|
Ministri i Mbrojtjes Gazmend Oketa, deklaroi se, miratimi i Ratifikimit të Protokollit për Anëtarësimin e Shqipërisë në NATO vazhdon normalisht, ndërkohë shprehu bindjen se, vendi ynë do të jetë anëtar me të drejta të plota në 2009-ën. Me këtë rast, në një intervistë dhënë për mediat, ministri Oketa, falënderoi Presidentin Amerikan Xh.W. Bush dhe Senatin Amerikan për Ratifikimin e Protokollit të anëtarësimit të vendit tonë në NATO, duke vënë theksin se kjo nismë do të shërbejë, si një nxitje për vendet e tjera. "Në radhë të parë, unë do doja të përshëndesja dhe të falënderoja edhe njëherë veprimin e senatit e në veçanti të Presidentit të Amerikës George W. Bush, për Ratifikimin e Protokollit të Anëtarësimit të Shqipërisë dhe Kroacisë në NATO. Natyrisht nuk është vetëm se, Shtetet e Bashkuara të Amerikës dhe Presidenti Bush ratifikuan këtë marrëveshje, porse Samiti dhe natyrisht Presidenti Bush vlerësuan realisht ecurinë e reformave në Shqipëri. Fjalët e Presidentit Bush, adresuar dy vendeve tona, ishin pikërisht një vlerësim midis të gjitha atyre reformave të ndërrmara ndër vite. Ishin një dëshmi e faktit se, Shqipëria realisht e ka merituar ftesën dhe realisht e meriton ftesën për të qenë anëtare me të drejta të plota në Aleancën e Atlantikut të Veriut. Pikërisht, kjo besoj është e veçanta pasi, anëtarësimi në NATO, nuk do parë thjesht si një proces, i cili varet në dëshirën e vendeve të Aleancës së Veriut, por natyrisht edhe të vendeve kandidate në rastin konkret Shqipërisë dhe Kroacisë, të cilat kanë edhe ato pjesën e tyre në përmbushjen e detyrimeve, si dhe në realizimin e reformave të premtuara", tha ministri Oketa. Me këtë rast, ministri Oketa vuri në dukje reformat që Qeveria shqiptare ka ndërmarrë në kuadër të përmbushjes së detyrave për në NATO. " Fakti që jemi në hapat e fundit të kësaj gare të gjatë për t'u anëtarësuar në NATO, dëshmon se Shqipëria i ka përmbushur të gjitha detyrimet që ajo i ka marrë përsipër t'i përmbushë në funksion të këtij misioni, pra, antarësimit me të drejta të plota në NATO ", tha ministri Oketa. Në fjalën e tij, ai nënvizoi faktin se, anëtarësimi në NATO, do të shërbejë si një kryefjalë edhe për integrimin në strukturat e BE-s. Ministri Oketa theksoi se, reformat e ndërmarra nga Qeveria shqiptare kanë marrë vlerësimin pozitiv dhe të partnerëve ndërkombëtarë, përmbushja e të cilave është bërë me bashkëpunimin e tyre. "Ka qenë një bashkëpunim, siç thashë dy palësh, ku merren në konsideratë faktorët e secilit vend, i cili aspiron të bëhet antarë me të drejta të plota në NATO, dhe besoj se kjo është e veçanta e këtij procesi", tha ministri Oketa. Ai ndërkohë shprehu bindjen se, anëtarësimi i Shqipërisë në NATO, do të jetë një kartë shumë e fortë, të cilën Qeveria shqiptare dhe klasa politike, do ta përdorë në integrimin e strukturave të BE-së.
Demontimi i armatimeve
Ministri Gazmend Oketa deklaroi se, Ministria e Mbrojtjes ka hartuar një plan - veprimi konkret në kuadër të demontimit të armatimeve në vendin tonë. Plan-veprimi i përgatitur dhe me asistencën e ekspertëve të huaj, parashikon që deri në 2010 rreziku të reduktohet në zero. "Plani është konkret dhe parashikon që brenda vitit 2010, rreziku të reduktohet në zero. Natyrisht do të ketë armatime dhe municione shtesë të mbetura, të cilat do të asgjësohen gradualisht deri në fundin e vitit 2015, por armatime të cilat konsiderohen të parrezikshme apo të një shkalle rreziku të ulët, të cilat nuk mund të shpërthejnë qoftë edhe nga një pakujdesi. A ka rrezik?
"Natyrisht, përsa kohë flitet për materiale luftarake, ushtarake", tha ministri. Ky projekt në fjalë është publikuar që në muajin korrik. Ministri vuri theksin se, po punohet për të minimizuar rrezikun. Synimi i Ministrisë Mbrojtjes është të asgjesojë të gjitha armatimet të cilat për shkak të vjetërsisë paraqesin rrezik për t'u vetëndezur apo shpërthyer. Për realizimin e këtij objektivi, ministri Oketa kërkoi bashkëpunimin e shumë aktorëve politikë. "Të asgjësojmë materialet apo t'i lëvizim ato të cilat janë të depozituara pranë qendrave të banuara. Ky është një proces, i cili në përfundim të tij, do të garantojë sigurinë e të gjithë qytetarëve shqiptarë. Gjithashtu është një proces, i cili kërkon bashkëpunimin e shumë aktorëve dhe faktorëve politik. Deri tani kemi bashkëpunim maksimal të Qeverisë shqiptare, kemi bashkëpunimin maksimal të Kuvendit të Shqipërisë, besoj se do të kemi edhe bashkëpunimin maksimal të pushtetit vendor". Ndërkohë shtoi se, "ne kemi kaluar në qeveri një projektligj për miratimin e asgjësimit të disa poligoneve, për asgjësimin e një pjese të municioneve të tepërta, një projektligj, i cili do t'i përcillet Kuvendit të Shqipërisë dhe besoj se edhe bashkëpunimi me pushtetin vendor dhe me të gjithë qytetarët shqiptarë nuk do të mungojë".
Ministri Oketa deklaroi se, janë afërsisht 98 mijë ton municione të tepërta, të cilat konsiderohen të rrezikshme. Një pjesë e armatimeve, të cilat për arsye teknike nuk mund të dëmontohen do të eksplodohen. Ministri nënvizoi se, "procesi i asgjësimit do të ketë dy komponentë kryesorë; asgjësimin në këto poligone në natyrë i atyre municioneve, të cilat për arsye teknike nuk mund të demontohen, por duhet të eksplodohen dhe demontimi i municioneve do të bëhet kryesisht në dy kombinatet kryesore: në Mjekës dhe Poliçan. Nga ana tjetër, po shohim mundësinë që edhe nga fabrika (kombinati), i Gramshit të merret me këtë aktivitet, por me kalibrat e vegjël, të cilat janë më pak të rrezikshëm", tha ministri. Ky aksion ushtarak, tha ministri Oketa ka ekspertizën e duhur. "Natyrisht që i gjithë ky proces nuk udhëhiqet nga politika, por udhëhiqet nga ekspertët, udhëhiqet nga ushtarakët shqiptarë, të asistuar në çdo rast që gjykohet e nevojshme nga ekspertët më të mirë ndërkombëtarë. Politika, në këtë rast qeveria, ministri i Mbrojtjes ka për detyrë të mbështesë këtë proces; ka për detyrë të përgatisë të gjithë kuadrin e duhur ligjor, të lëshojë urdhrat përkatës, përsa i takon mënyrës sesi i duhet realizuar teknikisht ky proces, natyrisht që kryefjalën e kanë ekspertët", tha ministri Oketa.
|
