Alketa Alia

Misioni i zyrës së Shtabit të NATO-s në vendin tonë ka përfunduar. Të mërkurën u zhvillua edhe ceremonia përkatëse në ambjentet e KDS-së. Të pranishëm në ceremoni ishin: Presidenti i Republikës, Bamir Topi, ministri i Mbrojtjes Arben Imami, komandanti i Komandës së Bashkuar të NATO-s në Napoli, admirali Fitzgerald, shefi i Shtabit të Përgjithshëm i FA-së gjeneral brigade Maksim Malaj, ambasadorë dhe atashe ushtarakë të vendeve anëtare të NATO-s, të akredituar në Tiranë, përfaqësues të misioneve të ndryshme të huaja në vendin tonë, etj. Ceremonia u çel me paraqitjen e forcës Komandantit të Përgjithshëm, njëkohësisht Presidentit të Republikës, Bamir Topi dhe kalimin në revistë përpara trupave të rreshtuara përballë tribunës së të ftuarve të nderit. Pas ekzekutimit nga Orkestra Frymore e FA-së të Himnit Kombëtar shqiptar dhe Himnin e NATO-s, fjalën e hapjes e mbajti kreu i Shtabit të NATO-s në Tiranë gjeneral brigade Kramunchev, i cili e konsideroi përfundimin e misionit të tij të suksesshëm. Gjatë fjalës së tij ai tha: "Tani si një vend anëtar në NATO, Shqipëria ka përgjegjësi rajonale në Ballkan, përgjegjësi për të dhënë një shembull të mirë vendeve të tjera aspiruese për të hyrë në NATO dhe gjithashtu për të koordinuar politikën kombëtare si me strategjinë e NATO-s edhe me vendet e tjera të rajonit. Ky shembull i mirë do të krijojë një demoktraci stabël dhe të suksesshme në rajonin tonë, i cili në shkuarën ka njohur shumë ndarje dhe konflikte. Integrimi i Shqipërisë në NATO shënon një hap solid përpara, por kjo është vetëm pjesë e një procesi të vazhdueshëm, i cili duhet të vazhdojë të mbështetet politikisht dhe të marrë konsensus të plotë nga të gjitha institucionet, për të çuar përpara progresin e arritur deri tani". Shtabi i NATO-s në Tiranë gjatë periudhës së paraanëtarësimit të Shqipërisë në NATO asistoi dhe ndihmoi vendin tonë në përmbushjen e kësaj aspirate të madhe, për të qenë pjesë e Aleancës më të madhe politiko-ushtarake siç është NATO. Shqipëria që në fillim të vitit 1992, shprehu aspiratën dhe nisi bashkëpunimin për integrimin në Aleancën e Atlantikut Verior. Në vitin 1994, ajo u bë pjesë e Partneritetit për Paqe, duke filluar kështu në angazhime konkrete në programe, në iniciativa dhe pjesëmarrje me trupa në stërvitje të shumta dhe misione përkrah vendeve aleate të NATO-s. Kjo bëri që në qershor të vitit 2002, të hapet Zyra e Shtabit të NATO-s në Tiranë, me qëllim ndihmën dhe bashkëpunimin mes Qeverisë shqiptare dhe organizmave ndërkombëtare në lidhje me anëtarësimin e Shqipërisë në Aleancë. Gjatë këtyre viteve, Shtabi i NATO-s në Tiranë e kreu me sukses të plotë misionin e tij, duke dhënë mbi të gjitha një ndihmesë dhe kontribut të vyer në realizimin e plotë të aspiratës shqiptare: anëtarësimin e Shqipërisë në Aleancën e Atlantikut të Veriut. "Ne sot simbolikisht mbyllim praninë e një misioni të NATO-s në Shqipëri, por ndërkohë kemi hapur tashmë prej më shumë se një viti, një mision të ri: E gjithë NATO-ja është e pranishme dhe me mision në Shqipëri, ashtu sikurse Shqipëria është tërësisht e pranishme dhe e misionuar në NATO",tha ministri i Mbrojtjes Imami gjatë fjalës së tij. Më tej, ministri Imami i ka përcjellë një falënderim të veçantë qeverive të vendeve anëtare të Aleancës për vlerësimin dhe besimin që patën në vlerat, kapacitetet dhe standardet e Shqipërisë për t'a merituar anëtarësimin. Gjithashtu, ai i shprehu mirënjohje dhe falënderim të veçantë gjeneralit Karamunchev, shefi aktual i Shtabit të NATO-s në Tiranë, për kontributin e dhënë gjatë kësaj periudhe, duke theksuar faktin se, do të mbaheni mend si gjenerali që kurorëzoi me sukses praninë mbi 10 vjeçare të misioneve të NATO-s në Shqipëri.

Nga fjala e përshëndetjes së ministrit të Mbrojtjes, Arben Imami, gjatë ceremonisë së mbylljes së zyrës të NATO-s, në Tiranë

Imami: Anëtarësimi në NATO arritja më e madhe e vendit tonë

Në këtë ditë të mbylljes së ndërlidhjes së misionit ushtarak të NATO-s në Shqipëri, sjellim me krenari ndërmend se, aspirata e Shqipërisë për tu bashkuar me aleancën mori jetë së bashku me aspiratën edhe angazhimin tonë të 20 vjetëve më parë për ta bërë Shqipërinë si gjithë Evropa. Është fakt kuptimplotë se, institucionalizimi i marrëdhënieve me NATO-n përmes anëtarësimit dhe Këshillit të Bashkëpunimit të Atlantikut të Veriut në vitin 1992 përkon pikërisht me institucionalizimin e demokracisë shqiptare. Vetëm dy vjet pas nënëshkrimit të dokumentit në kuadër të partneritetit për paqe me NATO-n në vitin 1994, Qeveria shqiptare ende në radhët e para të konsolidimit të demokracisë së vendit shfaqi vullnetin dhe dha kontributin e menjëhershëm duke iu bashkuar koalicionit të gjerë të trupave të 22 vendeve të botës demoktratike anëtare dhe jo anëtare të Aleancës në operacionin paqeruajtës në Bosnjë-Hercegonivë. Konseguentë për përgjegjësitë e ndërmarra, Shqipëria mund të angazhohet jo vetëm në kontribute por sidomos me arritjen e standardeve për të merituar denjësisht anëtarësimin në NATO.
Instalimi në Shqipëri i misionit të parë të NATO-s në vitin 1999, ishte një erë që demonstronte praninë e mirëpritur të aleancës, komunikimin e përditshëm me të për të na ofruar nga afër ekspertizën dhe përvojën e strukturave të saj. Po më shumë se dhjetë vjet shtabin e NATO-s në Tiranë e patëm një bashkëudhëtarë në përgjigjet tona drejt anëtarësimit me asistencën, mbështetjen, këshillimin dhe ekspertizën e kualifikuar të gjeneralëve dhe ushtarakëve të këtij shtabi. Anëtarësimi i Shqipërisë në NATO është arritja më e madhe e vendit tonë në këto dy dekada të zhvillimeve demokratike, është një arritje historike për vendin tonë. Për këto ne u jemi mirënjohës qeverive të vendeve anëtare të aleancës për vlerësimin dhe besimin që patën në vlerat, kapacitetet dhe standardet e Shqipërisë për ta merituar këtë anëtarësim. Mirënjohja jonë u shkon të gjithë përfaqësuesve të lartë, ushtarakëve të tjerë të NATO-s dhe anëtarëve të tjerë të NATO-s që shërbyen në Bruksel, Mons, Napoli si dhe atyre që shërbyen me vite në Durrës apo në Tiranë, për kontributin e tyre të shquar në modernizimin, në radhë të parë të mendimit tonë ushtarak, të strukturave ushtarake, në lehtësimin e bashkëpunimit tonë me NATO-n dhe organizatave të tjera të komunitetit ndërkombëtar, si dhe forcimin e bashkëpunimit, e sigurisë në rajon.
Gjeneral Karamunchev mirënjohja jonë shkon dhe te ju, sikurse dhe për të gjithë paraardhësit tuaj në detyrën që keni për kontributin tuaj dhe të stafit tuaj në këto arritje por edhe për faktin se do të mbaheni mend si gjenerali që kurorëzoi me sukses praninë mbi dhjetë vjeçare të misioneve të NATO-s në Shqipëri. Bashkë me këtë vlerësim, ne ju urojmë ju dhe stafin tuaj që përvoja juaj shqiptare të jetë një kontribut në karrierën tuaj ushtarake dhe të mbeteni përherë të mirëpritur si miq të Shqipërisë. Ne sot mbyllim simbolikisht praninë e një misioni të NATO-s në Shqipëri, por ndërkohë mund të themi, kemi ardhur pas një promocion civilizmi në një mision të ri. E gjithë NATO-ja është e pranishme dhe me mision në Shqipëri ashtu sikurse Shqipëria është tërësisht e pranishme dhe me misione në NATO. Edhe njëhere të dashur ushtarakë, të trupit të NATO-s në Tiranë ju uroj mbarësi në jetë në misionet tiuaja të ardhshme.
Ju faleminderit të gjithëve!

Nga Fjala e Presidentit Topi në ceremoninë e mbylljes
së prezencës së NATO-s, në Shqipëri

Topi: Shqipëria shikon me interes procesin integrues të Ballkanit

Jam shumë i gëzuar e njëkohësisht i nderuar, të marr pjesë në këtë ceremoni madhështore, që shënon përfundimin e misionit të prezencës së NATO-s në vendin tonë.
Dita e sotme është ngjarje jashtëzakonisht e rëndësishme dhe e veçantë për Shqipërinë, shqiptarët dhe për të gjithë aleatët e partnerët tanë strategjikë. Është e veçantë për shqiptarët, sepse ripohon realizimin përfundimtar të ëndrrës dhe dëshirës së tyre për t’u bërë anëtarë me të drejta të plota në NATO. Njëherazi, kjo ditë është e veçantë edhe për vendet anëtare të NATO-s, sepse zyrtarizon praninë tashmë dinjitoze të Shqipërisë në Aleancën e Atlantikut të Veriut dhe fazën më të avancuar të partneritetit me vendet e saj.
Dhjetë vjet më pare, ne të gjithë falënderuam partnerët dhe aleatët tanë që morën vendimin për të hapur zyrën e tyre të NATO-s në Shqipëri. Ky vendim ishte shumë i rëndësishëm. Ai shprehte qartësisht besimin që ata kishin fituar se Shqipëria dhe shqiptarët ishin në rrugë të mbarë dhe shumë të vendosur për t’u integruar në proceset euro-atlantike, por sidomos ata kuptuan se ne kishim dhënë garancitë e duhura që ky proces, ndonëse i vështirë, do të ishte i pakthyeshëm dhe i suksesshëm jo vetëm për Shqipërinë e rajonin, por edhe më gjerë.
Sot ne jemi këtu për të shprehur edhe njëherë mirënjohjen ndaj partnerëve tanë për ndihmën dhe mbështetjen politike, ushtarake, financiare, infrastrukturore që Shqipëria të anëtarësohej në NATO, të kthehej në një aleat institucional të Aleancës dhe, së bashku me vendet e tjera anëtare, të bashkërendonte mundësitë për t’u përballur me të ardhmen e përbashkët dhe sfidat e saj.
Ceremonia e sotme përmbyll një faqe të rëndësishme në historinë e marrëdhënieve tona me NATO-n, atë të premtimit të mbajtur dhe të standardeve të arritura, për të vazhduar kapitullin e ri dhe të suksesshëm të bashkëpunimit të ngushtë dhe afatgjatë me statusin e anëtarit të denjë dhe të përgjegjshëm.
Dita e sotme është një mundësi për të treguar sërish se, ne ishim shumë të bindur dhe të ndërgjegjshëm për vështirësitë me të cilat do të përballeshim, si për të plotësuar standardet e partneritet të kërkuara nga Aleanca, ashtu edhe ato të angazhimit si anëtar me të drejta të plota. Ne ishim shumë të qartë dhe të palëkundur në vendimin tonë. Rruga e vetme dhe më e mira për Shqipërinë e sotme dhe të ardhme, për rajonin sot dhe nesër, për popullin shqiptar dhe të gjithë popujt e rajonit, ishte anëtarësimi sa më i shpejtë i vendit tonë në NATO dhe në Bashkimin Evropian.
Dëshiroj të nënvizoj sot se, Shqipëria i shikon zhvillimet në Ballkanin Perëndimor me shumë vëmendje dhe proceset e tij integruese me shumë interes. Ne do të vazhdojmë, me përgjegjësinë e një vendi anëtar të NATO-s, të mbështesim fuqimisht proceset pozitive integruese dhe politikat e shtrirjes së sigurisë në këtë rajon, si rruga e vetme për ta shkëputur atë nga atavizmat e vjetra politike, etnike që përpiqen ta frenojnë nën petkun e një nacionalizmi të ri.
Gjithashtu, dëshiroj të theksoj sot me krenari se, bashkëpunimi dhe kontributi i Shqipërisë në NATO nuk mbetet vetëm në Tiranë e as vetëm në Bruksel. Sot Forcat e Armatosura të Republikës së Shqipërisë janë së bashku me miqtë dhe kolegët e vendeve të tjera të NATO-s, në luftën më të vështirë dhe sfidën më të madhe të sigurisë globale, në Afganistan.
I përshëndes ata dhe veprën e tyre nga kjo ceremoni madhështore;
I përshëndes të gjithë ushtarakët tanë kudo ku ata kontribuojnë;
I falënderoj edhe njëherë të gjithë vendet aleate të NATO-s për ndihmën dhe besimin;
I përshëndes të gjithë shqiptarët, të cilët ëndërruan, shpresuan, besuan dhe vazhduan për të arritur qëllimin e tyre madhor: anëtarësimin në NATO, aleancës më të madhe globale të sigurisë, paqes, lirisë dhe demokracisë.

Fjala e KKFB, admiral Fitzgerald

Fitzgerald: Komanda e NATO-s në Napoli konfirmon mbështetjen për FA

Është një nder i madh dhe kënaqësi të jem sot këtu në këtë ditë të bukur në sheshin e Komandës së Doktrinës dhe Stërvistjes. Jam krenarë që jam pjesë e kësaj ngjarje të rëndësishme.
President Topi, faleminderit që erdhe gjithashtu, falënderoj ministrin e Mbrojtjes z. Arben Imami, përfaqësuesin e Forcave Detare, gjeneralin e Brigadës Maksim Malaj, gjeneral Karamunchev, udhëheqësit e tjerë politikë dhe fetarë dhe ambasadorët e vendeve të ndryshme.
Erdha sot këtu më qëllimin për të vlerësuar komandën e NATO-s në Tiranë dhe listën e madhe të arritjeve të saj, megjithatë ndërkohë që po i afroheshim Hotel “Internacional”, vetëm pak më parë më erdhi një ide tjetër dhe besoj ju nuk do të pendoheni nëse unë shpenzoj pak më shumë kohë dhe mbaj një fjalim të gjatë.
Në një ditë kur ne po festojmë progresin drejt paqes sa i përshtatshëm është fakti se, vetëm duke fluturuar nëpërmjet një aeroporti të quajtur me emrin e një prej figurave më frymëzuese të paqes në histori, një bijë shqiptare Nënë Tereza. Kjo grua fantastike ishte në gjendje t’i sillte kaq shumë paqe dhe siguri botës nëpërmjet mjeteve më të thjeshta. Ajo themeloi misionin e bamirësisë vetëm me 12 anëtarë dhe kjo është një koefidencë interesante, sepse NATO u themelua me 12 vende anëtare. Por ngjashmëritë nuk mbarojnë këtu, të dy organizatat u betuan për të asistuar të tjerët në nevojë, misionarët e Nënë Terezës u betuan të ndihmonin të tjerët dhe pse jetonin në varfëri. Në vitin 1979, Nënë Tereza u dekorua me çmimin Nobel të paqes, për punën e ndërmarrë në betejën kundër talasemisë dhe vuajtjeve që është një kërcënim i jashtëzakonshëm ndaj stabilitetit dhe për NATO-n; kapërcimi i sfidave për të arritur stabilitetin është objekti primar. Në vitin 1982, Nënë Tereza shpëtoi 37 fëmijë të bllokuar në një spital në Bejrut, duke devijuar një pushim zjarri të përkohshëm midis Izraelit dhe Palestinës. Të shoqëruar nga nismëtarët e kryqit të kuq, ajo udhëtoi nëpërmjet asaj zone të shkatërruar për të evakuuar pacientët e rinj, sot anëtarët e saj vazhdojnë të kryejnë të njëjtin mision me ndihmën e një milion bashkëpunëtorëve në më shumë se qindra vende. Si është e mundur që një grua me një gjatësi aq të vogël dhe paraqitje aq të thjeshtë të krijonte dhe të shpërndante aq shumë paqe nëpër botë me kaq pak njerëz. Sot kur po i afrohesha aeroportit nuk mund si të mos mendoja që patjetër Nënë Tereza ishte lëvizje unike, ideja e saj por të shpëndarë paqe në botë duhet të jetë një ide e rrënjosur thellë në popullin shqiptar. Me të njëjtin vizion paqeje, aftësia e Shqipërisë për të asistuar në vendosjen e paqes dhe në vende të tjera në
Evropë është kaq mahnitëse por ndonjëherë sigurimi i një ambjenti të sigurt kërkon metoda më praktike. Si pjesë e misionit në Afganistan, 250 shqiptarët dalin çdo ditë në Kabul dhe në drejtim të Heratit. Shqiptarët, si në Kosovë dhe në Bosnje-Hercegovinë po ndihmojnë këto vende për të promovuar siguri dhe stabilitet në rajonin e Ballkanit. Impakti pozitiv që Shqipëria ka bërë në Evropë dhe në vendet e largëta është mahnitëse dhe është një testament dhe i vizionit që ne të gjithë ndajmë për të pasur një botë më të sigurt dhe më të begatë. Këto arritje shërbejnë për të nënvizuar arritjet e misionit që po mbaron sot këtu. Në dekadën e fundit, kjo organizatë ka ndihmuar popullin shqiptar për të realizuar qëllimin e tij për të qenë anëtar i NATO-s, e gjithashtu Komanda në Tiranë ka shërbyer edhe si qendër koordinimi dhe mbështje për vendin pritës duke vazhduar transformimin e Ushtrisë shqiptare në një ushtri profesioniste, si dhe përçoi inciativat e tjera për të çuar përpara sigurinë dhe stabilitetin e vendit. Komanda jonë do të vazhdojë tju asistojënë zhvillimin e planit strategjik dhe me programin e modernizimit të FA shqiptare, konceptin e menaxhimit ajror së bashku me mbështetjen e vazhdueshme ndaj institucioneve politike të vendit për ta adaptur legjislacionin e Mbrojtjes në mënyrë për të arritur kërkesat e anëtarësisë në NATO dhe detyrat e forcës. Ndërsa ju udhëtoni më tej në rrugën e integrimit të plotë në NATO të tjera vende do tju kërkojnë mbështetje dhe adoptim për të arritur qëllimet e tyre dhe për të qenë anëtare e NATO-s. Ndërsa mbetet akoma punë për të bërë, unë e konsideroj mbylljen sot si një shenjë të qartë progresi të dukshëm në drejtim të fituar nga drejtuesit dhe ushtria e këtij vendi. Gjeneral Karamunchev, burra dhe gra të ekipit të ndërlidhjes për hyrje dhe integrim MAIL, ju falënderoj për angazhimin dhe sakrificat ndaj kësaj komande dhe ndaj NATO-s, eksperienca dhe vizioni juaj gjeneral Karamunchev kanë patur një impakt të përhershëm dhe pozitiv tek të gjithë burrat dhe gratë që të mbështesin ty dhe gjithashtu në jetën e popullit shqiptarë. Faleminderit për mbështetjen e vazhdueshme që i keni dhënë komandës, ata kanë qenë kaq të suksesshëm falë ndihmës tuaj.
Faleminderit të gjithëve që më dhatë mundësinë që të marr pjesë në këtë ngjarje të rëndësishme dhe unë shpresoj se, do të shikojmë një të ardhme të ndritur nëpërmjet Shqipërisë dhe Aleancës së NATO-s.
Faleminderit!

Fjala e ShShP të FA të Shqipërisë, gjeneral brigade Maksim Malaj në ceremoninë e mbylljes aktivitetit të zyrës së NATO-s në Shqipëri

Malaj: Bashkëpunimi me zyrën e NATO-s solli rezultate konkrete

Fjala e ShShP të FA të Shqipërisë, gjeneral brigade Maksim Malaj në ceremoninë e mbylljes sw aktivitetit të zyrës së NATO-s, në Shqipëri
Tetë vjet më parë, pikërisht në qershor të vitit 2002, Shqipëria dhe NATO do të kalonin në një nivel të ri bashkëpunimi që do të konkretizohej me ngritjen e zyrës së NATO-s në Tiranë, si institucion koordinues i përpjekjeve të qeverisë dhe të shtetit shqiptar me institucionet ndërkombëtare dhe NATO-n, në rrugën e realizimit të një prej objektivave tona të mëdha kombëtare, atë të anëtarësi mit të vendit në Alenancën e Atlantikut të Veriut. Tetë vjet më pas, mund të deklarojmë me kënaqësi se, ky mision është përmbushur plotësisht, ndër të tjera edhe si rezultat i bashkëpunimit dhe ndihmës nga personeli i përfaqësisë së NATO-s në Shqipëri. Bashkëpunimi ynë gjatë kësaj periudhe është fokusuar në elementet më të rëndësishëm që lidhen me zhvillimin dhe reformimin e FA, si dhe të strukturave përkatëse në të gjitha dimensionet, me synim ngritjen dhe funksionimin e tyre në përputhje me standardet dhe nivelin operacional të kërkuar nga Aleanca. Duke u ndalur më konkretisht në gamën e këtij bashkëpunimi mendoj se, në një ditë ceremoniale si kjo, ia vlen të fokusohemi shkurtimisht në disa nga drejtimet më kryesore të tij, ku do të përmendja:
• Planifikimin dhe realizimin me sukses të pjesëmarrjes së trupave tona në misionet paqeruajtëse jashtë vendit në kuadër të operacioneve të drejtuara nga Aleanca.
• Krijimin e qendrës së koordinimit të mbështetjes së vendit pritës.
• Krijimin dhe vënien në funksionim të qendrës ndërministerore operacionale detare.
• Bashkëpunimin në procesin e planifikimit dhe të zhvillimit të Forcave të Armatosura profesioniste në veçanti.
• Asistencën e dhënë në procesin e demilitarizimit dhe të shkatërrimit të municioneve të tepërta, si dhe të pajisjeve ushtarake të vjetëruara.
Këto fusha bashkëpunimi përbëjnë një mozaik të larmishëm, bashkimi i pjesëve të të cilit krijon imazhin e plotë të rolit dhe të kontributit të qendrës së NATO-s, në procesin e anëtarësimit të vendit në NATO, si dhe në atë të transformimit dhe zhvillimit të FA. Ky rol, nuk do të ishte përmbushur pa kontributin e të gjithë ushtarakëve dhe civilëve që kanë shërbyer dhe vazhdojnë të shërbejnë në këtë institucion. Me këtë rast, më lejoni të falënderoj për kontributin e dhënë gjeneral Caparro-n, gjeneral Gianini-n, gjeneral Santroni, gjeneral Strathopoylos, gjeneral Fierro, gjeneral Di Ventura, gjeneral Mouroutsos, gjeneral Rintis, gjeneral Dimitrov dhe së fundi gjeneral Karamunchev. Një urim dhe përshëndetje të veçantë dëshiroj t'i adresoj gjithashtu edhe stafit aktual, si dhe gjithë atyre ushtarakëve e civilëve të angazhuar pranë këtij ekipi, gjatë tërë këtyre viteve. Kolegët nga vendet mike dhe aleate si Italia, Greqia, Turqia, Anglia, Spanja, Bullgaria etj, kanë ditur të transmetojnë vlerat më të mira dhe njëkohësisht të japin kontributin e tyre në mbarëvajtjen e punës së këtij institucioni. Duke përfunduar fjalën time më lejoni që t'ju uroj suksese të mëtejshme në angazhimet tuaja në të ardhmen, si dhe shëndet e lumturi në familje.
Faleminiderit

Ministri Imami mori pjesë në Konferencën Rajonale me temë: "Integrimi në NATO në Evropën Juglindore"

Prioritetet dhe sfidat e Evropës Juglindore

Procesi i integrimeve euro-atlantike duhet të përfshijë të gjithë shtetet e Evropës Juglindore, pa përjashtim. Ishte ky mesazhi kryesor që u përcoll në përfundim të punimeve në konferencën rajonale mbi "Integrimet e NATO-s në Evropën Juglindore" që u mbajt në Bitola ( Maqedoni), më 30-31 maj, në të cilën morën pjesë ministrat e Mbrojtjes të Maqedonisë, të Shqipërisë, të Kroacisë, të Sllovenisë dhe të Turqisë, si dhe zv.ministrat e Mbrojtjes të Bosnje-Hercegovinës, Malit të Zi, Serbisë, përfaqësues të NATO-s, etj. Tema kryesore e konferencës u hap nga ministri i Mbrojtjes maqedonase, Zoran Konjanovski, e ndjekur nga ministrat e Mbrojtjes të pranishëm. Në konferencë u diskutuan dhe u shkëmbyen mendime mbi prioritetet dhe sfidat me të cilat ballafaqohet rajoni, si dhe mundësitë e rrugët për forcimin e dialogut dhe bashkëpunimit në fushën e sigurisë, i cili i shërben integrimit të mëtejshëm në NATO të vendeve të rajonit dhe forcimit të sigurisë rajonale. Ministri i Mbrojtjes Arben Imami gjatë fjalës së tij theksoi se, " në një botë globale është e rëndësishme që të vlerësohet se përveç rreziqeve tradicionale, janë shtuar rreziqet asimetrike që vijnë si rezultat i terrorizmit, krimit të organizuar, luftës informatike etj, rreziqe të cilat mund dhe duhet të përballohen nëpërmjet bashkëpunimit dhe veprimeve konkrete". Ministri i Mbrojtjes Imami u shpreh se është shumë i rëndësishëm forcimi i bashkëpunimit rajonal, i cili do të ndikojë ndjeshëm në rritjen e mëtejshme të sigurisë. "Bashkëpunimi me NATO-n, si dhe përpjekjet për anëtarësim në Aleancë të vendeve të rajonit, jo vetëm që i shërben paqes dhe stabilitetit, por i shërben edhe ndërtimit të urave të bashkëpunimit midis vendeve të Ballkanit", tha kreu i Ministrisë së Mbrojtjes Imami. Me tej, ai nënvizoi domosdoshmërinë e një përqasje të përbashkët në përballimin e sfidave të reja të sigurisë, ku përpjekjet dhe objektivi për anëtarësim në NATO do të ishin forca shtytëse drejt suksesit. "Përfshirja e të gjithë vendeve të rajonit në organizatat e sigurisë kolektive është një element i rëndësishëm. Në këtë kuadër, Republika e Kosovës, si një realitet i ri, e konsideruar si një histori suksesi nga NATO, duhet të zërë vendin e saj në organizatat e sigurisë, si në ato rajonale, ashtu edhe më gjerë", tha ministri Imami. Në këtë kuadër, sekretari i Shtetit në Ministrinë e Mbrojtjes të Serbisë, Zoran Jeftik, tha se vendi i tij nuk e njeh Republikën e Kosovës dhe se nuk ka një proces të hapur ndërkombëtar për këtë çështje, por se ata do të përdorin mekanizma diplomatike në angazhim të paqes, sigurisë dhe në integrimin Euro-Atlantik të këtij rajoni. Ndërkohë, ministri slloven i Mbrojtjes Ljubica Jelushic theksoi se, perspektiva euro-atlantike e të gjitha vendeve në këtë rajon janë prioritet i politikës së jashtme të sigurisë së Sllovenisë. Gjatë konferencës, ministri i Mbrojtjes Arben Imami pati një takim me ministren e Mbrojtjes të Sllovenisë, Ljubica Jelusiç. Ata vlerësuan marrëdheniet shumë të mira që ekzistojnë midis vendeve tona dhe shkëmbyen mendime mbi mundësitë e zgjerimit të mëtejshëm të marrëdhënieve në fushën e bashkëpunimit ushtarak, si dhe për kontributin e përbashkët në mbështetje të vendeve të rajonit tonë në realizimin e objektivit të tyre për anëtarësimin në NATO. Të dy ministrat ishin të mendimit se, Forca e Sigurisë e Kosovës ka bërë përparime të dukshme në përgatitjen e saj profesionale sipas standardeve të NATO-s. Ata ndanë të njëjtin mendim se, integrimi sa më i shpejtë i Kosovës në strukturat euro-atlantike do t'i shërbejë forcimit të situatës së sigurisë në rajon.
Me këtë rast, ministri Imami e ftoi ministren sllovene të Mbrojtjes për një vizitë zyrtare në Tiranë, e cila e priti me kënaqësi.