Fjala e ministrit të Mbrojtjes, z. Arben Imami në ceremoninë e përcjelljes së Kontingjentit Paqeruajtës të Policisë Ushtarake në Afganistan

Zoti shefi i Shtabit të Përgjithshëm,
Shkëlqesia Juaj, zëvendës ambasadore e Republikës së Turqisë,
Të nderuar gjeneralë,
Komandantë të Policisë Ushtarake,
Të nderuar të pranishëm në këtë ceremoni,

Dëshiroj të përgëzoj Shtabin e Përgjithshëm dhe Komandën e Policisë Ushtarake për punën e mirë që kanë bërë për përgatitjen e këtij kontingjenti të Policisë sonë Ushtarake, i cili do të kryejë një mision tepër të rëndësishëm për Aleancën në Afganistan.

Gjej rastin të falënderoj ambasadorin e vendit mik, të Turqisë për kontributin dhe asistencën që kanë dhënë në trajnimin dhe përgatitjen e këtij ekipi të Policisë Ushtarake, i cili do ta zhvillojë këtë mision në bashkëpunim me palën turke. Gjithashtu dua të shpreh mirënjohjen e qeverisë shqiptare për të gjithë ndihmën që ka dhënë qeveria turke për reformimin dhe modernizimin e Forcave tona të Armatosura.

Bashkëpunimi ndërmjet Forcave tona të Armatosura dhe Forcave të Armatosura të Turqisë është 20-vjeçar dhe i konsoliduar në shumë drejtime, si në atë të asistencës teknike, rritjes së kapaciteteve, arsimimit dhe në shumë fusha të tjera, të cilat jemi të vendosur t’i çojmë përpara edhe më shumë.
Mundësia e Forcave tona të Armatosura për të dërguar këtë kontingjent të Policisë Ushtarake në një mision të kësaj natyre, me rëndësi të veçantë për rritjen e kapaciteteve të ushtrisë kombëtare afgane, është tregues i rritjes së kapaciteteve të ushtrisë sonë, i rezultatit jashtëzakonisht pozitiv i të gjithë reformës që është bërë në Forcat tona të Armatosura.

Ne jemi të vendosur që të vijojmë në rrugën e përmirësimit të vazhdueshëm të Forcave të Armatosura në të gjitha drejtimet: në rritjen e kapaciteteve njerëzore dhe teknike, modernizimin e pajisjeve, krijimin e kushteve më të mira infrastrukturore, por duke pasur si orientim themelor balancimin e resurseve me nevojat. Kjo është ajo që kërkon mjedisi i sotëm i sigurisë, kjo është ajo që po bëjnë aleatët tanë, kjo është ajo që po bën Aleanca, kjo është ajo që po bëjmë dhe do të bëjmë me këmbëngulje edhe ne. Nuk është shumë e rëndësishme se sa shpenzon për ushtrinë, por si i përdor ato resurse që ke, dhe ne po mundohemi t’i përdorim sa më mirë të jetë e mundur.

Rezultat i kësaj është pikërisht aftësia jonë për të dërguar përkrah aleatëve kontingjente të kësaj natyre, për ta trefishuar pjesëmarrjen tonë në operacione të kësaj natyre, për ta shumëfishuar produktin tonë, me pothuajse të njëjtat resurse. Ky është koncepti i ‘mbrojtjes inteligjente’ dhe ne do të ecim në këtë rrugë.

Të nderuar ushtarakë që niseni me këtë mision!

Detyra të ngjashme si kjo e juaja janë kryer dhe po kryhen me sukses nga njësitë e tjera të Forcave të Armatosura, dhe sot jemi krenarë për traditën e krijuar dhe përvojën e përftuar. Jam i bindur që edhe ju do të vazhdoni në këtë rrugë, për të përfaqësuar vlerat më të mira të ushtrisë sonë dhe të vendit tonë. Ju keni atë çka nevojitet për këtë, përgatitjen, stërvitjen, trajnimin dhe trimërinë për t’i dalë ballë detyrave tuaja. Jam i bindur se ju do ta ktheni me nder flamurin kombëtar, ashtu siç kanë bërë dhe kolegët tuaj para jush.

Ju uroj suksese dhe u kthefshi shëndoshë e mirë pranë familjeve tuaja!