LajmeZëvendësministrja e Mbrojtjes, Arta Musaraj priti zëvendësministrin e Forcës së Sigurisë së Kosovës
23 maj 2013
Zëvendësministrja e Mbrojtjes, prof. dr. Arta Musaraj ka pritur në një takim të veçantë zëvendësministrin e Forcës së Sigurisë së Kosovës, z. Bejtush Gashi dhe zëvendëskomandantin e FSK, gjeneralmajor Gëzim Hazrolli. Qëllimi i kësaj vizite ishte bashkëpunimi në fushën e sigurisë dhe të mbrojtjes midis dy ministrive dhe dy forcave, si dhe intensifikimi i marrëdhënieve në të ardhmen. Zëvendësministrja e Mbrojtjes, Musaraj pasi ka falënderuar homologun e saj Gashi për vizitën në Tiranë, u shpreh: “Midis Shqipërisë dhe Kosovës ka një bazë nisje shumë të fortë, pasi bashkëpunimi i deritanishëm në fushën e mbrojtjes, mbështetja në proceset integruese në NATO, si dhe të strukturimi i FSK dhe sistemit të mbrojtjes së Kosovës në përgjithësi është një bazë shumë e mirë fillimi, është bashkëpunim i strukturuar. Sot, ne, falë ndërveprimeve, kemi struktura të përbashkëta që kanë synim detyra të mirëfillta në arritjen e objektivave të caktuara në kuadër të këtij bashkëpunimi".
Zhvillohet në Tiranë, konferenca e 7-të e shefave të Shtabit të Përgjithshëm të vendeve të Ballkanit
22 maj 2013
Në ambientet e Hotel “Tirana Internacional” ka nisur sot, punimet konferenca e 7-të e Iniciativës së shefave të Shtabit të Përgjithshëm të vendeve të Ballkanit. Në këtë konferencë marrin pjesë shefat e Shtabit të Përgjithshëm të FA të Shqipërisë, Bosnje dhe Hercegovinës, Bullgarisë, Greqisë, Maqedonisë, Malit të Zi, Serbisë, Turqisë dhe Rumanisë. Gjithashtu, me statusin e të ftuarit marrin pjesë shefat e Shtabit të Përgjithshëm të Kroacisë dhe Sllovenisë, si dhe përfaqësues të lartë ushtarakë të NATO dhe Bashkimit Europian.
Dita Ndërkombëtare e Muzeve
18 maj 2013
Në zbatim të kalendarit vjetor të aktiviteteve të artit, kulturës dhe trashëgimisë për vitin 2013, Drejtoria e Aktiviteteve dhe Marrëdhënieve me Komunitetin në Qendrën e Kulturës, Medias dhe Botimeve të Mbrojtjes në bashkëpunim me drejtorinë e J9 në Shtabin e Përgjithshëm të Forcave së Armatosura të Republikës së Shqipërisë, organizuan një vizitë në ambientet e Muzeut të Forcave së Armatosura, në kuadër të “Ditës Ndërkombëtare të Muzeve”, shpallur nga Konferenca e Përgjithshme e UNESCOS. Qëllimi i këtij aktiviteti ishte rivlerësimi i trashëgimisë muzeore të FA, në administrim të Muzeut të FA dhe rëndësia që kjo trashëgimi ka në edukimin dhe formimin kulturor e historik të ushtarakëve tanë.
Kremtohet 3-vjetori i krijimit të Qendrës Ndërinstitucionale Operacionale Detare
17 maj 2013
Sot paradite, është zhvilluar një ceremoni me rastin e 3-vjetorit të krijimit të Qendrës Ndërinstitucionale Operacionale Detare (QNOD) pranë zonës ushtarake në Plepa, Durrës. Të pranishëm në këtë ceremoni ishin zëvendësshefi i Shtabit të Përgjithshëm i FA, gjeneral brigade, Sandër Lleshi, komandanti i Forcave Detare, gjeneral brigade, Qemal Shkurti, komandanti i Forcave Ajrore, gjeneral brigade, Dhori Spirollari, atasheu ushtarak i SHBA i akredituar në vendin tonë, kapiten i Rangut të Dytë, Glen Brown, përfaqësues të DIE dhe ushtarakë të tjerë italianë që kanë kontribuar për ngritjen dhe trajnimin e punonjësve të kësaj qendre, drejtues dhe punonjës të QNOD, si dhe të ftuar të tjerë.
Diskutohet projekti “Guidë vetëvlerësimi gjinor në Forcat e Armatosura”
Projekt bashkëpunimi mes Ministrisë së Mbrojtjes, UN Women dhe “Qendra për Kontrollin Demokratik në Forcat e Armatosura” (DCAF).
16 maj 2013
Sot paradite, në Ministrinë e Mbrojtjes u zhvillua tryeza e diskutimit në kuadër të implementimit të projektit “Guidë vetëvlerësimi gjinor në Forcat e Armatosura”. Ky projekt mbështetet nga UN Women dhe Qendra për Kontrollin Demokratik në Forcat e Armatosura (DCAF). Në këtë takim ishin të pranishëm: zëvendësministrja e Mbrojtjes, Prof. Dr. Arta Musaraj, zëvendësshefi i Shtabit të Përgjithshëm i FA, gjeneralmajor Viktor Berdo, komandantët e Forcave, drejtorë dhe ushtarakë të tjerë të lartë të Ministrisë së Mbrojtjes dhe Shtabit të Përgjithshëm. Gjithashtu, të pranishëm në takim ishin, përfaqësuesja e përhershme e Kombeve të Bashkuara në Shqipëri, znj. Zineb Touimi Benjelloun, drejtuesi i programit për Gjininë dhe Sigurinë në Qendrën për Kontrollin Demokratik në Forcat e Armatosura (DCAF), z. Daniel de Torrez Perez, znj. Aiko Holvikivi, drejtuesja e projektit dhe drejtuesja e programit të UN Women në Shqipëri, etj.
