Aktivitete & AnalizëDirektiva e Mbrojtjes 2012
Reformat intensive të ndërmarra në kuadër të ristrukturimit dhe modernizimit të Forcave tona të Armatosura, politika e jashtme dhe diplomacia aktive dhe mbi të gjitha anëtarësimi i Shqipërisë në NATO e kanë çuar në një stad të ri e cilësisht më të lartë nivelin e sigurisë duke e lidhur në mënyrë të pashmangshme me sigurinë e mbrojtjes kolektive të Aleancës.
Viti 2011 shënoi një numër arritjesh, ndër të cilat spikasin pjesëmarrja në operacionet e NATO me një angazhim të lartë në raport me numrin e popullsisë, zhvillimin e stërvitjeve duke përdorur sistemet e NATO për vlerësimin e kapaciteteve luftarake, inicimin e rishikimit të dokumenteve strategjikë të mbrojtjes, vazhdimi i procesit të modernizimit, i cili kulmoi me nxjerrjen në det të anijes “ORIKU”, modernizimin e strukturës duke ulur ndjeshëm burokracitë, ndihmën ndaj komunitetit, shkatërrimin e municioneve të tepërta, etj.
Të gjitha këto arritje, por jo vetëm, e kanë shndërruar Forcën tonë të Armatosur në një anëtare të denjë të NATO. Direktiva e Mbrojtjes për vitin 2012 mbështetet në synimet dhe kërkesat e dokumenteve themelore të politikës së sigurisë e mbrojtjes së vendit, në përgjegjësitë kushtetuese e ligjore të Ministrit të Mbrojtjes që rrjedhin nga programi i qeverise për mbrojtjen, si dhe në dokumentet themelore politike e të mbrojtjes të NATO dhe BE.
Viti 2012 përkon me 100 vjetorin e pavarësisë së Shqipërisë e në këtë kuadër edhe me 100 vjetorin e krijimit të Forcave të Armatosura. Ky përvjetor historik do festohet me madhështi si në tërë vendin tonë edhe në strukturat e Forcave te Armatosura. Organizimi dhe zhvillimi i festimeve të 100 vjetorit të krijimit të FA, të jetë në qendër të përpjekjeve e angazhimit të tërë strukturave duke filluar nga Shtabi i Përgjithshëm i FA.
Nisur nga sa me lart, kjo Direktivë të përbëjë bazën, në të cilën të mbështeten planet dhe programet e punës e të veprimtarive të të gjitha strukturave të Ministrisë së Mbrojtjes e të Forcave të Armatosura në përmbushje të misionit kushtetues si dhe detyrimeve që rrjedhin si vend anëtar i NATO. Ky Dokument është orientues, por zbatimi i tij ngarkon me përgjegjësi Shtabin e Përgjithshëm të FA dhe stafin e Ministrisë së Mbrojtjes të bashkërendojnë përpjekjet dhe veprimtaritë e nevojshme për përmbushjen e saj.
