Në prag të fundit të vitit, Forcat e Armatosura kanë përzgjedhur nënoficerët më të dalluar të dymbëdhjetë muajve të fundit.
Tre nënoficerët më të mirë të vitit 2019, vijnë nga forca të ndryshme dhe përfaqësojnë ushtarakët më të spikatur në Forcat e Armatosura.
Edhe këtë fund viti, Shtabi i Përgjithshëm i Forcave të Armatosura vijoi traditën duke organizuar një ceremoni për shpalljen e nënoficerit të vitit, ku morën pjesë shefi i Shtabit gjeneral brigade Bardhyl Kollçaku, komandantë të forcave dhe nënoficerë nga të gjitha forcat dhe komandat e FA.
Shefi i Shtabit të Përgjithshëm të FA gjeneral brigade Bardhyl Kollçaku vlerësoi arritjet e Forcave të Armatosura përgjatë vitit 2019 dhe veçanërisht rolin e nënoficerëve gjatë emergjencave civile. “Viti 2019 ka qenë një vit me shumë angazhime në operacione, në misione të NATO-s, në stërvitjet, në certifikimet, në emergjencat civile që kanë qenë jo të pakta, në zjarre, në përmbytje, por edhe në emergjencat e fundit të tërmetit të shtatorit dhe të nëntorit të 2019-s. Asgjë nuk do të ishte njëlloj pa angazhimin, kontributin dhe profesionalizmin tuaj, ju keni shkëlqyer që në momentet e para që u dha sinjali i kushtrimit në të gjitha angazhimet për kërkim –shpëtim, për transportin e të sëmurëve, për dhënien e ndihmës së parë, për ngritjen e fushimeve, për transportin e popullsisë, për transportin e materialeve, për koordinatorët e huaj që erdhën grupet e kërkim shpëtimit. Gjithandej ka qenë dora, djersa dhe angazhimi i juaj, ndaj unë the që ne jemi këta që jemi në sajë të punës dhe kontributit tuaj.”- u shpreh shefi i Shtabit, ndërkohë që nënvizoi edhe rëndësinë e procesit të përzgjedhjes në çdo forcë apo komandë të FA.
Nënoficeri më i mirë I vitit 2019 u shpall rreshter Egnat Kulli nga Forca Tokësore. Në vendin e dytë u rendit nëntetar Ardian Seitaj nga Komanda Mbështetëse, ndërsa në të tretin rreshter Julian Shaban nga Komanda e Doktrinës dhe Stërvitjes.
Shpallja e nënoficerëve më të mirë të vitit, u bë pas një procesi transparent, konkurrimi dhe vlerësimi.
VIDEO
