| Përgatiti Faik Skopeci
Fotografia Pëllumb Qejvani
Më datën 24 tetor, në batalionin e armatim-municionit në Kodër-Kamëz u zhvillua ceremonia e përcjelljes së Kontigjentit të II Paqeruajtës për në misionin "ALTHEA" në Bosnjë-Hercegovinë. Kontigjenti i përbërë nga 12 vetë, është pjesë e grupit special të Asgjësimit të Eksplozivëve dhe Municioneve (AEM).
Në ceremoninë e rastit morën pjesë gjeneral brigade Vladimir Qirjazi, komandant i Komandës Mbështetëse, përfaqësues nga Shtabi i Përgjithshëm i FA-së, si dhe familjarë e të afërm të pjesëtarëve të kontigjentit.
Kolonel Selim Spahiu, komandant i Brigadës Logjistike në fjalën e hapjes ka theksuar se, "Personeli i Grupit Special të Asgjësimit të Eksplozivëve dhe Municioneve ka një përvojë në zhvillimin e operacioneve të rëndësishme brenda vendit. Ai është çertifikuar në stërvitjen e zhvilluar vitin e kaluar "Longbow Lancer". Vlerat dhe profesionalizmi që ky personel ka treguar na krijon siguri se, edhe kontigjenti II do të përmbushë me sukses misionin".
Kolonel Hysen Cekodhima, drejtor i Drejtorisë Operacionale në Shtabin e Përgjithshëm ka përcjellë për te Kontigjenti i II përshëndetjen në emër të gjeneral brigade Maksim Malaj, shef i Shtabit të Përgjithshëm i FA-së.
Kontigjenti u përshëndet nga gjeneral brigade Vladimir Qirjazi, komandant i Komandës Mbështetëse. Major Arjan Shkurta, komandant i kontigjentit duke marrë flamurin e misionit garantoi gjeneral brigade Vladimir Qirjazin dhe të pranishmit se, misioni do të përmbushet me sukses.
Pranë Shtabit të EUFOR-it nga 21 prilli i këtij viti vazhdon të jetë prezent kontigjenti i parë prej 12 vetash, i përbërë nga ekspertët më të mirët të Asgjësimit të Municioneve dhe Eksplozivëve. Ky kontigjent ka treguar profesionalizëm të lartë dhe frymë bashkëpunimi me homologët e NATO-s. Ata kanë përmbushur me sukses të gjitha detyrat e caktuara nga Shtabi i EUFOR-it. Në këtë ceremoni u përcoll kontigjenti i dytë, për në këtë mision i cili do të qëndrojë për gjashtë muaj në Bosnjë-Hercegovinë.
Misioni i trupave të Asgjësimit të Municioneve dhe Eksplozivëve ka të veçantën e tij, pasi është i pari mision që kryhet jashtë Shqipërisë me kapacitete të plota operacionale, financiare e logjisitike.
Ky personel është përzgjedhur nga Kompania e Asgjësimit të Municioneve dhe Eksplozivëve, të cilët për më shumë se dhjetë vjet kanë marrë pjesë në pastrimin e 15 rajoneve të infektuara municione në disa zona të vendit tonë. Së fundi, për rreth shtatë muaj kanë marrë pjesë në operacionin "Kthim në Normalitet", ku kanë treguar përkushtim dhe profesionalizëm të lartë për pastrimin e zonës nga municionet.
Përvoja e fituar, profesionalizmi dhe përkushtimi që ky personel ka treguar deri më sot, jep siguri se ky mision do te përmbushet me sukses.
Përshëndetja e gjeneral brigade Vladimir Qirjazi
"U kthefshi faqebardhë dhe në Shqipërinë, anëtare të NATO-s!"
Bosnjë-Hercegovina ka qenë vendi i parë ku Shqipëria u përfaqësua me trupa paqeruajtëse, duke u pasuar më pas në Afganistan, Irak, Çad, Gjeorgji etj.
Pjesëmarrja e Forcave të Armatosura shqiptare në misionet paqeruajtëse ka bërë që Shqipëria të kthehet nga konsumues i sigurisë në një vend që prodhon siguri.
EUFOR ndihmon autoritetet qendrore në afrimin e Bosnjë-Hercegovinës me Bashkimin Evropian, duke ofruar asistencë me programe të ndryshme me ndihmën e organizatave të specializuara, në kontekstin e miratimit të paktit të Asociim-Stabilizimit me Bashkimin Evropian.
Shtabi i EUFOR-it me trupat paqeruajtëse, nga të gjitha shtetet pjesëmarrëse në këtë mision janë prezentë në të gjithë vendin.
Më lejoni të falënderoj të gjithë pjesëmarrësit në këtë ceremoni dhe të uroj kontigjentin e dytë të specialistëve të asgjësimit të municioneve: "U kthefshi faqebardhë dhe në Shqipërinë, anëtare të NATO-s!"
Përshëndetja e gjeneral brigade Maksim Malaj, shef i Shtabit të Përgjithshëm i FA-së (përcjellë nga kolonel Hysen Cekodhima)
"Misioni,
vlerë e madhe në mbështetje të paqes"
Sot ju do të vijoni një mision të rëndësishëm të filluar nga kolegët tuaj para gjashtë muajsh në Bosnjë-Hercegovinë në kuadër të misionit "ALTHEA" të Bashkimit Europian.
Tashmë, Forcat e Armatosura po japin kontributin e tyre në mbështetje të paqes, atje ku ajo është cënuar. Tashmë edhe Komanda Mbështetëse ka të shënuar në historikun e saj kontributet në misionet paqeruajtëse.
Edhe pse në dukje me pjesëmarrje modeste, misioni në Bosnjë-Hercegovinë ka vlera të mëdha në mbështetje të paqes, ky mision është i pari, ku Forcat tona të Armatosura përfaqësohen me flamurin kombëtar dhe me kapacitete të plota operacionale.
Kontigjenti i parë ka treguar se ju jeni të aftë për të përballuar çdo situatë. Kjo lidhet me trajnimin dhe eksperiencën që ju tashmë keni krijuar kudo anembanë vendit në pastrimin e municioneve të rrezikshme. Misionet që ju kryeni janë sa te rrezikshme, por që ndikojnë drejtpërsëdrejti në sigurinë e jetës të qytetarëve.
Me këtë rast, ju shpreh falënderimet për kontributin që keni dhënë në të gjithë Shqipërinë për pastrimin e minave dhe të municioneve, shembulli juaj ka qenë i jashtëzakonshëm.
Kolonel Selim Spahiu, komandant i Brigadës Logjistike në fjalën e hapjes ka theksuar se: "Personeli i Grupit Special të Asgjësimit të Eksplozivëve dhe Municioneve ka një përvojë të zhvillimin e operacioneve të rëndësishme brenda vendit. Ai është certifikuar në stërvitjen e zhvilluar vitin e kaluar në stërvitjen "Longbow Lancher". Nga muaji prill i këtij viti, kontigjenti I merr pjesë në misionin "ALTHEA" të BE në Bosnjë-Hercegovinë. Ky kontigjent ka shpalosur vlera dhe aftësi profesionale në përmbushjen e detyrave."
Në BrRSH, fryn "Era e Paqes 08"
Në BrRSH vazhdon puna për përmbushjen e objektivave të partneritetit, mbështetur në Matricën dhe Objektivat themelore të Forcës së Bashkuar dhe BrRSH-së, për vitin 2008. Një ndër treguesit më kryesor të këtij viti është puna e bërë për vlerësimin e b2k-së dhe togës shëndetësore të batalionit logjistik, nga NATO, sipas konceptit të aftësive operacionale, për nivelin e parë (ndërveprueshmëria). Ky vlerësim do të fokusohet në aftësinë për të vepruar me të njëjtën metodologji në zbatimin e detyrave të caktuara.
Ndërveprueshmëria e vëndeve partnere me NATO-n, kërkon një personel të stërvitur sipas doktrinës, procedurave dhe praktikës së NATO-s. Kërkon paisje të cilat përballen dhe ku është e mundur të përputhen me standartet e NATO-s. Oficerët e shtabit të jenë të stërvitur në gjuhën operacionale, doktrinën dhe procedurat e NATO-s, dhe të jenë të aftë për të plotësuar vendet e caktuara në shtabet ku ajo vepron.
Për të realizuar me sukses këtë detyrë, janë realizuar 4 konferenca planizuese (konferenca konceptuale, fillestare, kryesore dhe ajo finale kordinuese). Në konferencën e fundit u aprovuan masat përfundimtare planizuese të diskutuara gjatë konferencave të tjera planizuese. Në përfundim të të saj, u ra dakort dhe u hartua edhe një marrveshje midis palëve. Në këtë marrëveshje u përcaktuan qartë masat që do të merreshin për të realizuar me sukses stërvitjen "Era e Paqes 08".
Kjo marrëveshje i hapi rrugën për përgatitjen e urdhërit dhe matrices së Komandantit të Brigadës, udhëzimet e shtabit te brigades, urdhërit operacional (anekset në gjuhën Angleze), matricën e vlerësimit të b2k sipas OCC-së, si dhe shumë dokumentave të tjerë të domosdoshëm për realizimin me sukses të stërvitjes.
Tashmë çdo ditë që kalon në Garnizonin Zall-Herrit ku vijon përgatitja për stërvitjen "Era e Paqes 08", vëren qartë progresin që bëjnë forcat pjesëmarrëse në stërvitje. Çdo shef në shtab, sipas drejtimit që mbulon në bashkëpunim me komandantët pjesëmarrës në stërvitje, kanë siguruar mbështetjen e duhur. Kjo mbështetje konsiston, në sigurimin e bazës logjistike për stërvitje, si dhe instruktorëve që do të zhvillojnë temat speciale si: asgjësimi i eksplozivave, mbrojtja nga MADM dhe sigurimi shëndetësor etj. Këto tema do të zhvillohen me konceptin e stërvitjes me stacione.
Me përparësi është parë bashkëpunimi me komunitetin e zonës. Për këtë qëllim është marrë kontakt me kryetarin e komunës Zall-Herr dhe kryepleqtë e zonës ku vepron dhe kryen detyrën BrRSH.
Komanda e b2k ka planifikuar të zhvillojë stërvitjen në dispozicion të vlerësimit për nivelin e parë, sipas OCC-së në tre faza. Në kalendarin e stërvitjes, reflektohen qartë programet stërvitore të OMP dhe temave speciale. Vazhdon puna për ngritjen e stacioneve stërvitore në bazë të listës së ngjarjeve kryesore dhe incidenteve të stërvitjes. Është bërë ritual i përditshëm që në orën 14.00 nga ana e shtabit dhe komandantëve të reparteve pjesëmarrës në "Era e Paqes 08" të raportohet. Nën drejtimin e Komandantit të BrRSH Gjeneral Brigade Viktor Bërdo dhe zv/komandantit kolonel Mustafa Xhemali, brifohet për masat e marra në mbështetje tw stërvitjes, progresi i bërë ditë pas dite, nga repartet që do të vlerësohen. Njëkohësisht vihen detyra për eleminimin e mangësive të vërejtura.
Major Shkëlqim Margjeka
|
