Ministrja e Mbrojtjes, Olta Xhaçka u nis për në Londër, ku do te marre pjesë, si pjesë e delegacionit zyrtar shqiptar, në Samitin e NATO që mbahet në kryeqytetin britanik në datat 3 dhe 4 dhjetor.
Menjëherë pas përfundimit te punimeve të Samitit, ministrja Xhacka do të kthehet në Tiranë, ndërkohë që po ruan komunikim të vazhdueshëm me Agjencinë Kombëtare të Mbrojtjes Civile për menaxhimin e situatës pas tërmetit te 26 nëntorit.
Aktualisht, 1,26% e Prodhimit të Brendshëm Bruto (GDP) i është dedikuar Mbrojtjes dhe 14,42% e fondit për mbrojtjen përdoret për modernizimin e Forcës së Armatosur.
Siç mund të shihet edhe në listën e publikuar në faqen zyrtare të NATO, Shqipëria ka një përqindje më të lartë të buxhetit, krahasuar me vendet më të zhvilluara e me kontribut më të gjatë në Aleancë.
Buxheti dedikuar Mbrojtjes, që prej vitit 2014, kur është marrë zotimi në Samitin e Wellsit ka pësuar një trend konsistent, duke ndaluar rënien dhe filluar rritjen. Prej vitit 2017 qeveria ka miratuar planin kombëtar për të respektuar investimet në sektorin e Mbrojtjes. Ky plan përcakton zotimin politik dhe financiar, në të njëjtën frymë me zotimin e Wellsit, që në vitin 2024, Shqipëria të arrijë 2% te GDP për Mbrojtjen.
© Ministria e Mbrojtjes 2024 - Të gjitha të drejtat e rezervuara.