| |
Më 2-3 shkurt 2010, në mjediset e Komandës së Doktrinave e Stërvitjes, u zhvillua Konferenca Rajonale e Menaxhimit të Burimeve Njerëzore. Kjo Konferencë, do të luajë një rol vendimtar në finalizimin e përpjekjeve për hartimin e politikave dhe përmirësimin e sistemit të menaxhimit të personelit sipas standardeve të NATO-s, për vendet e rajonit. Në këtë Konferencë, marrin pjesë përfaqësues nga vende të ndryshme anëtare të NATO-s, si dhe përfaqësues nga Komandat Strategjike, të cilët gjatë punimeve të Konferencës, do të kontribuojnë me brifues e ekspertë të fushës së personelit. Në fjalën e tij të hapjes, komandanti i Komandës së Doktrinave e Stërvitjes, gjeneral brigade Sandër Lleshi, ndër të tjerash u shpreh: "Është një kënaqësi dhe privilegj i veçantë, mundësia për të përshëndetur këtë konferencë kaq të rëndësishme. Anëtarësimi i Shqipërisë në NATO dhe sidomos vendimi për të zëvendësuar forcën e bazuar tek shërbimi i detyrueshëm ushtarak me forcën plotësisht profesioniste përbëjnë dy zhvillimet më të rëndësishme me të cilat janë përballuar Forcat e Armatosura të Shqipërisë. Kalimi në forcën plotësisht profesionale, krahas shumë faktorësh të tjerë shoqërues, kryhet në kushtet e mungesës së përvojës së veçantë, gjë që përbën një disavantazh. Por ky disavantazh kompensohet nga avantazhi tjetër i madh. Qenia jonë në NATO mundëson përthithjen e përvojës së çmuar të aleatëve tanë në këtë fushë. Pikërisht këtij qëllimi i shërben edhe konferenca e sotme". "Nga kjo konferencë - theksoi më tej, gjeneral Lleshi, pritet që gjatë këtyre dy ditëve ne të arrijmë të kthjellojmë perceptimet tona lidhur me aspektet themelore që kanë të bëjnë me transformimin e forcës në një forcë plotësisht profesioniste. Çështje të tilla si niveli i ambicjes në drejtim të forcës profesioniste, targeti social i synuar për t'u rekrutuar nga FA, rrugët optimale për një marketing modern, çështjet që kanë të bëjnë me përzgjedhjen dhe rekrutimin e forcës, rrugët dhe mënyrat për motivimin e forcës, zhvillimi i karrierës si dhe harmonizimi i nevojave kombëtare me nevojat e NATO-s, në kuptimin e personelit, përbëjnë drejtimet kryesore të qëllimit të konferencës". Gjeneral Lleshi, falënderoi dhe organizatorët e Konferencës për punën shumë të mirë të realizuar në interes të fillimit të mbarë të saj, duke inkurajuar të gjithë pjesëmarrësit për angazhim intensiv në diskutime, me qëllim që Konferenca të shndërrohet në një gjenerator të rëndësishëm idesh dhe propozimesh për të ardhmen e procesit të transformimit të forcës. Në emër të ministrit të Mbrojtjes dhe të shefit të Shtabit të Përgjithshëm, gjeneral Lleshi falënderoi të dy komandat Strategjike, si dhe të gjitha vendet pjesëmarrëse, për përpjekjet e tyre për realizimin e këtij aktiviteti të rëndësishëm.
Në fjalën e tij, drejtori i ACOS në SHAPE, gjeneral brigade Jan Peter Sijpk, theksoi se ky eveniment është një mundësi jo vetëm për Shqipërinë e Kroacinë, por për të gjitha vendet pjesëmarrëse në të, ashtu sikurse dhe për të gjithë ata që punojnë direkt me burimet njerëzore, për të ndjekur politikat e duhura të menaxhimit.
Pjesëmarrësit në Konferencë, u njohën në vijim me prezantime të shteteve, në lidhje me Forcat e Armatosura, misionin që ato kanë, organizimin, çfarë është bërë brenda forcave të armatosura, dhe kryesisht në sistemin e menaxhimit të burimeve njerëzore.
Më pas, punimet vazhduan me diskutime në nivel ekpertësh të ndarë në sindikata në lidhje me çështje të ndryshme të fushës së menaxhimit të burimeve njerëzore si: sfidat e kombeve në këtë fushë, kufizimet e këtyre sfidave, ndarje pikëpamjesh, eksperiencash e idesh, si dhe përfitimet që sjellin këto eksperienca.
Kjo konferencë e realizoi qëllimin për lehtësimin e përpjekjeve kryesissht të Shqipërisë e Kroacisë, në fushën e menaxhimit të personelit, si dhe u konkludua në lidhje me konferencën e ardhshme rajonale, e caktuar të zhvillohet në Kroaci, në maj 2010.
Zhvillohet workshop-i për arsimimin, trajnimin individual, stërvitjen dhe vlerësimin
Workshop-i për përshtatjen me standardet e NATO-s
Më 1 shkurt 2010, në zbatim të planit të integrimit me Komandën e NATO-s për Transformim, ACT, u zhvillua workshopi një ditor me temë: “Arsimimi, Trajnimi Individual, Stërvitja dhe Vlerësimi”. Qëllimi i tij, ishte një pasqyrimin mbi proceset e NATO-s për edukim, trajnim individual, stërvitje dhe vlerësimin, të cilat mund të aplikohen dhe Shqipëri.Aktiviteti u organizua në mjediset e Komandës së Doktrinave dhe Stërvitjes, nën drejtimin e përbashkët Shqipëri-ACT, NATO.
Në këtë aktivitet morën pjesë: ekipi i Komandës së NATO-s për Transformim, si dhe ekipi i Komandës së NATO-s për Operacionet (KFB Napoli), përfaqësues ushtarakë të drejtorive në SHP, KFB, BrAj, BrD, Regj.Komando, KM, si dhe përfaqësues nga KDS. Nga të dy bashkëdrejtuesit e workshop-it, për palën shqiptare nga drejtori i Drejtorisë së J3, kolonel Hysen Cekodhima dhe për Komandën e ACT, nga drejtori i J7, kolonel Luc Geers, u bë njohja e pjesëmarrësve me axhendën e aktivitetit, duke dhënë një përshkrim të përgjithshëm për politikat e arsimimit, trajnimit individual, stërvitjes e vlerësimit. Aktiviteti vazhdoi me punën në ndarjen në grupe e sindikatave, për të diskutuar në nivel ekspertësh në lidhje me programet e instruksioneve dhe objektivat e mësimit, proceset e arsimimit e trajnimit, ccështjet studimore për analizat e nevojave të trajnimit, plani-fikimi i stërvitjeve kombëtare, si dhe diskutime në lidhje me hapat që duhet të ndërmerren në kuadër të planit të integrimit, si dhe prioritetet për të ardhmen.
U zhvillua Kursi Ndërkombëtar i Menaxhimit të Mbrojtjes
Si të menaxhosh Mbrojtjen
Më datat 25-29 janar 2010, u zhvillua në Tiranë, Kursi Ndërkombëtar i Menaxhimit të Mbrojtjes. Ky program u zhvi-llua me anëtarë të përzgjedhur të trupit pedagogjik të Institutit të Menaxhimit të Burimeve të Mbrojtjes, në shkollën pasuniversitare të F. Detare, Monterey, Kalifornia. Në të merrnin pjesë ushtarakë të lartë e funksionarë të ndryshëm me funksione drejtuesish, nga Ministria e Mbrojtjes, Shtabi i Përgjithshëm dhe forcat në varësi të tij. Synimi i këtij kursi ishte: mundësimi i kuptimit të një morie konceptesh dhe teknikash analitike, si dhe aplikimin e tyre gjatë menaxhimit të burimeve në sistemin e Planëzim-Programim- Buxhetimit.
Kursi që u zhvillua në Tiranë lidhet ngushtë me Kursin e Lartë Ndërkombëtar të Menaxhimit të Burimeve, i cili zhvillohet në Monterey dhe mbuloi konceptet dhe teknikat bazë të arsyetimit ekonomik, teorinë e vendimeve menaxhuese dhe analizat sasiore, ndërsa aplikoheshin në një sistem të Planëzimit, Programimit dhe Buxhetimit. Kursi konsistonte në leksione dhe në seanca të diskutimit në grupe, sesione të diskutimit të problemeve dhe studime të rasteve (kazuseve).
Gjatë leksioneve dhe seancave të diskutimit, u shpërndahen materiale të ndryshme, të cilat gjithashtu bashkë me materialet e mëparshme krijonin tërësinë e informacionit, që u përdor nga pjesëmarrësit.
Konceptet e parimet e dhëna nëpërmjet leksioneve u bënë më praktike, duke ndërtuar një vend imagjinar ku ato të aplikoheshin. Për këtë qëllim, Drmecia ishte vendi imagjinar, i krijuar nga Instituti i Menaxhimit të Burimeve të Mbrojtjes (Defense Resources Management Institute - DRMI). Ndërkohë që gjatë kursit, pjesëmarrësit luanin rolin e zyrtarëve civilë apo ushtarakëve të përfshirë në menaxhimin e Mbrojtjes Kombëtare të Drmecia-s. Ata u ambjentuan me Drmecia-n si me anë të përgatitjes së ushtrimeve të ndryshme gjatë kursit. Këto ushtrime trajtonin diskutimin mbi kërcënimet kryesore ndaj Drmecia-s, çështjet kryesore për t'u pasur në konsideratë në procesin e Planizimit-Programimit të Buxhetimit në Buxhetit Vjetor (BV), parashtronin njësitë organizative të çdo force dhe MM-së, që në fundin e vitit financiar të kishin të njëjtën fuqi njerëzore me atë të një viti më pare; paraqisnin fondet sipas shumave të caktuara dhe sipas forcave si një element shtesë buxhetor, përtej atyre të përfshira në përshkrimin fillestar, etj. Lektorët e trupit pedagogjik të Institutit të Menaxhimit të Burimeve të Mbrojtjes, në Shkollën Pasuniversitare të F. Detare, Monterey, Kalifornia, nëpërmjet organizimit efikas, arritën që të sjellin informacion të vlefshëm te të pranishmit që ndoqën këtë kurs. |
