Ministri i Mbrojtjes Gazmend Oketa priti studentët e rinj që do ndjekin studime jashtë vendit

Oketa: Ju do t’i shtoni edhe më  shumë vlera e frymë të re FA Shqiptare

Më datë 20 gusht 2008, ministri i Mbrojtjes Gazmend Oketa priti në një takim të veçantë studentët e rinj, që do të ndjekin studimet jashtë vendit për vitin e ri akademik 2008-2009. Janë gjithsej 23 studentë, djem e vajza, midis tyre edhe fëmijë të ushtarakëve, të cilët, në kuadër të bashkëpumimit me vendet e NATO-s dhe pas një konkurimi e përzgjedhje të kujdesshme, kanë fituar të drejtën të studiojnë në akademitë ushtarake (Forca Tokësore, Detare e Karabinieri, si dhe degë të specialiteteve mjekësi, farmaci, juridik, elektronikë dhe informatikë), në Republikën e Greqisë, të Italisë dhe të Turqisë.  
Ka qenë pikërisht ministri i Mbrojtjes Gazmend Oketa, i cili ka bërë me dije emrat e studentëve të përzgjedhur dhe degët përkatëse, të mbështetura mbi kriteret e mesatares së notës dhe të testit fizik, test të cilit i është nënshtruar gjithësecili prej tyre. “Juve ju jepet një mundësi e madhe, që do ta dëshironte çdo bashkëmoshatar juaji. Për më tepër, ju jepet kjo mundësi që të shpalosni vlerat dhe aftësitë tuaja më të mira, por edhe të nderoni emrin e Shqipërisë nga vini, aty ku çdonjëri nga ju do të shkojë, - u ka thënë ministri i Mbrojtjes studentëve të ardhshëm. 
Ju uroj suksese jo vetëm në studimet tuaja, ka shtuar Oketa, por edhe në ecjen tuaj të gjatë drejt karrierës, duke ju falenderuar që keni qënë ju, edhe pse shumë të rinj në moshë, që kërkoni ti bashkoheni Forcave të Armatosura Shqiptare.
Do të jeni ju ata që do të lini një shenjë dhe shpresoj e besoj, shumë të mirë e të veçantë te homologët tuaj dhe pas këtyre studimeve po ju do ti shtoni edhe më  shumë vlera e frymë të re Ushtrisë Shqiptare”.