Në kuadër të stërvitjes së përbashkët ndërmjet FA të Shqipërisë dhe FA të Mbretërisë së Bashkuar u zhvillua sot “Dita e Vizitorëve të Shquar” të stërvitjes “Ushtar Eagle 17”.
Të pranishëm në këtë ceremoni ishin presidenti i Republikës, njëkohësisht komandant i Përgjithshëm i Forcave të Armatosura z. Ilir Meta, shefi i Shtabit të Përgjithshëm i FA gjeneral brigade Bardhyl Kollçaku, shefi i Shtabit të Mbrojtjes të Mbretërisë së Bashkuar gjeneral Sir Stuart William Peach, ambasadori i Mbretërisë së Bashkuar në Shqipëri Duncan Norman, gjeneralë dhe ushtarakë të tjerë të nga MM dhe FA.
Në fjalën e tij shefi i Shtabit të Mbrojtjes të Mbretërisë së Bashkuar, gjeneral Sir Stuart William Peach çmoi bashkëpunimin me Shqipërinë, duke e vlerësuar si një anëtare të denjë të NATO. “Ne kemi ecur së bashku me eskperiencat tona ushtarake në NATO. E di se do të punojmë së bashku në të ardhmen. Unë kam bindjen si shefi i Shtabit së Mbretërisë së Bashkuar që e ardhmja jonë është shumë më e sigurtë si rezultat i kësaj Aleance. NATO, mbetet lidhja vitale që mundëson sigurinë në vendin tonë”.
Nga ana e tij shefi i Shtabit të Përgjithshëm të FA, gjeneral brigade Bardhyl Kollçaku e vuri theksin te forcimi i këtij bashkëpunimi në funksion të paqes dhe sigurisë. “Ky është demonstrim i bashkëpunimit të shkëlqyer që kemi midis FA të Mbretërisë së Bashkuar dhe FA të RSH, dhe sigurinë se ky bashkëpunim do të shtrihet dhe do të vazhdojë akoma më shumë edhe në të ardhmen në interes të paqes, sigurisë jo vetëm në vendet tona, por edhe në rajon edhe më gjerë. Ne jetojmë në një mjedis që praktikuesit e sigurisë e përcaktojnë si vulnerabël, të paparashikuar, kompleks dhe të paqartë, megjithëse jetojmë në një sistem ndërkombëtar, ku shtetet duhen të jenë aktorët e vetëm kryesorë, por në realitet ajo që konstatojmë është rritja në disa raste e frikshme e rolit të aktorit jo shtetëror. Një mjedis me aktorë të tillë, na ka ekspozuar të gjithëve njësoj përballë rreziqesh dhe kërcënimesh, që mesa duket asnjë shtet nuk e ka të lehtë t’i përballojë i vetëm, aq më pak vende të vogla si Shqipëria”.
Duke folur për sfidat e reja të sigurisë, gjeneral brigade Kollçaku tregoi se kjo stërvitje është një arsye më shumë për të na bërë të vendosur për të vijuar në rrugën tonë të bashkëpunimit me Mbretërinë e Bashkuar në fushën ushtarake, por jo vetëm, si mundësia më e mirë e ruajtjes së paqes dhe sigurisë.
Stërvitja “Ushtari Eagle 17” ka për qëllim ruajtjen e instalimeve apo bazave ushtarake, mbështetjen për operacionet ajrore dhe detare që lidhen me zonën e ulje-taktike, perfeksionimin e aftësive të patrullimit, kryerjen e veprimeve që kanë të bëjnë me operacionet e stabilizimit; është në fakt mënyra më e mirë për t’u përgatitur për karakteirn e ndryshueshëm të veprimeve në zonën e operacioneve.
Kjo stërvitje e cila ka nisur më 04 shtator 2017, zhvillohet në kuadër të bashkëpunimit dypalësh me Mbretërinë e Bashkuar dhe do të vijojë deri më datën 28 shtator 2017, në bazën detare të Kepit të Palit, Rajonin Stërvitor të Bizës, Bazën Ajrore të Kuçovës dhe në Batalionin III të Këmbësorisë në Poshnje.
Më pas dy ushtarakët e lartë u zhvendosën në rajonin stërvitor të Bizës, ku përuruan memorialin kushtuar ushtarëve britanikë të rënë në vendin tonë. Ushtarët britanikë humbën jetën në një fluturim gjatë operacioneve mbështetëse në Shqipëri më 29 nëntor 1944.
© Ministria e Mbrojtjes 2024 - Të gjitha të drejtat e rezervuara.