|
Përballimi i posttragjedisë, profesionalizëm përkushtim dhe përvojë
e çmuar
Flet komandanti i operacionit “Gërdeci ‘08” kolonel Xhevdet Zeneli
Unë,duke patur një përvojë të gjatë në FA, mendoj se mekanizmat e shtetit kanë funksionuar si asnjëherë tjetër në pikëpamje të reagimit. Konkretisht, me pushtetin vendor, me kryetarin e Bashkisë së Vorës kemi patur një kontakt të vazhduar, qoftë ai i pranishëm këtu ku jemi ne në operacion, qoftë duke shkuar atje. Edhe në nivele të tjera bashkëpunimi ka funksionuar jashtëzakonisht mirë, me Policinë e Shtetit në mënyrë të veçantë. Unë për herë të parë shoh një operacion të tillë që gjithçka ka funksionuar dhe ka qënë në gatishmëri për realizimin e një detyre të tillë.
Operacioni Gërdeci ‘08
Zemrat përmbi flakë
Ata janë shumë. Më tepër nga ç’mund të mendohet. Që në minutat e para të shpërthimit tragjik, ata janë këtu. Veshur me uniformat e kamuflazhit i gjen në çdo shtëpi, rrugë e rrugicë, kodër dhe fushë, përrua dhe luginë. Janë banorët më të rinj të Gërdecit. Janë ushtarakët e Forcave tona të Armatosura, që punojnë çdo ditë, orë e minutë për eleminimin e pasojave që la pas tragjedia. Përballë predhave ende të paplasura, gëzhojave, djegoreve, barutit, tritolit, amonitit, ata kanë vënë zemrat e tyre. Është një dyluftim i heshtur mes jetës dhe vdekjes...
A mjafton vetëm emri “specialë”
E shtunë 15.Regjimentit Komando i jepet sinjali i kushtrimit. Një shpërthim, ashtu si një tërmet dinak, lëkundi tokën. Të ndodhur përpara një ngjarje, që askush nuk mund t'i jepte një përgjigje se ç'po ndodhte në të vërtetë, përgatitjet e PG së Regjimentit ishin maksimale për të çuar sa më parë në vendngjarje, grupet e gatshme speciale, të cilët me përgatitjen dhe gatishmërinë e lartë u nisën për detyrë për një kohë të shkurtër. Komunikimi gjatë lëvizjes ishte i pandërprerë. Me një shpejtësi të madhe ata mbërritën në vendin e shpërthimit. Zhurma e shpërthimit të municioneve vazhdonte. Këto shpërthime dhe kjo zhurmë u solli atyre ndër mend kujtimevt e shpërthimeve në misionin e Irakut, ku shumtë prej tyre e kishin kryer me sukses. Por ky operacion në këtë zonë të dëmtuar ishte i veçantë. Njerëz të tmerruar lëviznin në mënyrë të çrregullt duke kërkuar ndihmë. Akoma pa identifikuar zonën e fatkeqësisë, ata dhanë ndihmesën për evakuimi e të plagosurve drejt spitaleve të Tiranës. Shpërthimet vazhdonin njëra mbas tjetrës, por detyra dhe vështirësitë e vërteta spo kishin filluar...
|
