|
“Një grup i ri pune, do të rinegociojë me shtetin fqinj, Greqinë, për marrëveshjen për kufijtë detare”, kështu deklaroi të martën ministri i Mbrojtjes. ”Pavaresisht se Gjykata Kushtetuese rrëzoi si antikushtetuese marrëveshjen detare me Greqinë, Shqipëria do të rinegociojë. Për marrëveshjen ndërkombetare për kufijtë detare me Greqinë, qeveria është një aktor ashtu sikurse janë aktorë Presidenti, Parlamenti, Gjykata Kushtetuese dhe në këtë rast, kur flet Gjykata të tjerët heshtin”, tha ministri Imami pas mbledhjes së Komisionit Parlamentar të Sigurisë, ku u diskutua mbi blerjen e pesë helikopterëve të rinj. Ai konfirmoi se, shumë shpejt, do të ngrihet dhe një grup i ri negociator për koordinatat e reja me shtetin helen. “Do të shohim çfarë është pjesë formale dhe çfare nuk është pjesë formale dhe pastaj mbi bazën e detyrave që do të ngrihen për një grup të ri apo për çfarëdolloj rinegocimi, ne do të mundohemi të plotësojmë detyrat tona”, u shpreh ministri. Ndërkohë, gjatë mbledhjes së Komisionit të Sigurisë, ku ishte i pranishëm edhe ministri Imami, u miratua kontrata mes Qeverise shqiptare dhe Kompanise franceze “Eurokopter”, për blerjen e pesë helikopterëve ushtarakë. Kontrata e miratuar nga deputetët e komisionit, ka një vlere prej 79 milionë euro që ende nuk ka nisur të paguhet. Megjithatë, me marrjen e miratimit në seance plenare, sipas përfaqësuesve të Ministrisë së Mbrojtjes, do të nisë të paguhet një pjesë e vogël e vlerës së saj në Kompaninë “Eurocopter”. Specialistët shpjeguan gjatë diskutimeve të djeshme, rëndësinë që ka blerja e pesë helikoptereve për një vend anëtar i NATO-s për Ushtrine shqiptare. Sipas tyre, helikopteri i parë do të jetë në dispozicion të shtetit shqiptar, 20 muaj pas pagesës së këstit të parë financiar, pra vetëm në vitin 2011, pavarësisht se, diskutimet po zhvillohen tashmë në Kuvend. Efekti financiar për pagesën e helikopterëve është parashikuar të shtrihet në buxhetin vjetor për një periudhe të gjatë kohore, ç’ka e kalon mandatin 4 vjeçar të qeverisë aktuale. Helikopterët që do të blihen, përmbushin sipas specialistëve të Ministrisë së Mbrojtjes, kriteret edhe misione shpëtimi, pasi në helikopter mund të vendosen deri në gjashtë shtretër, si dhe 10 pasagjerë të tjerë.
Ministri Imami, merr pjesë në Ministerialin e NATO-s
Ministri i Mbrojtjes, Arben Imami do të marrë pjesë në takimin informal të ministrave të Mbrojtjes të vendeve anëtare të NATO-s, i cili mbahet në Stamboll, Turqi, më datë 4 dhe 5 shkurt. Gjatë këtij Ministeriali do të diskutohen çështje shumë të rëndësishme, që kanë të bëjnë me angazhimet e NATO-s. Pas takimit, ministri i Mbrojtjes do të udhëtojë për në Mynih, Gjermani, ku më datë 6 dhe 7 shkurt do të zhvillohet Konferenca e Sigurisë, me pjesëmarrjen e personaliteteve të politikës europiane dhe më gjerë. Gjatë konferencës do të diskutohet mbi të ardhmen e sigurisë evropiane dhe globale, si dhe strategjinë dhe misionin e NATO-s.
Vazhdon misioni paqeruajtës në Afganistan
Shqipëria dërgon 110 trupa në Herat
Shqipëria dërgoi të mërkurën në Heart, të Afganistanit një kontigjent shtesë të përbërë nga 110 trupa, në vazhdim të përmbushjes së misionit paqeruajtës atje. Kontigjenti i 2-të, paqeruajtës do të vazhdojë misionin në kuadër të misionit ISAF të NATO-s, nën drejtimin e Komandës italiane. Trupat e këtij kontigjenti janë pjesë e trupave të Regjimentit Komando, njësi e cila ka dhënë një kontribut të çmuar përkrah vendeve aleate në misionet paqeruajtëse si në Bosnje-Hercegovinë, Irak, Afganistan dhe në Çad. Deri më sot, Regjimenti Komando ka kontribuar me 2021 trupa në misionet paqeruajtëse. Në përcjelljen e trupave paqeruajtëse ishin të pranishëm: zv.ministri i Mbrojtjes Ekrem Spahiu, zv.shef i Shtabit të Përgjithshëm të FA-së, kundëradmiral Kristaq Gerveni, komandanti i Shtabit të NATO-s në Tiranë, gjeneral brigade Dincho Karamunchev, komandanti i Forcës së Bashkuar gjeneral brigade Agim Lala, atasheu ushtarak i Italisë në Tiranë kolonel Luigi Maracci, gjeneralë dhe ushtarakë të tjerë të lartë të Forcave tona të Armatosura, përfaqësues të pushtetit vendor, si dhe familjarë e të afërm të paqeruajtëseve. Me këtë rast, zv.ministri Spahia falënderoi Qeverinë e Italisë dhe FA Italiane për mbështetjen e çmuar që i kanë dhënë Ushtrisë shqiptare në të gjitha misionet, për besimin që kanë treguar në përfshirjen e trupave tona komando në këtë mision të vështirë. Në fund të fjalës së tij z. Spahia përshëndeti dhe falënderoi edhe familjarët dhe të afërmit e trupave paqeruajtëse që nisen në Afganistan për përkrahjen që u kanë dhënë djemve të tyre, si dhe i uroi atyre udhë të mbarë dhe suksese në kryerjen me nder të këtij misioni fisnik. Kontigjenti i 2-të paqeruajtës përbëhet nga 110 trupa, nga të cilët 12 oficerë, 44 nënoficerë dhe 54 ushtarë profesionistë. Gjatë qëndrimit në Herat të Afganistanit, trupat e këtij kontigjenti do të kryejnë detyra speciale që lidhen me ruajtjen dhe sigurimin i Bazës Ushtarake përmes shërbimit në vendroje dhe patrullimit me automjete; shërbimin pranë Komandës së Forcës; ruajtjen e depove të armatimit; sigurimin e bazës logjistike, si dhe sigurimin dhe shoqërimin e personelit. Komandanti i Regjimentit Komando, kolonel Dritan Demiraj, shprehu bindjen se, kontigjenti shtesë në këtë mision, jo vetëm që do ta kryejnë me sukses të plotë detyrën, por do të jenë edhe shembull i mirë për forcat e tjera paqeruajtëse, duke demonstruar në çdo situatë, kompaktësi, disiplinë të fortë, aftësi të larta teknike e taktiko-speciale, guxim, maturi e moral të admirueshëm. |
