Intervistë me gjeneral Petr Pavel, kryetar i Komitetit Ushtarak të NATO

NATO përballë sfidave të reja të Sigurisë

1. Na tregoni më shumë për rolin tuaj si Kryetar i Komitetit Ushtarak të NATO dhe Komitetin Ushtarak

Kryetari i Komitetit Ushtarak zgjidhet nga shefat e Mbrojtjes të NATO, normalisht për një mandat trevjeçar. Si kryetar, unë përfaqësoj pikëpamjet e tyre të bazuara në konsensus dhe shërbej si këshilltar i lartë ushtarak i Sekretarit të Përgjithshëm, Këshillit të Atlantikut të Veriut dhe organizatave të tjera të NATO. Unë drejtoj axhendën dhe diskutimet e Komitetit Ushtarak, autoritetit më të lartë ushtarak të NATO, duke dëgjuar pikëpamjet dhe duke punuar për të pajtuar pozicione të ndryshme kombëtare ose ndryshime në politika, me qëllim daljen me këshilla të pranueshme për të gjithë. Çdo shtet ka një zë të barabartë në diskutimet dhe vendimet.

Përveç kësaj, si këshilltar i lartë ushtarak i Aleancës dhe zëdhënës i Komitetit Ushtarak, unë vizitoj rregullisht operacionet, misionet, vendet aleate dhe ato partnere për të diskutuar rolin dhe punën ushtarake të NATO, si dhe për të maksimizuar kapacitetet ushtarake dhe efikasitetin e NATO. Më ndihmon në detyrat e mia zëvendëskryetari, gjenerallejtënant Steven M. Shepro (Forca Ajrore Amerikane).

Gjenerallejtënant Shepro më ndihmon në rolin tim si këshilltar kryesor i Sekretarit të Përgjithshëm të NATO dhe zëdhënës i lartë ushtarak i Aleancës. Ai gjithashtu këshillon zëvendëssekretarin e Përgjithshëm, udhëheq bashkërendimin e çështjeve bërthamore, biologjike dhe kimike dhe, në mungesën time, drejton operacionet dhe punën e përditshme të Komitetit Ushtarak.

Për sa i përket Komitetit Ushtarak, ai u krijua në vitin 1949 dhe pas Këshillit të Atlantikut të Veriut, është organi i dytë më i vjetër i përhershëm i NATO, i themeluar në përputhje me Nenin 9 të Traktatit të Uashingtonit.

Komiteti Ushtarak mblidhet dy herë në vit në Shtabin e NATO në Bruksel, në nivel të shefave të Mbrojtjes për të diskutuar operacionet dhe misionet e NATO, duke i ofruar Këshillit të Atlantikut të Veriut këshilla ushtarake të bazuara në konsensus për mënyrën sesi Aleanca mund t'i përgjigjet më së miri sfidave globale të sigurisë. Ai mblidhet gjithashtu një herë në vit në një vend anëtar aleat. Në baza ditore, puna e tyre kryhet nga përfaqësues të përhershëm ushtarakë në Shtabin e NATO në Bruksel.

2. Ndërsa kryetari i ri do të zgjidhet gjatë Konferencës në Tiranë, a mund të reflektoni pak për dy vitet tuaja si kryetar, duke u ndalur tek objektivat tuaj për dy vitet e fundit të qëndrimit në detyrë?

Dy vitet e mia të para në detyrë janë karakterizuar nga ndryshime në mjedisin e sigurisë dhe përshtatjen e NATO. Kjo për t’u siguruar që Aleanca të mbetet e gatshme dhe e aftë për të përmbushur çdo sfidë apo kërcënim nga çdo aktor i mundshëm shtetëror ose joshtetëror nga çdo drejtim. Nëpërmjet kryesimit tim të Komitetit Ushtarak, unë kam qenë i privilegjuar të shoh sesi Komiteti Ushtarak dhe puna ime kanë kontribuar në zbatimin e Planit të Veprimit të Gatishmërisë (Readiness Action Plan), masave të Sigurisë dhe Përshtatjes, fuqizimit të rolit parandalues dhe mbrojtës të NATO, konceptit i Projektimit të Stabilitetit, Pranisë sonë të Përparuar në shtetet baltike dhe Poloni, Pranisë së Përparuar të Përshtatur në Bullgari dhe Rumani, tranzicionin e butë nga Forca jonë Ndërkombëtare e Ndihmës së Sigurisë në Afganistan në Misionin tonë Mbështetës të Përhershëm (Resolute Support Mission), thjesht disa nga fushat kyçe këto.

Objektivat e mi për vitin tim të fundit në detyrë, siç mund të imagjinoni, janë shumë në përputhje me tematikat që do të diskutohen në Konferencën e Komitetit Ushtarak në Tiranë, së bashku me detyrat e ardhshme nga takimet e ministrave të Jashtëm dhe të Mbrojtjes në nëntor dhe dhjetor. Si kryetar i Komitetit Ushtarak, dua të sigurohem që kur t’i dorëzoj detyrat e mia të jetë bërë sa më shumë progres, të jenë zgjidhur çështjet që kanë patur nevojë për vëmendje shtesë dhe që Komiteti Ushtarak të vazhdojë traditën e ofrimit të këshillave të shëndosha për të informuar Këshillin e Atlantikut të Veriut.

Deri në përfundim të mandatit tim, ministrat e Mbrojtjes do të kenë shqyrtuar Rishikimin e Strukturës së Komandës të NATO, ndërkohë ne duhet të punojmë për miratimin e rekomandimeve dhe zbatimit të tij. Kjo do t'i mundësojë Aleancës një strukturë fleksibël, të përshtatshme për qëllimet e nevojshme.

Koncepti i Projektimit të Stabilitetit përfshin shumë pjesë të punës, por në thelbin e tij, është puna që bëjmë me dyzet e një partnerët tanë dhe bashkëpunimi që kemi me organizatat shumëkombëshe si Bashkimi Evropian, Kombet e Bashkuara, Bashkimi Afrikan dhe Organizata për Siguri dhe Bashkëpunim në Evropë. Duke ecur përpara, unë pres që jo vetëm të përshtatim më tej mbështetjen tonë për partnerët por të shtojmë kuptueshmërinë tonë për nevojat e tyre, si dhe ku mund të shtojë vlerën Aleanca.

Terrorizmi dhe dhuna pa dallim që e shoqëron janë shqetësim për Aleancën. Ne kemi rritur përpjekjet tona për të ndihmuar në luftën kundër terrorizmit. Puna jonë përfshin shumë linja të ndryshme të përpjekjeve dhe llojeve të aktivitetit, duke filluar nga Misioni ynë Mbështetës i Përhershëm në Afganistan, në trajnimin tonë të forcave irakiane, në zhvillimin e teknologjive të reja për çminim apo zbulim bombash. Ne gjithashtu kemi rritur kohën e fluturimit të avionëve tanë mbikëqyrës AWACS që mbështesin Koalicionin, dhe po e rrisim mbështetjen e saj për Irakun dhe forcat e saj të sigurisë. Përveç kësaj, ne kemi ngritur një qelizë të re të Inteligjencës për Terrorizmin në Shtabin e NATO dhe kemi arritur kapacitetin fillestar operacional të Qendrës për Jugun, e cila ndodhet në Komandën tonë të Forcës së Bashkuar në Napoli. Qendra është projektuar të fokusohet në shqetësime të tilla si destabilizimi, terrorizmi i mundshëm, radikalizimi, migrimet, ndotja e mjedisit dhe fatkeqësitë natyrore. Ajo gjithashtu do të shërbejë si fokus për shmangien e konflikteve dhe koordinimin e përmirësuar midis aleatëve dhe partnerëve, me qëllim rritjen e mirëkuptimit gjithëpërfshirës, ndërgjegjësimin për situatën, vendimmarrjen dhe shkëmbimin e informacionit për Jugun. Qendra do të na ndihmojë të marrim të dhëna për kërcënimet aktuale dhe potenciale, ku me përvojën dhe ekspertizën e Aleancës, del në pah mënyra sesi mund të punojmë me partnerët tanë për të ofruar një zgjidhje të plotë, në bashkërendim me aktorët e tjerë përkatës.

Përveç kësaj, natyrisht do të vazhdoj të përqendrohem në operacionet, misionet dhe aktivitetet e NATO. Aleanca dhe partnerët operacional mbështetës të përhershëm të saj janë angazhuar në Afganistan dhe po punojnë me të, duke zbatuar planin e saj katërvjeçar për të zhvilluar më tej forcat e sigurisë dhe institucionet afgane. Ky plan synon t'i kthejë forcat e sigurisë dhe institucionet afgane në mbrojtës efikasë të kombit afgan. Do të mbulojë disa fusha si: kapacitetet luftarake, forcat e operacioneve speciale, forcat ajrore, realizimin e komandim-kontrollit. Angazhimi afatgjatë i NATO në Afganistan është çelësi për sigurinë e Afganistanit dhe për sigurinë tonë.

Përveç prezencës sonë në Afganistan, ne jemi të pranishëm në Kosovë përmes KFOR; në rajonin e detit Egje duke ndihmuar në krizën e refugjatëve dhe emigrantëve; në Mesdhe me Operacionin për Monitorimin Detar (Operation Sea Guardian); misionet tona të Kontrollit Ajror në kohë paqeje, si dhe rritjen e Kontrollit Ajror në vendet baltike, Rumani dhe Bullgari. Në det, ne kemi Grupet e Përhershme Detare si dhe Grupet e Përhershme Detare për Mbrojtjen kundër Minave që patrullojnë ujërat dhe stërviten, pasi siguria jonë detare është po aq e rëndësishme sa siguria jonë tokësore apo ajrore.

Një temë që diskutohet shpesh tani është ajo e marrëdhënieve të NATO me Rusinë. Kur fillova detyrën si kryetar i Komitetit Ushtarak të NATO, kishim pezulluar bashkëpunimin praktik me Rusinë pas aneksimit të saj të paligjshëm të Krimesë dhe përfshirjes në Ukrainën Lindore. NATO ka ndaj Rusisë një qasje në dy rrugë që bashkohen: dialog kuptimplotë i kombinuar me mbrojtje dhe parandalim të fortë. Ne jemi duke vepruar në të dyja drejtimet. Kohët e fundit u takova me gjeneralin Gerasimov për të diskutuar mënyrat për të përmirësuar komunikimin ushtarak-ushtarak dhe për të kontribuar në reduktimin e rrezikut dhe rritjen e transparencës. Ne ramë dakord të vazhdojmë të përdorim linjat ushtarake të komunikimit në të ardhmen, çka unë e shoh si një hap shumë pozitiv.

3. Misionet e NATO dhe Shqipëria, ç’mendim keni për kontributin e FARSH në misionet e ndërmarra nga NATO?

Unë jam shumë mirënjohës për angazhimin e fuqishëm të Shqipërisë ndaj Aleancës sonë, si dhe për kontributin tuaj në misionet, operacionet dhe aktivitetet e NATO, përkatësisht misionet tona në Afganistan dhe Kosovë. Ju nuk keni një FA shumë të madhe, por kontribuoni aq shumë sa mundeni.

Ju gjithashtu ofroni mbështetje të fortë për partnerët tanë, duke përfshirë kontributin për Fondet tona të Mirëbesimit për Ukrainën, duke ndihmuar në mbrojtjen kibernetike dhe tranzicionin e karrierës. Përveç kësaj, Shqipëria luan një rol të rëndësishëm në luftën kundër ISIL, duke siguruar pajisje dhe trajnerë të forcave speciale në Irak.

Shqipëria gjithashtu ndihmon në ndërtimin e stabilitetit në rajon, duke nxitur bashkëpunimin në të gjithë Ballkanin Perëndimor. Ju jeni një avokat i fuqishëm për politikën e Dyerve të Hapura të NATO-s, si dhe integrimin e fqinjëve tuaj në familjen euroatlantike.

4. Rajonet e Ballkanit Perëndimor duket se kanë tërhequr sërish vëmendjen e lartë të Aleancës. Si shpjegohet kjo ripërtëritje e fokusit?

Ballkani Perëndimor është një rajon me rëndësi strategjike për NATO dhe ne kemi investuar në sigurinë dhe stabilitetin e Ballkanit Perëndimor për më shumë se dy dekada. Me këtë ndihmë, rajoni ka bërë përparim të dukshëm që nga vitet 1990. NATO ka ndihmuar në përfundimin e dy luftërave etnike në Ballkanin Perëndimor. Stabiliteti dhe siguria në këtë rajon përforcojnë stabilitetin dhe sigurinë në Evropë. Ne synojmë të ruajmë praninë tonë, fokusin tonë dhe angazhimin tonë në Ballkanin Perëndimor dhe të mbështesim aspiratat euroatlantike të vendeve në rajon.

Vlerat demokratike, sundimi i ligjit, reformat e brendshme dhe marrëdhëniet fqinjësisë së mirë janë jetike për bashkëpunimin dhe stabilitetin rajonal. Aleanca e sheh të ardhmen e rajonit në bashkëpunimin dhe integrimin euroatlantik për ata që e duan dhe, jemi të vendosur t’i ndihmojmë vendet e rajonit të zbatojnë reforma reale për të mirën e qytetarëve të tyre, pa marrë parasysh nëse duan të hyjnë në NATO apo jo. Ne e respektojmë zgjedhjen e tyre, cilado qoftë ajo.

Në qershor të këtij viti, ne e mirëpritëm Malin e Zi në familjen e NATO si aleati ynë i 29-të. Kjo ndihmon në konsolidimin e stabilitetit dhe sigurisë në Ballkan. Provat janë para nesh. Vende të tilla si i juaji janë shembull primar si një komb nga rajoni që u bashkua me Aleancën dhe është bërë eksportues i stabilitetit në Ballkan dhe më gjerë. Një Ballkan i qëndrueshëm është në interesin tonë të përgjithshëm.

5: KFOR-i është operacioni i NATO-s me vazhdimësinë më të gjatë, sa do të vazhdojë ekzistenca e KFOR?

Ne jemi të pranishëm në Kosovë dhe udhëheqim një operacion për mbështetjen e paqes - Forcën e Kosovës (KFOR) - që nga qershori i vitit 1999. Për tetëmbëdhjetë vitet e fundit, KFOR-i po ndihmon ta transformojë Kosovën në një vend më të sigurt. Aktualisht kemi rreth 4500 trupa në terren. Megjithatë, ndikimi i NATO në Kosovë shkon përtej pranisë tonë ushtarake.

Jemi të përkushtuar ndaj ngritjes së kapaciteteve. Ekipi ynë Këshillimor dhe Bashkëveprues i NATO do të luajë një rol kyç në këto përpjekje, duke përfshirë mbështetjen për Forcën e Sigurisë së Kosovës. Ne kemi rënë dakord të rrisim bashkëpunimin tonë në disa fusha, duke përfshirë mbrojtjen kibernetike dhe luftën kundër korrupsionit.

Paralelisht, vazhdon procesi i normalizimit mes Prishtinës dhe Beogradit. NATO mbështet plotësisht dialogun e ndërmjetësuar nga BE, pasi kjo është kritike për paqen dhe sigurinë rajonale.

KFOR do të vazhdojë misionin e tij për të ruajtur një mjedis të sigurt dhe për të garantuar lirinë e lëvizjes, për aq kohë sa të jetë e nevojshme.

6. Si i përcepton NATO operacionet e përbashkëta ushtarake ndërmjet Rusisë dhe Serbisë në kufi me Kroacinë?

Çdo vend ka të drejtën të kryejë stërvitje, për sa kohë që i zhvillojnë sipas detyrimeve të tyre ndërkombëtare, duke përfshirë njoftimin e numrit real dhe ofrimin e mundësive të vëzhgimit, kur kërkohet. Aleanca realizon stërvitje rutinë me aleatët dhe partnerët nga e gjithë bota.

Me qëllim promovimin e besimit të ndërsjellë dhe transparencës, anëtarët e OSBE janë të detyruar nga Dokumenti i Vjenës të informojnë njëri-tjetrin paraprakisht për stërvitjet që përfshijnë më shumë se 9000 trupa, përveç rasteve kur stërvitjet janë teste të shkurtra gatishmërie.

Ajo që NATO përpiqet të bëjë është përpjekja për transparencë dhe parashikueshmëri lidhur me stërvitjet tona ushtarake. Dhe në këtë prizëm, ju mund të gjeni lehtësisht orarin e stërvitjeve tona të planifikuara në faqen e internetit të NATO.

Trajnimi dhe stërvitjet janë pjesë thelbësore e adaptimit të NATO. Ato na ndihmojnë të provojmë procedurat dhe taktikat, të identifikojmë praktikat më të mira dhe fushat për përmirësim.

Për sa i përket Serbisë, ambiciet tona janë të thjeshta. Të ndërtojmë marrëdhënie të mira dhe produktive me Serbinë, në mënyrë që të mund të punojmë së bashku në fushat ku si Serbia ashtu dhe NATO shohin vlera. Ne përballemi me sfidat e njëjta të sigurisë në rajonin tonë të përbashkët euroatlantik ku dialogu dhe bashkëpunimi janë të rëndësishme për t'i drejtuar ato.

7. Cilat janë sfidat dhe kërcënimet kryesore me të cilat përballet Aleanca?

Në mjedisin e sotëm të sigurisë, kërcënimet dhe sfidat rreth nesh dhe më gjerë janë aq të ndryshme sa edhe të shumta. Për të qenë në gjendje për t’u mbrojtur kundër çdo kundërshtari ose kërcënimi, NATO duhet të ketë mbrojtje dhe parandalim të besueshëm, të mbështetur nga vullneti për të vepruar. Për këtë arsye, NATO ka ndërmarrë përforcimin më të madh të mbrojtjes së saj kolektive që nga Lufta e Ftohtë. NATO duhet të sigurohet që ka një sërë kapacitetesh dhe mundësish për të ndërhyrë siç duhet, kur kërkohet.

Një nga sfidat në kufijtë tanë është një Rusi më agresive dhe më këmbëngulëse - një vend me të cilin Aleanca ka punuar për të ndërtuar një partneritet për më shumë se dy dekada pas Luftës së Ftohtë. Sfida tjetër është lufta kundër terrorizmit, ku duhet të sigurohemi që të përcaktojmë jo vetëm problemet e menjëhershme, por edhe shkaqet rrënjësore.

Partneriteti NATO-Rusi u përqëndrua për shumë vite në një gamë të gjerë të fushave me përfitim reciprok nga lufta kundër terrorizmit në menaxhimin e krizave. Megjithatë, në vitin 2014, Rusia shkeli ligjin ndërkombëtar dhe minoi rendin e sigurisë evropiane duke aneksuar ilegalisht Krimenë. Përveç kësaj, Rusia paralajmëron praninë e një qëndrimi të frikshëm ushtarak që përfshin stërvitje në shkallë të gjerë dhe të paparalajmëruara, shkelje të hapësirës ajrore, përdorim të keqinformimit dhe të tjera. Siç thashë më parë, ne kemi një qasje të dyfishtë ndaj Rusisë, dialog kuptimplotë të kombinuar me mbrojtje dhe parandalim të fortë.

NATO është përgjigjur në mënyrë të drejtpërdrejtë, mbrojtëse dhe në unison të plotë me të drejtën ndërkombëtare. Gjatë tre viteve të kaluara, Aleanca jonë ka trefishuar madhësinë e Forcës së Reagimit të NATO, ka krijuar një lider të fortë, ose një Task Forcë të Përbashkët të Gatishmërisë Shumë të Lartë, tetë shtabe të reja të vogla për të lehtësuar përforcimet dhe trajnimin, si dhe për të pozicionuar paraprakisht pajisjet dhe furnizimet. Këto masa po zbatohen për t’u siguruar që forcat tona të skalionit të dytë janë të trajnuara, të ndërveprueshme dhe të afta për t'u vendosur shpejt përballë çdo agresioni. Kohët e fundit në Samitin tonë të NATO në Varshavë, krerët e shteteve dhe qeverive vendosën që katër batalione të fuqishme shumëkombëshe të vendosen, me rotacion, në rajonin gjeografik lindor të Aleancës. Këto masa nuk janë as përpjekje për të përshkallëzuar situatën, as për të provokuar konflikt. Përkundrazi, ata janë për parandalimin e konfliktit.

Duke iu rikthyer luftës kundër terrorizmit, duhet të kemi parasysh se terrorizmi nuk ka fe ose kufij. Nuk mund të mposhtet thjesht ushtarakisht, por duhet të trajtohet në disa nivele - shoqërisht, ekonomikisht, politikisht dhe, kur është e nevojshme, ushtarakisht. Nuk ka zgjidhje të thjeshtë. Terrorizmi nuk është i ri, por është shfaqur në vitet e fundit, më së shumti në formën e Islamic State of Iraq the Levant ose siç njihet edhe me shkurtimin Daesh. Për të qenë në gjendje të trajtojmë me efikasitet një problem, ne duhet ta kuptojmë atë dhe të përdorim të gjitha mjetet në dispozicion. Unë besoj se ne përmes përpjekjeve të Aleancës sëbashku me ato të partnerëve tanë dhe organizatave shumëkombëshe mund të kontribuojmë në shkallë të gjerë në zhdukjen e terrorizmit, por kjo kërkon kohë. Nuk ka zgjidhje të shpejtë.

8. NATO është tani pjesë e Koalicionit Global kundër ISIL. Çfarë po bën NATO për luftën kundër terrorizmit dhe si mund të ndihmojë Aleanca për kthimin e luftëtarëve të huaj?

NATO ka luajtur një rol kyç në luftën kundër terrorizmit për shumë vite. Në takimet e Kryetarëve të Shteteve dhe Qeverive në maj të këtij viti, krerët e NATO-s ranë dakord për një plan veprimi për të rritur përpjekjet e NATO në luftën kundër terrorizmit. Puna jonë përfshin shumë linja të ndryshme të përpjekjeve dhe llojeve të aktivitetit. Duke filluar nga Misioni Mbështetës i Përhershëm në Afganistan, në trajnimin tonë të forcave të Irakut, në zhvillimin e teknologjive të reja për çminim apo zbulim bombash.

Unë përmenda anëtarësimin në Koalicionin Global për të Mposhtur ISIS, kontributin e avionëve tanë të mbikëqyrjes AWACS, si dhe krijimin e Qendrës për Jugun.

Kthimi i luftëtarëve të huaj është një çështje serioze. Asnjë rajon, asnjë vend, asnjë komunitet nuk është imun ndaj këtij kërcënimi. Autoritetet kombëtare të policisë dhe gjyqësorit luajnë një rol të rëndësishëm.

Shqipëria ka ofruar të strehojë një Qendër Ekselence të NATO për Luftëtarët e Huaj. NATO dhe Shqipëria po koordinojnë në këtë drejtim.

Vetë Aleanca ka rritur shkëmbimin e informacionit midis Aleatëve, ka bërë trajnime dhe po punon me vendet e tjera për të ndërtuar kapacitetin e tyre për t'u përballur me kërcënime të tilla. Shumë aleatë gjithashtu po punojnë ngushtë me vendet e Ballkanit Perëndimor për të adresuar këtë çështje. NATO ka një rol për të luajtur në luftën kundër terrorizmit dhe për të ndihmuar në ndërtimin e stabilitetit në komunitetin tonë. Ne e bëjmë këtë nëpërmjet misioneve tona në Ballkan dhe Afganistan.

9. Mali i Zi është antari më i ri i Aleancës dhe gjithashtu një prej fqinjve të Shqipërisë. Ç'mendim keni për hyrjen e Malit të Zi në NATO. Si e përforcon kjo gjë sigurinë rajonale?

Anëtarësimi i Malit të Zi në NATO është më shumë sesa një anëtar më shumë. Bëhet fjalë për zgjerimin e familjes së shteteve demokratike që duan të mbrojnë sigurinë tonë të përbashkët. Anëtarësimi i Malit të Zi do të ndihmojë në konsolidimin e stabilitetit dhe sigurisë në Ballkan. Është krejt evidente.

Megjithëse Forcat e Armatosura të Malit të Zi nuk janë shumë të mëdha, ato kontribuan në Forcën tonë të Sigurisë Ndërkombëtare në Afganistan dhe vazhdojnë të jenë të përfshirë në Misionin Mbështetës të Përhershëm për të trajnuar, këshilluar dhe ndihmuar Forcat dhe qeverinë afgane duke ofruar trupa dhe fonde.

Mali i Zi gjithashtu luan një rol pozitiv në rritjen e sigurisë rajonale dhe globale: në Ballkanin Perëndimor, në Afrikën Perëndimore dhe përmes pjesëmarrjes së tyre për mbrojtjen e qarkullimit të lirë të mallrave botërore në det të hapur pranë brigjeve të Somalisë. Përveç misioneve, Mali i Zi ka marrë pjesë gjithashtu në shumë stërvitje.

Vendet në rajon që i janë bashkuar Aleancës janë bërë promotorë të stabilitetit në Ballkan dhe më gjerë.

Mali i Zi tashmë jep kontribut të vlefshëm për sigurinë ndërkombëtare.

10. Së shpejti, në shtator, MCC do të organizohet në Tiranë, cili do të jetë qëllimi i kësaj konference?

Shefat e Mbrojtjes do të diskutojnë për zbatimin e mëtejshëm të konceptit të Projektimit të Stabilitetit, situatën e sigurisë në rajonin e Ballkanit Perëndimor, si dhe do të japin rekomandime për rrugën përpara për Misionin Mbështetës të Përhershëm në Afganistan dhe Forcën e Kosovës (KFOR). Shefat e Mbrojtjes (CHoDs) do të shkëmbejnë pikëpamje mbi Përshtatjen e NATO dhe do të informohen mbi statusin aktual të rishikimit të Strukturës së Komandës së NATO. Së fundmi, ata do të zgjedhin kryetarin e ardhshëm të Komitetit Ushtarak të NATO, i cili do të marrë detyrën në verën e vitit 2018.

Gjatë sesionit të tyre të parë, shefat e Mbrojtjes do të diskutojnë për konceptin e Projektimit të Stabilitetit, duke u fokusuar në përcaktimin e objektivave strategjikë afatshkurtër dhe afatgjatë. Ata do të shqyrtojnë progresin e angazhimit të NATO në luftën kundër terrorizmit, Iniciativën për Ndërtimin e Kapaciteteve të Mbrojtjes, Trajnimin dhe Ngritjen e Kapaciteteve të NATO në Irak, si dhe funksionimin e Qendrës për Jugun.

Përshtatja e NATO do të jetë fokusi i sesionit të dytë. Shefat e Mbrojtjes do të informohen nga të dy komandantët strategjikë, gjeneral Scaparrotti, komandanti Suprem i Forcave Aleate në Evropë dhe gjeneral Mercier, komandanti Suprem i Aleancës për Transformimin. Komandantët strategjikë do të japin detaje të mëtejshme mbi progresin e bërë nga të dy komandat. Përpara takimit të ministrave të Mbrojtjes në nëntor, shefat e Mbrojtjes do të ofrojnë udhëzime shtesë mbi rishikimin e strukturës së Komandës së NATO, si dhe rrugën më të drejtë për t’i sjellë koherencë më të madhe punës në drejtime të vazhdueshme dhe të ndryshme.

Sesioni i tretë do të përqëndrohet në Misionin Mbështetës të Përhershëm dhe KFOR. Shefat e Mbrojtjes do të informohen nga komandanti Mbështetës i Përhershëm, gjenerali Nicholson dhe përfaqësuesi i Lartë Civil, ambasadori Cornelius Zimmermann në Afganistan, ndërsa komandanti i KFOR, gjeneralmajor Fungo do të bëjë një përmbledhje të shkurtër për Kosovën. Shefat e Mbrojtjes do të ofrojnë rekomandime për të dy misionet duke marrë parasysh situatën e sigurisë në terren.

Në sesionin e tyre të fundit, shefat e Mbrojtjes do të zgjedhin kryetarin e ardhshëm të Komitetit Ushtarak, i cili do të marrë detyrën në vitin 2018.




Apliko tani! Bëhuni pjesë e FA 16 tetor 2023 - 09 janar 2024 Nisin rekrutimet për ushtarë/detarë në Forcat e Armatosura, Ministria e Mbrojtjes e konsideron thelbësore për Forcat e Armatosura rekrutimin e ushtarëve me një profil sa më të lartë, në kushtet e një profesionalizmi....
Vijnë në Shqipëri helikopterët e parë Black Hawk Janar 2024 Kanë mbërritur në Shqipëri dy helikopterët Black Hawk, si pjesë e parë e porosisë së bërë nga vendi ynë dhe mbështetur nga fondet e ndihmës...
Direktiva e Mbrojtjes 2024Janar 2024 Dokumenti bazë mbi planet dhe programet e punës e të veprimtarive të MM, të FA në përmbushje të misionit kushtetues, si dhe detyrimeve si vend anëtar i NATO...
11 vende të lira pune; Peleshi thirrje ekspertëve: Aplikoni! Janar 2024 Ministri i Mbrojtjes Niko Peleshi ka bërë thirrje për aplikime nga ekspertët e fushave të Teknologjisë së Informacionit dhe Inxhinierisë për 11 vende të reja pune në Qendrën e....
Përurohen mjediset e reja të Muzeut të Forcave të Armatosura Dhjetor 2023 Muzeu i Forcave të Armatosura do të jetë tashmë në mjediset e tij të reja në Bërzhitë. Në ceremoninë e inaugurimit të hapësirave të reja morën pjesë ministri i Mbrojtjes Niko Peleshi, ministri për Evropën dhe Punët e Jashtme Igli Hasani...
Ministeriali i Mbrojtjes së Nismës SHBA-Karta e Atlantikut Nëntor 2023 Në takimin e Ministrave të Mbrojtjes të vendeve të NATO-s në Bruksel, ministri i Mbrojtjes Niko Peleshi mes të tjerave vuri theksin mbi zhvillimet në Veri të Kosovës....
Ministeriali i Mbrojtjes i vendeve të NATO, Bruksel Tetor 2023 Në takimin e Ministrave të Mbrojtjes të vendeve të NATO-s në Bruksel, ministri i Mbrojtjes Niko Peleshi mes të tjerave vuri theksin mbi zhvillimet në Veri të Kosovës....
Shqipëria merr sërish drejtimin e Brigadës së Europës Juglindore Gusht 2023 Ministri i Mbrojtjes, Niko Peleshi ka bërë me dije me anë të një postimi në mediat sociale që nga sot Shqipëria merr drejtimin e Brigadës së Europës Juglindore (SEEBRIG)....
Përmbyllet “Defender Europe ’23” në Shqipëri Qershor 2023 Për mëse një muaj mbi 24 mijë trupa nga 26 vende NATO e partnere nëpërmjet skenarëve strategjikë e operacionale në tokë, ajër e det demonstruan fuqinë në...
Revista Mbrojtja Nr. 01 (2024) Janar 2024Numri i fundit i revistës "Mbrojtja"...
Gazeta Ushtria 08 mars 2024Numri i fundit i të përjavshmes gazeta "Ushtria"...






Arkivi Lajmeve
Mars 2024
Ma En Pr Sh Di
26 27 28 29 1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31