Aktivitete & AnalizëBE në Samitin e NATO
Bashkimi Europian (BE) do të marrë pjesë më 20-21 maj në Samitin e Organizatës së Traktatit të Atlantikut Verior (NATO) në Çikago, me përfaqësuesit e tij: Herman Van Rompuy, Presidenti i Këshillit Evropian, José Manuel Barroso, Presidenti i Komisionit Evropian dhe Përfaqësuesja e Lartë për Punët e Jashtme dhe Politikat e Sigurisë Catherine Ashton.
BE ka rol specifik në garantimin e sigurisë, parandalimin e konflikteve dhe menaxhimin e krizave: qasja e tij gjithëpërfshirëse përmbledh një gamë të gjerë mekanizmash si fuqia ushtarake, aksioni politik dhe diplomatik, tregtia, asistenca humanitare dhe ndihma afat-gjatë për zhvillim. Në Çikago, liderët e BE do të përcjellin vendosmërinë e BE për të rritur më tej aftësinë e tij për të drejtuar sfidat e sigurisë dhe mbrojtjes, sidomos duke forcuar kapacitetet ushtarake në Evropë, dhe angazhimin e tij për të çuar më tej bashkëpunimin me NATO.
Meqenëse shumica e vendeve anëtare të BE janë edhe vende anëtarë të NATO, BE në vitet e fundit ka zhvilluar një partneritet të fortë me organizatën: në nivel politik, nëpërmjet bashkëpunimit të zgjeruar institucional, në nivel operacional meqë të dy janë të dislokuar së bashku në arena të ndryshme (Afganistani, Kosova, lufta kundër piraterisë në Horn të Afrikës), si dhe në zhvillimin e kapaciteteve ushtarake. Konteksti i përgjithshëm i krizës financiare dhe orientimet e reja strategjike të SHBA e kanë bërë këtë bashkëpunim edhe më thelbësor.
Samiti Çikago do të trajtojë tri tema kryesore:
- Afganistani, dhe procesi i tranzicionit që lidhet me përfundimin e planifikuar të misionit ISAF në fund të 2014;
- Aftësitë ushtarake në periudhë të krizës financiare;
- Zhvillimit të Partneriteteve, sipas përvojës në Libi.
E ardhmja e Afganistanit do jetë një ndër temat kryesore të Samitit. BE dhe shtetet anëtare aktualisht ofrojnë rreth 1 bilion euro në vit, si ndihmë të përgjithshme për vendin, dhe kanë premtuar të vazhdojnë të financojnë të paktën në nivelet aktuale edhe pas vitit 2014. Në sektorin e sigurisë, shtetet anëtare të BE në parim kanë rënë dakord për ta zgjatur deri në fund të vitit 2014 mandatin e Misionit Policor të BE, i cili fokusohet në reformën institucionale të Policisë Afgane, lidershipit dhe trajnimit të specializuar, si dhe në përmirësimin e lidhjeve midis sektorit të policisë dhe drejtësisë. BE do të përsërisë në Çikago angazhimin e vazhdueshëm afat-gjatë për të mbështetur sigurinë dhe zhvillimin e Afganistanit, duke përfshirë mbështetjen e rëndësishme për një forcë policore afgane efektive.
Në fushën e Kapaciteteve Mbrojtëse Europiane, BE do të prezantojë progresin e konsiderueshëm që ka bërë nëpërmjet projekteve mbi Grumbullimin & Shpërndarjen (Pooling & Sharing) e Kapaciteteve të Mbrojtjes midis shteteve anëtare, për të cilat Agjencia e Mbrojtjes Evropian (EDA) ka krijuar lehtësira, si p.sh. ai i Furnizimit me karburant në Ajër dhe ai i Spitaleve Fushore. Bashkëpunimi i ngushtë ndërmjet BE dhe NATO siguron që rezultati i punës së BE në Grumbullimin & Shpërndarjen dhe koncepti ekuivalente i NATO, Mbrojtje e Zgjuar, të janë në praktikë, komplementare dhe reciprokisht përforcuese.
Gjatë sesioneve të NATO, Përfaqësuesja e Lartë/Zëvendëspresidentja Ashton do të zhvillojë një takim tri-palësh me Sekretarin e Përgjithshëm të NATO, Rasmusen dhe Sekretaren e Shtetit të SHBA, Klinton. Ata do të diskutojnë çështje të ndryshme me interes të përbashkët, duke përfshirë Kosovën, Bosnje-Hercegovinën, kapacitetet mbrojtëse dhe piraterinë detare.
