Ministri Imami pritet nga homologu i tij turk Vecdi Gőnũl në Ankara
E mërkurë, 10 Mars 2010 16:07
Ministri i Mbrojtjes, z. Arben Imami, me ftesë të homolgut të tij turk z. Vecdi Gőnũl, po zhvillon një vizitë zyrtare dyditore në Republikën e Turqisë.
Në fillim të vizitës së tij, ministri Imami bëri një vizitë në Mauzoleumin e Mustafa Qemal Ataturkut, ku vendosi një kurorë me lule. Më pas ai u prit me ceremoni protokollare nga ministri i Mbrojtjes i Turqisë, Vecdi Gőnũl. Ministri Imami falenderoi homologun e tij turk për të gjithë mbështetjen që Turqia i ka dhënë Shqipërisë, veçanërisht për anëtarsimin e saj në NATO dhe ndihmën e dhënë nga shteti turk për Forcat e Armatosura të Republikës së Shqipërisë, si për modernizimin me mjete dhe materiale, ashtu edhe për rritjen e nivelit arsimor të ushtarakëve shqiptarë.
Ministri i Mbrojtjes Arben Imami niset për vizitë zyrtare në Turqi
E martë, 09 Mars 2010 13:47
Ministri i Mbrojtjes, z. Arben Imami, me ftesë të homolgut të tij turk z. Vecdi Gőnũl, është nisur sot për një vizitë zyrtare dyditore në Republikën e Turqisë.
Gjatë qëndrimit të tij në Ankara, Ministri i Mbrojtjes Imami do të pritet në një takim të veçantë nga ministri turk i Mbrojtjes Gőnũl, ku do të diskutohet rreth marrëdhenieve dhe bashkëpunimit midis dy vendeve dhe ushtrive tona, si dhe çështje të tjera që lidhen me ruajtjen e paqes dhe dhe të sigurisë në rajon e më gjërë.
Ministri Imami pret delegacionin e Asamblesë Parlamentare të NATO-s
E hënë, 01 Mars 2010 19:33
Ministri i Mbrojtjes Arben Imami ka pritur sot delegacionin e Asamblesë Parlamentare të NATO-s, përkatësisht përfaqësues të Nënkomisionit të Marrëdhënieve Transatlantike, të kryesuar nga senatori italian Sergio de Gregorio. Në përbërje të këtij delegacioni kishte përfaqësues të parlamenteve nga Anglia, Franca, Spanja, Portugalia, Polonia, Turqia, Maqedonia e Serbia.
Ministri Imami ka dhënë një briefing të përmbledhur për delegacionin dhe u është përgjigjur pyetjeve dhe interesimit të tyre në lidhje me kënd vështrimin e Shqipërisë mbi çështjet e sigurisë dhe mbrojtjes në rajon.
Ditë pas dite, për përballimin e situatës në Shkodër
E premte, 26 Shkurt 2010 12:27
Edhe pse reshjet e shiut duke filluar nga dita e djeshme kanë pushuar, Forcat e Armatosura vazhdojnë me përgjegjësi të lartë detyrat e ngarkuara për stabilizimin e situatës së krijuar.
Aktualisht gjendja në qarkun e Shkodrës vazhdon të jetë kritike.
Gjithsej llogariten 6500 ha tokë e përmbytur, 108 shtëpi nën ujë dhe 723 shtëpi të rrethuara dhe kërcënuara nga uji kryesisht në komunat Ana Mali, Berdic, Bushat e Dajç.
Në afërsi të Urës së Gjo Lulit dhe tek kthesa e Dajçit uji ka arritur 40 cm lartësi në një segment rruge prej 200 m.
Në fshatin Dragjat ka përmbytje si rezultat i çarjes së argjinaturës në një segment prej 4 m.
