Letër falenderimi e ministrit Imami drejtuar Orkestrës Frymore të Forcave të Armatosura

15 Maj 2012

Të nderuar anëtarë të OFFA

Më lejoni të shpreh përgëzimet e mia të sinqerta, mirënjohjen time personale dhe të Ministrisë së Mbrojtjes për aktivitetin e shkëlqyer dhe emocionet e mëdha patriotike që përcollët në Prishtinë.

Ju me përkushtimin dhe dashurinë për atdheun u dhuruat bashkëkombësve tanë në Kosovë momente gëzimi e krenarie të madhe. Aktiviteti juaj ishte perfekt në të gjitha dimensionet e tij, duke treguar nivel të lartë profesionalizmi dhe dedikim të plotë ndaj profesionit tuaj.

Me anë të kësaj letre dëshiroj t'ju përcjell edhe falenderimet e homologut tim të Kosovës dhe autoriteteve të tjera shtetërore në Kosovë, të cilët u shprehen entuziast dhe mirënjohës për çka ju dhuruat atje.

Gjithashtu, dëshiroj t'ju përgëzoj për realizimin me sukses edhe të aktivitetit TATOO 2012, në Norfolk, Virxhinia, ku keni dëshmuar vlerat më të mira të Forcave tona të Armatosura dhe të kombit shqiptar.

Këto aktivitete dhe të tjera që ju realizoni në vijimësi në Tiranë dhe qytetet e tjera të Shqipërisë e kanë bërë OFFA një orkestër qendrore, me një program të ngjeshur aktivitetesh, cilësia e të cilëve është e niveleve më të larta profesionale.

Ju ftoj që të vijoni me të njëjtin përkushtim e devotshmëri për të tejkaluar vetveten në cdo performancë që jepni për publikun shqiptar dhe të huaj. Në këtë mënyrë ju nderoni veten, nderoni Forcat tona të Armatosura, nderoni kombin shqiptar.

Dua t’ju konfirmoj edhe një herë dedikimin dhe mbështetjen time të plotë për këtë institucion me vlera të mëdha kombëtare.

Me respekt,

Arben IMAMI