një sfidë e vërtetë edhe për më tej, është angazhimi i një mase të konsiderueshme personeli dhe ushtarësh profesionistë në ruajtjen dhe përpunimin e objekteve ushtarake organike dhe joorganike të planit të përhapjes së FB-së. Lehtësimi i angazhimit të forcës në këtë drejtim, vlerësohet një domosdoshmëri dhe nevojë jetike. Planëzimi, organizimi, zhvillimi dhe pjesëmarrja e strukturave të ndryshme të Forcës së Bashkuar, krahas operacioneve të përmendura me lart, në shumë stërvitje të ndryshme brenda dhe jashtë vendit, janë realisht një tregues pozitiv i aktivitetit dhe funksionimit të Forcës së Bashkuar. Organizimi dhe zhvillimi i stërvitjes së batalionit të Dytë të BrRSH “Kthetrat e Shqiponjës 09”, “Bovilla 09”, “Jack Stone”, “Elita Komando 09”, “Surveimi i Avancuar 09”, SEL-1 “Komando Spirit 09”, “SAR 09”, “Albanian Lion 09”, dhe pjesëmarrja në shumë stërvitje jashtë vendit si: “Cooperative Maco 09” dhe “Balkan Peace Support 09” në Turqi, “Rapid Trident 09” në Ukrahinë, etj, ishin një eksperiencë dhe aktivitet i konsiderueshëm i strukturave të FB. Megjithatë, sikurse është theksuar edhe më sipër, pavarësisht arritjeve dhe progresit në stërvitje, KFB vlerëson se, përgatitja dhe stërvitja e forcës ka nevojë për një evoluim dhe rishikim të thellë dhe total të koncepteve dhe praktikave të deritanishme. Kjo konsiston kryesisht në përgatitjen dhe zhvillimin e programeve stërvitore disavjeçare të unifikuara dhe specifike të të gjithë llojeve të strukturave ushtarake të Forcës së Bashkuar, të cilat janë në proces përfundimi. Zhvillimi i një planifikimi real dhe praktik për të gjitha strukturat e FB ka qënë një nga angazhimet më të vështira dhe voluminoze të organizmave dhe strukturave të Forcës së Bashkuar. Midis të tjerave, kjo punë është materializuar me përgatitjen e Planit Afatgjatë 2009-2020 të Forcës së Bashkuar dhe të gjithë dokumentacionit tjetër plotësues e mbështetës. Një nga elementet efektiv të kësaj pune voluminoze janë projekt-detyrat e modernizimit të përgatitura nga Forca e Bashkuar gjatë vitit 2009. Pavarësisht mungesës së eksperiencës dhe vështirësive e mangësive, projekt-detyrat e modernizimit janë një bazë fillestare me vlera dhe efekte pozitive për të gjitha drejtimet e zhvillimit të Forcës së Bashkuar . Në këtë kuadër janë përgatitur 16 programe, projekt-detyra modernizimi, ose mbi 80% të të gjithë nevojave për modernizim të Forcës së Bashkuar, me kërkesat operacionale që duhet të sigurojnë sistemet dhe pajisjet përkatëse. Modernizimi i kryer në disa struktura të Forcës së Bashkuar mbi bazën e këtyre projekt-detyrave, nëpërmjet sigurimit të sistemeve dhe pajisjeve të reja si: Sistemi i Vëzhgimit të Hapësirës Detare, sistemet dhe radiot e komunikimit, anija e parë e re BrD, armatimi dhe pajisjet speciale të Batalionit te Operacioneve Speciale, mjetet zjarrfikse, kanë ndikuar relativisht ndjeshëm në rritjen e kapaciteteve operacionale. Realizimi i detyrimeve të integrimit Euro-Atlantik ishte një objektiv i vazhdueshëm që ka angazhuar kapacitetet më cilësore të Forcës së Bashkuar. Bazuar në vlerësimin dhe detyrimin e kuptueshëm për përballimin e nevojave kryesore të anëtarësimit në NATO me personel, Komanda e Forcës së Bashkuar ka bërë studimin, vlerësimin dhe analizat përkatëse për kontributet e mundshme me personel dhe ka planifikuar gjithashtu kapacitetet e duhura për angazhime të tjera jashtë vendit. Në përfundim të këtij procesi, KFB ka plane dhe evidenca konkrete. Aktualisht janë rreth 35-40 ushtarakë që vlerësohen të aftë për t’u pozicionuar në strukturat e NATO-s. Pavarësisht vështirësive objektive dhe subjektive, një punë e lavdërueshme është kryer edhe për planifikimin bazë të zhvillimit të Objektivave të Forcës dhe veçanërisht të atyre që lidhen drejtpërsedrejti me përgatitjen dhe zhvillimin e grup batalionit. Megjithatë, KFB dhe komandat e të gjitha niveleve të saj, janë të ndërgjegjshëm se ky është një aktivitet madhor, në proces, që ka akoma një punë mjaft të madhe dhe profesionale, për të rishikuar dhe zhvilluar më tej planifikimin efektiv dhe perspektiv. Gjithashtu, zhvillimi i aktiviteteve të bashkëpunimit ushtarak, përgjegjësi e FB, kane qenë nje angazhim tjetër mjaft i konsiderueshëm për mundësitë dhe kapacitetet e FB, duke patur parasysh që janë zhvilluar rreth 150 aktivitete të tilla. Viti 2010 vjen me mundësi dhe realitete të reja. Angazhimi, vullneti dhe përkushtimi i të gjithëve do të siguroj realitete dhe zhvillime më të mira. Në përfundim të këtij viti, KFB vlerëson dhe beson, se me një motivim dhe menaxhim më të mirë të personelit, me rritjen e kërkesës, përgjegjësisë, disiplinës dhe profesionalizmit, veçanërisht me një bashkëpunim dhe mirëkuptim domosdoshmërisht të ngritur në shkallën më të lartë, si dhe me një mbështetje të mjaftueshme nga strukturat eprore, mund të realizohet me sukses dhe efektivitet të plotë funksionimi operacional dhe administrativ i FB dhe të sigurohet plotësimi i çdo detyre të misionit të saj. Me këtë përgjegjësi dhe përkushtim, mbështetur dhe në zbatim të objektivave, prioriteteve dhe detyrave që do të përcaktohen në dokumentat kryesore të MM dhe SHP për vitin 2010, KFB do të orientojë, organizojë dhe drejtojë gjithë aktivitetin e saj për vitin në vijim.

Bejdo Malo