Newsroom 106 - Vjetori i Krijimit të FA, Xhaçka: Së shpejti në misione paqeruajtëse edhe nën ombrellën e OKB
Në 106 - Vjetorin e Krijimit të Forcave të Armatosura, një kontingjent me 66 ushtarakë shqiptarë u përcoll për në misionin e NATO në Afganistan, Resolute Support.
Kontingjenti i radhës përbëhet nga një kompani, e cila përfshin dy toga të Batalionit Komando dhe Batalionit të Tretë të Këmbësorisë së Poshnjes (b3k). Në përcjelljen e trupave për në Afganistan morën pjesë ministrja e Mbrojtjes Olta Xhaçka, shefi i Shtabit të Përgjithshëm të FA gjeneral brigade Bardhyl Kollçaku, ambasadori i Turqisë në vendin tonë Murat Ahmet Yörük, komandantët e forcave dhe familjarët e efektivëve që u nisën në mision.
Ministrja Xhaçka uroi ushtarakët shqiptarë për 106 - Vjetorin e Krijimit të Forcave të Armatosura dhe kujtoi Ismail Qemalin burrin e madh të kombit shqiptar, i cili një nga dekretet e para dhe ndër më të rëndësishmit që firmosi, ishte krijimi i Ministrisë së Luftës më 4 dhjetor 1912.
Nisjen e trupave për në Afganistan, ministrja Xhaçka e konsideroi koincidencë shumë të bukur duke e quajtur “Kontingjenti i 106 - Vjetorit të Krijimit të Forcave të Armatosura”.
Ministrja Xhaçka vlerësoi kontributin e trupave shqiptare në misionet jashtë vendit, si dhe njoftoi angazhime të tjera ndërkombëtare për Forcat tona të Armatosura. “Përfaqësimi në këto misione është shndërruar tashmë në simbolin e profesionalizmit dhe të përkushtimit të ushtarakëve tanë. Përkushtimi, përgjegjshmëria dhe profesionalizmi i tyre është demonstruar në marrjen përsipër dhe kryerjen e detyrave me rrezikshmëri të lartë në bashkëpunim me trupat aleate, për të cilat unë personalisht kam marrë vlerësime maksimale dhe të merituara prej personaliteteve më të larta ushtarake dhe politike të Aleancës gjatë vizitave në teatrot e operacioneve, por edhe në takime të nivelit të lartë të NATO.
Ne jemi prezent në Afganistan, ku për herë të parë këtë vit forcat tona speciale po trajnojnë forcat speciale afgane. Njëherësh jemi kontribues edhe në Mali, Kosovë, Bosnje Hercegovinë, Letoni dhe së shpejti do të fillojmë angazhimet nën ombrellën e Organizatës së Kombeve të Bashkuara. Djemtë tanë të Forcës vijojnë operacionet duke shpëtuar çdo muaj dhjetëra jetë njerëzish në detin Egje.”- u shpreh ministrja Xhaçka.
Nga ana e tij ambasadori i Turqisë në vendin tonë uroi njëkohësisht 106 - Vjetorin e Pavarësisë dhe Krijimit të Forcave të Armatosura, vlerësoi kontributin e vazhdueshëm të trupave shqiptarë nën komandën turke, por dhe bashkëpunimin mes Shqipërisë dhe Turqisë, sidomos në fushën e Mbrojtjes.
Në përfundim, ministrja e Mbrojtjes Olta Xhaçka i dorëzoi Flamurin Kombëtar komandantit të Kontingjentit, major Kreshnik Bunguri.
Kontingjenti shqiptar do të shërbejë në Aeroportin Ndërkombëtar të Kabulit për një periudhë 6 - mujore, nën komandën e Forcave të Armatosura të Turqisë.
Gjithashtu, me rastin e 106 - Vjetorit të Krijimit të Forcave të Armatosura, në garnizonin “Skënderbej” u zhvilluan edhe disa aktivitetet të tjera.
Në Muzeun e Forcave të Armatosura u çel ekspozita fotografike për ministrin e parë të Mbrojtjes të Shqipërisë, Mehmet Pashë Dërralla, i cili ka edhe 175-vjetorin e lindjes.
Gjithashtu, Arkivi i Forcave të Armatosura dhe Drejtoria e Përgjithshme e Arkivave ekspozuan disa fotografi dhe dokumente të papublikuara më parë, të viteve të para të krijimit të Forcave të Armatosura.
Në mjediset e tjera të garnizonit u zhvilluan disa aktivitete sportive, ku mori pjesë edhe ministrja Xhaçka.
VIDEO:
