Lindur më 21 janar 1958, në Tiranë, Arben Imami është edukuar së pari në Akademinë e Arteve të Bukura, ku edhe ka punuar më pas si pedagog. 

Z. Imami ishte ndër pedagogët që iu bashkuan Lëvizjes Studentore për Liri dhe Demokraci, në vitin 1990, Lëvizje prej së cilës u shpërbë sistemi mono-partiak totalitar komunist, dhe u formësua pas 5 dekadash pluralizmi politik në Shqipëri. Arben Imami ishte një ndër themeluesit e parë të Partisë Demokratike, e cila qe edhe partia e parë opozitare në skenën politike shqiptare.

Ai zgjidhet nënkryetar i Partisë Demokratike dhe Kryetar i Grupit të Parë Parlamentar opozitar në sistemin e ri demokratik.

Z. Imami ka kontribuar për formalizimin e mëtejshëm të sistemit shumë-partiak, mirëfunksionimin e shtetit demokratik, forcimin e parlamentarizmit, draftimin e ligjeve të para kushtetuese pas rënies së komunizmit, të cilët do të reflektonin një vend të lirë e demokratik që respektonte liritë dhe të drejtat e njeriut.

Arben Imami në funksionin e Kryetarit të Komisionit Parlamentar të Rregullores u përfshi në hartimin e Rregullores së Parë të Kuvendit Shqiptar.

 Në vitin 1998, z. Imami ishte bashkëhartuesi i Kushtetutës së Shqipërisë, e cila mbetet edhe sot dokumenti themelor i shtetit shqiptar.

Gjatë gjithë këtyre viteve, z. Imami ka dhënë një kontribut të spikatur për institucionalizimin e Shtetit të së Drejtës dhe Demokracisë Procedurale, si edhe në mirëfunksionimin e pushtetit vendor dhe miradministrimin e territorit.

Arben Imami ka dhënë kontribut të thelluar në mjedisin intelektual shqiptar, veçanërisht sa i përket shkencave politike. Pasi kryen studimet në Georgetoën University (1999-2000), Uashington D.C. USA, z. Imami themelon Institutin e Studimeve Politike ku ideon, drejton dhe organizon një kolanë me veprat më në zë të filozofisë politike për t’ia ofruar lexuesit në gjuhën shqipe. Arben Imami ka përkthyer (“Shkenca, Politika dhe Gnosticizmi”- Eric Voeglin) dhe ka bërë redaktimin shkencor dhe parathëniet e 10 prej titujve të kolanës. Ndër autorët themelorë të botuara deri më sot, mund të përmenden: Hobbes, Locke, Machiavelli, De Maistre, H. Arendt, Ch. Taylor, J. Maritain, H.L.A. Hart, Mounier, E. Voegelin etj. Përmes kolanës, lexuesi mund të ndihmohet të kuptojë më gjerësisht debatin teorik mbi “sistemet totalitare vs. sistemeve liberale”, vendin e lirisë politike, sociale, ekonomike dhe religjioze të individit si edhe rolin e etikës në skenën e ndërveprimit human dhe të konsolidimit të paqes.

Z. Imami është gjithashtu një nga hartuesit e platformës së një forumi intelektual të quajtur “Kolokiumi Liberal”,  në të cilin u diskutuan në nivel doktrinor teza të rëndësishme politiko-ekonomike mbi alternativat qeverisëse të djathta, të cilat patën ndikim në orientimin e debatit politik në zgjedhjet e vitit 2005.

Aktualisht z. Imami, që prej shtatorit të vitit 2009, mban funksionin e Ministrit të Mbrojtjes së Republikës së Shqipërisë. 

Arben Imami është i martuar dhe ka dy fëmijë.

 

Karriera politike:

1990            Nënkryetar i Partisë Demokratike

1990            Kryetar i Grupit të Parë Parlamentar opozitar

1992-1997  Sekretar i Përgjithshëm i Partisë Aleanca Demokratike

1997-1999  Ministër i Reformës Legjislative dhe Marrëdhënieve me Parlamentin

2000-2001  Ministër i Drejtësisë

2000-2002  Kryetar Ekzekutiv i Partisë Aleanca Demokratike

2001-2002  Ministër i Pushtetit Vendor dhe Decentralizimit

2005-2009  Drejtor i Kabinetit të Kryeministrit Sali Berisha

2009            Ministër i Mbrojtjes i Republikës së Shqipërisë