Ministrja e Mbrojtjes Olta Xhaçka intervistë në Abc News

Në studio jam me ministren e Mbrojtjes zonjën Olta Xhaçka. Mirëserdhët zonja ministre!

Mirë se ju gjej, faleminderit për ftesën!

Kënaqësi t’ju kemi në studio. Ka qenë një situatë fundjavën e kaluar, sërish situatë përmbytjesh. Si është situata? Keni bërë një llogari paraprake? Dhe sa ndërhytë për ta parandaluar këtë situatë?

Në fakt sigurisht që bëjmë llogari paraprake gjatë gjithë kohës, sidomos tanimë që Emergjencat Civile janë fushë - përgjegjësi e Ministrisë së Mbrojtjes. Përgjegjësia edhe detyrimi ynë është shumë më i madh jo vetëm për të reaguar në momentin e fatkeqësive natyrore, të përmbytjeve apo të motit të keq. Duke pasur mision kryesor ruajtjen dhe shpëtimin e jetëve njerëzore pikësëpari po pastaj edhe të gjitha dëmeve që vijnë më pas, por edhe një përgjegjësi të shtuar për të mbajtur le të themi, për të bërë një farë presioni tek të gjithë ata aktorë që kanë një rol në parandalimin e emergjencave civile. Që nga momenti i marrjes së detyrës kam përjetuar dy emergjenca civile, ajo që ndodhi në dhjetor dhe ajo që ndodhi tashmë. Mund të themi që pavarësisht se situata ka qenë e ngjashme, dëmi që është krijuar është shumë herë më i vogël nga ai i dhjetorit. Vlen të thuhet që kemi pasur një koordinim shumë të mirë mes të gjithë aktorëve, mes gjithë institucioneve shtetërore që janë përgjegjës për reagimin ndaj emergjencave civile, veçanërisht me Ministrinë e Brendshme, me Ministrinë e Infrastrukturës, me Ministrinë e Bujqësisë, por edhe me të gjithë entet e tjera dhe të gjitha agjencitë që kanë një përgjegjësi në menaxhimin e emergjencave. Edhe roli i prefekturave, por edhe i bashkive vlen të theksohet në këtë koordinim shumë të mirë që, besoj unë, ka qenë receta e suksesit për përballimin me sukses të një situate që ka qenë shumë problematike për të gjithë ne, veçanërisht për ata banorë, të cilët kanë përjetuar dëme në shtëpitë e tyre, në të mbjellat e tyre, në tokën e tyre bujqësore.

E kuptoj... Si është bashkëpunimi me pushtetin vendor? Jam kurioze ta di këtë sepse sa herë ka përmbytje ne shikojmë thuajse të njëjtën problematikë. Pra, kemi, shkarje dherash, do shohim pak më vonë edhe me video një pallat në Gjirokastër që është bërë çështje tani. Është një pallat i cili 10 vjet më parë është ndërtuar, si duket toka që në fillim ka qenë e tillë, që rrëshqiste. Nuk e di, nuk e dimë ne gazetarët. Çështja është marrë nga prokuroria dhe gjykata tani. Por ne shohim njerëz të dëshpëruar të cilët kanë vënë alarmin prej kohësh që ky pallat nuk mban, toka po rrëshqet etj., etj. Bien shira, situata rëndohet. Çfarë duhet bërë që mos të ndodhi kjo gjë? Si është bashkëpunimi mes jush, mes autoritetit qendror dhe autoriteti vendor?

Aktualisht është shumë e rëndësishme që të ketë një informim paraprak mbi të gjitha parashikimet që ne kemi për një mot të keq që mund të sjellë fryrjen e lumenjve dhe pastaj vërshimin e tyre për të shkaktuar dëme tek popullsia. Dhe ky moment është shumë i rëndësishëm dhe kyç, le të themi, për të marrë disa masa parandaluese. Dhe pastaj koordinimi hap mbas hapi për reagimin. Ama, sa i takon parandalimit dhe marrjes së të gjitha masave për të lehtësuar sadopak dëmin që mund të shkaktohet nga emergjenca civile, që jo gjithmonë i kemi në dorë, se të paktën me motin e keq, reshjet e furishme, ne nuk mund të hamë inat, le të themi në gjuhë popullore. E megjithatë edhe pushteti vendor ka një rol dhe një përgjegjësi jashtëzakonisht të posaçme në këtë proces. Nuk mund të them se e ka kryer, të paktën sot që e shikoj nga optika e një institucioni që është përgjegjës për Emergjencat Civile, nuk mund të them se e ka kryer me përgjegjësinë e vet maksimale. Në ligjin aktual për Emergjencat Civile, bashkitë, pra pushteti vendor, duhet të dedikojë deri në 3% të buxhetit të vet për Emergjencat Civile; që do të thotë edhe fonde për marrjen e masave për parandalimin e situatave që janë tanimë të njohura, ose të përsëritura, për të mirëmbajtur rrugë, për të mirëmbajtur ndoshta edhe situata si ajo që kemi parë në Gjirokastër. Por jo vetëm kaq! Edhe për të koordinuar pastaj me të gjithë aktorët kur kjo mundësi nuk ekziston. Dhe për të pasur të dhëna sa më shkencore ashtu siç parashikon ligji për të bërë kërkesë pastaj për më tepër nga ç’mund të alokojë dhe ç’mund të bëjë vet. Fatkeqësisht nuk mund të themi se kjo është respektuar nga të gjithë aktorët dhe nga të gjitha bashkitë. Pra kemi pasur bashki ku situata është e përsëritur edhe për shkak të ndërtimeve pa leje, edhe për shkak të problematikave të ndryshme që vijnë nga zhvillimi kaotik i këtyre 27 viteve. Po themi shumë banorë të cilëve kanë gjetur tokën dhe kanë ndërtuar buzë lumenjve atje ku nuk mund të ndërtohet edhe fatkeqësisht tanimë vuajnë pasojat e një përmbytjeje të përsëritur. Por është shumë e rëndësishme të thuhet që ne sot jemi duke parë të gjitha përgjegjësitë e të gjithë aktorëve përmes disa ndryshimeve ligjore, që mund t’i konsiderojmë edhe një reformë në Emergjencat Civile; për të evidentuar se cilat janë përgjegjësitë edhe për t’i ndarë këto përgjegjësi pak më mirë.

Do të ndërhyni për të pasur një rregullator në ligjin aktual, në legjislacionin aktual, në marrëdhënie mes jush dhe pushtetit vendor?

Ekzaktësisht! Sepse nuk mund të jetë ushtria, apo më përpara policia, që është le të themi reaguesi i parë. Duhet të jetë bashkia përmes një planifikimi shumë të mirë për mirëmbajtjen e zonës së vet të përgjegjësisë, marrjen e masave parandaluese në ato zona ku përmbytjet apo emergjencat janë të përsëritura dhe pastaj sigurisht mund të ndërhyjmë me polici, me ushtri apo me këdo tjetër për të përballuar një emergjencë, e cila ka mbërritur atje ku nuk menaxhohet më. Vlen të thuhet që pushteti vendor ka një përgjegjësi shumë të posaçme edhe si reagues i parë, por edhe si parandalues i një procesi, i cili do të bënte minimizimin e dëmeve në rastet e një emergjence.

Cilat janë bashkitë më problematike? Më thatë që është një fond 3%, që çdo bashki duhet ta këtë për rastet e emergjencave civile. Cilat janë ato bashki që ju i keni gjetur në shkelje qoftë edhe të këtij 3%, apo në pamundësi vigjilence për një situatë të tillë?

Unë nuk mund t’ju bëj për momentin një panoramë të përgjithshme të kësaj situate. Di t’u them që një pjesë shumë e madhe e tyre janë në shkelje të këtij detyrimi pavarësisht se ligji nuk është komplet taksativ, sepse bashkitë mund të dedikojnë nga 0-3 %. Megjithatë kemi një dakordësi me prefekturat që mos të miratojnë buxhetin e bashkive nëse ato nuk parashikojnë për parandalimin e emergjencave civile, e megjithatë ky është një diskutim që do ta bëjmë në vijim në momentin që do të bëjmë një proces shumë transparent diskutimi për të gjetur mënyrën më të mirë për të ndarë përgjegjësinë me ligj të pushtetit vendor dhe atij qendror për përballimin por më së shumti për parandalimin e emergjencave. Megjithatë nga kërkesat që unë kam sot në MM për masive shkëmbore që rrezikojnë banesat dhe komunitetet, për ura, të cilat nuk ekzistojnë dhe janë shumë të rëndësishme për të lidhur komunitetet e izoluara me akset kryesore të rrugëve, me qendrat shëndetësore, me shkollat për fëmijët e tyre, shikoj që të gjitha këto janë kërkesa, të cilat mund të ishin marrë parasysh në buxhetimin që bëjnë bashkitë për komunitetet e tyre, sepse edhe urat që ndërton ushtria janë të përkohshme, nuk janë zgjidhje e përhershme. Urat bailey janë zgjidhje e përkohshme deri në momentin që bashkitë investojnë në infrastrukturë për të lidhur komunitetin me qendrat me shkollat. Pra për të lehtësuar jetën e tyre të përditshme, të fëmijëve, të të moshuarve, të atyre që kanë nevojë për kujdes mjekësor por është një gjë, e cila unë shikoj sot, në këtë detyrë, që është shumë e neglizhuar dhe synohet të përmbushet nga ushtria, e cila ka kapacitete shumë të limituara për të adresuar një kërkesë që është jashtëzakonisht e madhe.

Unë e di që nuk është në autoritetin tuaj, por është shembur ura e Hoshtovës, është dëmtuar ura e Orgockës, kjo e fundit është të paktën 300 - vjeçare. Nuk ka rëndësi nëse e ka Ministria e Kulturës, apo cila e ka, këtu po dëmtohen edhe monumente dhe dihet që prurja e lumenjve kur ka përmbytje do të dëmtojë gjërat në të cilat nuk vihet dorë. Pyetja është: po mendoni për një rakordim që kur të kemi një përmbytje prapë tjetër mos të themi u shemb edhe kjo ura monumentale; të dalin njerëz, të cilët përsëri përmbyten, përveç fajit që ata kanë. Pra, të vihet në maksimum bashkëpunimi midis shtetit edhe pushtetit vendor dhe pastaj për njerëzit që duan të zënë toka pa kolektor apo nuk punojnë për kanalet e tyre ujitëse dhe vaditëse bëjmë një tjetër apel. Ka vend besoj te ky rakordimi që sapo thashë pak më parë, sepse ato janë monumente, të paktën për këto monumente të cilat janë tona, janë kulturore, nuk ka rëndësi kush e ka dhe si e ka.

Urat monumentale fatkeqësisht mund të prishen për shkak të motit të keq dhe vërshimit të ujërave dhe kjo, fatkeqësisht, nuk është asnjë gjë që ne mund ta parandalojmë. Mirëmbajtja e tyre në rastet kur ato janë monument kulture ka përgjegjësi edhe pushteti qendror, por bashkia më së shumti ka përgjegjësi kryesore edhe për mirëmbajtje të urave, që në rastin konkret, ju çon Ministria e Mbrojtjes. Ne kemi pasur disa njoftime në media që janë prishur edhe disa ura që janë ndërtuar dhe inauguruar edhe prej meje si ministre e Mbrojtjes dhe në fakt vlen edhe këtu të thuhet që edhe këtu, edhe kur ne çojmë një urë, edhe kur ne krijojmë mundësinë që banorët të dalin nga izolimi dhe përmes urës të lidhen me rrugën kryesore, apo me qendrat shëndetësore dhe me shkollat. Edhe këtu përgjegjësia e bashkisë është e posaçme, sepse këmbët e urës i ngre bashkia, ne sjellim vetëm elementët metalikë që ndërtojnë urën. Sa më cilësorë të jetë puna e bashkisë në ndërtimin e këmbëve të këtyre urave aq më të qëndrueshme do të jenë këto ura në rastin e ndonjë emergjence, apo në rastin e vërshimit të lumenjve, apo përrenjve, ku këto ura janë. Dhe jo vetëm kaq por edhe mirëmbajtja e urave që ndërtojmë ne është sërish përgjegjësi e bashkisë, edhe përforcimi i këmbëve është sërish përgjegjësi e bashkisë, edhe hedhja e gurëve për të devijuar rrjedhën lumin...

Do të ketë përgjegjës për këta njerëz në kushtet që nuk bëjnë detyrën sepse prishen ura monumentale. Ne nuk po flasim vetëm për ura që janë shumë të rëndësishme për të lidhur dy komunitete. Ne po flasim për monumente kulturore që mbrohen nga shteti. Pra këtu shkelen shumë ligje, mbi të gjitha cenohet trashëgimia jonë kulturore, do të ketë përgjegjës për këta njerëz që ndoshta nuk e bëjnë mirë punën e tyre, kur të keni gjetjet tuaja?

Sërish, në rastin e urës monumentale nuk mendoj se është çështje përgjegjësish. Ju e dini që çdo gjë që është shpallur monument kulture nuk mund të trazohet, të përforcohet, meremetohet apo restaurohet përveç se nga ekspertë. Mirëmbajtja dhe historia është çështje e pushtetit vendor. Unë nuk besoj se në rastin e urës monumentale kjo është çështje përgjegjësish, por po, mendoj që atje ku të gjithë aktorët kanë përgjegjësi dhe është ceduar në përgjegjësitë e tyre drejtësia duhet të veprojë, prandaj edhe reforma në drejtësi, besoj që, do të zgjidhi shumëçka edhe për shumë gjërat, që nuk shkojnë në këtë vend.

Të shohim njëherë peshqit e mëdhenj dhe, kur të arrijmë deri tek ura, kushedi sa do jetë pastruar. Flasim për angazhimin e Shqipërisë në NATO. Kam parasysh angazhimin tonë në misionet paqeruajtëse. Sa cilësorë është bashkëpunimi ynë me NATO?

Bashkëpunimi ynë me NATO, për hir të së vërtetës, është shumë cilësor. Shqipëria është një vend i vogël dhe nga pikëpamja e numrave të FA ka një angazhim jashtëzakonisht të madh dhe tanimë është kthyer në një gjenerator sigurie përtej kufijve të vendit tonë. Sigurisht që përfshirja e vendit tonë në Aleancë është për ne një arritje shumë e madhe dhe shumë strategjike, e cila çon përpara interesin tonë kombëtar, në projektimin e sigurisë në kushtet e mbrojtjes kolektive të NATO. Për momentin, ne përfaqësohemi në disa misione dhe operacione të NATO dhe siç e thashë nga pikëpamja e numrit të Forcave të Armatosura, e vendit të vogël që ne jemi, por edhe të buxhetit që kemi dedikuar për mbrojtjen përfaqësimi ynë është më shumë sesa cilësor dhe renditemi në një ndër vendet me angazhimin më të madh të mbrojtjes kolektive dhe të projektimit të sigurisë. Aktualisht jemi në Afganistan, jemi në Kosovë, jemi në Bosnje dhe Hercegovinë, jemi në Mali, jemi në Letoni, jemi në detin Egje për vitin e dytë tanimë me një anije patrulluese, që besoj e keni parë edhe nga media ka shpëtuar shumë nga jetët e refugjatëve, të cilët kalojnë klandestinë deri në brigjet e Turqisë. Edhe është shumë e rëndësishme të theksohet që ky angazhim i joni vjen duke u rritur. Për momentin ne kemi 155 ushtarakë të angazhuar në misionet dhe operacionet e NATO jashtë vendit, por duke iu përgjigjur shumë pozitivisht strategjisë së presidentit Trump për Afganistanin, do të shtojmë kontributin tonë me 60% në Afganistan në 2018 dhe, nga 155 ushtarakë do të shkojmë në 215 ushtarakë për vitin 2018.

Buxheti, kam parasysh që SHBA kanë këmbëngulur gjithmonë që vendet anëtare të NATO të kenë një 2% të buxhetit të tyre të mbrojtjes për Aleancën, ne jemi në çfarë shifrash?

Ne jemi aktualisht në 1,2% të PBB si buxhet për Mbrojtjen. Sigurisht vlen të theksohet që rritja e buxhetit në masën 2% nuk është një sfidë vetëm për ne, është një sfidë për shumë vende të tjera, që janë aleate të NATO. Sigurisht është një sfidë, sepse për një vend të vogël si i joni, ku nevojat për kujdes shëndetësor më cilësor, për arsim më cilësor, për shërbime më cilësore, janë shumë të mëdha dhe është vështirë të justifikosh një buxhet gjithnjë e në rritje për mbrojtjen, në kushtet kur duket sikur se nuk ka rrezik eminent përballë, apo armik përballë. Megjithatë, buxheti për mbrojtjen është shumë i rëndësishëm, sepse na ndihmon të ecim përpara në rrugën e modernizimit të ushtrisë, në rrugën e rritjes së operacionalitetit të të gjitha strukturave tona ushtarake, që padiskutim i vijnë në ndihmë edhe përmbushin të gjitha objektivat e kapacitetit që ne kemi si vend anëtar i NATO. Kemi një skemë le të themi të dakordësuar me aleatët, veçanërisht me aleatin tonë amerikan, aleatin tonë strategjik, që buxheti i mbrojtjes të rritet inkrementalisht çdo vit dhe të kapi 2% deri në vitin 2023. Jemi duke ecur sipas këtij plani dhe kjo është shumë pozitive dhe kjo është një gjë që në fakt edhe në takimet që kam pasur gjatë Ministerialit të NATO, edhe me sekretarin e Përgjithshëm Stoltenberg, por edhe në të gjitha bilateralet e tjera me homologët tanë me të cilët kemi bashkëpunim të jashtëzakonshëm, është përgëzuar dhe është vlerësuar.

Në fakt ka një vëmendje të shtuar për këtë intervistë dhe, ajo që shoh nga kolegë gazetarë, ka një pyetje, si duket kur shohin përfaqësues të qeverisë, kemi një pyetje sa i përket marrëveshjes së detit Greqinë. Ka qenë ministria juaj e angazhuar në këtë marrëveshje dhe ku janë pikat, nëse keni ndonjë dijeni për këtë?

Në fakt kjo është një temë për të cilën vlen të diskutohet me Ministrinë e Jashtme. Ministri Bushati, kam përshtypjen, e ka bërë shumë të qartë pozicionin tonë. Sigurisht që do të jetë një marrëveshje shumë transparente, në interesin tonë kombëtar, por edhe në kushtet e fqinjësisë së mirë me Greqinë, që siç e keni dëgjuar edhe sot në deklaratat edhe të zonjës Mogherini, është një kusht shumë i rëndësishëm për anëtarësimin tonë në Bashkimin Evropian, për hapjen e negociatave.

Ishte një ndër 6 rekomandimet në fakt të Strategjisë së Zgjerimit. Do të jetë një marrëveshje e ndryshme nga e Berishës? Më e mirë se e Berishës? Ato 12 milje do t’ia falim Greqisë apo do të negociohet, apo akoma...?

Kjo nuk është për mua për ta thënë. Siç u thashë, është një marrëveshje, që do të jetë shumë transparente dhe në çdo rast, në çdo rast, shumë më e mirë se ajo e Berishës dhe, në çdo rast, në konformitet të plotë me interesin tonë kombëtar.

Këto 12 milje diskutohen?

Nuk është për mua për ta diskutuar.

Dakord. Si është marrëdhënia në qeveri? Kemi parasysh që reforma në drejtësi këto ditë, do t’ju pyes pak më vonë, ka nisur zbatimin. Janë bërë disa ndalime në nivele të caktuara, por si ndjehet, çfarë fryme ka qeveria në këtë moment?

Unë mendoj që edhe duke qenë pjesë e qeverisë dhe, duke ndjekur nga afër dinamikën e krijuar në punën e përbashkët, do t’ju thosha që është një marrëdhënie shumë kolegjiale, është një marrëdhënie shumë konstruktive, është një marrëdhënie shumë bashkëpunuese dhe, sa më takon, meqenëse kemi qenë duke kaluar edhe emergjencat civile, pjesa e përballimit me sukses të emergjencës është tregues i faktit që ka një bashkëpunim jashtëzakonisht të mirë mes të gjitha institucioneve, për të përmbushur atë që është misioni ynë kryesor, që t’i shërbejmë interesit të qytetarëve shqiptarë. Dhe besoj që të paktën në këtë situatë këtë e kemi treguar më së shumti që ka qenë një recetë suksesi që ka ardhur si pasojë e bashkëpunimit të të gjithëve dhe e gjetjes së fjalës, e koordinimit më të mirë të të gjithë aktorëve.

Strategjia e Zgjerimit ditën e sotme kishte perspektiva, të cilat u panë në këndvështrime të ndryshme. Ka gazetarë, analistë apo njerëz që e kanë njohur dinamikën e ecurisë së procesit të integrimit, të cilit thonë se nuk u tha ndonjë gjë shume e re, por në opinionin tuaj, mendoni se do të jetë qeveria juaj, e cila do të çelë negociatat me Bashkimin Evropian?

Unë besoj që nga çelja e negociatave me Bashkimin Evropian, nuk do të përfitonte më së shumti qeveria, por do të përfitonin të gjithë qytetarët shqiptarë, të cilët e kanë parësore aspiratën e tyre për t’u integruar në familjen evropiane. Dhe unë besoj që ne sot jemi në një udhëkryq shumë të rëndësishëm edhe, ky udhëkryq, na çon vetëm drejt Reformës në Drejtësi. Edhe besoj që Reforma në Drejtësi, është ai çelësi që besoj do të hapë një derë që do të çojë përpara procesin e integrimit përmes hapjes të negociatave dhe unë jam shumë shpresëplotë që kjo do të ndodhë. E megjithatë më vjen keq që e shoh këtë proces që të ndodhë mbrapsht, në sensin që, gjykoj që duhej të kishte ndodhur ndryshe: nuk duhet të kishte qenë qeveria që e do Reformën në Drejtësi, opozita që nuk e do Reformën në Drejtësi, apo populli dhe qytetarët, që nuk ndihen. Duhej të kishte e kundërta, duhej ta kërkonte rinia ose të rinjtë në emër të së ardhmes, duhej të ishte populli ose qytetarët që duhej ta mbështesnin, duhej të ishte opozita që bën presion dhe duhej të ishte qeveria që e miraton. Ndaj, sot e gjitha kjo që po shohim, veçanërisht me opozitën është mosdëshira për të bashkëpunuar për ta hapur këtë portë, pra për të çelur negociatat edhe për të shtyrë përpara interesin e 99% të shqiptarëve që aspirojnë për në familjen evropiane. Opozitën sot e kemi në parlament për të përfaqësuar vetëm 1% të atyre që kanë frikë nga Reforma në Drejtësi.

Opozita mendon se Reforma është selektive: zgjodhët një kryeprokurore; do të hetoni ata që do të dojë pozita, aq më tepër me ndalimin e disa ish-drejtuesve të LSI, dy prej tyre dhe një i PD, opozita mendon se gjithçka po bëhet me gjueti shtrigash?

Fatmirësisht i gjithë procesi i reformës ka qenë një proces kaq kolegjial dhe kaq transparent, sa nuk besoj se ka justifikim sot që mund të justifikojë atë që po bën opozita. Dhe për më tepër nuk ka qenë një proces i cili është iniciuar dhe përfunduar vetëm përmes vullnetit të qeverisë edhe përfaqësuesve të saj në të gjithë procesin e Reformës në Drejtësi. Përkundrazi, ka qenë një proces, i cili është asistuar nga partnerët tanë amerikanë dhe nga partnerët tanë evropianë. Dhe është një proces i bërë në frymën më të mirë të bashkëpunimit dhe të ligjit për një Reformë në Drejtësi, që do ta sillte Shqipërinë në parametrat e së drejtës, ashtu siç duhej të ishte dhe besoj se ky ishte interesi parësor i të gjithëve jo vetëm i qeverisë. Dhe nuk mund të kemi dy standarde në mënyrën se si i qasemi këtij problemi. Prandaj them se, sot ndodhemi në një udhëkryq shumë të rëndësishëm dhe Reforma në Drejtësi dhe bashkëpunimi me opozitën për reformën në Drejtësi, për ta çuar përpara këtë proces kaq të rëndësishëm për interesin e të gjithë shqiptarëve është shumë, shumë i rëndësishëm. Prandaj mendoj që dorën e bashkëpunimit nuk ja shtrijmë vetëm ne, por po ja shtrin gjithë populli shqiptar, për ta çuar përpara aspiratën e tyre.

Mendoni që reforma në Drejtësi do të penalizojë qoftë dhe anëtarë të qeverisë Rama apo deputetë të PS?

Por kjo nuk ka asnjë lidhje. Këtu nuk diskutohet se kë do të penalizojë Reforma në Drejtësi. Ne duam një shtet të së drejtës, që e shikon të drejtën në sy dhe i jep të drejtën atij që i takon dhe jo atij që është më i fortë apo atij që ka më shumë para. Nëse Reforma në Drejtësi do të kapë cilindo deputet të së majtës, të së djathtës, qofshin këta në opozitë apo në qeveri, kjo nuk ka absolutisht asnjë konsekuencë për këtë që po themi, për ta çuar Shqipërinë përpara, për ta jetuar Evropën këtu, brenda kufijve të vendit tonë dhe, pastaj, për të kërkuar për t’u integruar në Evropë. Dhe ky është një kusht shumë i rëndësishëm për të gjithë dhe kjo nuk ka lidhje fare me: kë do të kapë Reforma në Drejtësi apo kë nuk do të kapë Reforma në Drejtësi. Reforma në Drejtësi do t’u shërbejë të gjithë shqiptarëve çfarëdo qofshin këta, politikanë apo jo.

Si e shihi ju opozitën, kam parasysh mënyrën e të bërit opozitë në parlament, kemi parë seancën e zgjedhjes së prokurores së përgjithshme, kemi parë dhe seancën e fundit parlamentare, por ndërkohë opozita ka bërë dhe një protestë në datën 27 janar dhe ka paralajmëruar një protestë tjetër në datën 20 shkurt.
Ka frikë qeveria juaj se mund të rrëzohet nga këto protesta të opozitës dhe nga mënyra se si bën opozitë fronti opozitar përballë jush?

Unë kam qenë përfaqësuese e PS edhe kur kemi qenë në opozitë, pa diskutim kemi organizuar edhe ne protesta. Qeveritë nuk bien…

Keni bërë grevë ju...

Po edhe grevë urie kemi bërë dhe e kemi bërë në mënyrë shumë paqësore për të kërkuar një të drejtë. Në atë kohë ishte transparenca e zgjedhjeve dhe hapja e kutive. Asgjë nuk ndodhi, vetëm se dëmtuam shëndetin tonë, por besonim fort, se ajo ishte një mënyrë paqësore për të mbërritur një qëllim. Në atë kohë nuk ia dolëm dhe megjithatë, unë nuk besoj në asnjë rast se qeveritë e një vendi demokratik bien apo ngrihen përmes protestave. Kjo nuk ka shans të ndodhë! Por, respektoj të drejtën e çdo qytetari për të protestuar paqësisht për të gjitha ato gjëra që mendojnë se nuk shkojnë. Edhe për t’u përfaqësuar përmes zërit të opozitës, për atë alternativë qeverisëse që mendojnë se mund të jetë më e mirë. Megjithatë historia në fund fare ndahet në një vend demokratik me vota. Nuk ka qeveri që bie nga protestat! Por sërish e ritheksoj, e respektoj të drejtën e çdo kujt për të protestuar dhe asnjë e keqe nuk na vjen nga protestat, asgjë e keqe nuk na vjen nga zëri opozitar, mjafton që të jemi të gjithë bashkë atëherë kur kemi të bëjmë me interesin kombëtar.

Si po bëhet opozitë në parlament në këtë sesion?

Sërish do të them atë që kam thënë pak më përpara: mohuese e të gjitha proceseve të rëndësishme zhvillimore të vendit. Është shumë e rëndësishme që opozita të vijë në parlament për të përfaqësuar zërin e opozitarëve, për të përfaqësuar zërin e atyre që mendojnë ndryshe nga ne dhe, për të çuar përpara një axhendë, që ata mendojnë se është më e mirë për të përmirësuar ligjet që diskutohen atje, në të mirë të qytetarëve dhe në përputhje me interesin e tyre. Fatkeqësisht nuk po e bëjnë. Në këtë moment nuk diskutohet më për ligje, nuk diskutohet më për alternativat më të mira qeverisëse dhe programore, diskutohet vetëm për të penguar, vetëm për të shkatërruar dhe vetëm për të bllokuar rrugën e integrimit evropian të Shqipërisë. Dhe kjo nuk është aspak konstruktive dhe nuk është aspak demokratike.

Ju faleminderit zonja ministre!

Ju faleminderit dhe ju!

Submit to FacebookSubmit to Google PlusSubmit to TwitterSubmit to LinkedIn


Ministeriali i NATO, Xhaçka: 2% e PBB për FA deri në vitin 2024 4-5 tetor 2018Ministrja e Mbrojtjes, Olta Xhaçka mori pjesë në Ministerialin e Mbrojtjes së vendeve anëtare të Aleancës të Atlantikut të Veriut...
Buletini mujor nëntor 2018Ditari, të rejat kryesore nëntor 2018...
Ministrja Xhaçka vizitë zyrtare në SHBA 17-18 prill 2018Washington - Shtetet e Bashkuara të Amerikës e vlerësojnë Shqipërinë një aleat të denjë të NATO dhe vend lider në Ballkanin Perëndimor...
FA shpëtojnë nënën e sëmurë në Kukës27 shkurt 2018Pas 3 orë ecjeje në këmbë, Forcat Armatosura kanë arritur të transportojnë për në spitalin rajonal të Kukësit...
Ministeriali i NATO, takimi Stoltenberg - Xhaçka14 - 15 shkurt 2018Ministrja Xhaçka merr pjesë në takimin e ministrave të Mbrojtjes të vendeve anëtare të NATO në Bruksel...
Fotogaleri/FA angazhim maksimal për situatën e përmbytjeveNëntor - Dhjetor 2017Angazhimi i Forcave të Armatosura të Republikës së Shqipërisë për situatën e përmbytjeve.
NATO: Misioni i “Orikut” në Egje, moment i rëndësishëm për Forcat Detare shqiptare24 nëntor 2017Misionit të anijes patrulluese të forcës detare shqiptare “Oriku”, e cila ishte pjesë e operacionit të NATO-s, “Sea Guardian”, i është dedikuar një shkrim në faqen zyrtare të NATO-s...
BBC: Shqipëria rehabiliton varrezat e dëshmorëve pas dekadash të lëna në harresë15 nëntor 2017Prestigjiozja britanike BBC, i ka bërë jehonë nismës së Ministrisë së Mbrojtjes për rehabilitimin e varrezave të dëshmorëve...
Mbyllet takimi i shefave të Mbrojtjes të NATO17 shtator 2017Mbylli punimet formale Konferenca e Komitetit Ushtarak të NATO, e cila u zhvillua për herë të parë në vendin tonë...
Zhvillohet në Tiranë Konferenca e Komitetit Ushtarak të NATO16 shtator 2017Në vendin tonë ka nisur punimet Konferenca e Komitetit Ushtarak të NATO, e cila mbledh së bashku shefat e shtabeve të ushtrive të vendeve anëtare të Aleancës...
Intervistë me gjeneral Petr Pavel, kryetar i Komitetit Ushtarak të NATO15 shtator 2017Intervistë me gjeneral Petr Pavel dhënë për revistën "Mbrojtja"...
Zhvillohet stërvitja shqiptaro-britanike “Ushtar Eagle 17”14 shtator 2017Në kuadër të stërvitjes së përbashkët ndërmjet FA të Shqipërisë dhe FA të Mbretërisë së Bashkuar u zhvillua sot “Dita e Vizitorëve të Shquar” të stërvitjes “Ushtar Eagle 17”...
Programi qeverisës 2017-2021 për Sigurinë dhe Mbrojtjen13 shtator 2017Qeveria e re e RSH mori detyrën pas ceremonisë së betimit në Presidencë. Nga programi qeverisës 2017-2021 veçojmë pjesën që ka lidhje me Sigurinë dhe Mbrojtjen...
Kontributi i Forcave të Armatosura në infrastrukturëShtator 2017Ministria e Mbrojtjes dhe Forcat e Armatosura gjithmonë kanë treguar përkushtim dhe angazhim maksimal në ndihmë të popullsisë civile...
Bëhuni pjesë e Forcave të Armatosuraprill 2018Qendra e Personel Rekrutimit ka filluar regjistrimin e kandidatëve për ushtarë/detarë aktivë dhe kërkon të rekrutojë 100...
Strategjia UshtarakeKorrik 2015Në themel të Strategjisë Ushtarake të Republikës së Shqipërisë është aspirata e popullit shqiptar dhe vullneti politik për të realizuar vizionin e përbashkët...
Direktiva e Mbrojtjes 2018Shkurt 2018 Dokumenti bazë mbi planet dhe programet e punës e të veprimtarive të MM, të FA në përmbushje të misionit kushtetues, si dhe detyrimeve si vend anëtar i NATO...
Revista Mbrojtja Nr. 12 (2018) Dhjetor 2018Numri i fundit i revistës "Mbrojtja"...
Gazeta Ushtria 30 nëntor 2018Numri i fundit i të përjavshmes gazeta "Ushtria"...






Arkivi Lajmeve
Dhjetor 2018
Ma En Pr Sh Di
26 27 28 29 30 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 1 2 3 4 5 6