Takim me Komandën e ACT për sistemin e integruar të MM e SHPFA

Në kuadër të përfundimeve të Konferencës së 2-të të Transformimit, e cila i zhvilloi punimet e saj në 28-29 shtator 2009, Ekipi i NATO-s, i kryesuar nga Frank Boland, drejtor i Planifikimit të Forcës në Shtabin Ndërkombëtar të NATO-s, realizoi një takim, ku u morën në shqyrtim çështjet më sensitive të planifikimit të Mbrojtjes, ku ndër më kryesoret ishte statusi i strukturës së integruar MM/SHP të FA. Në funksion të këtij takimi, më 15 dhjetor 2009, në mjediset e QKFA u realizua “Tryeza e Rrumbullakët” me Komandën e ACT, për sistemin e integruar të MM e SHPFA. Qëllimi i këtij takimi ishte konsolidimi i mendimeve për rolin dhe përgjegjësitë e një strukture të mundshme integruese të MM e SHPFA, në interes të transformimit të FA. Në këtë takim morën pjesë: ministri i Mbrojtjes Arben Imami, zv.ministri i Mbrojtjes Arjan Starova, shefi i Shtabit të Përgjithshëm gjeneral brigade Maksim Malaj, zv.shefi i Shtabit të Përgjithshëm kundëradmiral Kristaq Gerveni, personalitete të tjera të larta ushtarake e civile të MM e SHP, përfaqësues të misionit ushtarak shqiptar në NATO, si dhe në Komandën e ACT, përfaqësues nga Shtabi Ndërkombëtar (IS), Shtabi Ushtarak Ndërkombëtar (IMS) dhe Komanda e NATO-s për Transformim (ACT). Të ftuar në këtë takim ishin dhe përfaqësues të MAIL-t, CUBIC dhe DIE, si dhe përfaqësues nga Norvegjia, Hungaria, Finlanda e Hollanda, të cilët dhanë përvojën e tyre në lidhje me statusin e strukturës së integruar MM/SHP të FA.
Në fjalën e tij, ministri Imami vlerësoi punën shumëvjeçare të FA shqiptare, si një histori përpjekjesh në kuadër të modernizimit e standardizimit, për të qenë pjesë e denjë e Aleancës. Një strukturë e integruar civilo-ushtarake, theksoi, ndër të tjera, në fjalën e tij ministri Imami, do të shërbejë për të marrë vendimet e duhura në kohën e duhur.
Më tej, takimi vazhdoi me prezantime e diskutime në lidhje me analizën e strukturës aktuale të MM/SHP, lidhjet midis tyre, mbivendosjet në detyra dhe përgje-gjësitë, si dhe propozimet konkrete për draft- strukturën e integruar në të ardhmen. 

Medalje “Për shërbime të veçanta” për major Isa Sancakli

Shefi i Shtabit të Përgjithshëm të FA-së, gjeneral brigade Maksim Malaj i akordoi major Isa Sancakli, me detyrë oficer koordinator i Kryesisë së Këshillit të Koordinimit dhe Bashkëpunimit ushtarak të Turqisë medaljen “Për shërbime të veçanta” me motivacionin: “Për kontributin e dhënë në rritjen e bashkëpunimit ushtarak midis FA të Turqisë dhe FA të RSH, në fushën e Mbrojtjes”. Në ceremoninë e organizuar me këtë rast, me 14 dhjetor 2009, ishin të pranishëm drejtorë dhe ushtarakë të lartë të Ministrisë së Mbrojtjes dhe Shtabit të Përgjithshëm, si dhe pjestarë të tjerë të Këshillit të Koordinimit dhe Bashkëpunimit Ushtarak të Turqisë në Tiranë. Zv.shefi i Shtabit të Përgjithshëm, kundëradmiral Kristaq Gerveni i dorëzoi medaljen e lartë dhe i shprehu major Sancakli mirënjohje dhe vlerësim për kontributin e tij në rritjen e nivelit të bashkëpunimit ushtarak midis dy ushtrive tona gjatë viteve të qëndrimit të tij në Shqipëri, kontribut ky që është njëkohësisht dhe një reflektim i marrëdhënieve shumë të mira midis të dy vendeve. Gjithashtu, kundëradmiral Gerveni i uroi suksese në detyrën e re edhe major Ahmet Uçar, duke i garantuar se, gjatë punës së tij, ai do të gjejë një bashkëpunim të plotë me të gjithë SHP të FA shqiptare. Major Sancakli shprehu mirënjohje për vlerësimin që iu bë punës së tij, punë e cila është kurorëzuar me çuarjen përpara të marrëdhënieve të shkëlqyera midis FA shqiptare dhe atyre turke.

Nënshkruhet akt-dhurimi i pajisjeve që shpejtojnë procesin e demontimit të municioneve

Më 8 dhjetor 2009, në Ministrinë e Mbrojtjes u zhvillua një ceremoni e veçantë me rastin e përfundimit të projektit për asgjësimin e përbërësit toksik të karburantit të raketave dhe nënshkrimit të akt-dhurimit të 6 (gjashtë) sharrave metalike që do të përdoren në procesin e demontimit të municioneve të tepërta në vendin tonë. Në këtë ceremoni ishte i pranishëm: ministri i Mbrojtjes Arben Imami, zv.ministrat e Mbrojtjes Arjan Starova, Ekrem Spahiu dhe Zana Xhuka, shefi i Shtabit të Përgjithshëm i FA-së gjeneral brigade Maksim Malaj, gjeneralë, drejtorë dhe ushtarakë të lartë të Ministrisë së Mbrojtjes dhe Shtabit të Përgjithshëm. Të pranishëm ishin gjithashtu edhe ambasdori i OSBE-së në Tiranë, Robert Bosch, ambasadori i Mbretërisë së Danimarkës, Jensen, ambasadori i Greqisë Nikolas Pazios, përfaqësues të ambasadës suedeze, etj.
Ministri i Mbrojtjes Arben Imami, në fjalën e tij tha se, jemi mbledhur këtu për dy arsye: E para për përfundimin e projektit MELANZH, i cili është kryer me sukses nga specialistët suedezë, po kështu dhe nga Forcat tona të Armatosura. Me këtë rast, ai falënderoi në mënyrë të posaçme OSBE-në, Qeverinë e Danimarkës, Suedisë, Greqisë dhe e Finlandës për kontributin e tyre financiar që me aq zemërgjerësi dhanë për realizimin e këtij projekti. “Gjithashtu, ka vijuar më tej z. Imami, sot jemi mbledhur këtu për të falënderuar në mënyrë të veçantë Ministrinë e Mbrojtjes dhe Qeverinë e Danimarkës, të cilat po na mbështesin me 6 sharra metalike, që po u ofrohen Forcave tona të Armatosura nëpërmjet OSBE-së”. Më pas, ministri Imami foli për prioritetin që Ministria e Mbrojtjes dhe FA i kanë dhënë procesit të demilitarizimit dhe demontimit të municioneve të tepërta, si dhe për punën që po bëhet për rikonceptimin, organizimin dhe planëzimin e këtij procesi shumë të rëndësishëm, duke siguruar për këtë mbështetjen dhe ekspertizën e aleatëve tanë, me qëllim që procesi të ecë edhe më shpejt. Pjesë e kësaj ceremonie ishte edhe dorëzimi i një certifikate zyrtare nga OSBE, ministrit të Mbrojtjes Imami, me rastin e përmbylljes së asgjësimit të 34 ton përbërësish toksik karburanti raketash, të njohur si melanzh, që gjendej prej vitesh në Shqipëri. Ky projekt ishte ngritur pas kërkesës së bërë nga delegacioni shqiptar pranë OSBE-së në Vjenë dhe u financua nga Qeveria e Greqisë, Danimarkës, Suedisë dhe Finlandës. Lënda toksike u transportua në një uzinë të specializuar në Suedi, ku edhe u dogj. Gjashtë makineritë gjysmë automatike prerëse model Startrite KMT 350 KSA do të vihen në punë së shpejti, në repartet e çmontimit në Poliçan dhe në Mjekës. Ato do të përdoren në gjashtë linja të demontimit të municioneve të tepërta konvencionale dhe qëllimi kryesor është që me to të shkatërrohet një sasi prej rreth 7 mijë ton municione në një periudhë njëvjeçare.

Nënshkruhet kontrata për
blerjen e pesë helikopterëve

Më 18 dhjetor 2009, në Ministrinë e Mbrojtjes u zhvillua një ceremoni e veçantë me rastin e nënshkrimit të kontratës për blerjen e pesë helikopterëve tip “AS 532 AL COUGAR, të cilët do të futen në përdorim në strukturën e Forcave tona Ajrore përgjatë 3-4 viteve të ardhshëm. Ishte i pranishëm ministri i Mbrojtjes Arben Imami, zv.ministri i Mbrojtjes Arjan Starova, shefi i Shtabit të Përgjithshëm i FA-së gjeneral brigade Maksim Malaj, drejtorë dhe ushtarakë të lartë të Ministrisë së Mbrojtjes dhe Shtabit të Përgjithshëm të FA-së. Të pranishëm ishin gjithashtu edhe ambasdorja e Francës në Tiranë Maryse Daviet, ambasadori i Gjermanisë Bernd Borchardt, zv.presidenti i kompanisë franceze EUROKOPTER z. Thomas Hein, si dhe përfaqësues të tjerë të kësaj kompanie.
Ministri i Mbrojtjes Arben Imami e vlerësoi nënshkrimin e kësaj kontrate, si një moment shumë të rëndësishëm për Forcat e Armatosura shqiptare dhe veçanërisht për Brigadën Ajrore. “Forcat tona të Armatosura, nënvizoi Ministri Imami, janë në rrugën e modernizimit dhe po shënojnë arritje të reja në përmbushjen e standardeve dhe të ndërveprimit me NATO-n”.
Në këtë ceremoni përshëndeti edhe zv.presidenti i kompanisë EUROKOPTER, z. Thomas Hein.
Kontrata u nënshkrua nga ministri i Mbrojtjes Arben Imami dhe zv.presidenti i kompanisë franceze EUROKOPTER, Thomas Hein.
Nënshkrimi i kësaj kontrate u finalizua pas një procedure transparente dhe të plotë prokurimi, si dhe u pasua nga negocime midis ekspertëve të Ministrisë së Mbrojtjes dhe kompanisë së njohur EUROKOPTER. Helikopterët e tipit AS 532 AL COUGAR janë një version ushtarak i familjes “Super Puma”. Vlera e kësaj kontrate kap shifrën prej 78. 633 288 euro. Kontrata përfundon në vitin 2013 me mbërritjen e helikopterit të fundit. Ky është një nga projektet më të mëdha të FA shqiptare dhe Ministrisë së Mbrojtjes në këto 30 vitet e fundit. Nëpërmjet këtij projekti Shqipëria do të hedhë një hap tjetër të rëndësishëm në plotësimin e standardeve të NATO-s dhe modernizimin e Forcave të saj të Armatosura.

Kontigjenti i 2-të paqeruajtës kthehet nga Çadi

Me 14 dhjetor 2009, në aeroportin ushtarak të Rinasit u zhvillua ceremonia e pritjes së Kontigjentit të 2-të Paqeruajtës, i cili përfundoi misionin në Republikën e Çadit. Për të pritur paqeruajtësit kishin dalë zv.ministri i Mbrojtjes Arjan Starova, zv.shef i Shtabit të Përgjithshëm të FA-së kundëradmiral Kristaq Gerveni, gjeneralë dhe ushtarakë të lartë të Forcave tona të Armatosura, familjarë dhe të afërm të ushtarakëve, pjesëmarrës në këtë mision etj. I pranishëm ishte edhe zv.ambasadori francez në Tiranë. Fjalën e rastit e mbajti zv.komandanti i Forcës së Bashkuar gjeneral brigade Vladimir Qiriazi. Më pas, të pranishmit i përshëndeti zv.ministri i Mbrojtjes Arian Starova. Ai i uroi trupave të Kontigjentit të dytë mirëseardhjen në atdhe dhe i falënderoi ata për përmbushjen me sukses të plotë të misionit të tyre në Çad. « Ju e mbajtët me nder Flamurin e Republikës së Shqipërisë, iu drejtua z. Starova trupave paqeruajtëse, duke dhënë kështu një ndihmë të çmuar për ruajtjen e sigurisë dhe paqes në Çad dhe duke u qëndruar pranë popullit në nevojë të këtij vendi. Në vijim të fjalës së tij, zv.ministri Starova u drejtoi një falënderim të veçantë familjarëve dhe të afërmve të misionarëve paqeruajtës, që për më shumë se gjashtë muaj kanë sakrifikuar dhe mbështetur bijtë e tyre në këtë mision të vështirë, duke u bërë pjesë edhe e suksesit të tyre. Gjithashtu z. Starova falënderoi Qeverinë franceze dhe Forcat e saj të Armatosura për mbështetjen që i kanë dhënë FA shqiptare e në veçanti misioneve tona të paqes në Çad. Kontigjenti i 2-të i Çadit shërbeu për 6 muaj nën Komandën franceze, në kuadër të misionit paqeruajtës të OKB-së. Ai kishte në përbërjen e vet, 63 ushtarakë, nga të cilët 9 oficerë, 25 nënoficerë dhe 29 ushtarë profesionistë. Detyra kryesore e këtij kontigjenti ishte sigurimi dhe ruajtja e Shtabit të OKB-së dhe e bazës ushtarake në kryeqytetin e Çadit. Deri tani në Çad kanë shërbyer 124 ushtarakë shqiptar, efektivë të Regjimentit Komando dhe ndërkohë, sapo ka nisur misionin kontigjenti i 3-të.

Gjeneral brigade Maksim Malaj takon trupat paqeruajtëse në Herat

Nga data 12 deri 13 dhjetor 2009, shefi i Shtabit të Përgjithshëm të FA-së gjeneral brigade Maksim Malaj bëri një vizitë një ditore pranë trupave tona paqeruajtëse që shërbejnë në misionin ISAF në Herat të Afganistanit. Gjatë vizitës së tij, gjeneral brigade Malaj u prit në një takim të veçantë nga komandanti i zonës perëndimore (RC WEST) gjeneral brigade Alessandro Veltri, i cili shprehu vlerësimet e tij për përkushtimin e trupave shqiptare në kryerjen e misionit. Nga ana e tij, gjeneral brigade Malaj e falënderoi gjeneral brigade Veltrin për vlerësimet pozitive për efektivin shqiptar, duke theksuar njëkohësisht se, kontributi i Shqipërisë në këtë mision ka ardhur në rritje, pasi ai përbën një nga prioritetet e MM e SHP të FA shqiptare. Gjeneral Malaj i bëri me dije komandantit Veltrin, vendimin e Qeverisë shqiptare për rritjen e pranisë ushtarake të Shqipërisë në Afganistan, si dhe për trajnimet e studentëve afganë në institucionet arsimore të vendit tonë. Gjatë takimit që pati me trupat tona paqeruajtëse, shefi i SHP Malaj u njoh nga afër me jetën e përditshme, si dhe vështirësitë që ndeshin ata në kryerjen e misionit. Duke shprehur bindjen në profesionalizmin e tyre, gjeneral Malaj iu garantoi trupave shqiptare mbështetjen e vazhdueshme të shtetit shqiptar, të MM-së dhe SHP të FA.

Kontigjenti i 3-të paqeruajtës niset me mision në Çad

Në Regjimentin Komando në Zall-Herr, më 11 dhjetor 2009 u zhvillua ceremonia e përcjelljes në Çad të Kontigjentit të 3-të paqeruajtës. Të pranishëm ishin: zv.ministri i Mbrojtjes Arjan Starova, zv.shef i Shtabit të Përgjithshëm të FA-së, kundëradmiral Kristaq Gerveni, komandanti i Forcës së Bashkuar gjeneral brigade Agim Lala, zv.ambasadori francez në Tiranë, atashe ushtarakë të akredituar në vendin tonë, ushtarakë të Ministrisë së Mbrojtjes dhe Shtabit të Përgjithshëm, si dhe të afërm e familjarë të ushtarakëve, pjesëmarrës në këtë mision. Të pranishmit i përshëndeti zv.ministri i Mbrojtjes Arjan Starova. Duke shprehur kënaqësinë e tij për pjesëmarrjen në këtë ceremoni të veçantë, z. Starova u shprehu trupave të kontigjentit të 3-të falënderime dhe mirënjohje për misionin që ata do të nisin së shpejti në ruajtje të paqes dhe sigurisë në Çadin e largët. « Pjesëmarrja juaj në misionet e paqes, vijoi më tej ai, është një detyrë e lartë në shërbim të paqes në botë. Misionet tuaja kanë qenë të vështira, por ato janë përballuar me sukses nga të gjithë ushtarakët tanë, duke shpalosur njëkohësisht profesionalizëm, devotshmëri dhe gatishmëri të lartë. Këto janë vlerësime që vijnë edhe nga aleatët tanë, përkrah të cilëve keni vepruar edhe ju. Jam i bindur, nënvizoi zv.ministri Starova, se edhe trupat e këtij kontigjenti do të çojnë më tej këto rezultate dhe këtë traditë të çmuar ». Me këtë rast, zv.ministri Starova falënderoi edhe FA franceze për bashkëpunimin dhe ndihmën që japin për trupat tona në këtë mision të vështirë, si dhe familjarët dhe të afërmit e paqeruajtëse që ndodheshin në këtë ceremoni për mbështetjen që u kanë dhënë dhe u japin bijëve të tyre për të kryer me nder misionin. Në fund të fjalës së tij z. Starova i uroi trupave të këtij kontigjenti edhe njëherë suksese në misionin e tyre dhe të mbajnë lart me krenari flamurin dhe emrin e Shqipërisë. Zv.ambasadori francez, në fjalën e tij, vlerësoi kontributin e Shqipërisë në misionet paqeruajtëse në disa vende të botës dhe shprehu sigurinë që edhe ky kontigjent i trupave shqiptare do të bashkëpunojë ngushtë me forcat franceze në misionin e tyre të tretë në Çad. Në përfundim të ceremonisë, zv.ministri i Mbrojtjes Starova i dorëzoi Flamurin Kombëtar komandantit të kontigjentit, major Besim Çela. Kontigjenti shqiptar do të jetë nën komandën franceze, në kuadër të misionit paqeruajtës të OKB. Ai ka në përbërje të tij 63 ushtarakë, nga të cilët 9 oficerë, 25 nënoficerë dhe 29 ushtarë profesionistë dhe do të zgjasë 6 muaj. Detyrat kryesore të kontigjenit shqiptar do të jenë: ruajtja dhe sigurimi i Kamp «Europa», shërbime në vendroje, ruajtja e depove të armatimit, sigurimi i bazës logjistike «SOTEC», sigurimi dhe shoqërimi i personelit të UN-së, etj.