Ky është vizioni i NATO për vitin 2020, të cilin Sekretari i Përgjithshëm i NATO, Anders Fogh Rasmussen e paraqiti në Forumin e VII vjetor të Brukselit të Fondit Marshall Gjerman, mbajtur më 23 mars 2012.

Duke iu drejtuar mbi 200 politikanëve dhe drejtuesve politikë, të korporatave dhe intelektualëve më me influencë të Amerikës Veriore dhe Europës, z. Rasmussen riafirmoi rëndësinë e pashuar të NATO për sigurinë botërore: “Ajo ka luajtur një rol të rëndësishëm në garantimin e paqes në zonën Euroatlantike për më shumë se gjashtëdhjetë vjet”- rikujton ai, - “dhe siç tregoi misioni ynë për Libinë, Aleanca jonë mbetet një burim thelbësor stabiliteti në një botë të paparashikueshme. NATO është Aleanca e domosdoshme”'.

NATO është e bazuar në një qëllim të përbashkët që duhet ruajtur në momente sfiduese, pavarësisht krizës financiare dhe rënies së buxheteve të mbrojtjes. “Çdo shkurtim buxhetor sot, do të ketë pasoja për sigurinë tonë në të ardhmen, por edhe për atë çfarë jemi në gjendje të bëjmë si një Aleancë”, - theksoi Anders Fogh Rasmussen.

 

Shpenzimi i buxhetit të mbrojtjes në një mënyrë më të zgjuar, nëpërmjet vendosjes së prioriteteve, specializimit dhe bashkëpunimit, duke u përqendruar  “jo vetëm për ato gjëra që shkurtojmë, por edhe në ato që mbajmë”, është thelbi i konceptit të përgjegjësisë së përbashkët. Duke ndërtuar, bazuar në aftësitë dhe eksperiencat operacionale të kaluara dhe aktuale, Iniciativa e Forcave të Lidhura, ne do të ndihmojmë edhe konsolidimin e nivelit të lartë të ndërveprueshmërisë të vendeve aleate dhe partnere. “Në Afganistan, amerikanët, europianët dhe vendet partnere kanë zhvilluar një aftësi të mrekullueshme për të vepruar përkrahë njëri-tjetrit”, - theksoi Sekretari i Përgjithshëm i NATO, “Ne kemi nevojë t’i mbajmë e ruajmë këto përfitime”.

Duke ju rikthyer operacioneve në Kosovë, Afganistan dhe Libi, ai shprehu besim në aftësitë e Europës dhe Amerikës Veriore për të ndarë së bashku drejtimin e tyre: “Kjo tregon se si aleatë të ndryshëm mund të udhëheqin operacione të ndryshme. Dhe kjo është arsyeja përse jam i bindur që vendet europiane mund ta ndajnë rolin e drejtimit të operacioneve brenda komunitetit të Atlantikut”.

 

Kjo detyrë mund të jetë e suksesshme vetëm nëse lidhet fort në rrjetin unik të partneritetit të sigurisë që NATO ka zhvilluar gjatë viteve të fundit: “Duke punuar së bashku me partnerët tanë, ne rrisim sigurinë tonë. Ne rrisim sigurinë e vendeve të tyre, dhe sigurinë e botës në të cilën jetojmë”, - është shprehur Rassmusen.

 

Marrë nga faqja zyrtare e NATO: www.nato.int