|
Në Gjermani është duke u zhvilluar konferenca vjetore e ushtrive Evropiane. Në këtë konferencë merr pjesë edhe shefi i Shtabit të Përgjithshëm të FA, gjeneral brigade Maksim Malaj. Kjo është konferenca e 16-të e ushtrive Evropiane, e cila organizohet nën kujdesin Komandës Amerikane për Evropën. Në të marrin pjesë: shefat e shtabeve të ushtrive Evropiane. Gjithashtu në këtë konferencë marrin pjesë edhe komandanti i Komandës së Aleancës për Transformimin, gjeneral James Mattis dhe komandanti i Komandës së SHBA për Evropën, gjeneral Carter Ham. Fokusi i konferencës është përgatitja e Forcave Tokësore (Land Forces) për gjithë spektrin e operacioneve. Diskutimet janë orientuar në trajnimin e ushtarakëve për të gjithë spektrin e operacioneve; krijimin apo përgatitjen e liderëve për gjithë spektrin e operacioneve; krijimin e ekipeve civilo-ushtarake dhe iteroperacionalitetin në mision. Gjeneral Malaj, gjatë zhvillimit të punimeve të konferencës, ka pasur takime me gjeneralin Ham, komandanti i Komandës Evropiane, gjeneral Casey, shef i Shtabit të Forcave Tokësore amerikane dhe homologë të vendeve pjesëmarrëse në këtë konferencë.
Ministri Oketa pret ambasadorin e Danimarkës
“E ardhmja e rajonit tonë, padyshim në NATO dhe në BE”
Më 29 tetor 2008, ministri i Mbrojtjes Gazmend Oketa, priti në një takim të veçantë ambasadorin e Mbretërisë së Danimarkës në Tiranë, Ankjaer Jensen. Ministri Oketa e përgëzoi ambasadorin Jensen për këtë takim, duke e falënderuar sidomos për bashkëpunimin midis dy vendeve tona. “Unë, theksoi z. Oketa, jam i bindur që ky bashkëpunim do të vazhdojë edhe në të ardhmen, sidomos në fushën ushtarake”. Ministri Oketa falënderoi gjithashtu Qeverinë daneze për ndihmën e madhe që po japin në fushën e demontimit të municioneve të tepërta, që ndodhen në vendin tonë. “Ky problem, nënvizoi ai, është i mbartur nga vitet e shkuara dhe se objektivi i Ministrisë së Mbrojtjes është që deri në vitin 2015, të jenë shkatërruar tërësisht municionet e tepërta në Shqipëri”. Për këtë qëllim, ka vijuar më tej Oketa, para disa javësh ne organizuam edhe një tavolinë të rrumbullakët, në të cilin morën pjesë përfaqësues të vendeve të NATO-s, donatorë dhe specialistë të ndryshëm, që merren me këto probleme. Ne jemi vërtet optimistë se, për realizimin e këtij objektivi do të kemi ndihmën edhe të vendeve mike dhe partnere, siç është edhe Danimarka. Nga ana e tij, ambasadori i Mbretërisë së Danimarkës në Tiranë Ankjaer Jensen falënderoi ministrin Oketa, për pritjen dhe theksoi se po shikoj një imazh të mirë për atë që po ndryshon në FA shqiptare dhe shprehu besimin se, marrëdhëniet e bashkëpunimi midis dy vendeve dhe dy ushtrive tona do të rriten e forcohen më shumë.
Dy bashkëbiseduesit kanë diskutuar edhe për situatën në rajon, si dhe për rritjen e frymës së bashkëpunimit rajonal në interes të forcimit të paqes dhe të stabilitetit. “E ardhmja e rajonit tonë, theksoi Oketa, do të jetë padyshim në NATO dhe në Bashkimin Evropian”. Ndërsa lidhur me Kosovën ai u shpreh se, kemi deklaruar gjithmonë se jemi të bindur se çështja e Kosovës është e pakthyeshme dhe se Serbia duhet të pranojë këtë fakt për të qenë pjesë e BE-së.
Ministri Oketa, takon ndihmës sekretarin e Shtetit
të Amerikës z. Stuart Jones
Vlerësohet roli i Presidentit Bush, në mbështetje të Shqipërisë
Ministri i Mbrojtjes Gazmend Oketa u takua dje me ndihmës sekretarin e Shtetit të Amerikës z. Stuart Jones. Në këtë takim, ministri Oketa, vlerësoi rolin e Presidentit Bush në mbështetje të Shqipërisë. Ministri Oketa i shprehu z, Jones bindjen se, Qeveria shqiptare do të vazhdojë me reformat dhe se ka plane të qarta për shkatërrimin e municioneve të tepërta. Ministri Oketa i konfirmoj atij me këtë rast se, Shqipëria do të vazhdojë të japë kontributin e saj në Afganistan deri sa kjo të kërkohet nga NATO. Ndihmës sekretari i Shtetit të Amerikës z. Stuart Jones shprehu vlerësim për arritjet e Shqipërisë drejt anëtarësimit në NATO. “Firmosja e Portokollit ishte një arritje e rëndësishme e Shqipërisë, por mbeten akoma shumë angazhime të tjera pas anëtarësimit në NATO”. Ndërkohë z. Jones tha se, “ e rëndësishme është që të vazhdojë bashkëpunimi rajonal. Ne e shohim pozitivisht A3 +2, në të njëjtën kohë SHBA do të konsiderojë edhe mundësinë e mbështetjes për shkatërrimin e municioneve të tepërta”. Z. Jones falënderoi Shqipërinë edhe për kontributin e dhënë në Afganistan dhe Irak.
Vizita e ekipit të Komandës së NATO-s për transformim në vendin tonë
Partnerët, vlerësojnë arsimimin dhe trajnimin e FA
Në kuadrin e plankalendarit të Komandave Strategjike të NATO-s për procesin e Integrimit në Aleancë, një ekip nga Komanda e NATO-s, Norfolk /SHBA bëri vizitë në vendin tonë për problemet e arsimimit e trajnimit.
Ekipi u prit nga zv.shefi i Shtabit të Përgjithshëm gjeneral brigade Zyber Dushku dhe u shoqërua nga drejtori i Shtabit të Përgjithshëm kolonel Foto Duro.
Takimi u hap me një prezantim nga drejtori i Shtabit të Përgjithshëm , i cili njohu ekipin nga afër me problemet e sistemit të arsimim-trajnimit, mbi plotësimin e standardeve të NATO-s, puna për përzgjedhjen e personelit për të punuar në funksionet e NATO-s, trajnimi i kontingjenteve që dërgohen në misione paqeruajtëse.
Më pas, takimi vijoi me brifingjet e përgatitura në Shtabin e Përgjithshëm të FA, me përfaqësues nga Drejtoria e Menaxhimit të Personelit e Burimeve të Mbrojtjes të MM dhe drejtoritë në SHPFA.
Në ditën e dytë, ekipi vijoi punën në Komandën e Doktrinave e Stërvitjes.
Në ditën e tretë, takimet vijuan në Komandën e Forcës së Bashkuar.
Ekipi filloi vizitën e tij nga data 27 tetor dhe përfundon me 31 tetor 2008.
Delegacioni vlerësoi kontributin e çmuar që Ministria e Mbrojtjes dhe Shtabi i Përgjithshëm kanë dhënë dhe vazhdojnë të japin në rrugën e edukimit e stërvitjes në Forcat e Armatosura.
Major Arben Molla
|
