Forcat e Armatosura po vijojnë nga Vlora deri në Ksamil operacionin për pastrimin e territorit, i cili veç pastrimit, qëllim kryesor ka sensibilizimin e qytetarëve dhe bizneseve, që të mbajnë pastër mjedisin.
Zëvendësministri i Mbrojtjes z. Petro Koçi ka inspektuar përgjatë aksit rrugor Himarë-Borsh, punën e efektivëve të batalionit “Komando”, të angazhuar në këtë operacion.
Z. Koçi përgëzoi efektivët për përkushtimin dhe sakrificën e tyre, dhe u njoh me planin e operacionit të pastrimit.
Ai shprehu keqardhje për ndotjen e mjedisit në Shqipëri, të cilën ai e konsideroi si emergjente. “Fatkeqësisht ndotja e mjedisit mbetet një emergjencë aktive në Shqipëri, kjo edhe për shkak të një ndërgjegje shumë të ulët shoqërore që kanë qytetarët tanë, sidomos ata që lëvizin me mjete në rrugët e Republikës sonë. Dua t’i shpreh mirënjohjen dhe vlerësimin çdo njeriu me uniformë që është angazhuar në këto ditë pushimesh për të tjerët, për të punuar në mënyrë që ky operacion të zbatohet me sukses, por kjo gjendje "bëj pis se pastron ushtria" nuk mund të vazhdojë pa fund.” – theksoi zëvendësministri Koçi, i cili kishte një mesazh edhe për organet e pushtetit vendor. “Dua t’i bëj thirrje organeve të pushtetit vendor që të jenë më bashkëpunuese me FA në zbatimin e këtij operacioni. Ky bashkëpunim është shumë domethënës për realizimin me sukses të të gjithë aksionit.”
Në operacionin e nisur për shkak emergjencës mjedisore, janë angazhuar efektivë nga pothuajse të gjitha njësitë, strukturat dhe repartet e Forcave të Armatosura. Gjithashtu në këtë operacion janë përdorur edhe mjete të rënda të FA për zhvendosjen e thasëve të mbushur me mbeturina.
Operacioni i Forcave të Armatosura për pastrimin e rivierës shqiptare, për sezonin turistik veror, për vitin 2016, do të vijojë përgjatë gjithë muajit gusht.
© Ministria e Mbrojtjes 2024 - Të gjitha të drejtat e rezervuara.