Entela Xheraj
60 vjet nuk janë shumë në jetën e një njeriu. Por, nuk mund të jenë kurrsesi as pak, kur jeta e këtij njeriu është e mbushur plot ngjarje historike dhe sfida të lavdishme. Kështu e nisëm sot këtë shkrim, kushtuar 60-vjetorit të lindjes së Profesor Doktor, Pajtim Ribaj, i cili të premten e javës së kaluar, festoi 60 vitet e jetës së tij. Në një aktivitet të shkurtër e solemn, 60 vjeçari Ribaj, i rrethuar nga të afërm, miq, shokë e dashamirës, ndihej më i lumtur se kurrë dhe kjo për faktin se, në secilin prej viteve të jetuara, kishte diçka për të treguar…..
Në fjalën e tij përshënde tëse, profesori, në mënyrë mjaft modeste pasi ka falënderuar të pranishmit që e kanë nderuar me ardhjen e tyre në këtë festë, tha se: “Në të gjithë historinë e jetës sime, (e cila është e zakonshme si e gjithë të tjerëve), nuk kam pretenduar të jem ndryshe nga të tjerët. Gjithsesi, nga kjo karrierë e gjatë, që nga koha kur kam nisur karrierën time ushtarake deri tani, gjithçka ka qenë e mbushur plot dinamikë, me bukuri, por po kaq edhe sfida e vështirësi.
Ndoshta mund të flitet gjatë për një karrierë 60 vjeçare, 40 prej të cilave në radhët e ushtrisë, por megjithatë në këtë karrierë të gjatë, dy kanë qenë historitë të cilat janë skalitur thellë në memorien e Profesorit.
“Së pari, më duket se kam mbajtur lidhje të forta me rrënjën, atë që më ka ushqyer gjithmonë, që nga vatra prindërore, nga vendlindja dhe karriera ime në Malësinë e Veriut, kështu edhe në ecurinë e arsimimit, kualifikimit, me gjithë sfidat në institucionet e nderuara mësimore-studimore ushtarake”.
Sigurisht, jeta për të ka qenë shumë komplekse, por po kaq edhe e bukur, në llojin e saj. 40 vjet nuk mund të jenë kurrë pak për një njeri, që gjithçka ia ka kushtuar rrobave të gjelbra. Nuk mund të jenë pak për një njeri, i cili ka sakrifikuar, deri edhe tek familja e tij……
Së dyti e rëndësishme për Profesor Doktor Ribaj, gëzimi i një shëndeti të plotë ka qenë një kënaqësi më vete. Duke u ndalur në këtë aspekt, ai përmendi edhe fjalët e miqve të tij, të cilët shpesh i thoshin se: “Karriera në ushtri të ka dhënë jo vetëm fisnikërinë, por edhe vlera qëndrueshmërie fizike”.
Por më tepër se kjo, për Profesorin, vlerat e mirënjohjes dhe respektit janë shumë herë më të mëdha se gjithçka tjetër. Kjo mirënjohje, sipas tij, buron nga njohja e aktiviteteve dhe të gjitha vlerave, që kanë përcjell profesorët, komandantët, eprorët dhe i gjithë stafi përbërës, të cilët kanë shërbyer si një udhëzues për përballimin e sfidave të jetës. Ai nuk harroi të lërë pa përmendur edhe kolektivin e tij të punës, siç është ai i Departamentit të Strategjisë, me në krye zotin Abaz Lleshi.
E ndërsa pjesa më e gjatë e jetës ka kaluar tashmë, Profesori nuk mund të ndalet me kaq…….Ai thotë se, u detyrohet shumë, të gjithë atyre që e kanë mbështetur deri tani në këtë punë të lodhshme. Megjithëse në fund të karrierës së tij, profesori nuk resht së dhëni betimet e rastit, duke u shprehur se: “Do të vazhdojë akoma të kontribuoj deri në përmbushjen e atyre sfidave dhe detyrimeve, që na presin në një të ardhme, që nuk është shumë e largët”…
Në këtë 60 vjetor, miqtë dhe kolegët e Profesorit mbajtën secili nga një fjalim të shkurtër, për nder të tij, duke u fokusuar në arritjet e deritanishme dhe karrierën profesionale të tij. Ata shprehën kënaqësinë që kanë mundur të njohin nga afër e të punojnë me të, pasi sipas tyre, “Të punosh me Profesor Ribajn, jo vetëm ke se çfarë të mësosh, por edhe ecën përpara, një shoqëri e cila po emancipohet çdo ditë e më shumë”. Ata e cilësojnë profesorin e nderuar, si një njëri tepër të përkushtuar ndaj punës, të dashur, optimist, fisnik dhe patriot.Kështu, ata kujtuan copëza nga momentet më të bukura, të përjetuara së bashku me kolegun e tyre ndër vite.
Me këtë rast, Prof. Ribaj promovoi librin e tij me titull: “Veprimtaria shke-ncore e Profesor Doktor, Pajtim Ribaj”, në të cilën ishte e pasqyruar e gjithë historia e jetës së tij ushtarake, që nga momentet e para të hyrjes në radhët e ushtrisë e deri në ditët e sotme. Profesori Ribaj, është i vetmi shkrimtar, i cili ka botuar mjaft libra për uniformat jeshile, që del nga radhët e ushtrisë.
|
