LajmeMirënjohje për ish-Ansamblin Artistik të Ushtrisë
25 maj 2013
Qendra e Kulturës, Medias dhe Botimeve të Mbrojtjes (QKMBM) organizoi sot një aktivitet mjaft mbresëlënës të titulluar “Mirënjohje për ish-Ansamblin Artistik të Ushtrisë”. Qëllimi i këtij aktiviteti ishte kujtimi dhe mirënjohja për të gjithë ata figura të shquara që formuan, krijuan dhe zhvilluan ish-Ansamblin Artistik të Ushtrisë, këtë institucion me emër dhe të mirënjohur prej dekadash në mbarë vendin tonë dhe që ka lënë gjurmë e bërë histori në botën e artit shqiptar. Salla e madhe e QKMBM-së ishte e mbushur plot me ish-drejtues, dirigjentë, regjisorë, këngëtarë, valltarë dhe artisë të tjerë që kanë punuar e shërbyer ndër vite në ish-Ansamblin Artistik të Ushtrisë. Ishte e pranishme edhe znj. Donika Çapi, drejtore e kabinetit të ministrit të Mbrojtjes, ushtarakë dhe familjarë të tyre, etj.
Ministri i Mbrojtjes Imami dekoron dy ekspertë amerikan
24 maj 2013
Në Ministrinë e Mbrojtjes është organizuar sot një ceremoni e veçantë me rastin e dekorimit me medaljen “Për Shërbime të Shquara” të z. Robin Sakoda dhe z. Jaan Muruets, dy ekspertë amerikan që kanë kontribuar në procesin e hartimit të Dokumentit të Rishikimit Strategjik të Mbrojtjes. Në këtë ceremoni ishin të pranishëm ministri i Mbrojtjes, z. Arben Imami, zëvendësministrat e Mbrojtjes, z. Arian Starova dhe znj. Arta Musaraj, zëvendësshefat e Shtabit të Përgjithshëm të FA, gjeneralmajor Viktor Bërdo dhe gjeneral brigade, Sandër Lleshi, gjeneralë, drejtorë dhe ushtarakë të tjerë të lartë të Ministrisë së Mbrojtjes dhe Shtabit të Përgjithshëm të FA.
Ministri i Mbrojtjes Imami priti shefin e Shtabit të Përgjithshëm të FA të Turqisë
24 maj 2013
Sot paradite, ministri i Mbrojtjes, z. Arben Imami ka pritur në një takim shefin e Shtabit të Përgjithshëm të FA të Turqisë, gjeneral Necdet Özel, i cili po bën një vizitë zyrtare në vendin tonë.
Ministri i Mbrojtjes Imami, duke iu drejtuar gjeneral Necdet Özel, u shpreh se, jam shumë i lumtur që ju po vazhdoni vizitën në Ministrinë e Mbrojtjes dhe shpresoj që Tirana t’ju ketë pëlqyer dhe t’ju ketë pritur ngrohtë. “Marrëdhëniet midis dy vendeve dhe ushtrive tona janë të shkëlqyera. Bashkëpunimi shtrihet në të gjitha fushat dhe dua t’iu falënderoj për ndihmën e veçantë që ju keni dhënë në fushën e arsimimit me pajisjet teknike, por ushtarakët tanë gjithashtu së bashku ndodhen në operacionet e NATO dhe kjo është një shprehje e mirëbesimit reciprok”, - ka theksuar ministri Imami.
Zëvendësministrja e Mbrojtjes, Arta Musaraj priti zëvendësministrin e Forcës së Sigurisë së Kosovës
23 maj 2013
Zëvendësministrja e Mbrojtjes, prof. dr. Arta Musaraj ka pritur në një takim të veçantë zëvendësministrin e Forcës së Sigurisë së Kosovës, z. Bejtush Gashi dhe zëvendëskomandantin e FSK, gjeneralmajor Gëzim Hazrolli. Qëllimi i kësaj vizite ishte bashkëpunimi në fushën e sigurisë dhe të mbrojtjes midis dy ministrive dhe dy forcave, si dhe intensifikimi i marrëdhënieve në të ardhmen. Zëvendësministrja e Mbrojtjes, Musaraj pasi ka falënderuar homologun e saj Gashi për vizitën në Tiranë, u shpreh: “Midis Shqipërisë dhe Kosovës ka një bazë nisje shumë të fortë, pasi bashkëpunimi i deritanishëm në fushën e mbrojtjes, mbështetja në proceset integruese në NATO, si dhe të strukturimi i FSK dhe sistemit të mbrojtjes së Kosovës në përgjithësi është një bazë shumë e mirë fillimi, është bashkëpunim i strukturuar. Sot, ne, falë ndërveprimeve, kemi struktura të përbashkëta që kanë synim detyra të mirëfillta në arritjen e objektivave të caktuara në kuadër të këtij bashkëpunimi".
Zhvillohet në Tiranë, konferenca e 7-të e shefave të Shtabit të Përgjithshëm të vendeve të Ballkanit
22 maj 2013
Në ambientet e Hotel “Tirana Internacional” ka nisur sot, punimet konferenca e 7-të e Iniciativës së shefave të Shtabit të Përgjithshëm të vendeve të Ballkanit. Në këtë konferencë marrin pjesë shefat e Shtabit të Përgjithshëm të FA të Shqipërisë, Bosnje dhe Hercegovinës, Bullgarisë, Greqisë, Maqedonisë, Malit të Zi, Serbisë, Turqisë dhe Rumanisë. Gjithashtu, me statusin e të ftuarit marrin pjesë shefat e Shtabit të Përgjithshëm të Kroacisë dhe Sllovenisë, si dhe përfaqësues të lartë ushtarakë të NATO dhe Bashkimit Europian.
