FA, konsolidim i gjithanshëm në tre vite reforma intensive *

Forcat tona të Armatosura po shkojnë drejt konsolidimit të plotë përsa i përket kolonave bazë zhvillimore. Së pari, rritjes së kapaciteteve operacionale dhe rritjes së ndërveprueshmërisë në kuadër të Aleancës së Atlantikut të Veriut. Nëse tre vjet më parë ne kishim vetëm forca që kryenin mbështetje e ruajtje, sot tipologjia e operacioneve që kryejmë në Afganistan është zgjeruar duke plotësuar të gjithë gamën e operacionalitetit të një Force të Armatosura të një vendi të vogël. Forcat tona Speciale janë të angazhuara në operacione luftarake në teatrin më të vështirë të luftimit në Afganistan; një ekip mjekësor ofron mbështetje shëndetësore; kemi oficerë të angazhuar në shtabet të ndryshme në të gjitha rajonet e Afganistanit; një ekip OMLT-je në bashkëpunim me SHBA-në ofron trajnimin e Forcave të Sigurisë të Afganistanit; ndërsa një ekip i policisë ushtarake trajnon homologët afganë. Mendoni një vend që para 100 vjetësh mund të mos ishte fare në hartën e Evropës, një vend i vogël që me përpjekje, por me vullnet të madh për liri dhe paqe mbas 100 vjetësh, jo vetëm që anëtarësohet në Aleancën më të fuqishme të të gjitha kohërave, por ndihet tashmë një vend dhe një Forcë e Armatosur e integruar brenda saj, për të dhënë  kontributin e vet për paqen, lirinë dhe sigurinë kudo në botë.

Tre vite mbas këtij anëtarësimi, ndihemi të konsoliduar jo vetëm në misionet tona, por edhe në fusha të tjera me rëndësi të posaçme. Javën e kaluar ne mbyllëm përfundimisht demontimin e municioneve të tepërta në poligone të hapura, çka tregon se programi ynë i demilitarizimit të ushtrisë, të heqjes së asaj barre të rëndë që regjimi komunist i kishte lënë FA-ve, po përfundon me sukses të plotë. Brenda këtij muaji do të shohim edhe një shpërthim të fundit simbolik në mënyrë që kjo ngjarje të shënojë pikën fundore të një procesi të gjatë, jo pa kosto, jo pa dhimbje, jo pa një angazhim dhe sakrificë të të gjithë ushtarakëve tanë. Janë me miliona ton/km municionet që janë demontuar gjatë këtyre viteve në poligonet tona dhe me qindra ushtarakë të angazhuar çdo ditë në këtë proces. Kjo ka qenë kolona e dytë e rëndësishme e politikave të Ministrisë së Mbrojtjes dhe Forcave tona të Armatosura dhe ne po e përmbyllim me sukses.  Për të qenë një ushtri e vërtetë e NATO-s, FA nuk mund të bëhen profesionale pa pasur kapacitetet e duhura planëzuese. Në fakt, gjatë gjithë vitit të shkuar e deri tani Shtabi i Përgjithshëm i FA-së dukshëm ka rritur kapacitetet planëzuese, duke e përmbyllur me sukses Konferencën e Pestë me Komandën e Transformimit të Aleancës (ACT). Ne sot jemi të lumtur për faktin se FA sot kanë kapacitete për të planëzuar njësoj si të gjitha vendet anëtare të NATO-s. Për këtë falënderoj Shtabin e Përgjithshëm, të gjitha komandat që janë përfshirë gjatë një viti e gjysmë në një proces të mundimshëm, të lodhshëm, që kërkon kapacitete profesionale dhe intelektuale, që këtë ushtri ta kthejmë me të vërtetë në një ushtri të NATO-s. Ndërkohë, nuk  mund të rri pa përmendur punën e bërë për rishikimin e Strategjisë së Mbrojtjes, Planifikimin e Mbrojtjes, Menaxhimin e Burimeve Njerëzore, Standardizimin, Arsimimin, Logjistikën etj, çka tregojnë që planëzimi në këtë forcë kryhet në mënyrë të integruar. Është bërë një punë e madhe e cila vijon edhe më tej për realizimin e Objektivave të Forcës, për Strategjinë Ushtarake, për integrimin e kësaj Force në strukturat e NATO-s, dhe të gjitha këto së bashku dalin si një produkt i vetëm.

 Gjithashtu, duke u nisur nga dita e parë që kemi marrë detyrën, ka ecur me ritme të larta puna për reformat strukturore, administrative dhe institucionale, që nga Plani i Përhapjes i vitit 2009, me ristrukturimin e Ministrisë së Mbrojtjes, vendosjen e stafit të integruar të saj dhe të Shtabit të Përgjithshëm. Kanë vazhduar me rishqyrtimin e këtij plani përhapjeje, rishikimin e tij, shtrirjen e tabelave të reja të organizimit, të cilat do të mbyllin përfundimisht çdo reformë strukturore në Forcat tona të Armatosura, brenda muajit korrik të vitit 2012. Kështu, ne konsolidohemi edhe në këtë fushë.

Kjo nuk do të thotë se nuk kemi sfida të tjera përpara. Dy sfidat tona kryesore janë: Personeli dhe Transporti. Në drejtim të menaxhimit të personelit, përcaktimit të politikave dhe hartimit të dokumenteve themelorë është bërë një punë e madhe përgjatë vitit të kaluar dhe këtij viti. Viti që vjen do të jetë viti i konsolidimit përfundimtar të politikave për menaxhimin e burimeve njerëzore. Do të kryejmë implementimin serioz, të ndershëm, të paanshëm të kësaj politike, e cila do të rris më tej kapacitetet tona, sepse nëse ka një gjë me të vërtetë të çmuar, tek e cila ne me të vërtetë mbështetemi, nëse ka diçka e cila na ka nderuar dhe përfaqësuar, ky është ushtari, nënoficeri, oficeri i Forcave tona të Armatosura. Ky është thesari i kësaj ushtrie dhe të gjithë së bashku duhet të bëjmë përpjekjet maksimale ta ruajmë dhe ta zhvillojmë atë.
Sfida jonë e dytë do të jetë rregullimi përfundimtar i çështjes së transportit në Forcat tona të Armatosura, pasi pajisja e Forcës Detare me anije të reja moderne dhe i Forcës Ajrore me helikopterë nga më modernët në qarkullim konsiderohet e konsoliduar tashmë. Projekti i modernizimit të mjeteve të transportit të Forcave të Armatosura do të jetë projekti i ardhshëm më madhor, i cili do të ketë ndikim të veçantë në rritjen e operacionalitetit të Forcave Tokësore dhe veçanërisht të trupave që marrin pjesë në misione.

Dua të kujtoj me dhimbje dhe me krenari veprën heroike të Dëshmorit të Atdheut, të kapitenit Feti Vogli, i cili dha jetën në krye të detyrës duke mbrojtur shokët dhe lirinë e një populli që po vuan nga një intolerancë, nga ekstremizmi ideologjik, nga fanatizmi fetar dhe prapambetja. Kjo është arsyeja që ne shkojmë atje, kjo është arsyeja që ju shkoni atje për të dhënë një ndihmë dhe një kontribut për paqen si parakusht për zhvillimin e atij vendi. Kapiten Vogli me trimërinë dhe sakrificën e tij është shembull frymëzues i ushtrisë tonë, është modeli më i mirë i qytetarit të një shoqërie demokratike dhe vendi të lirë. Me aktin e tij sublim ai përjetësoi emrin e tij, të familjes së tij, përjetësoi kombin shqiptar. Ne jemi krenar për kolegun tuaj. Lavdi të përjetshme Dëshmorit të Atdheut Feti Vogli. Lavdi dëshmorëve të kombit! Ju ushtarë, nënoficerë dhe oficerë jeni profesionistë, jeni trima dhe të përgatitur më së miri për detyrën që ju kanë ngarkuar populli shqiptarë, Parlamenti i këtij vendi dhe Forcat tona të Armatosura. Ne besojmë tek ju, aleatët tanë mbështeten tek aftësitë dhe besueshmëria juaj. Dëshiroj t’ju përgëzoj për këtë, për përkushtimin, vendosmërinë dhe profesionalizmin e treguar gjatë fazës së stërvitjes dhe trajnimit tuaj. Ju tashmë, njësitë tuaja kanë krijuar një traditë të shkëlqyer të angazhimit të vendit tonë në ruajtjen e paqes, ndaj jam i bindur që ju do të vazhdoni në rrugën e duhur për të përfaqësuar vlerat më të mira të ushtrisë tonë, të vendit tonë dhe të kombit tonë. Ju keni gjithçka që ju nevojitet, megjithëse ne do të vijojmë të punojmë edhe më shumë për t’ju pajisur me çdo gjë të nevojshme, të duhur, por përgatitja, stërvitja në veçanti e “Eagle 5”, ka dhënë rezultate të shkëlqyera, të provuara tashmë në fushën e betejës. Ju keni treguar edhe trimërinë e ushtarit shqiptar për t’i dalë ballë detyrave e për t’i kryer ato me dinjitet. Ju jeni krenaria e Forcave tona të Armatosura, ju lartësoni dinjitetin e shqiptarëve dhe për këtë ne jemi të gjithë krenar. Jam i bindur se do të shkoni me kokën lart dhe do ta ktheni me nder flamurin shqiptar. Kthehuni shëndoshë e mirë në atdheun tuaj, pranë prindërve tuaj, pranë fëmijëve dhe bashkëshorteve tuaja!

* Fjala e ministrit të Mbrojtjes, z. Arben Imami mbajtur në ceremoninë e nisjes së kontingjenteve paqeruajtëse në Afganistan