MajMinistri i Mbrojtjes merr pjesë në Samitin e NATO në Çikago
21 Maj 2012
Më 20 dhe 21 maj u mbajt në Çikago të SHBA, samiti i 25 i Aleancës së Traktatit të Atlantikut të Veriut. Shqipëria u përfaqësua në këtë samit me një delegacion të kryesuar nga Kryeministri i Shqipërisë, z. Sali Berisha dhe me pjesëmarrjen e zëvendëskryeministrit dhe ministrit të Punëve të Jashtme, z. Edmond Haxhinasto dhe ministrit të Mbrojtjes, z. Arben Imami.
Samiti i Çikagos synonte balancimin e arritjeve të Samitit të Lisbonës, me fokus veçanërisht tek zhvillimi i kapaciteteve kritike të përbashkëta të Aleancës. Në samit u përshëndet arritja e konsensusit për Rishikimin e Kapaciteteve të Mbrojtjes dhe Deterrencës, Mbrojtjen Raketore, Vëzhgimin e Përbashkët të Hapësirës, dhe Kapacitetet e Përkohshme të Mbrojtjes Raketore.
Në qendër të punimeve të samitit ishte diskutimi rreth Paketës së Mbrojtjes, e cila u miratua nga krerët e shteteve duke i hapur rrugë implementimit të vizionit të Aleancës për Forcat e NATO 2012.
Punimet u fokusuan gjithashtu tek domosdoshmëria e vënies në jetë të politikave të planifikimit dhe mbrojtjes së NATO, dhe zhvillimi i mëtejshëm i projekteve të Mbrojtjes Inteligjente, si një domosdoshmëri për të balancuar burimet financiare me zhvillimin e kapaciteteve.
Gjithashtu u diskutua edhe domosdoshmëria e trajnimit dhe stërvitjes së përbashkët të Forcave të Armatosura, certifikimi i përbashkët i tyre dhe specializimi i tyre në funksione të veçanta e prioritare.
Një tjetër pikë e rëndësishme ishte edhe vizioni i Aleancës për rindërtimin e Afganistanit, dhe rolin e NATO për periudhën pas vitit 2014 në Afganistan. Në diskutim u përfshinë edhe vendet partnere të NATO në Afganistan, si edhe presidenti i Afganistanit Hamid Karzai.
Të gjithë mbështetën iniciativën për një partneritet strategjik mes NATO dhe Afganistanit, dhe në këtë kontekst angazhimin afatgjatë të Aleancës dhe partnerëve atje, duke vënë theksin në rindërtimin e vendit, zhvillimin ekonomik dhe mbrojtjen e të drejtave të njeriut.
Samiti i dedikoi një seancë të veçantë vendeve partnere të NATO që i përkasin Iniciativës së Stambollit dhe Dialogut të Mesdheut, duke theksuar domosdoshmërinë e rritjes së fushave të veprimit me partnerët në kuadër të bashkëpunimit për sigurinë. Udhëheqësit e vendeve anëtare të NATO rikonfirmuan mbështetjen për politikën e dyerve të hapura.
