| Major Faik Skopeci
Në dhjetë ditorin e tretë të muajit janar 2010, në Brigadën Logjistike u krye trajnimi i punëtorëve të mirëmbajtjes dhe personelit magazinier të depove të armatim-municionit nën drejtimin e ekspertëve të Agjensisë së Reduktimit të Rreziqeve dhe Kërcënimeve, DITRA.
Brigada Logjistike ka një shtrirje gjeografike mjaft të gjerë. Duke u nisur nga ky fakt, trajnimi u krye i ndarë në dy “periudha” dhe vende të ndryshme. Nga data 19-20 janar u krye trajnimi i personelit magaziner të depove të municionit të rajonit të depove të Tiranës në Kodër Kamëz. Më pas, nga data 25-28 janar, ekipi i trajnuesve të DITRA-s u zhvendos në rajonin Mengël, Elbasan, ku vijoi trajnimin e personelit të rajoneve të depove Elbasan dhe Berat.
Eksperti i DITRA-s Ben A. Cacioppo, kapiten Bernd Kaltenborn dhe toger I Stefan Krasenbrink të qëndrës gjermane të Verfifikimit gjatë trajnimit, trajtuan tema teorike dhe praktike në lidhje me masat e sigurisë fizike, njohjen e eksplozivëve, klasifikimin sipas rreziqeve të OKB-së, etj.
Major Ajet Dalti, specialist i armatim-municionit, gjatë zhvillimit të këtij trajnimi ka qenë i pranishëm dhe duke qenë një njohës mjaft i mirë i situatës reale të municioneve në vendin tonë ka bërë bashkërendimin e mësimeve teorike me ato praktike, çka e ka bërë më rezultativ trajnimin. Në përfundim të këtij trajnimi u certifikuan 68 punëtorë të mirëmbajtjes dhe të personelit magazinier të depove të armatim-municionit të Brigadës Logjistike.
Zbatimi i masave të sigurisë, në qendër të vëmendjes.
Në të gjitha takimet e përjavshme, të drejtuara nga gjeneral brigade Xhemal Gjunkshi, që lidhen me procesin e asgjësimit të municioneve të tepërta dhe të atyre me parametra të rëna, zbatimi i masave të sigurisë mbetet një shqetësim i vazhdueshëm. Gjeneral Gjunkshi në çdo takim kërkon nga çdo person që ka përgjegjësi në procesin e demontimit të municioneve, zbatim me korrektësi maksimale të rregullave të sigurisë. Zbatimi i masave të sigurisë kërkohet deri në imtësi, duke filluar nga sistemimi i municioneve në depo, gjatë ngarkim-shkarimit, transportimit me automjete dhe deri në poligon apo në uzinat, ku kryhet demontimi në rrugë industriale. Trajnimi i personelit të kompanisë të Asgjësimit të Municioneve dhe Eksplozivave (AEM) që realizojnë asgjësimin në poligone apo të atyre që realizojnë demontimin industrial në uzinat ushtarake ka qenë i plotë. Ndërsa trajnimi i personelit të mirëmbajtjes, ngarkim-shkarkimit të municionit dhe atij magazinier të depove të armatim-municionit është vlerësuar si hallkë e dobët në zinxhirin e masave të sigurisë. Kjo e lidhur edhe me faktin se, shumë nga punëtorët e mirëmbajtjes dhe ngarkim-shkarkimit janë marrë në punë me kontratë nga terreni. Për këtë arsye trajnimi i tyre nuk mund të kufizohej vëtëm me kryerjen e një instruktazhi të zakonshëm. Ky është i pari trajnim që zhvillohet në Forcat e Armatosura në këtë nivel, pasi më parë trajnime janë kryer me personelin oficer dhe nënoficer me detyrë magazinier.
Kujtojmë se, procesi i asgjësimit të municioneve të tepërta fillon pikërisht me këtë proces në dukje mjaft i thjeshtë, por që mbart një rrezik të vazhdueshëm, pasi nga shkelja më e vogël mund të ndodhin katastrofa.
Certifikimi
28 janari ishte dita e fundit e trajnimit në rajonin Mengël të Elbasanit. Po këtë ditë u zhvillua edhe ceremonia e certifikimit të personelit pjesmarrës. Në këtë ceremoni morën pjesë: kolonel Perikli Tiko, shef i Degës së Operacioneve dhe Stërvitjes në KM, si dhe përfaqësuesi amerikan, nënkolonel Perryman, shef i Zyrës së Bashkëpunimit Ushtarak Amerikan në Ministrinë e Mbrojtjes, si dhe nënkolonel Dedë Marku, komandant i rajonit të depove Elbasan. Koloneli në ceremoni përcolli urimet në emër të gjeneral brigade Xhemal Gjunkshi. Përshëndetje të veçantë përcolli për ekipin e trajnuesve të DIRTA-s Ben A. Cacioppo dhe kapiten Bernd Kaltenborn dhe toger I-rë Stefan Krasenbrink të Qendrës gjermane të Verfikimit, të cilët dhanë kontrubutin e tyre në këtë proces mjaft të rëndësishëm në rritjen e sigurisë. Kolonel Tiko theksoi se “ky është një proces që është iniciuar një vit më parë, me interesimin dhe mbështetjen e ambasadës amerikane dhe të kompanisë CUBIC. Problemet e ngarkim- shkarimit janë çështje sentitive. Kjo është një eksperiencë mjaft e vyer edhe për punëtorët në kontakt me ekspertët e huaj nga të cilët ke se çfarë mëson, qoftë edhe për të parë sesa me korrektësi trajtohen dhe vlerësohen edhe çështjet që në dukje mund të quhen të thjeshta. Më pas foli eksperti i DIRTA-s Ben A. Cacioppo, i cili falënderoi personelin që mori pjesë në trajnim për përkushtimin dhe disiplinën e treguar gjatë trajnimit. “Njohuritë tuaja do të kontribuojnë në sigurinë e përbashkët, theksoi z. Cacioppo. Shkëmbimi i informacionit ishte i ndërsjelltë. Ne kemi përfituar nga ju, po aq sa keni përfituar edhe ju nga ne”. Ndërsa nënkolonel Perryman në fjalën e tij theksoi se: “Forcat e Armatosura shqiptare po vijojnë procesin e demontimit të municioneve të tepërta, ku po vazhdon suksesshëm demontimi në rrugë industriale në tre uzinat ushtarake dhe asgjësimi logjistik në 8 poligone. Ky proces po ndodh dhe Qeveria shqiptare ka një plan veprimi, të cilën FA po e zbaton me korrektësi. Ky kurs u realizua falë ndihmës dhe mbështetjes që dhanë ekspertët amerikane dhe ata të Ushtrisë gjermane. Ju duhet të jeni krenarë për punën që keni bërë”. Për pjesëmarrësit në trajnim u shpërndanë certifikatat për përfundimin e kursit për rregullat e sigurisë gjatë punës me municionet. |
