Kontigjenti Paqeruajtës “Eagle-1” niset me mision në Kandahar të Afganistanit
E mërkurë, 28 Korrik 2010 14:38
Sot paradite, në mjediset e Qendrës Kulturore të Forcave të Armatosura, u zhvillua ceremonia e përcjelljes së Kontigjentit Paqeruajtës “Eagle-1”, i cili do të kryejë misionin e tij në Kandahar të Afganistanit. Ky është kontigjenti i parë paqeruajtës shqiptar, i cili për herë të parë do të angazhohet në operacione luftarake përkrah forcave amerikane.
Në ceremoni ishin të pranishëm Kryeministri i Shqipërisë, z. Sali Berisha, ministri i Mbrojtjes, z. Arben Imami, zv.ministrat e Mbrojtjes Ekrem Spahiu dhe Zana Xhuka, shefi i Shtabit të Përgjithshëm të FA-së, gjeneral brigade Maksim Malaj, gjeneralë dhe ushtarakë të lartë të Forcave tona të Armatosura dhe familjarë e të afërm të paqeruajtëseve. Gjithashtu morën pjesë përfaqësues nga ambasada e SHBA-së në Tiranë, të Zyrës së Bashkëpunimit Ushtarak, të SAIC, si dhe ushtarakë të tjerë të huaj me mision në vendin tonë.
Në fjalën e tij Kryeministri Berisha u shpreh se, për të gjithë ne këtu, për Shqipërinë dhe shqiptarët kjo është një ditë e veçantë. Pak më shumë se një vit nga anëtarësimi i vendit tonë në Aleancën e Atlantikut të Veriut, në Alenacën më të madhe të lirisë së të gjitha kohrave, nisim sot njësinë e parë të ushtarakëve shqiptarë në një mision të ri, në një mision luftarak, nisim anëtarët e Forcave tona të Armatosura në një fushëbetejë, më të madhen që kombet e qytetëruara dhe Aleanca kanë ndërmarrë. Me këtë rast, Kryeministri Berisha falenderoi me mirënjohje qeverinë e SHBA-së për të gjithë ndihmesën shumë të çmuar që na ka dhënë dhe jep edhe për përgatitjen e trupave tona paqeruajtëse. “Unë shpreh bindjen më të madhe, - tha ai duke iu drejtuar trupave të këtij kontigjenti, - se ju me dinjitet, burrëri dhe me kurajo do të mbani lart flamurin e kombit tuaj. Ju niseni si shqiponja, e cila përbën zemrën e simbolit tonë kombëtar, flamurit që merrni me vete. Ju niseni me një mision të vështirë, por ju jeni ushtarak të zot, djem trima, të përgatitur në të gjitha rrafshet. Të përgatitur në rrafshin psikologjik, të motivuar për misionin tuaj të madh, të përgatitur në rrafshin ushtarak dhe profesional. Unë kam bindjen se ju do ta përmbushni me sukses të plotë misionin që nisni”. Më tej Kryeministri theksoi se, ky është vetëm misioni i parë i trupave tona në këtë fushëbetejë. Qeveria është e vendosur të punojë dhe të mbështesë Forcat tona të Armatosura dhe ne dora-dorës, në kohrat që vijnë, do të ta rrisim kontributin tonë në misionet e paqes me njësi të tjera më të mëdha, deri edhe në një batalion, krah për krah aleatëve tanë aty ku ta lyp nevoja. 
“Oficerë, nënoficerë dhe ushtarë që po shkoni në frontin e luftës, - e nisi përshëndetjen e tij ministri i Mbrojtjes, Arben Imami, - ju jeni të vetëdijshëm për rëndësinë e detyrës e nivelin e operacionit që ju është besuar. Kryeministri, qeveria, populli shqiptar, aleatët kanë besim në aftësitë tuaja. Qeveria shqiptare, me ndihmën e Shteteve të Bashkuara të Amerikës dhe aleatëve të tjerë kanë bërë maksimumin e mundshëm për përgatitjen dhe trajnimin tuaj”. Në vijim të fjalës së tij z. Imami nënvizoi kontributin e dhënë nga trupat tona në misionet e paqes, si dhe u ndal sidomos në rëndësinë që ka misoni që do të kryejë ky kontingjent, i cili do të angazhohet në operacione luftarake, përkrah forcave aleate.
Duke iu drejtuar trupave të kontingjentit paqeruajtës “Eagle-1”, ministri Imami tha: “Si Ministër i Mbrojtjes, unë kam një porosi: Tregohuni burra shqiptarë, trima e të besës; veproni me ashpërsi, por pa urrejtje ndaj armikut; bëni detyrën tuaj dhe tregohuni zemërmëdhenj me një popull që prej 30 vjetësh po vuan tmerret e luftës; dëgjoni, bindjuni urdhrave të eprorëve, mendoni dhe ndihmoni në çdo rrethanë njëri-tjetrin”. Në fund të fjalës së tij ministri Imami shprehu edhe njëherë bindjen e tij se trupat paqeruajtëse që nisen në këtë mision të vështirë do ta kryejnë me sukses të plotë misonin e tyre dhe do të kthehen shëndoshë e mirë dhe me dinjitet në atdheun e tyre dhe pranë familjeve të tyre.
Në këtë ceremoni përshëndeti edhe shefi i Shtabit të Përgjithshëm, gjeneral brigade Maksim Malaj dhe përfaqësuesi i ambasadës amerikane në Tiranë, Paul Poletes. 
Më pas, Kryeministri Berisha i dorëzoi Flamurin Kombëtar komandantit të kontigjentit “Eagle -1”, nënkolonel Dritan Demiraj. Ceremonia përfundoi me një foto të përbashkët të kryeministrit Berisha, ministrit Imami dhe personaliteteve të tjerë të pranishëm në ceremoni me trupat e kontigjentit që niset me mision në Kandahar të Afganistanit.
Kontigjenti Paqeruajtës “Eagle-1”, përbëhet nga 44 oficerë, nënoficerë dhe ushtarë profesionist, efektivë të Batalionit Special të Forcave Tokësore. Ky është misioni i parë që do të marrë pjesë në operacione luftimi përkrah forcave speciale amerikane që veprojnë në Afganistan dhe përbën një hop të ri cilësor në shkallën e pjesëmarrjes së trupave tona në operacionet në Afganistan. Trupat e këtij kontigjenti kanë kohë që përgatiten me një program special në përshtatje me detyrat që do të kryejnë në zonat e luftimit në Kandahar. Ato janë trajnuar nën kujdesin dhe mbikqyrjen e një ekipi ushtarakësh amerikan, të cilët kanë përvojë në këto lloj operacionesh. Afati i qëndrimit të tyre në këtë mision është 6 muaj.
