KulturëNë QKMBM përkujtohet 63-vjetori i ansamblit “Kuvendi” i Zall-Dardhës
29 qershor 2012
Në kuadër të 100-vjetorit të Pavarësisë, Qendra e Kulturës Medias dhe Botimeve të Mbrojtjes në zbatim të strategjisë së Ministrisë së Mbrojtjes për një komunikim sa më aktiv me publikun dhe në bashkëpunim me shoqatën artistike kulturore “Vala e Drinit” dhe me komunën Zall-Dardhë, rrethi Dibër, organizuan sot në sallën e madhe të shfaqjeve të QKMBM, aktivitetin në përkujtim të 63-vjetorit të ansamblit “Kuvendi” Zall-Dardhë.
Të pranishëm në këtë aktivitet ishin: shefi i Shtabit të Përgjithshëm i Forcave të Armatosura, gjeneralmajor Xhemal Gjunkshi, kryetari i shoqatës kulturore “Vala e Drinit”, z. Kujtim Çerpja, kryetari i Komunës Zall-Dardhë, z. Njazi Cani, qytetarë të ardhur nga komuna e Zall-Dardhës, ushtarakë dhe familjarë të tyre, sidomos me origjinë nga kjo trevë, etj.
Fillimisht të pranishmit vizituan ekspozitën me rreth 50 fotografi të ansamblit “Kuvendi” të Zall-Dardhës, ku shpalosej historia dhe aktiviteti i këtij ansambli ndër vite, e cila ishte hapur në hollin kryesor të Qendrës se Kulturës, Medias dhe Botimeve të Mbrojtjes.
Më pas, të pranishmit morën pjesë në punimet e sesionit shkencor kushtuar personaliteteve të trevës së Zall-Dardhës dhe Reçit. Kështu u ndoqën me vëmendje kumtesat kushtuar jetës dhe veprës së kompozitorit të mirënjohur, Muharrem Xhediku, këngëtarit popullor virtuoz dibran Haziz Ndreu, drejtuesit për shumë vite të ansamblit “Kuvendi” të Zall-Dardhës etj. Pas prezantimit të kumtesave kushtuar figurave të shquara të trevës së Dibrës, për të pranishmit u shfaq një dokumentar kushtuar ansamblit “Kuvendi” të Zallë-Dardhës, ku u shpalosën vlerat historike dhe kulturore ndër vite të krahinës së Dibrës. Në këtë ceremoni festive nuk munguan edhe interpretimet e këngëve dibrane nga artistë të mirënjohur të këtij ansambli si Liri Rasha, Shaban Mziu, Qerim Sula, Caje Poleshi, Sherif Dervishi, Viktor Paloka etj, të cilët kanë sjellë emocione të mëdha, duke marrë edhe duartrokitje të shumta nga spektatorët e pranishëm që kishin mbushur plote sallën.
Në fund të këtij aktiviteti festiv shoqata “Valët e Drinit” dha diploma për disa nga përfaqësuesit e saj që kanë dhënë një kontribut të shquar për këtë ansambël ndër vite. Me “Diplomë Mirënjohje” është vlerësuar edhe Shtabi i Përgjithshëm i Forcave të Armatosura për mbështetjen në zhvillimin e aktivitetit të 63-vjetorit të krijimit të ansamblit “Kuvendi” Zallë-Dardhë në Qendrën e Kulturës, Medias dhe Botimeve të Mbrojtjes. Diploma i është dorëzuar shefit të Shtabit të Përgjithshëm të FA, gjeneralmajor Xhemal Gjunkshit.
Në fjalën përshëndetëse gjeneralmajor Gjunkshi ka falënderuar të gjithë organizatorët e këtij aktiviteti të mrekullueshëm. “Është për t’u vlerësuar mënyra e organizimit të këtij aktiviteti, mënyrë e cila në këndvështrimin tim është me të vërtetë maksimal. Zall-Dardha, Dibra ka me të vërtetë njerëz të mrekullueshëm, ashtu siç ka pasur, ka dhe do vazhdojë të ketë talente të mrekullueshme, siç është Liri Rasha, Qerim Sula, Caje Peleshi etj”, është shprehur gjeneralmajor Gjunkshi. Në përfundim të fjalës së tij, shefi i Shtabit të Përgjithshëm, gjeneral major Xhemal Gjunkshi ka nënvizuar se mbështetja ime dhe e Shtabit të Përgjithshëm të FA nuk do të mungojë asnjëherë për organizimin dhe zhvillimin e aktiviteteve të tilla që promovojnë dhe evakuojnë vlerat historike dhe kulturore të popullit tonë.
