KulturëNjë mbrëmje e veçantë miqësore me gratë e ushtarakëve që shërbejnë me mision në Kandahar, Afganistan
29 qershor 2012
Mbrëmë në ambientet e Qendrës së Kulturës, Medias dhe Botimeve të Mbrojtjes, nën kujdesin bashkëshortes së ministrit të Mbrojtjes, znj. Najada Imami dhe bashkëshortes së shefit të Shtabit të Përgjithshëm të Forcave të Armatosura, znj. Teuta Gjunkshi, u organizua një takim me bashkëshortet e ushtarakëve që shërbejnë me mision paqeruajtës në Kandahar të Afganistanit.
E konceptuar si një darkë miqësore, familjare dhe shoqërore, mbrëmja e djeshme ka nisur nën tingujt e muzikës melodioze të harqeve të Orkestrës Frymore të Forcave të Armatosura dhe mandej ka vijuar si një darkë e bukur dhe mjaft gëzueshme.
Rreth 45 gratë e ushtarakëve të pranishme, disa prej të cilave të shoqëruara edhe nga fëmijët e tyre, kanë përjetuar dhe shijuar një mbrëmje të këndshme, larg stresit të përditshëm, mallit dhe vëmendjes së përqendruar tek bashkëshortët e tyre, të cilët po kryejnë një nga misionet më të vështira paqeruajtëse në Kandahar të Afganistanit. Duhet theksuar se, gjatë gjithë periudhës që bashkëshortët e tyre shërbejnë në këtë mision, gratë dhe fëmijët e tyre nuk janë ndjerë asnjëherë vetëm, por kanë pasur kurdoherë kujdesin dhe vlerësimin e lartë të Ministrisë së Mbrojtjes dhe Shtabit të Përgjithshëm të FA. Shumë prej tyre, ndoshta nuk njiheshin më parë me njëra-tjetrën, por në këtë mbrëmje ato u bënë shumë të afërta pasi ndajnë të njëjtën krenari, por edhe të njëjtin shqetësim e mall, që lidhet me bashkëshortët e tyre ushtarakë që shërbejnë si misionarë të paqes dhe lirisë në Afganistanin e largët.
“Jam tepër e surprizuar që bashkëshortet e ministrit të Mbrojtjes z. Imami dhe shefit të Shtabit, gjeneralmajor Gjunkshi na ftuan, duke na servirur një ambient kaq të këndshëm dhe një mbrëmje kaq të bukur. Unë jam dyfish e surprizuar, sepse jam vetë ushtarake dhe bashkëshortin tim e kam në mision. Doja të shprehja një falenderim të veçantë dy bashkëshorteve të krerëve më të lartë të Forcave tona të Armatosura për këtë interesimin që kanë treguar ndaj bashkëshorteve të misionarëve, për të cilët ne jemi krenare dhe ju themi që i kemi bërë ata të jenë krenarë edhe ndaj nesh. Edhe ne, pavarësish se burrat tanë i kemi shumë larg atdheut, kujdesemi për familjen, për fëmijët, për punën dhe karrierën tonë”, tha, ndër të tjera, nënkolonele Flora Dako.
Një prej vajzave të misionarëve, duke folur me mall për babain e saj thotë: “Babai im është në mision paqeruajtës në Afganistan. Pres me mall që të kthehet sa më parë dhe që të mbarojë misionin me sukses. I uroj jo vetëm atij, por të gjithë misionarëve të tjerë që të vijnë sa më mirë në Shqipëri. Ne na mungojnë dhe është normale që na ka marrë malli, pasi 6 muaj janë shumë për ne fëmijët pa parë baballarët tanë. Ne e dimë që shkalla e vështirësisë ku ata shërbejnë është shumë e lartë, por duam vetëm që të kthehen shëndoshë e mirë pranë nesh”. Ndërsa një vajzë tjetër thotë: “Unë jam shumë krenare që babi im është një nga misionarët e paqes, që për të flasin të gjithë fjalët më të mira. Është më se normale, pres me padurim që të kthehet sa më parë pranë familjes së tij, ku ne e presim me padurim. E përshëndes atje ku është dhe i them se na ka marrë malli të gjithëve, e presim me padurim që të kthehet”.
Surpriza e mbrëmjes ishte telefonata e drejtpërdrejtë e kryer në ato momente me komandantin e misionit paqeruajtës “Eagle 4”, kolonel Behar Mara, i cili i përshëndeti në emër të të gjithë kontingjentit bashkëshortet e paqeruajtësve, duke i thënë që të mos mërziten pasi ata janë të gjithë shëndoshë e mirë dhe se dita e kthimit të tyre në atdhe do të jetë shumë e afërt.
Më pas, mbrëmja ka vijuar e mbushur me plot urime për njëra-tjetrën dhe bashkëshortët e tyre, me humor e vallëzime dhe shoqëruar gjithashtu nga zëri i ëmbël i këngëtarëve të QKMBM Redon Makashi, Ervin Bushati dhe Mira Bregu.
